Thursday, June 21, 2007

كنت عايزة اقول

كيف يفعلونها .. لا أعرف
اكره السفر .. مش السفر نفسه ولكن كل المشاعر المتعلقة بالسفر
انك تنزع جدورك من مكان ومن قلب ناس عشان تزرعهم في مكان تاني جوا ناس تانية
وبعدين تقرر بعد فترة انك تنزع نفسك تاني عشان تتزرع في مكان تاني

وتحس ان الدنيا ماشية كده ناس كتير بتتزرع جواك وناس بتقلع نفسها من قلبك من غير ما يكون لك رأي في الموضوع

من كام ساعة بس .. وصلتها للمطار .. راحت أبعد مكان في الدنيا
ومعرفتش اقولها انها رغم انها زوجة دلوقتي .. لكن بالنسبة لسه العيلة الصغيرة اللي كانت لابسة الدريل الكحلي وعندها تلات سنين
وشعرها ناعم وطويل ,, وماسكة في إيدي وعنينها بتلمع

لسه العيلة الصغيرة اللي كنت بتحايل على ماما اخدها وانزل بيها ولما وقعت وكسرت سنتها كانت أول مرة قلبي ينخلع بجد

كنت عايزة اقولها انها هتنساني بعد كام سنة .. وان وجودي في حياتها هيبقى هامشي جدا وده شيء طبيعي
بس مقدرتش ..
كل اللي عرفت اقوله لها وهي في حضني وبتبكي ان اللي عايز حاجة بيعملها وان اللي عايز ما ينساش حد بيفضل مرتبط بيه طول عمره

بس انا كنت بكدب عليها ...

عشان كده مقدرتش اقول كل حاجة عايزة اقولها لها ..مالحقتش ..
كنت عايزة اقولها ماتزعليش اني كتير كنت ببقى متسلطة جدا
عشان كنت بمارس امومتي معاها من غير ما اقولها

كمان

كنت عايزة اقولها اني زعلانة جدا منها

لما حد ياخد جزء منك ويرحل من غير ما يستأذنك .. حد ماشي ومعاه جزء من طفولتك ومراهقتك وذكرياتك ولحظات الفرح والحزن والجنون والاسرار ,,,, حد بياخد حتة منك ويمشي ... مش هتزعل؟

كنت عايزة اقولها انها بالنسبة لسه العيلة الصغيرة ام 3 سنين
ودريل كحلي
وشعر ناعم
وسنة مكسورة
خالعة قلبي

38 comments:

متغيرة شوية said...

هما ليه لازم يمشوا؟
وليه أحنا لازم نقعد؟
ليه لازم نكبر من أصله؟
ساعات الواد بيتمنى يبقى عنده الة الزمن علشان نجمد بيها الايام الحلوة

bluestone said...

متغيرة شوية:
هي دي المشكلة
وهي دي الأسئلة
هما ليه لازم يمشوا
ليه لازم يتقلعوا من جوانا
وليه احنا ممكن نتقلع من جوا ناس تانية ..
بس السؤال اللي بيخنق اكتر
هو احنا ليه بنكبر من أصله

Gid-Do - جدو said...

ماريان

امبارح عديت على مدونة انا و هى و وشوشات البحر ولقيت صاحبها حاطت اغنية اسمها الحدود .. لخالد الذكر والذكرى صلاح جاهين اول مرة اسمعها ومن ساعتها وانا مش قادر امسك دموعى وجيت عندك لقيت كل اسئلتك علشان كدة حنقل هذا الجزء من الاغنية ليكى لان اسئلتك ملهاش ردود ـ

و ابتدى شيء ينجرح جوه الوجود
و ابتدينا أسئلة ملهاش ردود
ميلنا عالشباك نخبي
دمعة فرت مننا

Gid-Do - جدو said...

ماريان

انا بمر المرة دية هنا مش علشان اكتب تعليق
ولكن بمر علشان اقول الف شكر على مرورك
عندى وكتابة كلامتين اسعدونى فى مرضى
دة جميل فوق راسى وابسط شئ لرد جزء بسيط
من هذا الجميل انى اجى لغايه هنا واقول ...شكرا

اسكندراني اوي said...

