أرونا صحيح الدين... الله يرضى عليكم

أرونا صحيح الدين احسن الحكاية بقت خَل خالص (بفتح الخاء) .....ومابقيتش فاهمة حاجة

الحكاية بتاعة الولدين اندرو وماريو وغيرهم ... المشكلة واحدة تقريبا .. واحد ابوه أسلم

.

.

طيب ماشي .. ربنا يوفقه .. حقه وحريته

.

ساب بيتهم من 7 سنين

.

وصحي من النوم فجأة قالك انا عايز العيال يهتدوا .!.!!!!!!؟!؟!؟!؟!ه

.

يبقوا مسلمين

.

ويمتحنوا دين اسلامي

.

.

في السنة الدراسية في نص السنة

.

والادارة التعليمية معندهاش مشكلة

.

كده ع السريع .. وبدون أي عواقب .. ولا مشاكل ابدا

والروتين اللي مكفر سيئاتنا اتحل .. مفيش موظف رذل ولا ورقة متأخرة.. ولا فوت علينا بكره ..

الورق خلص هوا والعيال فجأة بقوا مسلمين .. ده على اعتبار ان كل موظف شايف في الأمر نوع من الجهاد ؟ه

.

.

فيه كام نقطة غايظني جدا ومحشورين في زوري الحقيقة ..

بس الأول اقروا التدوينة دي عند نوارة بالتعليقات (عشان مهمة جدا هي كمان)

وثانيا اتفرجوا على الحلقة دي

http://freecopticvoice.com/fcv/video/androw-maruo-25-7-2007.wmv http://freecopticvoice.com/fcv/video/androw-maruo-25-7-2007-2.wmv

وسيبكوا من الموقع لاني معرفش عنه حاجة غير انه حمل الحلقة على الانترنت

وبعدين استرجعوا التدوينة دي من عند زنزانة

.

.

قريتوا .. ورجعتوا .. قصدي استرجعتوا .. تعالوا نتكلم بقى

..

عندي أولا شوية أسئلة وملحوطات واستحملوني:

1- كيف يجبر إنسان على اعتناق دين بينما تربى على دين آخر في حضانة أمه لمدة 13 سنة؟

يعني العيال دي مسيحيين بقالهم 13 سنة .. وابوهم عمدهم وراح معاهم الكنيسة كمان .. وبعدين فجأة اتخانق مع الولية وبعدين قرر يسلم (لأي سبب الله اعلم ولا نفتش في النوايا .. يعني كان بيهرب او شاف انه اهتدى للطريق الصحيح أو كان بيعند الله اعلم )

رايح سايب لها البيت 7 سنين وبعدين فوجائي فوجائي كده يقولك لأ هاتولي العيال تسلم دلوقتي ..

وإذ فوجائي فوجائي برضه كل العواقب والعوائق تسخر لخدمة هذا الأب المهتدي .. كما لو كان ممسكا بعصى سحرية تبيد الروتين أقوى من قدرة فيري على إبادة الدهون .. واللمعان مضمون ؟؟

.

2- أين النص في الاسلام الذي يتناول التبعية الدينية للابناء؟ (سؤال بجد وعايزة إجابة مباشرة)ه

.

3- وان وجد هل يطبق على الطفل الذي يسلم والده قبل ولادته أم على اي ابن يسلم والده في اي مرحلة من مراحل عمره ؟

يعني لو عنده 15وابوه راح اسلم والولد مسيحي نفس الحل؟

طيب الواد الغلبان اللي كان وائل الابراشي جايبه الاسبوع اللي فات .. ابوه اسلم وساب البيت وهو عنده 13 سنة .. وما يعرفش عنه حاجة من ساعتها وهو في العشرينات تقريبا من عمره .. طول عمره مسيحي آهه .. والحمد لله امتحن ونجح ..

