Saturday, March 01, 2008

مسلم؟؟؟ ولا مسيحي.؟؟ الحضري هو السبب (معا امام الله)

التدوينة طويلة شوية ,, ولكن احرص على متابعتها للنهاية
سألني كثيرون لماذا أركز في كتاباتي على المدونة أو في احاديثي الشخصية واهتماماتي على المسائل الدينية
أو تلك التي تتعلق بالعلاقة بين المسيحيين والمسلمين في مصر (ترتيب بأسبقية الوجود)ا
أو بين المسلمين والمسيحيين في مصر (ترتيب بحسب العدد) وربما الآن يبدو وقتا مناسبا للكشف عن السبب.
ولكن احتملوني لبضعة دقائق ودعوني أسرد عليكم قصة أو موقف تعرضت له قبل أيام وأذهلني خلاله ما رأيت . حيث أن ذلك الموقف وغيره من المواقف التي تتكرر يوميا هي التي دفعتني نحو ما اسميه مشروع العمر
دعونا نبدأ بما حدث أولا.. قبل أسبوع وعند عودتي إلى المنزل وجدت لدينا بعض الضيوف عمي وصديق لوالدي كانا بصحبة والدي ووالدتي ودعوني للجلوس معهم .. وبعد فاصل من الثرثرة في كل شيء بدأ صديق والدي في سرد قصة "مؤسفة" على حد وصفه عن فتاة جارة له أسلمت (غيرت دينها بعد أن كانت مسيحية) وبدأ يقص علينا بإنزعاج شديد كيف إنها جلبت العار لأسرتها وانها إنسانة ساقطة وفاسدة سيلاحقها العار .. إلخ
في وصلة طويلة من الانتقادات الحادة للفتاة التي باعت آخرتها. والحضور (والدي ووالدتي وعمي وآخرين) كل بدوره يعبر عن الأسف والامتعاض والاستياء من تلك الفتاة الفاسدة. وكل هذا وانا استمع في صمت دون إبداء أي رد فعل
ثم تدخل عمي أيضا كرد فعل قائلا (يالا معلش آهي كلبة وراحت بس ابوها المسكين هو اللي راسه بقت في الارض)!!!.ا وهنا خرجت عن صمتي وقلت بهدوء (حقها!!!) ..ه
وهنا نزلت الكلمة على الجميع كالصاعقة .. !!!!! وبعد فاصل من الاعتراض ما بين ال ( لا لا لا ) و (إزااااااااي) و (ايه الكلام الفارغ ده) ومصمصة الشفاة والرفض القاطع ونظرات الاندهاش .. وجدت فرصتي .. اعتدلت في جلستي ونظرت إلى عمي وقلت له
حقك ان تعتبرها كلبة أو غير ذلك.. ولكنه ايضا حقها في ان تفعل ما تريد .. هي مش قاصر ولا ناقصة عقل .. صح؟ .. إذا ليه مش حقها).. ولكنه لم يقتنع وراح فيما يشبه اللهجة الحادة يحدثني عن الخطف والأسلمة وكيف انها اساءت لاسرتها وليس من حقها ان تلحق العار باسرتها
وحينما انتهى قلت له (عمو انت فاكر البنت اللي اسمها فاطمة اللي انت حكيتلي عنها من 6 شهور تقريبا ؟؟؟ اللي شافت نور المسيح وعرفت طريق الخلاص .. فاكر؟؟ .. طيب تخيل معايا كده ابوها واخواتها كان رد فعلهم ايه؟؟؟ مش هي برضه جابت العار لاخواتها وابوها؟؟ مش هي في نظرهم فاسدة وساقطة وقليلة الادب؟؟؟ .. ا
انا عارفة انه صعب بس تخيل معايا الموقف من عينيهم .. هتلاقي نفس ردود الفعل.. لكن انا وانت تعاطفنا معاها جدا لانها من وجهة نظرنا اختارت الاصح .. اختارت نور ربنا) .. وهنا ساد صمت طويل .. بين الحضور مشوب باحساس غير مريح .. بينما ساد توتر بيني وبين عمي .. الذي بدأ يعبر عن رفضه بكثير من التردد حينما فجأة بدأ يرى الأمور بمنظور مختلف
فقال لي (انا عارف انتي بتعملي ايه..بس برضه ابوها ملوش ذنب) .. فقلت ( ولا ابو فاطمة .. يا جماعة .. كلنا عارفين ان مسألة تغيير العقيدة ايا كانت بتبقى صعبة جدا وموجعة .. بتبقى حدث مؤسف في كل اسرة .. لكن مفيش أي سبب ابدا ان الحدث ده يخرج بره نطاق الاسرة وخلاص .. يعني احنا مالناش دعوة .. المجتمع مالوش دعوة .. كل انسان حر يعمل اللي عايزة وربنا يحاسبه .. لكن احنا هنحاسبها او نحكم عليها ولا على غيرها ليه؟؟ هي تسببت في أذية أسرتها ودي حاجة تخصها وتخص أسرتها
