Monday, August 20, 2007

أنا.. وخيالي المريض

رأيت خير الله ما اجعله خير .. فيما يرى النائم .. مجتمعا موازيا
كأنه قد طاف بي ركب الخيال -على رأي الست-
إلا اني سرعان ما عدت لرشدي .. ونفضت تلك الخيالات الحمقاء الساذجة
التي قد توصمني في حال نشرها بالجنون والعياذ بالله
.
ولكن تسجيلا لحالة الجنون "المؤقتة" التي أصابتني وتفريغا لشحنة اللوثة العقلية "الطارئة" التي ألمت بي
كان من المفيد تسجيلها حتى لا يعود العقل إلى ضلالاته ويعود عن تيهه في الخيال ..ه
.
وإليكم بعض مما أصابني.. فهكذا تجرأت وتخيلت عناوين صحف الغد الخيالي بعد ان خدعني خيالي المريض:
.
-وزير الداخلية حبيب العادلي يقدم استقالته لرئيس الجمهورية ويقدم اعتذار مكتوب لاسر ضحايا "سلاخانات الشرطة" الأقسام سابقا
-أسرة فتاة أمل (فتاة المحلة) ترفض الاعتصام في الكنيسة وتقرر الاعتصام أمام مديرية الأمن حتى ظهور معلومات لكشف غموض اختفاء الفتاة وتقاعص الأمن .. تؤكد انها ستلجأ للقانون وليس للكنيسة علاقة بالموضوع
-والد الفتاة يصرح "نريد الاطمئنان انها بخير .. وتوجهها الديني شأن خاص بها"
- الجهات الأمنية تؤكد على ان القضية حتى الآن جنائية تتعلق باختفاء فتاة ولا داعي لاقحام الطائفية في القضية
-أسرة قتيل سيوة بالحرق (يحي عبد لله) واسرة ناصر (سباك العمرانية) وأسرة (طفل شها) وأسرة (شهيد تلبانة) تتضامن معا وتعتصم أمام مقر وزارة الداخلية في القاهرة طلبا للقصاص من قتلة اولادهم
- جمعية أهلية للمساعدة القانونية تتولى قضية الضحايا الثلاثة
- طلب عاجل بمجلس الشعب لاستجواب وزير الداخلية بشأن منهجية التعذيب في اقسام الشرطة
- وزارة الداخلية تقرر فتح تحقيق عاجل وفوري في الوقائع الثلاثة وووقائع التعذيب الأخرى ووزير الداخلية يتعهد بنشر اسماء المجرمين ومعاقبتهم
- جمعيات حقوقية تنشر قائمة سوداء باسماء ضباط التعذيب
-مظاهرة احتجاجية حاشدة يقودها رموز المجتمع المدني وشيوخ وقساوسة تندد بامتهان آدمية الإنسان في أقسام الشرطة بما يخالف شرائع الدين والانسانية
-رئيس الجمهورية يلقي كلمة على الشعب بعد تكرار تعذيب المواطنين في اقسام الشرطة
-مواطن يقاضي محافظ محافظته ووزير الري والموارد المائية لفشلهما في توفير المياه النظيفة له ولابناء قريته رغم انهم من دافعي الضرائب
-وزير .. (أي وزير) يقوم بحل مشكلة في وزارته قبل حدوث كارثة ودون انتظارها
-وزير .. (أي وزير برضه) يعمل اللي بيقوله
-مرور أسبوع واحد كامل دون الحديث عن الطائفية والوحدة الوطنية في الصحف
-فضيلة المفتي يصدر فتوى ضد امتهان الإنسان
-مواطنون يقتحمون مركزا للشرطة بعد احتجاز وتعذيب مواطنين داخله
- وزارة الداخلية تقرر تدريس مادة (حقوق الإنسان) في كليات الشرطة
- مركز حقوقي ينشئ مجموعة دعم نفسي وقانوني واجتماعي لضحايا التعذيب في أقسام الشرطة
-المحامي نجيب جبرائيل يعلن عن تبرعه باقامة دعوى قضائية ضد قاتلي طفل شها
-المحامي منتصر الزيات يقيم دعوى عاجلة ضد قاتلي ناصر سباك العمرانية
- الاعلان عن اتهامات واضحة لمعتقلي الاخوان المسلمين. ووزير الداخلية "لا اعتقالات غير قانونية لاي إنسان"
-تدريس مادة حقوق المواطن في المدارس والجامعات
-وزير الداخلية "لا يوجد شيء اسمه مكتب مكافحة المجتمع المدني" .. الشرطة المصرية تحافظ على أمن وحرية المجتمع المدني
-عودة شعار "الشرطة في خدمة الشعب"
-صدور أحكام حقيقية وتنفيذها في ضباط شرطة مثل ابو سحلة واسلاك نبيه والتسوئي بعد إدانتهم بتعذيب مواطنين

20 comments:

محمد عبد الغفار said...

شكلك كنت صايمه النهارده

م said...

حمد الله على سلامتك يا ماريان
متهيألى فاهمانى
وربنا يسامحك برضه على الكلام ده
مش عارف ان كان الاحسن اكتفى بكده ولا اتكلم معاكى نقطه نقطه
اللى تحبيه

bluestone said...