فجأة الواد راح يعمل بطاقة رقم قومي .. قالوله لأ يا عوووووومر ما ينفعش .. انت مسلم

طيب ازاي ياعم الحاج .. ما هو معاه بطاقة قديمة بتقول في خانة الديانة (منها لله بقى) مسيحي .. والمدير اللوزعي في إدارة السجق المدني اداله شهادتين ميلاد واحدة مسيحي وواحدة مسلم .. (عشان يبقى يغير فيهم)ه

وفجأة وهو بعد 25 سنة تقريبا ويمكن اكتر .. الحكومة بتقول له انت مسلم يا حلاوة .. وشيخ الأزهر الاسبق يقول له (انت مسلم غصب عن عينك وعين ابوك) واللي خلفوك (وهو الكلام اللي قاله الراجل بالحرف) يعني صلي بالعافية، صوم رمضان بالعافية وكل حاجة بالعافية .. ولكن خلي بالك (لا إكراه في الدين) ... والعكس لا يمكن يحصل ابدا بالقانون والشرع ..

.

.

4- على يتعين على الطفل البقاء مسلم (زورا) أو (تقضية) زي ما نوراة سميتها حتى يتم 16 سنة ثم يرفض الاسلام علنا؟ وفي هذه الحال يحاكم كمرتد ؟؟؟

يا حلاوة يا حلاوة .. يعني الأخوة الافاضل خبراء الشرع والقانون يطالبون أم ماريو واندرو ومن هم في مثل حالتهم .. أن يعلموا أولادهن الكذب والتزوير والنفاق والرياء .. يضحكوا على الناس والقانون وربنا .. ثم تحاسبهم الدولة على ذلك .. وكله بالقانون .. يا آه يا آه

.

.

5- السيدة الفاضلة سعاد صالح قالت على العاشرة مساء .. هو ده القانون والشرع هنعمل ايه بقى الابن يتبع دين ابوه واستحملوا السنتين دول .. ولما سألتها منى هل يطبق القانون في حالة العكس .. يعني لو الأب مسلم واعتنق المسيحية والام مسلمة ..ٌ

قالتها لأ وسكتت

(طبعا كانت هتقول ... لأ طبعا في الحالة دي الأب هينضرب بالجزمة ويترمي في السجن ويخرس خالص مش كفاية كافر وبهدل الأم المسلمة المؤمنة المسكينة) ما هو ده القانون وهو ده الشرع ..ُ

.

(يجي اي حد نايم في مية البطيخ يقوللي مواطنة وحقوق وقرف .. هسكعه على عينه ...

.

.

7- الحديث التالي عامل لي بارومة في نافوخي (والكلام للاخوة المعتدلين المتنورين وهما عارفين نفسهم كويس وهما دول اللي انا مستنية اسمع منهم بجد) .. (كل مولود يولد على الفطرة، فأبواه يهودانه أو ينصرانه أو يمجسانه)

فيه كام نقطة في الحديث ده : أولا: يعني ايه الفطرة؟ وهل الفطرة هي الاسلام؟ يعني كل بني آدم في كل الكون بيتولد مسلم وبعدين أهله بيقلوا عقلهم ويكفروه ؟؟ ولا بيتخبطوا في دماغهم ويغيروله فيوزاته .. ويقلبوا فطرته؟؟؟

-طيب هل ساوى الاسلام هنا بين اليهودية والمسيحية والمجوسية؟؟ هو مش المفروض المسيحية واليهودية بالنسبة للاسلام اديان سماوية برضه؟ والمجوس دول على ما اسمع يعني .. بعيد عنكوا وعن السامعين كفرة وعبدة اوثان؟؟؟

.

.

8- فين صحيح الدين في الموضوع .. في القضية دي كلها ؟؟؟؟ ُ

يعني في الحلقة وفي التعليقات عند نوارة وكلام المتخصصين وغيرهم .. واحد يقول لك هو ده الشرع وده القانون

والتاني (خبير برضه) يقولك لأ .. ده لا شرع ولا قانون

طيب واحدة زي حالاتي .. تحتكم لمين يعني؟؟ مين الصح؟؟ يعني الست سعاد والشيخ بتاع الأزهر قالوا مش هتنزل الارض ابدا .. مسلم .. مسلم .. ومحامين وخبراء قانون تانيين قالوا لأ تنزل .. ده حرام الافترا .. لا اكراه في الدين .. سيبوهم لحد ما يبلغوا ويقرروا ... مين يحكم لنا في المسألة دي؟؟؟

.

