Friday, August 04, 2006

كان صرحا من خيال وهوى


استمرارا لسقوط الرموز
معه أحد آخر سدود مقاومتي ..
مش قادرة أقول غير جاتكم القرف ..
افقدتوا ثقتنا حتى فيما اعتقدنا انه الاكثر طهرا
وانهم آخر الرجال المحترمين ...
وما اعتقدناها معقلا للحرية المكبوتة وصوتا لها
الكل طالته القذارة ولا أمل

18 comments:

The Eyewitness said...

علمتني الحياة مؤخراًً ألا أطرح ثقتي وألا أبني إيماني على أشخاص والا مت من جراء طعن خيانتهم لمبادئهم وأفكارهم.

lastknight said...

برجاء الأتصال بى مباشرة على بريدى
lastknight1964@hotmail.com

admelmasry said...

معلشي ما تزعليش

She said...

والله يا بنتي من كتر القرف اللي الواحد بقي بيشوفو بقي عندو حاجه كده شبه البلاده
ومبقاش ياثر فيه اي حاجه

باسم said...

شوفى يا بلوستون .. المشكله مش الأوضاع الزباله اللى فى الدستور .. أنا شايف أن المشكله الحقيقيه فى تدنى وأنحدار أسلوب الحوار اللى المفروض أنه بين ناس ف خندق واحد .. مصالح شخصيه و عقد نفسيه و شتيمه .. جاتكوا القرف .. بس على فكره هوا ده الوضع السائد بين المعارضه .. حتى على مستوى العلاقات البسيطه بين الأفراد .. مش حتى كمان على مستوى الشغل .. أحنا فعلا محتاجين - باقول أحنا - نعيد ترتيب البيت من أول و جديد .. الفوضى وصلت لمرحله مينفعش السكوت عليها

karakib said...

دي قله ادب بجد !!!
معقول يكون هما دول الصحفيين الكبار اللي بيكتبوا !!

abderrahman said...

انا مش متأكد اذا كنت صحفية أو لأ..
بس هي الصحافة كده
ومش حاسس انه فيه مكان بيمثل "حلم جميل" في الكارير ده .
**
وبرضه محدش عارف مين ورا حاجة زي اللي بيحصل في الدستور، ومين ليه صلات بأجهزة ايه، ومين واعدينه بايه.. الخ .

bluestone said...

eyewitness
عندك حق .. بس للاسف احيانا الواحد بيكون غبي زيادة ومبيحرمش .. وبيتكرر التعلق بالبشر والرموز على المستوى الشخصي أو الروحي أو العام .. وتكرر الطعنات أو الصدمات .. والواحد بيرجع تاني زي الغبي بالظبط .. والدرس عمره ما بينتهي ..
-------------------------

ودي الكارثة يا شيمو .. لما نبقى زي بقيت الناس .. مفيش حاجة مهمة اصلا .. كله محصل بعضه .. طيارة تقع معلش .. عبارة عليها آلاف .. يا حرام .. مسرح يولع بخيرة الشباب الفنان .. يا عيني ,, بلد بتتحرق قدامنا ومحدش واخد باله .. بكره هنجوع ومش هنلاقي ناكل .. وبرضه عادي جدا .. مابقاش في حاجة بتأثر فينا ..

بقالي مدة ما اندهشتش .. نفسي في حاجة تدهشني .. بس مفيش ..
---------------------------
عندك حق يا باسم . . تدني الاخلاق والاسلوب دي مش حاجة خاصة بالموضوع الاخير بس .. كان عندي أمل ان رواد الفكر وأرباب القلم اللي هم الصحفيين يكونوا على مستوى انضف من كده .. ده برضه مع منحهم كامل الشك في ان ما كتب على المدونة المشار إليها ممكن يكون من مدعين وليس الاشخاص الحقيقين .. لكن بشكل عام ريحة الموضوع فايحة والكل بيتكلم عنها في الوسط .. من أول كارنيه بنت رئيس مجلس الادارة اللي عيسى ادخل فيه ولحد المرتبات ..

بس بصراحة انت عندك حق .. صدمت بعض الشيء حينما اختطلت ببعض المعارضين ورموزهم وعالمهم .. وما يرونه حرية .. واذكر اني قلت لاحدهم .. لا يمكن أن تصلوا للناس في الشارع ابدا بالاسلوب ده ..

اما ترتيب البيت وإعادة النظر .. لا اعتقد .. بصراحة انا فقدت الامل في أي تحسن من أي نوع .. إذا كانت دي عينة الناس اللي احنا حاطين أملنا عليهم في بكره احسن يبقى كل سنة واحنا طيبيين ..

انا بفكر انضم للحزب الوطني .. بجد!!

bluestone said...

كاراكيب ...