لكنها لم تؤذي المجتمع ولا تسيء للدين .. فلا الاسلام نقص بمسيحية فاطمة ولا المسيحية تضررت بإسلام هايدي.. المتضرر الاول هي الاسرتين .. وليس المجتمع.. فعاد عمي بانفعال أقل هذه المرة وبكثير من التردد يحدثني عن قوانين المجتمع التي يجب ان تقيد حرية الانسان .. فقصصت له قصة الفتاة السعودية التي تزوجت من رجل من طبقة اجتماعية أقل ولكنه زواج شرعي تماما بين رجل فقير وامرأة ثرية ولكن اسرتها رفعت دعوى تفريق بينهما بسبب اختلاف الطبقة الاجتماعية رغم انهما انجبا أطفالا.. وبالفعل قضت المحكمة بتطليقها رغما عنها.. إلي أن شكت لمنظمات حقوق الانسان وتدخل الملك لاعادتها لزوجها).. أليست تلك قوانين اجتماعية؟؟؟؟ هي كذلك .. ولكن هل هي صحيحية؟؟ هل يقبلها الله؟؟؟؟ هل يقبلها العقل ؟؟؟
فقال صديق والدي (هم كده .. والله مش بيحبونا من القلب .. بيكرهونا جدا مش عارف ليه ؟؟؟!! مش عارف ليه المسملين بيكرهونا كده من غير سبب.. كلهم يا اخي .. صحيح ممكن يبتسم في وشك بس اللي في القلب في القلب .. هم دينهم بيعلمهم العنف والكره وانهم يكرهونا بالذات)ا
فقلت (مش صحيح .. )افنظر إلي بدهشة (يا بنتي انتي أيش عرفك .. ده في آيات كتير جدا ضدنا واضحة .. وعلى فكرة انا زميلي في الشغل هو اللي قاللي كده .. قاللي ربنا قالنا انكم مخادعين وكل ما اكلمه في حاجة يبص لي ويقوللي (ولن ترضى عنك اليهود والنصارى) وبعدين يرجع يقولك دين التسامح .. تسامح مين ياعم ده لو طالوا يولعوا فينا مش هيتأخروا
فقلت (طيب بس هدي اللعب يا عمو بس وبراحة .. صحيح فيه آيات زي ما بتقول وانا لا انكر اني مش فاهماها كويس لكن برضه في آيات تانية بتشجع المسلمين على انهم يعاملونا كويس وبيقولوا اننا اقرب لهم من اليهود مثلا .. زي آية معناها بيقول ان المسيحيين الاقرب للمسلمين ومنهم قسس ورهبان وبيصلوا ليل ونهار.. صدقني فيه حاجات كتير محدش بيتكلم عنها بس موجودة )ه
وبينما كنت اشعر اني بدأت اوصل فكرتي وهدفي الذي اعمل عليه منذ شهور طويلة .. بدأت ألحظ نظرات اتهام شخصية.
. فانفعلت قائلة (انا مش هكفر يا جماعة ولا ناوية اغير ولا حاجة .. ماتخافوش .. إيماني بالنسبة لي قضية عمر ومسيحيتي جزء من روحي فمحدش يزايدني على ايماني لو سمحتوا .. ناقشوني بالمنطق عشان نتفاهم ..)ه
ولكن والدي استشعر التوتر الذي بدا مخيما على الغرفة فقال بصوت مرح كعادته
(بس هو السبب هو الزفت الحضري ده .. هو السبب في كل حاجة ولازم نولع فيه)..
وانتهى الموقف على خير "ظاهريا" ولكني شعرت اني على الاقل تمكنت من خلخلة حجر صغير في جبل الصمت والجهل الماثل في مجتمعنا
طولت عليكم معلش .. وهنا انتهت القصة
لم أكن لاتكلم بهذه الشجاعة أوحتى أدرك ان هناك آخرا لابد وان أفكر فيه قبل ان أصدر احكامي لولا مجموعة من البشر .. اطلق عليهم المغامرون ال15 مثل افلام الكارتون (أفراد مبادرة مصارحة ومصالحة) الذين تعاهدت معهم على المصارحة في كل شيء مصارحة تتخطى كل الحواجز الحمراء .. فكانت المصالحة الحقيقية .. فوجدنا أنفسنا .. معا أمام الله
منهم شريف عبد العزيز (العدالة للجميع) هاني جورج (كراكيب) توتا ، رامز شرقاوي (عباس العبد) ، رامي كرم (لنتعد الطبيعي) وجهاد ، ومحمد الشموتي (حارس الهاوية) ونهال (زيتونة ) وسامية اليماني ورامي سيدهم (إخناتون) ومينا (أفريكانو)و عبد المجيد الشهابي
على مدى عام كامل تحدثنا عن المسكوت عنه فاكتشفنا ارض خصبة تسع الجميع ..... ولهذا الحديث بقية قريبا
ولكن الآن شارك معنا في إخراج المسكوت عنه ان كنت مسلما ... دوس هنا وان كنت مسيحيا ... دوس هنا
وان كنت لا ده ولا ده (دوس الاتنين وقلنا رأيك)
عادت التعليقات .. لمن يريد
ولكن الأهم .. والمشاركة الأكثر قيمة
هي مشاركتك في الاستبيان .. في كشف المسكوت عنه
ومازالت أي اقتراحات او تعليقات او مشاركات مرحب بها على العنوان ده
احتراما لخصوصية اصحابها
في انتظاركم

