تمثل الاخبار جزء كبير ..بل الجزء الاكبر من حياتي
العالم بالنسبة لنا ليس سوى حفنة من الاخبار ..
الكون ينقسم بالنسبة لنا إلى مناطق ملتهبة تستحق المتابعة
واحداث ساخنة في كل مكان ..
اعيش حيث الحروب مجرد "خبر عاجل"
والموتى ليسوا سوى "ارقام"
هذه هي عينة من الاخبار التي سببت لي حالة من الاكتئاب والقرف طوال الايام الماضية ..
-الرئيس يتدخل لالغاء الحبس في قضايا النشر للصحفيين.
(خلااااص المشهد الاخير في الفيلم ونزل رشدي اباضة ضرب كل الممثلين الشريرين وانقذ المزة بطلة الفيلم
مع انه هو الرجل التالت)
(مداخلة بسيطة للتعليق على الخبر جملة قالها لي سائق تاكسي .. انا غلبان وحقي ضايع ياريت الريس يتدخل والنبي ويجيب لي حقي ويكون مشكور والله)
(طيب ممكن اتنفس والنبي يا ريس؟)
-غارتين جديدتين على غزة ومقتل 16 شخصا.
(يا ترى رجالة حماس والمقاومة على الحدود النهاردة حزام ولا شنطة؟)
-الجيش الامريكي يأمر في التحقيق في واقعة اغتصاب فتاة عراقية وقتل افراد اسرتها.
(انضموا معنا للمقاطة .. المقاطعة مستمر للكلاب الدنمركيين .. كلنا فداء رسول الله .. شجعوا فرنسا الفريق الاسلامي)
سؤال:: يا ترى البنت دي اسمها ايه؟؟
-الانبا مكسيموس: لا احد يستطيع عرقلتي .. انا محمي من امريكا .. سأبني كنائس في كل مكان تابعة لمجمعي الجديد ..
عضو في (لجنة السياسات) عبد الرحمن عودة يحضر افتتاح المجمع الجديد .. الرجل جاء بصفة شخصية ...
لم اواجه مشاكل مطلقا من الداخلية في التصاريح لانشاء المجمع
(259 علامة استفهام) ولا تعليق .. غير اني افتكرت لما حبينا نزود دورين في مبنى الخدمات القائم فعلا داخل سور الكنيسة في حينا انتظرنا سنوات ومئات من الامضاءات من اول محصل النور لحد السيد الرئيس !!!!!!!!!
-مصطفي بكري رئيس تحرير صحيفة الاسبوع يطالب بحظر عرض فيلم عمارة يعقوبيان بدعوى انه مسيء لمصر.
(لا جدع ياد .. وبتحب مصر صحيح .. كلاب السلطة كتروا قوي .. إلا إيجار القلم بقى كام اليومين دول؟؟؟)
-حبس رئيس تحرير صحيفة الدستور الاسبوعية بتهمة نشر خبر ؟؟!؟؟!
(اي والله العظيم ... دي تهمة في مصر ..اعتقد ان الخبر اللي جاي (حبس مواطن قال انه حران بصوت عالي في الشارع بتهمة الاساءة لمصر والاضرار بالسياحة)
-طالبة ترسب في امتحان لانها سبت رئيس دولة أجنبية ..
(علموا اولادكم التناحة والجهل وركوب الموجة)
-دورة في مبادئ حقوق الانسان لطلبة كلية شرطة برعاية وزارة الداخلية
(والنعمة دي مش نكتة !!!)
-فلاح صيني يصنع اجهزة روبوت ويبيعها لتسديد ديونه
(راجع خبر الطالبة آلاء .. او افتكر كل السنين اللي درستها)
-طهران تحذر الدول الكبرى من دراسة ملفها النووي في غيابها
(راجع الاجندة السياسية العربية .. كلها )
-الهند باكستان كوريا الشمالية إيران .. خيول مارقة في السباق النووي تفرض شروطها بقوة الذرة
(الرئيس اليمني يتراجع عن التنحي نزولا على رغبة الشعب)
(جهود ناجحة لتصنيع اول استيكه صناعة مصرية)
11 comments:
ياااااااااااااااااااااااااه وشايله كل دا جوا قلبك وساكته؟
وانا اقول هيا البنيه راحت فين؟
معلش يا بنتي الاخبار كلها وحشه بس من امتي واحنا بنسمع اخبار حلوه بس
ايه مش هنشوفك ولا ايه؟ اطلعي من المود الوشح دا يالا اوعي تسيبي نفسك كده
(جهود ناجحة لتصنيع اول استيكه صناعة مصرية)
مبروك لمصر
أحب اهدى الانجاز ده للرئيس مبارك .
