القهوة العالية

رد الفعل على الرسوم كان احمق وغبي جدا واتسم بهمجية غير عادية .. من حق كل بني آدم في الدنيا يعترض على حاجة مش عجباه ومن حق كل واحد ينفعل لاهانة مقدساته .. لكن السادة العرب الاشاوس بكثير من الجهل وبعض من استغلال المواقف والفهلوة نجحوا نجاح مذهل في تقوية صورة الهمجية والتخلف المعروفة مسبقا عن العرب لدى الغرب.
أولا: اظهرت الاحتجاجات الرسمية والشعبية التي تطالب حكومة الدنمرك بالاعتذار قد ايه احنا ولا مؤاخذة مابنفهمش .. وان الشعوب العربية لا تعرف الديموقراطية من المسقعة ولا حرية الرأي من البتنجان .. اطراف كتير جدا بمنتهى الجهل طالبت باعتذار رسمي من الحكومة الدنمركية والراجل الغلبان رئيس الوزراء غلب يفهم الحمير إنه لا يمكن للحكومة الاعتذار لان الصحيفة صحيفة مستقلة ولا يمكن الحجر على رأيها وان الاعتذار عنها أو تجريمها او حتى تبني رأيها في هدم لاسس الديموقراطية في الدنمرك لان وسائل الاعلام حرة ومستقلة وتعبر عن رأيها فقط ولا تمثل اتجاه حكومي .. بس تقول ايه يا محترم .. ما هي الناس اللي واخدة على قراية الاهرام والاخبار بتوع توجيها سيادة الرئيس لازم مايفهموش كده .. وآخر ما الراجل غلب رفض يقابل سفراء الدول العربية والاسلامية لانه تأكد انه مش هينفع يفهمهم وان المسألة ميئوس منها.
-ثانيا التخلف العقلي اللي تجلى في سوريا وإيران كان في منتهى الجنان .. يعني المتظاهرون الايرانيون الله يحرقهم لان معندهمش سفارة أمريكية وعايزين يتظاهروا زي الهمج وخلاص جريوا على سفارة بريطانيا وحرقوها طيب يا حمير هي بريطانيا مالها .. مفيش جريدة بريطانية واحدة نشرت الرسوم والراجل بلير من قصة الرسوم كان بيحارب عشان قانون عدم الاساءة للاديان ومالهومش علاقة بالموضوع .. واصلا ليه يهاجموا السفارة الامريكية .. تخلف محض ,, هما الامريكان ايه علاقتهم بالقضية من اولها لاخرها .. وهو ما فعله الاخوة الاشقاء في سوريا المنكوبة .. منتهى التخلف .. خلاص انعدم الوعي والفهم لدرجة انه لم يعد بمقدورهم التفريق بين الدول .. الغرب كله واحد .. ايه الجهل ده .. امريكا زي الدنمرك .. زي بريطانيا .. صحيح كله عند العرب صابون.
-ولاننا كعرب شاطرين كالعادة في الخيبة والفهلوة والنصب والضحك على الدقون .. تحركت حكومات خايبة عايزة تظهر للناس انها راعية الاسلام والتدين للشجب والادانة ووصل الامر لسحب السفير ... يا نهار اسود ومهبب .. حتى الحكومات مش عارفة ايه الفرق بين الصحف المستقلة والحكومية .. يعني خيبتنا وجهلنا بقوا بجلاجل .. وطبعا الناس شبعت ضحك على العرب الهبل المختلفين واثبتنا لهم قد ايه العرب جهلة واغبياء حتى حكوماتهم. يا امة ضحكت من جهلها الامم !!! صديق دنمركي ارسل لي إيميل من فترة وكان في غاية الدهشة .. قال لي هي الحكومة ذنبها ايه ,, ده تعسف وجهل وقال لي ان الحكومة لو كانت اعتذرت كان الدنيا تقوم ولا تقعد في الدنمرك لانها كده بتنتهك حرية التعبير عن الرأي .. ودي مصيبة .. وطبعا كانت فرصة ذهبية لتجار المقاطعة والمتاجرين بكل قضية حتى يفقدوها معناها. وبدأت شركات البدائل تطرح بدائل للالبان والزبدة والجبنة الدنمركي .. وصورت وسائل الاعلام العربية ان خلاص الدنمرك حتشحت عشان العرب يا حرام مقاطعين الزبدة الدنمركي .. وطبعا اول رد فعل كان موقع على الانترنت بيدعو فيه اصحابه إلى شراء المنتجات الدنمركية لان ذلك يمثل دفاعا عن حرية الرأي ضد البرابرة العرب .. واصبح هناك شعار الكتروني BUY DENMARK وSUPPORT DENMARK. وظهرت بدل الصورة ألف.
-واجمل ما في الامر ان العرب بمنتهى الغباء المطلق خسروا اكبر حلفاء للقضية الفلسطينية الازلية ... الله يخرب بيوتهم .. الدنمرك من أولى الدول الغربية المدافعة عن القضية اللي جابتنا ورا .. واكتر الدول الغربية تقديما للمساعدات المالية للفلسطينية يعني من اكبر الجهات المتبرعة .. وييجي شوية عيال باسلحة يقتحموا مقر الاتحاد الاوروبي في غزة وآل ايه بيهددوا الدنمركيين بطردهم من غزة وإلا .. يا شحاتين يا جهلة .. دا كلام يا عالم .. اي دولة في موقف الدنمرك الان لا لوم عليها لو قالت بمنتهي البساطة (ملعون ابو الفلسطينيين على قضيتهم) .. ولا لوم عليها إطلاقا .. وهنيئا للعرب بهمجيتهم ومظاهراتهم .. وامجاد يا عرب امجاد ..
-واحد فكيك يسألني (على رأي الكابتن لطيف) طيب وايه الحل .. وكيف يكون الاعتراض .. والرد ببساطة للحمير بتوع حرق السفارات (يا بهايم مسمعتوش يوم عن حاجة اسمها قضاء وقانون) .. حل ابسط من كده .. اكيد كلنا قرينا رواية شفرة دافنشي DAVINCI CODE الرواية دي كلها بلاوي ومسيئة للمسيحية اكتر من الف رسم وفيها اللي يحرق دم اي مسيحي غيور على دينه .. شوف بقى رد الفعل كان شكله ايه .. الناس قرت الرواية بالفعل .. ونظموا مناظرات لمناقشتها واقام بعض الاساقفة في أمريكا موقع على الانترنت يناقش فيه الرواية واحداثها وما ورد فيها بالتفاصيل والرد على ما يرونه من أكاذيب وبالاضافة لمعلومات عن المسيحية والكنيسة والسيد المسيح .. ولم يحرق احد دار النشر ولم يطالب احد بحل دم دان براون لانه كافر وزنديق ..