صحيت امبارح من النوم كالعادة
استعديت للشغل كالعادة
شربت قهوتي المعتادة
وبصيت في المحمول كالعادة
فوجدت هذه السطور ....
عيناك موطن قلبي واستراحته
والحر من يفتدي بالروح أوطانا
قلبي وعيناك سهم الحب جمعهما
فكيف لا يلتقي يا خل دربانا
وبعدين .......
.
.
.
ولا حاجة
.
.
.
كملت يومي كالعادة
.
.
صحيح مش كل الكلام ...
----------------------------------------------------
صديق عزيز بقالنا كتييير ما اتكلمناش.. بعت لي رسالة ...
انا خلفت بنت. سميتها ...
وبعد مكالمة طويلة اتكلمنا فيها عن حاجات كتيير ...
بس نسيت اقوله
.
.
اني سمعت طفولتها في رعشة صوته ..
---------------------------------------------
اقر وانا في كامل قوايا العقلية والمهنية
انه لم يرد في بنود عملي
.
.
.
إيقاظ الزملاء .......... النائمين
.
.
وعلى المتضرر توفير مخدااااااااات
------------------------------------
صديقي العزيز:::::::::::
أفهم تماما ما تشعر به
توقعته ايضا ...
ولا ألومك ان تسرب إليك الملل ...
.
.
فهو التطور الطبيعي ..................
.
.
للحاجة الساقعة
----------------------------------------------------------------------
أعرف واحدة كل ما تسمع صوتها
تسمع عيال بتجري وتلعب
وبلالين ..
وعيال على بسكلتة
وصوت عصافير
وبنات بتغني
وجرس بسكلتة
.
.
مع انها دايما حزينة
18 comments:
الواحدة الاخرانية دي هي الفراشة ؟؟ بيتهيألي هي
بعدين من واجباتك طبعا ايقاظ الزملاء .. يعني و يا ريت لو تعملي لهم سندوتش فول بالسطلة ... في طحينة يا بلوستون ؟؟ ابقي حطي له طحينة :)
ييووووو متفكرنيش بايقاظ الزملاء دا
خصوصا لو ساكنين في مكان واحد
انا كنت بجيب م الاخر جردل مياه وادلق ع السرير لحد ما بيقوا مينموش م الاساس لان السرير مبلول ههههههههه
انت تعرفينى؟
ما اتشرفناش قبل كدة
:)
ساعات باحس فى صوتى الحاجات دى وساعات طرقعة الكى بورد وساعات حلل وصوانى وبرامات
كلماتك جميلة
والاجمل رسالة الصباح
أغبطك عليها
:)
العزيزه
هي الايا م التا ئه الي حيث اللا معني
سوي انها تدور بنا الي لحظة الصمت الكا مل لصوت الحيا ه
نحيا تي
كراكيب:
لأ يا سيدي مش هي
دي واحدة تانية
...
اصل كل اللي اعرفهم يجننوا :))
-----------------------------------
زنزانة:
إيقاظ الزملاء دا حاجة كويسة .. لو كانوا في البيت ساكنين مع بعض
والزملاء دول نايمين في السرير
لكن الوضع هيبقى بايخ قوي لو الزملاء دول قاعدين في المكتب في مواعيد العمل الرسمية !!!
حلم:
جميل ان البني آدم يحس قد ايه صوته مميز
أما رسالة الصباح دي .. فدي نكتة الصباح .. :)
اتفضلي على حسابي !!! :)
-----------------------------------
الجحيم هو الحقيقة
صاحب المدونة المغلقة :)
احاول ألا اكون اكثر يأسا أو انزعاجا ..
أحاول أن أجد أي معنى على الطريق قبل مواجهة لحظة الصمت
ايه الحاجات الكتير دى
وبعدين لما فى عندك اوبشن خدمة الاستيقاظ من النوم مش بتقولى ليه لصحابك ولا ده مش لينا
وبعدين مين اللى صوته فى كل الحاجات دى مش عارفة حد عايش فى مصر ولا فين انا مش واخدة بالى
هو هنا فى صوت غير صوت كلاكسات العربيات وبتاع الروبابكيا بيطلع الباقى دى امتى ومنين وازاى
بلاش اول لما تصحى تبصى على الموبايل رسايل الصبح دى بتبقى بتاعة احلام باليل
تدوينة بتفكرني بكتاب علم النفس
سعيد بالتعرف علي مدونتك
هههههههههههههههههههههههههه
مش قادر امسك نفسي بصراحه
.
.
انا كتير باكون في الحالة دي
عادي ما تقلقيش
ليها علاج
.
.
علي فكرة
سعات بتروح لوحدها
ههههه
.
.
تحياتي والسلام
توتا:
ايوة طبعا لازم يكون فيه خدمة ايقاظ الزملاء .. يعني تطلب 0999 وتعملي منبه
---
احلى حاجة في صوتها انه بيديكي الايحاء بالحاجات دي كلها مع بعض ...
----
الموبايل ده بقى .. جلاب المصايب :)
آهو كله برتقال يا عزيزتي
عمرو أحمد:
طيب ابقى ذاكر كويس :)
وتنور في اي وقت
-------------------------------
آدم المصري:
اللي هي ايه بالظبط :)
--------------------------------
الكنبة الحمرا:
انت مقرتش لحد بيكتب وهو ايه ؟؟؟
مافهمتش
حالة التهييس طبعا
صاحب القهوة العالية
انا طول عمرى اعرف القهوة يا سكر زياده يا مظبوطه يا ساده
انما العالية دى اول مرة
يمكن قصدك مكان شرب القهوة يعنى المقهى ؟ وتكون على قمه جبل مثلا عشان تبقا عاليه او الخدمه 5 نجوم؟
اول مرة ازور مدونتك بس لذيذه
ويا بختك يا رادل طلعت فى الدرنال
كتير بنقدر نعرف حاله اللى بنتكلم معاهم من اصواتهم
حتى من غير ما نكون شايفنهم
تحياتى
ده شي بيحصل لناس كتير قوي
قوي
أعرف واحدة كل ما تسمع صوتهاتسمع عيال بتجري وتلعب وبلالين
================================
أعرف أنا كمان واحد
لما تكلمه تحس انك واقف قدام قماشة بيضا
و لما تفكر فيه تضخك
و لما تزوره تحس انك تعرفه من زمان
و لما تكلمه يوريلك الدنيا أحلى و ابسط
===============================
نوجد أعذار لهذه الدنيا لنستمر فيها
فلماذا نحن لا نحاول ان نكون هذا العذر
!!!!!!!
لومي:
اهلا .. خطوة عزيزة
بس هي صاحبة القهوة من صاحب القهوة
-------
الشيطان يعظ:
منور ..
البشر كتير بيشتركوا في خبرات كتيرة قوي .. ده اللي بيخليهم بني آدمين وبيخلق حالة ما بينهم
---------------------
كارول:
الناس دي بحس كتير انها زي هدية ربنا بيبعتها للواحد في اوقات بيكون محتاجها
حاجات صغيرة جدا بس بتفرق قوي
سؤالك وجيه جدا
ليه مانكنش احنا العذر ده؟
--------------------------------------
الكنبة الحمرا:
شكرا جدا على التوضيح
معلش ثقافتي موزمبيقي ..
بس اصل التعليق كان بالعامية ماعدا الجزء ده فالتبس علي الامر ..
اشكرك على التعليق والمتابعة
Post a Comment