عقبال القلم الرصاص يا رب
**
عضو لجنة السياسات هو جهاد عودة الاستاذ في جامعة حلوان ..تقريبا مش عبدالرحمن .
الرئيس يتدخل لالغاء الحبس في قضايا النشر للصحفيين .. فى المسرح الأغريقى . عندما كانت تتعقد الدراما ف نهاية المسرحيه .لكى لا يحزن المتفرج .تجد -فجأه- شخص ينزل من سماء المسرح ليقول هذا ظالم يذهب الى الجحيم .و هذا طيب أعيده الى أسرته و أجعله غنيا .هناك جمله لبريخت تقول ( كم تعس هذا البلد الذى يحتاج الى بطل ) ..
غارتين جديدتين على غزة ومقتل 16 شخصا .. سمعتى أغنية غريبة لمحمد منير .. لا؟ .. فيها مقطع بيقول ( غريبه غريبه . غريبه و مش غريبه . أنى أكون ويا الحبيبه . دنيا مبتسمه و رحيبه . و فجأه أكون . زى القلوع . ساعة الغروب مروحين . بلا شطوط ولا حنين . و أنطفى فى الحال . من غير سؤال ) أتخطف مننا 16 انسان ف لحظه و النتيجة : خبر ف نشرة 9 .. آه يا بشر ..
مصطفي بكري رئيس تحرير صحيفة الاسبوع يطالب بحظر عرض فيلم عمارة يعقوبيان بدعوى انه مسيء لمصر .. أسمعى النكته دى ( مذيعه بتسأل أتنين واقفين ف الشارع : مصر بالنسبه لكوا ايه ؟. واحد منهم أتشملل و قال : مصر هيا أمى .. المذيعه جالها أنشكاح غضروفى .. و نقلت ع التانى و هى مبتسمه . وأنت ؟؟ . راح قايلها : مبحبش أتكلم عن أم واحد صاحبى ) .. الهند باكستان كوريا الشمالية إيران خيول مارقة في السباق النووي تفرض شروطها بقوة الذرة .. فينك يا فيروووووووز ؟؟؟ .. تعالى أغسلى روحى
الرئيس اليمني يتراجع عن التنحي نزولا على رغبة الشعب .... أيه ده ؟؟ .. أنا شميت الريحه دى فين قبل كده؟؟؟؟ .. لا تتنحى لا تتنحى .. هما عندهم ف اليمن كمان حكاية 99,9 % و لا أيه؟؟؟؟؟؟؟
هتشفوني يا شوشو .. طبعا .. انتوا واحشني جدا .. بس انتوا قشروا
عبده باشا:
متأسفين يا فندم على السهو في اسم عضو لجنة السياسات .. اصل بصراحة اساميهم ولجنتهم تقال على قلبي جدا ..
وشكرا يا فندم مرة أخرى على التصحيح
( كم تعس هذا البلد الذى يحتاج الى بطل )
والله عندك حق يا باسم .. فعلا
بس المشكلة كمان ان الراجل المنقذ بتاع المسرح الاغريقي القديم كان هدفه اسعاد المشاهد .. لكن تفتكر في المسرح الجديد هدفه ايه ؟؟؟؟؟؟
لان المشاهدين حالهم يصعب على الكافر
ياااااااااااااااااااااه
كل ده
منك لله يا مبارك إنته السبب في ده كله
منك لله
ومنك لله يا إلي بتدفع ويجيبوا بفلوسك مدفع
جدتى - الله يرحمها - كانت بتقول ( يا بنى الحدايه ما بتحدفش كتاكيت ) .. يبقى عايزنا نصدق أن النظام المصرى بتاعنا ممكن يحدف ديمقراطيه .. كل ده صدقينى مجرد مكياج لتجميل الوش المكرمش القديم .. نفس الوش القديم .. و التجربه هاتثبت أن القانون ده - حتى لو جيد - هيعرف النظام أزاى يستخدمه لمصلحته .. المشكله مش ف قانون يتعدل و لا لأ .. المشكله ف النظام نفسه .. ( فى الدوله الدانمركيه شئ من العفن ) جمله من هاملت لـشكسبير
أسلوب رائع فى قرائة الأخبار وكل خبر منهم يمكن تصنيفه باعتباره جريمه ارتكبها أحدهم فى حق الشعب و الدستور و حقوق الأنسان .. لكن بعد مانصنف الجريمه .. و نجهز البلاغ .. نقدمه لمين ..؟؟
شرفينى بزيارة مدونتى .. فقد سعدت بقراءة كتاباتك و سأسعد أكثر باستقبال تعليقاتك على كتابتى ..
نقدمه لمين ؟؟ مممم
لربنا طبعا
الشكوى لغير الله مزلة ..
بس من امتي واحنا بنسمع اخبار حلوه
------------------------
تخفيف الوزن
Post a Comment