كلهم بيكبرو
يوم ما بيتولدو بنشيلهم على ادينا
ويكبرو ادام عنينا
ونقلهم تعالو خدو الشكولاته
وبعدين يتكلمو يطلبو يقولو هاتلي ياعمو
ويا احنا نبعد يا هما يبعدو
وبرضه نفضل شايلنهم بس المره دي في قلوبنا مش على ادينا

فكرتيني باللي سيبتهم ورايا في اسكندريه
ياااااااااااااااه

abderrahman said...

لا تحزني
برضو السفر بيعطي أمل في شيء أفضل
الحركة أفضل من السكون حتى إن صاحبها ألم
أو فراق

karakib said...

الموقف ده اتعرضت له مرتين
مرة و اختي مسافرة زي ما قلت لك ... بس لأني كنت مجهز نفسيا اني لازم اكون متماسك لأنه امي و ابويا الاتنين كانوا في حالة غريبة يمكن كانت اول مرة في حياتي اشوف ابويا بيدمع بالشكل ده
بس لأخر لحظة فضلت متماسك و باقول لنفسي لأ هي كدة احسن ما تبقاش اناني
لحظة واحدة بس فاليوم ده حسيت انه في زلزال جوايا .. قبل ما تخش صالة السفر حضنتني جامد و اتعلقت في رقبتي و قالت لي .. خد بالك من نفسك شوية بقي و سيبك من الناس .. كانت بتترعش و هي بتتكلم
اكيد مع الوقت هاتنسي شوية و شوية و هانسي شوية ... و يمكن ما يبقاش لينا اي دور في حياة بعض ... و الشخصيات تتغير و حتي الوشوش الزمن ينحت علاماته عليها .. يمكن لو شفتها لما تيجي .. او لو روحت لها هابقي باتعرف علي بني ادم جديد بخبرات جديدة و حياة جديدة ... لو توقعت انه هلاقي نفس الشخص يبقي هاتصدم لأنه اكيد اكيد الغربة و الظروف و الحياة في مكان مختلف بتشكل شخص مختلف
ده اللي شفته في ناس كتير من عيلتي سافرت و رجعت و علشان كده برضه مجهز نفسي اني اشوف واحدة جديدة خالص ما اعرفش عنها غير طفولتها و جزء من شبابها و الباقي عليا اكتشفه لما اشوفها
---------------
تاني مرة و دي كانت صعبة لأنها كانت اول مرة اختبر الاحساس ده كانت لصديق و اصدقائنا هما اخواتنا اللي اخترناهم فالدنيا دي ... اخواتنا اللي ما يقلوش اي حاجة عن اخواتنا الحقيقيين و كان مسافر امريكا ... كان الوحيد اللي امنت له و عملت له نسخة علي مفتاح شقتي فالمنصورة لما كنت عايش وحدي هناك.. يدخل و يخرج في اي وقت حتي لو كنت مش موجود
الشخص ده لما سافر اثر في كتير .. بيقول راجع كمان شهرين يقعد شوية في مصر و يرجع تاني امريكا
ساعتها كتبت تدوينة بعد ما سافر
كنت سهران طول الليل مش مصدق انه هيسافر خلاص و الصبح روحت عالمطار و فضلت ماسك نفسي عن العياط و لما رجعت كتبتها قبل ما انام
ساعتها فهمت يعني ايه الم جاف لا يبلله الدموع ... يعني ايه زي ما بتقولي واحد شاركني لحظات جميلة و خد جزء مني و خدت جزء منه مضطر اني انزعه و لو مؤقتا لأنه بقي شوكه في قلبي كل ما افتكرها تعذبني
احلي ذكرياتنا ساعات بتبقي برضه مؤلمه جدا
لو عندك وقت
لبقي اقريها
http://bikya.blogspot.com/2006/05/blog-post_29.html#links

الأغاني للرأفتاني said...