كنت لسه بقول .. ان الردود على المدونة المشار إليها من غير المؤكد انها تعود للاشخاص الحقيقين المشار إليهم .. لكن المؤكد ان فيه مشكلة عميقة أو كارثة ,, وان الصورة الوردية عن قلعة الحرية والتعبير عن الرأي وعائلة الدستور ,, لاتوجد إلا في خيال القراء الهبل أمثالنا
---------

عبده باشا ..
المفروض ان المهنة دي تكون كده ..
مش متفقة معاك انها مش مكان للاحلام ولا للشرف ..
المفروض انها تكون مهنة الحق والنور .. المفروض ان حامل القلم يحمل على كتفيه مسؤولية كبيرة جدا تجاه ما يكتبه .. لانه سيؤثر في آخرين ويشكل وجدانهم .. أو هكذا علمونا ..

ولكننا في زمن الاهرام المقلوبة .. زمن انعدام الموازين .. حتى ميزان العدل بقى حبة فوق وحبة تحت ..
مش في بلدنا بس .. في العالم كله ,,

lastknight said...

اشقائى الغاليين جميعا .. أعتقدكم جميعا من جيل أصغر منى .. و هذا مايرعبنى فعلا .. أن يفقد جيلكم الأمل و أيمان
معكم كل الحق ولا ألومكم .. لكن دعونى أقول مشددا .. أبحثوا عن قواعد الأخلاق داخلكم .. داخل ضمائركم و ثقافتكم .. أبنوا دساتيركم و تشريعاتكم و آمنوا بها .. و التزموا طريقها .. نعم أنتم جيل جاء و نشأ فى ظل انهيار حضارى و أخلاقى و اقتصادى لا مثيل له .. قد أراكم سيئى الحظ أذا نظرت للوضع باعتباركم تفتقدون القدوه و الدليل و المنهج
لكنة أراكم سعداء الحظ جدا .. حيث لديكم الآن الفرصه لتخلقوا منهجكم ..و تكون ضمائركم ووعيكم وحدهم أدلائكم .. و تنصبوا بأنفسكم قدوتكم ..
أسألكم الآن يا اشقائى .. هل تعلمون ماهى الروح القتاليه ؟ و من هو المقاتل الحقيقى ؟؟
أنه ليس المقاتل الذى يجيد القتال و ينتصر فقط .. ابدا .. نتيجة الأشتباك لتكن ماتكون .. لكن المقاتل الحقيقى .. هو من لا يغلبه الأحباط .. الأحباط يا أشقائى هو العدو الأكبر للمقاتلين الحقيقيين .. انتصروا على الأحباط وواصلوا القتال .. ابنوا فوق أنقاض هذه الحضاره المنهاره صرح حضارتكم و بأخلاقكم و قواعدكم و طريقتكم .. اختاروا لأنفسكم و تحملوا تبعة اختياركم
لا تؤلهوا الأفراد .. ولا تبحثوا عن القدوه بل أنتقدوا القاده .. و نصبوا فقط من يطابق معاييركم ..
أرجوكم لا تيأسوا .. فأن يأس جيلكم فماذا يفعل جيلى ؟ بل أين يذهب جيل أولادى ؟
..

... said...

بلو ستون
عارفة
الصفحة لم تفتح عندى
ولكنى قرأت عنوانا بصورة عشوائية فى مكان ما عن احداث مؤسفة تجرى فى الدستور
بصراحة
اتصدمت
لكن.. احب اقوللك اننا فعلا لا يجب ان نؤله احدا
ولا يجب ان نحيا بالاحلام
الدستور جريدة خطفتنى لمدة عام
كنت مرتبطة بها ارتباطا مرعبا
لدرجة الاحتفاظ باعدادها
لكن كان يستوقفنى دوما عيوب واضحة وفاضحة وكنت اتحاشى التفكير فيها
وهذا امر غير مرغوب
يجب ان نحتفظ بتحفظنا على ما نقرأه
ونملك فلتر خاص ننقى به شوائب تلقى برؤوسنا
الدستور لا تعبر عن واقع صحفى
فلا يوجد واقع صحفى بهذه الفجاجة والضحالة اللغوية
نموذج الاسرة الصحفية اصبح موضه قديمة
مثل انتماء لاعبى الكرة لنواديهم ايام السبعينات
الان
كل شىء قابل للبيع
وقابل للتفاوض المهين
للوصول لاعلى سعر
وايا كان نوع المشكلة هناك
فانى كنت اتوقع حدوثها
.
.
.

علاء السادس عشر said...

سقوط إبراهيم عيسى مؤلم ومحبط ,ربماالسبب أن الكثيرون صنعوا منه أسطورة ورسموا حوله هالة ,ابراهيم عيسى أنسان يأكل ويشرب ويتبول ويتبرز ويخاف ويكذب ويشتهى أيضاً لم ولن يكن أله كل مابينى وبينه هو مقالتاه تعجبنى أو لا تعجبنى طبعاً خسارة أنه ليس البطل والرمز ولكن هذه هنا مشكلتنا وليست مشكلته ,وطريقة أدارته أو موقفه من زملائه سوف يكون درس شخصى له ربما يراجع أفكاره وربما أيضاً لا .
من حق كل أنسان أن يخطىء وهذا حق وليس هبة.
شكراً لمساحة التعليق
وتحياتى

Anonymous said...

