Sunday, August 20, 2006

السلطانية ... وماله

كان في دماغي فكرة بتاع 3 تدوينات عن حاجات كتير منها حالة العبث التدويني الدائر حاليا وعن نطرية جديدة انتظروها قريبا .. حتى تختمر ,, د
ما علينا .. فوجئت من يومين بالدكتورة بلوروز تمرر لي أول تاج من ساعة ما بدأت لعبة التدوين ..
ولانه أول تاج من ساعة ما دونت .. مع اني كنت بقرا تاجز كتير جدا لكن محدش مرر لي تاج قبل كده .. مش عارف ليه
لذلك اعتقد انها مناسبة مهمة .. اول تاج من أول فتحنا القهوة في مارس اللي فات
نبتدي بقى .. نجر كرسي .. ونقعد على الباب
واحد نسكافيه هنا يا جااااااااابر .. والناس اللي قاعدة بالمشاريب كله يدفع حسابه ..
معلش يا جماعة مبدأ القهوة (عم عشم مات ... والمعاملة خد وهات)
هل انت راضى عن المدونة شكلا وموضوعأ؟
شكلا لأ:: كنت اتمنى إضافة ملامح كتير جدا على المدونة اتابع بعضها على مدونات أخرى .. لكن بصراحة معرفتي بالتكنولوجيا الحديثة زي معرفة السيد كويزومي رئيس وزراء اليابان ببولاق الدكرور ومعرفة السادة الوزراء بوسائل النقل العام .. عشان كده من الصعب اضافة شيء جديد من غير ما اعمل مصيبة .. واضطر استعين بصديق (هامررله التاج ده بإذن الله)
موضوعا:: يعني مش أوي .. في حاجات كتير جدا كنت عايزة اقولها لكن مش مهم .. انا قررت ان المدونة مايكونش ليها هدف معين أو طبيعة خاصة .. مجرد مساحة للبوح والفضفضة من غير ما تلاقي رد فعل مباشر يحرق الدم
هل تعلم أسرتك الصغيرة بأمر مدونتك؟
لا .. لان الاهتمام اصلا بهذا النوع من النشاط مش موجود .. وهم غير مهتمين اساسا بالموضوع ..
-هل تجد حرجا فى أن تخبر صديقا عن مدونتك؟ هل تعتبرها أمرا خاصا بك؟
هو مش حرج .. بس اغلبهم لا يعرف يعني ايه مدونة من اصلا؟ فعشان اشرح يعني مدونة واقول ان عندي مدونة دي أزمة تانية خالص .. واغلبهم لا يعرف شيء عن نشاطي التدويني واهتماماتي الاجتماعية والسياسية وغيرها .. لكن لا اعتقد انه قد يفاجئهم لان لساني مدونة مفتوحة طول النهار
-هل تسببت المدونات بتغير ايجابى لافكارك؟ اعطنى مثال فى حالة الاجابة بنعم؟
أيوة مش نعم .. :) .. يعني اصبحت اكثر قبولا للاخر وللافكار الاكثر تطرفا عن تفكيري .. لانك بتتمكن من الاطلاع على افكار الاخرين في محيط هادئ بدون احكام مسبقة .. اصبحت اكثر قبولا للاخر على اختلافه ..وفيه مدونات محددة ساهمت في كده زي مثلا مدونة (وسع خيالك) و(مذكرات فتاة مثلية) و(الحرملك) .. وغيرها .. كان استقبالي لهذه المدونات في البداية صادما جدا لعدم قبولي التام لفكرها او لصدامها مع معتقداتي او نمط حياتي ومبادئي .. ومع استمرار خلافي معها تعلمت قبولها وفهمها بصورة اكتر بدون انفعال .. او احكام مسبقة
-هل تكتفى بفتح صفحات من يعقبون بردود فى مدونتك ام تسعى لاكتشاف المزيد؟
لما بيكون في وقت بحاول اتصفح اكبر عدد من المدونات .. لضيق الوقت احيانا اكتفي بالمجمع (ربنا يخلي لنا المعلم علاء)
لكن حينما يتوفر الوقت بحاول اعمل بحث خاص عن مدونات مختلفة .. واعتقد اني اخدت فكرة كويسة عن المدونات في دول عربية زي البحرين والكويت وسوريا وعمان وبعض المدونات في دول غربية
-ماذا يعنى لك عداد الزوار.. هل تهتم بوضعه فى مدونتك؟
وضعت العداد من كام شهر لكني لم اهتم به اصلا .. كان مجرد حلية إضافية ساعدني صديق على وضعها وكنت اريد وضع اكبر عدد من الاضافات على المدونة اثناء وجوده للاستفادة من خبرته .. لكن العداد لا يمثل لي اي شيء مطلقا
-هل حاولت تخيل شكل اصدقائك المدونين؟
لا .. خالص
-هل ترى فائدة حقيقة للتدوين؟
فائدة شخصية بحتة للمدون .. تساهم في تطوير شخصيته والانفتاح على فكر مختلف .. بالاضافة لكونها مساحة ممتازة زي ما قلت للبوح والفضفضة ..
- هل تشعر ان مجتمع التدوين مجتمع منفصل عن العالم المحيط بك ام متفاعل مع احداثه؟
المجتمع التدويني متفاعل من جانب واحد بس وهو جانبه .. يعني المجتمع التدويني يتفاعل مع المجتمع المحيط لانه انعكاس ليه وجزء منه .. فتجد الكثير من الاحداث في المجتمع يتم تحليلها وتفسيرها والحديث عنها في المدونات .. لكن العكس غير صحيح .. فالمجتمع الفعلي لا يتفاعل على الاطلاق مع المجتمع الافتراضي او التدويني بل قد لا يعلم بوجوده
-هل يزعجك وجود نقد بمدونتك؟ ام تشعر انه ظاهرة صحية؟
حتى لا .. لا انزعج ابدا .. ربما لاني لم اتعرض لنقد مباشر من النوع اللي فيه تعدي او اهانة باللفظ أو لغة حادة .. بالعكس المسألة حتى الان تسير في إطار مناقشة مثمرة جدا
-هل تخاف من بعض المدونات السياسية وتتحاشاها؟ هل صدمك اعتقال بعض المدونين؟
لا اتحاشي اي مدونة طبعا .. اطلاقا .. غير اني لا احب التصنيفات .. ولا المدونة ذات الاتجاه الواحد لانها تخلو كثيرا من الروح ..
لو كنت عايزة اقرا تحليلات سياسية جافة .. هقرا الجرايد او اتابع الفضائيات .. لكني ابحث عن روح المدونة واختلافها وتفردها سواء كان موضوع تدويناتها ادبية او سياسية او فنية او شخصية او دينية
مسألة اعتقال المدونين .. لم يصدمني الاعتقال لانهم مدونين ولكن لاني اعرف بعضهم بصورة شخصية او من خلال مدوناتهم. وانزعجت كثيرا من فكرة اعتقال شخص لرغبته في التعبير عن رأيه ..
-مين اكتر مدونين أثروا فيك؟ وليه؟
مالك لانه أول من شجعني على التدوين .. وافتكر جملته ليه اكتر من مرة (يا بنتي لازم يبقى عندك مدونة .. لازم) وهو اللي فهمني يعني ايه تدوين
فيه مدونين كتير اسلوبهم اثر في جدا خاصة في البداية مع اصطدامي بانماط تفكير مختلفة .. وهناك مدونات اتابعها دائما وانتظر تدوينات اصحابها .. لاني أرى من خلالها الاحداث من حولي والدنيا بألوان مختلفة .. لذلك اميل لمتابعة المدونات التي تختلف مع فكري او معتقداتي
-مين من المدونين بتحس انه شبهك؟
معنديش فكره ..
- آخر سؤال: تحب تسمع ايه؟
اي حاجة خفيفة على المعدة عشان الدنيا حر
اكتب اسماء خمسة مدونين ليقوموا بهذا الاستقصاء بعدك
-شيماء
وكل اللي يعدي من هنا ومايدفعش الحساااااااااب
بس خلاص