احنا بنمشى علشان نعرف اللى قاعدين بيحبونا قد ايه
واحنا بنمشى علشان نقول للى قاعدين انهم هيوحشونا قد ايه
موضوع الكبر فى السن ده..انا اؤمن انه مجرد رقم لا غير
بس اختك البنوته الصغيره هتفضل بنوته صغيره فى نظرك حتى لو كانت جده وعندها احفاد
ربنا يرجعها لك بالسلامه

يا مراكبي said...

أنا بقى كده على طول .. عايش زي صاحبتك كده على طول

كل شوية أشيل جذوري من حتة .. وأروح أزرعها في حتة تانيه .. لحد ما بقيت أشك في موضوع الجذور ده

شوفي بقى لما تحسي إنك مش عارفه جذورك دي فين؟

Dananeer said...

وجعتينى اوى يا ماريان
مفيش اوحش من الفرقه
و الغربه
و مفيش اوحش من الناس اللى بيتخلعوا منا

ربنا يصبرك

و برضه مهما كان انتى حتفضلى شايله البنوته ام سنه مكسوره جوا قلبك و حتحسيها كتير حواليك
و أكيد هيه

bluestone said...

جدو الجميل:

صلاح جاهين باعتبره فيلسوفي المفضل
تفتكر يا جدو كل ده جزء من اننا بنكبر .. جزء من نضوجنا .. اننا نفارق ناس بنحبها ونعرف ناس تانية
ونودع ونلاقي .. تفتكر يا جدو ده جزء من اننا بنكبر بجد.

اما المرة التانية وحضرتك منورني على طول بس ازاي تشكرني يا جدو على سؤالي يعني .. ؟ ما حضرتك جدو وطبيعي اننا نسأل عليك :))
ومش جميل ولا حاجة.. ده واجب على الاحفاد طبعا :)
حمد لله على السلامة تاني يا جدووووووو

bluestone said...

اسكندراني قوي:
بس الفرق كبير
مش ممكن يروح عن بالي المثل المصري
البعيد عن العين .. بعيد عن القلب
وده كل خوفي
\
ربنا يجمعك بكل اللي سبتهم .. ويسعدك بلحظة لقا بجد ويهون غربتك

bluestone said...

عبده باشا:
أي شيء إلا الفراق ..
تجميد الزمن مستحيل
لكن بيفضل أمل

bluestone said...

كراكيب:
اكره لحظات الفراق كراهية التحريم ..
هل ممكن نكون مجهزين نفسيا ابدا لفقدان جزء مننا .. انا مش عارفة ممكن نكون مجهزين للفراق .. اعتقد ان ده جزء من نضوج لا نرغبه ابدا.

خصوصا ان في اللقا ان حصل هيكون تعرف على انسان جديد بملامح مختلفة .. كأني بشوفه لأول مرة
ودي حاجة مرعبة ..

bluestone said...

المهاجر المصري:
صحيح في نظري هتفضل نفس العيلة الصغيرة
لكن الواقع بيقول اني هشوف انسانة تانية خالص .. وهنتعامل رسمي زي اي اتنين بيشوفوا بعض لاول مرة

bluestone said...

يامراكبي:
ياااه
دي اصعب حاجة .. اكيد متعبة قوي .. انك تنزع جذورك من مكان وتمدها في مكان تاني .. الجذور بتتبل وممكن ماتبقاش قادرة تحدد مكانها الحقيقي.

بس يا ترى الناس اللي سبتهم حاسين بإيه؟
------------------------------
دنانير:
يمكن بكره بس هو اللي عنده إجابة للسؤال ده .. يا ترى لو اتقابلنا تاني
هتفتكر كسرت سنتها فين؟ ومين كان معاها؟

اسكندراني اوي said...

ابدا ابدا
مش كل بعيد عن العين بعيد عن القلب
ممكن مع زميل صديق جار ماشي
لكن مع حته منك
شفتيها بتكبر يوم بعت يوم
شنه بعد سنه
تيجي كل عيد تاخد العيديه وتبوس خد عمو

اه
اه
اه

Gid-Do - جدو said...