محمد عبد الغفار:
مكنتش صايمة ولا حاجة .. بس دي تهجمات خيالي المريض بقى تعمل ايه

---
محمد الهنداوي:
الله يسلمك :)
لا ماتكتفيش
اديني نقطة نقطة ..
بس اعذرني اذا تأخر الرد .. عشان هسافر يومين شغل وجاية ع السريع

abderrahman said...

:)
أرغب في وضع علامة × على كلمة المريض، واخليها الوردي
أو التقدمي
**
كاني امام نهاية لإحدى الملاحم الشهيرة

Unknown said...

طب اصحي بأه يا بنتي
لحسن تستهوي
انت باين عليكي مش متغطية
:)

ليس بالأحلام وحدها تعيش الأوطان

تحياتي

بنت القمر said...

بلو ستون العزيزة
اذا كنت شايفه ان ما حلمتى به لوثه عقليه ياريت تنتشر الفيروس بتاعها فى المجتمع كله البوست جميل بجد والله مش مجامله وافكارنا المرة دى متفقه ميه الميه يارب تكونى دايما بخير لانىاحترم مدونتك وافكارك
مهما اختلفنا تظلى اختى العزيزة

Amira said...

ممكن تتغطي و انتي نايمه و كمان و انتي قاعده سرحان لأن مثل هذه الأحلام مضره بالصحه النفسيه للمواطن المصري

:)

خيالاتك مش مريضه و ياريتها تكون حقيقه

Alexandrian far away said...

مساء الفل يا بلو ستون
أنا حأتكلم على الأحلام بعدين
لكن هو بجد فيه شىء اسمه مكتب مكافحة المجتمع المدني؟
بجد يعني؟

karakib said...

بتهزري :)

البدراوى said...

انتى حلمتى بكده ؟
طيب

micheal said...

ملعون أبو الصنف علي اللي بيغشوه
:)
ايه كل ده....ده ولا في الاحلام الورديه
تحياتي لكي

semsem said...

ربنل يشفيك ويقومك منها على خير

عباس العبد said...

لا حول و لا قوة الا بالله
انتى بتقولى الكلام الى بيقولوه الناس التانيين
انتى معانا و لا معاهم و لا مع الناس التانيين
اوعى تكونى مع الناس دوكهم

أحمد المصري said...

اه في دوا جديد بيخلي الواحد ينام من غير ما يحلم..ساعات الأحلام بتبقى مرعبى ساعة ما تتحقق0

جبهة التهييس الشعبية said...

هييييييييه
وانت ازيك كده

bluestone said...

عبده باشا:
لا يا عم خليها المريض ماتوديناش في داهية ..
واتحسب في النهاية مع المختلين عقليا
-----------------------
أنونيمس :
ولا بغيرها اليومين دول يا انونيموس
-------------
بنت القمر:
منورة
ونبقى مجتمع من المختلين بجد :)
في الاتفاق اخوات
وكمان في الاختلاف اخوات
اختلاف ولا خلاف .. :)
ينفع شعار جماعة ده :)
-----------------------------
فريدة:
علم وينفذ ..
احنا مش قد الاحلام فعلا
--------------------
اسكندرية بعيد (بس قريب :) :
مساء الفل
على سمعت ايوة فيه مكتب اسمه مكافحة المجتمع المدني اتكلموا عنه في البديل من كام يوم
وان مكانش موجود باسمه
اكيد اكيد موجود بعمله
زي بالظبط مكتب مكافحة المدونين :)

bluestone said...

كراكيب:
لأ .. يمكن ..
انت مجيتش
-----------------------
البدراوى:
ماشي
----------------------
مايكل:
بس لازم تعترف انه صنف كويس خالص ..
بس ماتقولش لحد احسن يصادروه
-----------------------------------
semsem:
شفانا الله واياكم والسامعين والقارئين آمين
--------------------------------
عباس العبد:
انت جيت ولا لسه كعب داير ..
عشان تبقى تحلف (أحلى من الشرف مفيييش) :)))

طب قول كده انت مين؟
ومين الناس التانيين ؟؟

انا معايا
لا مع دوكهما
ولا دوكهوبا
----------------------------------
أحمد المصري:
بس الاحلام دي لو اتحققت هتبقى مرعبة لناس تانية مش لينا
---------------------------------
جبهة:
نوارة المجتمع الافتراضي ...
انا .. مش قوي
انتي كويسة؟؟

Alexandrian far away said...

شكرا يا بلو ستون على جملتك الودوده :-)
لو المكاتب دي موجوده بجد يبقى مش حتنفع أحلام عاديه
ده أحنا محتاجين شريط LSD
لكل مواطن عشان نتخطى الكوابيس بتاعة الحكومه دي
تحياتي
وتمنياتي بأحلام أجمل وأجن باستمرار

يا مراكبي said...

هو مش خيال مريض ولا حاجة .. لكن بالنسبة لحبايبنا بيعتبروه خيال علمي

أضعف الإيمان إن يكون حتى عندنا خيال .. حتى لو مريض

ياسمين حميد said...

مجتمع موازي
!!!
يظهر أنك كنتِ من قراء ملف المستقبل
الرجاء إرسال فريق البحث العلمي بقيادة الرائد نور للبحث عن أسباب تقدم هذا المجتمع الموازي
ه(سريعاً قبل أن ترسلهم الدولة في مهمة رسمية لردم الفجوة التي فتحت بيننا وبين المجتمع الموازي)ه
;-P