كنت عايزة اقول

كيف يفعلونها .. لا أعرف
اكره السفر .. مش السفر نفسه ولكن كل المشاعر المتعلقة بالسفر
انك تنزع جدورك من مكان ومن قلب ناس عشان تزرعهم في مكان تاني جوا ناس تانية
وبعدين تقرر بعد فترة انك تنزع نفسك تاني عشان تتزرع في مكان تاني

وتحس ان الدنيا ماشية كده ناس كتير بتتزرع جواك وناس بتقلع نفسها من قلبك من غير ما يكون لك رأي في الموضوع

من كام ساعة بس .. وصلتها للمطار .. راحت أبعد مكان في الدنيا
ومعرفتش اقولها انها رغم انها زوجة دلوقتي .. لكن بالنسبة لسه العيلة الصغيرة اللي كانت لابسة الدريل الكحلي وعندها تلات سنين
وشعرها ناعم وطويل ,, وماسكة في إيدي وعنينها بتلمع

لسه العيلة الصغيرة اللي كنت بتحايل على ماما اخدها وانزل بيها ولما وقعت وكسرت سنتها كانت أول مرة قلبي ينخلع بجد

كنت عايزة اقولها انها هتنساني بعد كام سنة .. وان وجودي في حياتها هيبقى هامشي جدا وده شيء طبيعي
بس مقدرتش ..
كل اللي عرفت اقوله لها وهي في حضني وبتبكي ان اللي عايز حاجة بيعملها وان اللي عايز ما ينساش حد بيفضل مرتبط بيه طول عمره

بس انا كنت بكدب عليها ...

عشان كده مقدرتش اقول كل حاجة عايزة اقولها لها ..مالحقتش ..
كنت عايزة اقولها ماتزعليش اني كتير كنت ببقى متسلطة جدا
عشان كنت بمارس امومتي معاها من غير ما اقولها

كمان

كنت عايزة اقولها اني زعلانة جدا منها

لما حد ياخد جزء منك ويرحل من غير ما يستأذنك .. حد ماشي ومعاه جزء من طفولتك ومراهقتك وذكرياتك ولحظات الفرح والحزن والجنون والاسرار ,,,, حد بياخد حتة منك ويمشي ... مش هتزعل؟

كنت عايزة اقولها انها بالنسبة لسه العيلة الصغيرة ام 3 سنين
ودريل كحلي
وشعر ناعم
وسنة مكسورة
خالعة قلبي

لن اكتب

ماذا أكتب إليك؟
وما نفع الكلام
بنينا به قصورا في الهواء
وبيتا من الاحلام

على مقعدي الأثير
في ذلك المقهى القديم
الهارب من صخب الأيام
أنزف أحلاما
وانتظر ..

وأنت تأتي
ولا تأتي أبدا
وفي التمني
انتهاك للروح
لا تهتكه الأقلام

ونعاود أملا
وكوبين من القهوة
وطاولة من حلم
ممتدة بيننا

تعذيب ترفيهي

ساقتني الاقدار ... بالغصب وبالاجبار
لمشاهدة تلك التوليفة
اللي عاملة زي السلطة من غير خيار
وهي بعيد عنكم وعن السامعين والقارئين والمبلوجيين
عمر وسلمي
لابن مصر البار
الهارب من الجندية ومزور الشهادات العسكرية
تامر حوووووسني
وفاتنة الشاشة الركيكة
التي تختصر التمثيل في زم الشفايف
عقد شعرها بوني تيل
خريجة معهد التنهدات قسم دموع وآهات
مي عز الطين

طبعا قبل ما اي حد من القارئين تسول له نفسه ان يقولها لي .. انا هاقولها لنفسي .. انا اللي استاهل كل اللي يجرالي
ولكن يعلم الله اني شاهدته مجبرة لاسباب لا مجال لذكرها الآن
.
.
كان يجب أن اتوقع ما انا مقبلة عليه
فمشاهدة فيلم لتامر نجم الجيل ورمز الشباب الوتني المسري امر معروفة عواقبه
ولكن ان يقتادك بعضهم لمشاهدة فيلم

من بطولة تامر حوسني
.
.
وتأليف تامر حوسني
.
.
وغناء تامر حوسني
.
.
وتشاركه الركة والركاكة
.
مي عز التين البرشومي اللي بكرهه
.
.
وان تبدأ أول لقطة في الفيلم بصوت
.
محطم قلوب العذارى
.
خبير العواتف
.
أسامة منير
.
.
فده كتييييييييييييييييييييييير
أوفر
أوفر
خالص بصراحة .....

.
للاسف تلك كانت الحقيقة المرة
الفيلم من بطولة وقصة وغناء تامر حسني .. والقصة عاطفية خالص من النوع الملزق تبدأ على صوت اسامة منير في عيد الحب
.
وهنا تحضرني بعض الالفاظ البذيئة التي لا استطيع نطقها
.
الفيلم تم سلقه في استعجال بمناسبة خروج نجم النجوم .. فخر الشباب المصري .. كفارة يا تامر
وهو بصراحة كنجم يعني لم يستخسر اي شيء في محبيه وعشاقه من البنات الأمامير والشباب الكووول من عشاقه ومحبيه
حيث قام الفنان المشهور طوال الفيلم باستعراض طقم كامل من (البوكسرز) بألوان مختلفة
واستعراض سعر صدره بمختلف الاوضاع مع التأكيد على شدة عضلات البطن وقوة عضلات الذراعين
.
كما قام بغناء نص اغاني الالبوم الجديد
بصراحة عداه العيب ...

كما ارتدت الست مي عس التين الكثير والكثير من الهدوم الموضة
واستعرض طاقم الممثلين في الفيلم مجموعة من السيارات الفارهة لتصوير حياة طلبة الجامعات في إطار من الواكعية الرومانسية
.
اي حد بعد كل المجهود ده يتجرأ ويسأل على القصة والسيناريو والحوار والحاجات الوحشة دي
هيعاقب بمشاهدة الفيلم
مع فصل تالتة تالت
مدرسة الزهراء الثانوية بنات

ألا أراكم الله يوما كهذا
سيظل علامة سوداء في تاريخ زياراتي للمدينة الأجمل في الدنيا
الاسكندرية
تلك الأنثى المجنونة
التي احبها

تماحيك..

بيان عام :
قرر مجموعة من البشر في يوم بساعته وتاريخه ان يعلنوا على الملأ انهم يتمحكون في الحياة .. بصورة يومية .. وهو أمر لا يتبرءون منه ابدا... ولم ينكروا ابدا انهم سعداء بهذا ولذلك قرروا ان يتشاركوا في هذه المساحة كي تظهر تماحيكهم للجميع

توقيع
السادة المتمحكون

مذنب أول
البنت دي اللي من هنا
مذنب تاني
الدكتور ده اللي تعدى الطبيعي

مذنب تالت
الدكتورة وردة زرقا

مذنب رابع
الواد مالكوم

مذنب خامس
اللي بيهاتي على العدالة
مذنب سادس
دكتور ونبي افريقي

مذنب سابع
واحد آسف

مذنب تامن

البنت نورا

مذنب تاسع
بتاع الكراكيب

مذنب عاشر
واحدة مكبره دماغها

مذنب حادي عشر
اخناتون العصر الحديث

مذنب ثاني عشر
اللي ساكن جنب القمر

مذنب تالت عشر
البنت توتا

المذنب الرابع عشر
صاحبة القهوة