9- بعض التعليقات على البرنامج وعند نواره لفتوا نظري جدا::

واحدة ست مصرية اتصلت بالبرنامج ومعترضة على بقاء الطفلين مسيحيين وقالت بالحرف الواحد (أمهم بتبث فيهم الافكار المسيحية) ده على اعتبار يا حاجة ان الافكار المسيحية سموم بتبث في نفوس الاطفال المساكين.. وهو كان المفروض وهي مسيحية وابوهم مسيحي واهلهم كلهم مسيحيين .. تقول للعيال تعالوا يا حبايبي احكيلكوا عن الاسلام .... ؟ه

-ناس كتير علقت عند نواره بداية من اللي مقتنع واللي مش عاجبه .. واللي مقتنع بس مش عايز يقول .. واللي بيقول اي كلام والسلام ويلخبط عيشة على أم الخير.. ويقولك هو كده القانون عشان المسيحيين وحشين وبيكرهوا المسلمين والمواقع بتاعة مش عارف ايه .. والمسيحيين الشريرين اللي زعلانين من الغزو العربي .. يعني هو ده بقى العدل .. هو ده القانون بتاعنا ان كان عاجب ابوكوا .. ولو مش عاجبكوا روحوا موتوا ولا سيبوا البلد .. يا أقباط متحدين مع مش عارف مين .. ايه علاقة اي حاجة من دول بالكلام اللي اتقال اصلا ؟؟

وتعليق أخير:: لماذا يجب أن التزم بما لا اعتقد فيه؟ ان كان المسلمون يؤمنون بان الاسلام هو دين الفطرة .. لماذا يسعون لتطبيق ذات الأمر علي الاخرين؟؟؟؟ لماذا يتعين علي ان التزم بما لا أؤمن به .. قد يكون الاسلام هو دين الفطرة لدى المسلم .. لكن بالنسبة لي ليس كذلك .. فلماذا يتعاملون مع الأمر بصورة مطلقة ؟ لماذا لا يفكرون من خارج الدائرة المغلقة؟ لماذا لا يفعل الجميع ذلك؟

مجرد سؤال ممزوج بالكثير من المرارة

ملحوظة: أي تعليقات خارج إطار الموضوع سيتم حزفها بديكتاتورية مطلقة .. بينما لن يتم حذف الشتيمة

يسير على درب السلام بأستيكة

يبدو أن عالمنا يتجه بالتدريج باتجاه الاسوأ .. وتلوح نهاية محتومة وان اختلفنا على الاسباب
فهناك من يتكهن بان الحرب العالمية المقبلة ستكون على المياه
وآخر يقول انها ستكون صراع حضارات بين الشرق والغرب
وآخر يؤكد على انها ستكون حرب أديان
والجديد هو صراع الطوائف ... كما لو أننا لدينا متسعا يكفي لصراع آخر ...

لم يرق لي البابا بندكت السادس عشر منذ البداية .. لا لشيء إلا اني لم اشعر بارتياح تجاهه تأكد بعد كل تصريح أو تصرف علني يقوم به

ولن أناقش هنا مسائل عقائدية أو روحية أو طقسية إلخ ...
فقط السياسة الخارجية..للكنيسة الدولة ..
قرأت الكثير عن البابا يوحنا بولس الثاني .. الرجل الذي حاز على محبة واحترام الجميع ..

لطالما احترمت رغبته القوية في السلام .. وانه كرس نفسه لخدمة الرسالة التي رأى أن العالم في أمس الحاجة إليها .. رسالة السلام ... لم الشمل بين البشر

فلدينا من التفرقة والفرقة والصراعات والخلافات والاختلافات ما يكفي

حاول الرجل طوال حياته في ان يرأب صدوع شقها التاريخ بين البشر .. رأى في منصبه ونفوذه أداة يمكن أن يقدم بها القليل .. وكان هذا القليل كافيا لان يذكره التاريخ ويبحث عمن يكمل رسالته

البابا يوحنا واليهود:
كان هذا هو موقف الفاتيكات الرسمي من اليهود لفترة طويلة
"خطيئة الشعب الذي رفض المسيح وعذَّبه تزداد جيلاً بعد جيل، وتحكم على كل فرد من أفراده بالعبودية الدائمة"