ماريان

سؤالك
---------
تفتكر يا جدو كل ده جزء من اننا بنكبر .. جزء من نضوجنا .. اننا نفارق ناس بنحبها ونعرف ناس تانية
ونودع ونلاقي .. تفتكر يا جدو ده جزء من اننا بنكبر بجد.
---------
من حسن الحظ دلوقت ان التكنولوجيا من تليفونات وكاميرات تنقل الصورة والصوت عبر الانترنت خلت اننا مش لازم نكبر واحنا بنتألم طول الوقت ـ الالم بيكون مؤقت ساعه السفر لكن بعد كدة بيكون مافيش فرق كبير بين اللى فى اخر الدنيا واللى فى الناحية التانية من نفس المدينة ـ انا زمان جوابى كان بياخد اسبوعين علشان يوصل مصر ولو كتبوا الرد فورا بياخد الرد اسبوعين علشان يوصلنى ـ شهر على الاقل ما بين سؤالى لاهلى ازيكم وردهم عليا ـ وده كمان لو ان البريد مفيش فية تاخير ـ وكان الجرنال المصرى بيوصلنا مع القدمين فقط ـ النهاردة عن طريق النت انا بقرأ الجرايد المصرى فى نفس يوم صدرها وبكلم الاسرة فى مصر كل اسبوع لمدة قد تصل للساعة ـ بدون مصاريف زيادة ـ اهم ما فى الامر ان يكون فية حرص من المسافر انه يتصل ويكون منتظم فى هذا وبكدة يبقى مفيش فقد كبير للتواصل ـ طبعا مش حقدر اقول ان دة زيه زى اللقاء الحى ولكن احسن من عزلة زمان ـ تحياتى

Sally said...

انا الموقف دا حصلي
بس بشكل اقووووي











حصلي في موت بابا
السفر اهون مش كدا
؟؟؟
يالا الحمد لله

أحمد المصري said...

إنها سنة الحياة 00فلا تحزني0

Anonymous said...

ظللت طويلا أمام الكلمات

أحيانا .. نريد ان نقول.. فيأتي الصمت أبلغ

Abo Amr said...

من واحد اضطر يسافر
و سايب زوجته اللي بيحبها اوي و ابنه اللي منور حياته
صدقيني
برضه المسافر بيحس بكل اللي حستيه من لوعة و فراق و ظنون و شكوك
بس يبقى المثل القائل

اللي رماك على المر

اول مرة اجي
بس مش اخر مرة ان شاء الله
على فكرة اسلوبك صادق و حساس و يمس الوجدان

bluestone said...

جدو العزيز:
يعني اللي قالوا مثل البعيد عن العين بعيد عن القلب كانوا غلطانين ؟
اتمنى
---
بالله المستعان :
الفراق هو الفراق ..
اكيد الموت اقوى .. لان المسافة اللي بتفصل ما بين اللي بنحبهم وبيننا بتكون اكثر استحالة ..
وتبقى الذكرى في كل الاحوال .. جزءا حيا ممن فارقناهم

bluestone said...

أحمد المصري:
اشكرك ..
وشرفت
وللاسف عندك حق
------------------
Anonymous :
منور يا غريب .. :)
وان لم تقل ..

bluestone said...

ابو عمرو:
اتمنى بحد ييجي اليوم اللي يجمعك بيهم .. وبكل الاحبا اللي سبتهم
تنور حياتهم وينوروا حياتك

مفيش أمر من فراق الحبايب ..
ترجع لهم بالسلامة ان شاء الله
ولا تفارقهم مرة اخرى

منور وفي انتظارك
----------------------

يا مراكبي said...

مافيش إحساس

كان زمان الكلام ده

بس بيفتكروني بالخير ويقولوا كان راجل طيب

انحلت سيور العربه وسقط المهر من الاعياء said...

انافى الغربة ابكى

مابكت عين غريب

لمااكن يوم خر وجى

من مكانى بمصيب

عجبا لى ولتركى

وطنا فيه حبيبى

صدقينى لاالمسافر مبسوط ولا القا عد سعيد
!

ibn_abdel_aziz said...