35 comments:

بنت القمر said...

صباح الفل يا بلو
اولا اخص اخص بقا لمووضع كده طب مش قولتيلي ليه مش احنا عيش وملح وموبايلات والايه؟؟
كنت كتبت معاكي في الاسئله
عموما ملحوقه
انا جاوبت ولازم تنجحوني جاوبت بكل صدق ولو ان الاسئله تتفاوت في قوتها بين العبيط والعميق
واسمحيلي انقلك تعليقي عند كراكيب عشان صباعي وجعني من الكتابه
وكمان علقت عند رامز
**********************
انا عملت الاستبيان يا عم بس ده استبيان عنصري
حطين للمسلمين 73 سؤال والمسيحيين53 ليه بقا
ممكن كده تكونوا جايبين اسئله سهله ليكوا عشان تعدوا من الامتحان تاخدوا انتوا طب وصيدله وترمونا احنا في حقوق وتجارة!!!
زعلانه عشان كان مفروض تشركوني معاكو من الاول انا ليا اهتمام بالموضوع ده
المهم انا ها اشترك كده كده ببوست
بس لازم نفهم نتيجه الاستبيان دي مين ها يحللها ويقيمها
تحياتي

Anonymous said...
This comment has been removed by a blog administrator.
بنت القمر said...

اهنييك بنجاح المبادره الي الان واهنييك بطاقه البوح التي خرجت الي النور
اشكرك علي هذه الفرصه قد شارك اخرون معنا لم تكوني لتعرفيهم او تتصوري مشاركتهم
اقتراحي الاولي ان تكون المبادرة سنويه في نفس العام زي كلنا ليلي
واحد تلاته نفتح طاقه البوح مرة اخري لان الموضوع حي لا يموت
اقترح ايضا ان نتخيل جميعا نفس الاستبيان مرة ثانيه وتختار لجنه نهائيه صيغه اخيرةللاستبيان حتي تستفيد من افكار المشاركين
صباح الفل

MerMaid said...