7 comments:

abderrahman said...

على فكرة فيه إجابات متشابهة مع إجاباتي..
أطالب بإعادة تصحيح الاجابات
:))

أنا كمان معتقدش إن فيه حد مقرب ليا عنده مدونه أو يعرفها، كمان محبش إن حد من زملاء في عمل مثلا يتابعوا اللي بكتبه ويخنقوني.

على فكرة بالنسبة لترك نقد في مدونتك القهوة العالية.. يمكن مدونتك من المدونات القلائل اللي بتردد في كتابة تعليق فيها
:-S

لإني بحس انك انسانة حساسة كتير.
تحياتي لمدونتك الجميلة
:)

Lasto-adri *Blue* said...

كنتى بتسألى عندى يابلو ستون عن يوم الويكيبيديا.. بس انا مالقتش ايميلك عشان اقول لك.. فاسمحيلى ارد هنا

بصى.. مش لازم تشاركى بمقالات تقنية زى اللى معلن عنها فى الصفحة.. لاء براحتك ع الآخر فى اى مجال سواء تكملى صفحة ناقصة او تصحيحى معلومة او تترجمى مقال او حتى تنشئى صفحات ناقصة فى أدب.. تاريخ.. علوم.. سياسة.. اى شئ المهم بس تراعى شروط الموسوعة فى عدم التحيز.. الخ


اما نظام التعديل فهو سهل قوى... عادى زى أى ملف ورد بتكتبى فيه
ولو عايزة معلومات اكتر ممكن تزورى هنا

http://ar.wikipedia.org/wiki/%D9%85%D8%B3%D8%A7%D8%B9%D8%AF%D8%A9

ح تلاقى تقريبا كل شئ عايزة تستفسرى عنه

اهم حاجة بس تشتركى عليها زى اى منتدى


اتمنى اكون ساعدتك يابنوتة

:)

ايــــــــــــــــــوب said...

يعنى كدا .. انا كنت ناوى امررلك نفس التاج ، لكن لقيتك سبقتى ، قلت بردو ما يهمش الاعمال بالنيات كأنى انا اللى مررته، والجايات اكتر
تحياتى

She said...

لسه عامله قبلك علي طول

bluestone said...

عبده باشا ::
مرور شريف يا باشا كنت ناوية امررلك التاج لقيت الدكتورة بلوروز مررته بالفعل.
-
الاستاذة لست ادري::
مشكورة يا فندم .. على المعلومات القيمة
--
ايوب ::
خيرها في تاجات تانية ان شاء الله .. ده أول تاج .. محدش قبل كده عبرني .. عليك انت بعد كده تلحقني عشان الاحراج

sydalany-وش مكرمش said...

مش عارف ليه التاج يحسسني إن أغلب المدونين بيفكروا بطريقة واحدة

The Eyewitness said...

Thanks for the tationn Bluesstone, this the first time someone invits me personally to answer a tag. I'll not be able to do this soon because I'm out of home for nearly 2 weeks. But really thanks a lot I appreciate this.
Sorry for writing in English but I'm in a cyber and there is something wrong with the arabic setup on the computer.