مش عارف اقوللك ايه يا ماريان
انتم لسة صغيرين
حتتقابلو تاني
ان شاء الله
ولو بعد حين

امي سابت اخواتها وراحت الكويت مع ابويا
وبعدت عنهم عشرين سنة
ورجعت تاني
واهم مع بعض بقالهم سنين

مسير الحي
يتلاقي ان شاء الله

bluestone said...

القابع في جحيم الحقيقة:
عارفة ده كويس ..
مفيش حد عاجبه حاله ..
بس علامة الاستفهام اللي بعد الاسم ... قوية اوي. :)
------------------------------------
ابن عبد العزيز:
يمكن .. او اكيد هنشوف بعض تاني
بس المشكلة في انك هتشوف حد تاني خالص .. بني آدم جديد بتتعرف عليه لاول مرة

Anonymous said...

Oi, achei teu blog pelo google tá bem interessante gostei desse post. Quando der dá uma passada pelo meu blog, é sobre camisetas personalizadas, mostra passo a passo como criar uma camiseta personalizada bem maneira. Até mais.

Anonymous said...

bluestone:
التدوينة الأخيرة لي كتبتبها قبل مسافر علطول، ممكن يكون فيها أجابة على سؤالك وممكن لأ، أنا مش عارف أنت قراءتيخا أصلاً ولا لأ...
يمكن لو مكونتيش قراءتيها، ده وقت مناسب تقراءيها....

صاحب البوابــة said...

الفراق

اقتلاع مؤلم للجذور

وتبديد قهري للذكريات

ادعو الله ان تكوني بخير حال

وتجتازي تلك المرحلة في اسرع وقت

تحياتي

بلال حســــنى said...
This comment has been removed by the author.
bluestone said...

صاحب البوابة:

وتبديد قهري للذكريات
هو ده قوييييي
------------------------
الكنبة الحمرا:
الحب باب للتعلق ... باب للتعلق
مش فارغة ابدا

صاحب البوابــة said...

مررت لأقرأ لكِ الجديد فلم اجد ؟؟؟

عسى أن يكون المانع خيراً

تحياتي

انحلت سيور العربه وسقط المهر من الاعياء said...

اين انتى؟

فى القلب said...

أنتى مدحكتيش عليها ولا على نفسك
لما ألتلها أن ألى عايز ينسى ينسى والى عايز يفتكر بيفتكر دى حقيقه
والمثال أنتى
هيه برضه جوها نفس الأحساس بألم الفراق
يمكن أكبر لأنها راحه للمجهول
التواصل ممكن يكون يومى عن طريق النت
بالبرامج صوت وصوره ومجانى
ربنا معكى ومعها

sasoo said...

msh 3rfa 2a2ol eh??? bs kol ely ha2dar 2a2olholk enk makdebtish lma 2oltili
ان اللي عايز حاجة بيعملها وان اللي عايز ما ينساش حد بيفضل مرتبط بيه طول عمره
we ana 3yza 2akon m3akom tol 3omry
3rfa msh 3rfa eza konty hatsad2yny wla bs kelmtk di heya ely medyany push hena fi elbalad elsa3ba di la2ny 3yza 23ysh hena we zay ma2o`7ty 2altli ely 3yz 7aga by3melha we 3shan keda ana belzabt today yb2a leya one maonth 2shta`3lt we da 3omro ma by7sal we kaman ba`7od course el english we ba`7od training fi medical center
we kol ely by2aweny kelmtk
di f3ln kelmt 2om la2n kalam el2omahat ely bigad howa ely by2asar we byb2a tol elzaman
da `3er ba2a eny 3yza 2fdal mnokom we m3kom tol 3omry
la2n belbaldy keda
(ely malosh mady malosh 7ader)
we da 2kbar dalil yebinlk eny mansetsh eny mn masr ana 3omri ma hansa 2a7n 2ab fi elkon we 2om 7awatet 3la 3yalaha fi 2k7al elzerof we 2o`7ten 3omry lao lafet kol belad el3alm ely rabna `7al2ha mahala2y zayhom
we yla kefya 3leki keda len elbeta3 da 2tmas7 we katabto 3times we m3ndish 2st3dad yetms7 tany