وتلك كانت كلمات البابا بيوس لهرتزل (لم يعترف اليهود بسيدنا، ولذلك لا نستطيع أن نعترف بالشعب اليهودي، )

وحاول الفاتيكان في عهد البابا يوحنا كسر جمود العلاقة بين الفاتيكان واليهود
رغم ما كان لهذا من أثر على موقف الفاتيكان من القضية الفلسطينية ..حيث التزمت حيالها الصمت في عهده بينما كان الفاتيكان سابقا رافضا تماما لفكرة إقامة وطن لليهود في فلسطين
إلا انه بقى على موقفه الرافض لاحتلال العراق والحصار على ليبيا
كان أول من صلى أمام هيكل يهودي في اعلان لاحترام قدسية اماكن العبادة على اختلافها

البابا والشيوعية والعلمانية:
حاول البابا يوحنا مد جسور الثقة إلى الدول الشيوعية ذات الاتجاه العلماني تمثلت في زياراته وعلاقته بالولايات المتحدة

البابا والمسيحيين:
كان البابا أول بابا فاتيكان يدخل كنيسة بروتستانتية
وأول بابا كاثوليكي يزور مصر حيث أقام قداسا ضخما ضم ممثلو الطوائف المسيحية فيما وصفه بمحاولة حتى "تتطور علاقات صافية وأخوية بين كل الكنائس والطوائف الدينية في إطار الإحسان والإرادة الطيبة".ه

البابا يوحنا والمسلمين:
صمم البابا يوحنا على رفض مبدأ ربط الدين – أي دين – بالارهاب وكان ذلك في ذروة مابعد احداث سبتمبر
بل ودعا لعقد لقاء اسلامي – مسيحي في روما
وكما زار حائط المبكى زار المسجد الأموي الكبير في دمشق. واجتمع بياسر عرفات
وحينما طلب إليه محافظ روما أن يبدي رأيه بشأن طلب تقدم به سفراء الدول الاسلامية في ايطاليا لبناء مسجد ومركز ثقافي اسلامي في العاصمة الايطالية وافق بل طلب أن تمنح الارض مجاناً لبناء المشروع

وبعد كل هذا يأتي البابا الالماني الاصل بندكت السادس عشر أو جوزيف راتسينجر ليسير على نهج سلفه بأستيكة عالية الجودة

أما البابا بندكت السادس عشر:
فمنذ بداية عهده افتتحه بشقاق مع العالم الاسلامي بسبب تصريحاته الهجومية ضد الاسلام
ثم اعلانه رفض انضمام تركيا للاتحاد الاوروبي

واثار غضب اليهود حينما لم يذكر ضحايا هجوم على حافلة في نتانيا بإسرائيل جاء رد الفاتيكان حاسما "أنه من غير الممكن أن تصدر إدانة لكل اعتداء يقع على إسرائيل؛ لأنه في المعتاد ما ترد إسرائيل برد فعل غير متناغم مع حقوق الإنسان المتعارف عليها في القانون الدولي"ه

قم جاء الدور على المسيحيين الاخرين:
فكان ختامها خلا بالوثيقة الاستعلائية التي تؤكد تفوق الكنيسة الكاثوليكية فوق الكنائس الاخرى لانها تضم كل عناصر الايمان الحقيقي التي أرادها المسيح لكنيسته
وهي وثيقة قديمة دومينوس يسوس صاغها هو قبل توليه المنصب ولا ادري سبب ظهورها على السطح الان

وتشمل هذه الوثيقة الكنيسة الارثوذكسية والبروتستانتية ...

لا ادري حقا سبب ذلك الشقاق وتوقيته غير المفهوم ابدا .....
ألا يمكننا كبشر .. على الاقل احترام بعضنا بعضا
أهناك داع أن يخرج علينا كل يوم احدهم ليذكرنا بأننا اعداء وبان هناك خلافات بيننا ..وان كل منا يحتكر الحقيقة وحده وجميع الاخرين مخلدون في الجحيم ...

لماذا لا نترك ذلك لله ..لماذا ننصب أنفسنا آلهة يومية .. ندخل من نشاء الجنة ونلحق عقابنا وجهمنا على آخرين