يبدو ان نظريه تينكر بل بدأ حدوثها فعلا

كما ذكرت مدونه بلد البنت

بدأت الناس وليس الارض كما متوقع من النظريه

بدأت الناس تتقطع الى خطوط عرضيه وطوليه

اعتقد ان ابراهيم عيسى كان على خطأ
وفى رأيى ايضا انه على ..قدر كبير من تعليماته وقراراته

واعتقد ايضا ..ما هى كلها بقيت معتقدات

اعتقد ان جريده الدستور ...تابعه الى الحزب الوطنى

تلهينا فى مشاكلها ...واحاطتها
وابتزازها
كما هو على الساحه الان

دى سياسه يا ناس

سياسه العم حسنى واولاده

الهاء فى المشاكل الداخليه
ونامت على كده

متهأيلى ان محدش هايفهم منى اى حاجه
وده اكيد

بس اعذرونى ..مصدووووووووم

بكل اللى بيحصل

وعجبى

bluestone said...

علاء السادس عشر::

سقوط ابراهيم عيسى محبط فعلا لكن ليس لان اصبح اسطورة ولا حاجة ا.. الحكاية ومافيها ببساطة ان الرجل فعلا كان الكثير يعتقدون انه بيدافع عن الحرية والديموقراطية وانه من اصحاب الايادي البيضاء .. وانه من القلة اللي ممكن نثق في ان قلبهم على البلد بجد وبيحبوها بجد ومش بتوع مصلحتهم ولا بيجروا ورا المكاسب وبس ..

يعني ممكن يبقى قدوة طيبة

وعشان كده سقوط الصورة دي عنه كان محبط جدا ..
لانك لما تكتشف ان واحد تعرفه مثلا وكنت شاكك فيه انه حرامي .. ماتنزعجش قوي .. لانك كنت شاكك فيه ومتوقع ده .. لكن لما تصدم في شخص كنت فاكره عيسى يطلع نافع .. يبقى لازم تنزعج جدا وتصدم وتحبط كمان ..

انا مش بتكلم عن عيسى الانسان .. يعني ماليش دعوة هو ايه كرجل وزوج وصديق وحياته الشخصية .. انا بتكلم عن ابراهيم عيسى الصحفي والشخصية العامة والرمز .. لانه رئيس تحرير واحدة من أكبر صحف المعارضة في البلد .. ولما يكون بيتكلم عن النور والحق والخير والدموقراطية والعدل والفقرا ومحاربة الفساد ومايكونش بيطبق اي حاجة من دول جوا مؤسسته يبقى منافق ومايفرقش عن نافع وحموده وغيرهم كتير

شكرا لتواجدك للتعليق
وتحياتي أيضا

bluestone said...

هشام ::

فيه ناس كتير مؤمنة بعدد كبير جدا من نظريات المؤامرة .. مقدرش اقولك انت صح أو غلط .. لاني شخصيا معنديش فكرة ..لكن كل اللي اعرفه ان فيه حاجات كتير ملعبكة وغلط حوالينا .. والوضع كله بقى في غاية القرف ..

وعامة الناس في مصر مش محتاجة التدبيرات والتخطيطات والمؤامرات دي كلها .. الناس بقت مسالمة جدا ومعندها مشاكل خالص ومش ممانعة في اي حاجة ومهاودة على الاخر

bluestone said...

حلم ::
مفارقة طريفة يكون اسم مدونتك حلم .. وبتطلبي اننا مش لازم نعيش في الاحلام .. ماتنسيش لو بطلنا نحلم .. ايه ؟؟؟ اسألي منير ..

ما علينا .. الاحلام هي الحاجة الحلوة الفاضلة لنا في الدنيا .. ومش لازم نتخلى عنها ..

كنت لسه بتكلم مع صديق عزيز علي جدا النهاردة عن الدستور .. وكنت بقوله اني من زمان كان عندي شك في قدر الحرية والتعبير ده لكن مكنتش عايزة اصدق .. كنت حابة الوهم او الكدبة الكبيرة اللي اسمها حرية التعبير عن الرأي في الدستور.

وكنت بحترم عيسى جدا .. لان قلمه كان محترم .. وعشان كده صدمت لاني لم اتوقع الضربة المرة دي

--وعندك حق فعلا .. كنت بلاحظ فعلا العيوب دي .. في الكتابة وفي الاسلوب وفي تبني مواقف معينة .. لكن كان العزاء الوحيد قدر الحرية الذي كنا نتنفسه حتى ولو كذبا بين صفحاتها

Lasto-adri *Blue* said...
This comment has been removed by a blog administrator.
3rby said...

اولا:البلوج ده حلو جدا جدا جدا مش ابا
ثانيا:انا متفق معاكي فاللي قولتيه...بس لا مؤاخزة انا عربي


انا عارف اني الاش...بس اصلي بكتب رسالة من تحت البطانية