تحياتي لعقلك المستنير يا بلو

:)

Lasto-adri *Blue* said...

Please ya Blue, delete the comment by AkiCage dah.. its a virused link i think

dont let others fall in the same trap i fell in :)

bluestone said...

mermaid:
شاركونا بعقولكم ايضا

==========
بنت القمر:
مش هكدب عليكي لو قلت لك ان ناس كتير من خارج المبادرة كتبوا أفضل بكثير مما فعلنا

طاقة البوح تشملنا جميعا

=========================
لستوادري بلو

علم وينفذ

جبهة التهييس الشعبية said...

مريانا
السيكو سيكو ابتدا
انا عملت تنويه عنه في مدونتي
وباعمل الاستطلاع اهو

MerMaid said...

انا بالفعل عملت الاستفتاء ده و جاوبت علي الاسئلة خلاص

تحياتي ليكي

حـنــّا السكران said...

الموضوع مهم جدا

و ربنا يكفيكم شر الطائفية ..لا يعرفها سوى من اكتوى بنارها
انها أصعب و أغبى مرض عرفته البشرية
ـ أنا شاركت مع اني مش مصري
و ياريت ما يكون عندكم مانع

تحياتي و شكرا لكم

جو غانـم

basma saghir said...

موافقة على المبدأ ده بشدة..موافقة بقوة..موافقة جدا..كنت محتاجة حاجة زي دي من زمان..لما كانت تيجي سيرة المسيحين عند ولا سيرة المسلمين عند المسيحين واحس بحاجة غريبة في الجو مكنتش افهمها..ولا لما كنا في بيتنا القديم واخرج اشتري حاجات مع رانيا وبنتها يوستينا..واشوف نظرات عجيبة عجيبة..كنت محتاجة المباردة دي من زمااان قوي

جاوبت الاستبيان بكل صراحة وبكل وضوح يمكن الغيمة تروح..ونقدر نفهم

زيزي said...

مش ليه الموضوع ده عامل ضجة..طول عمرنا عايشين مع بعض ومتأقلمين اي نعم كانت بتحصل بعض المشاكل بس كنا قادرين اننا نسويها من غير ما تاخد كل الضجة دي ومكنش حد اصلا بيعرف ان في مشكلة...وايه موضوع ركنة العربية الي يعمل فتنة طائفية ده هي الناس بقت هايفة قوي كدة؟

على فكرةانا اخويا اسمه احمد ومراته اسمها كريستينا..وبنتهم اسمها فاطمة..بس الاسامي دي متمنعش انهم عيلة سعيدة..وسعيدة جدا كمان..اي نعم في بعض النظرات الي مش ولابد بس دي عمرها ماكانت مشكلة بالنسبة لنا
ياريت مخنا يتفتح شوية علشان كدة عيب..وانا بجد بشكرك جدا على المباردة دي..واكيد هيكون لها وقع ايجابي..وطبعا هجاوب على الاستفتاء

جبهة التهييس الشعبية said...

مرمر يا مرمر
هاتي الوفد ان شاء الله يوم الاحد اللي جاي

------ said...

I answered the survey and it is an excellent job.

Please post the results as soon as they are finished.
They should be quite interesting.

حسن مدني said...

أولا: هذه أول زيارة لي هنا بناء على تنويه من نوارة، وقد أسعدتني هذه الزيارة جدا.
ثانيا: لقد أجريت الاستفتاء من قبل، ولا أنكر أن هناك أسئلة توقفت أمامها طويلا، لأنها لم تخطر ببالي أبدا. أولا يعنيني أمرها في شيء. ولكنه جهد طيب يستحق الإشادة.
ثالثا:أحسب أن هناك خلط في فهم كثير من الآيات القرآنية المتعلقة بالمسيحيين. أو أهل الكتاب عامة، كما يسميهم القرآن.
فهناك فرق كبير بين اعتقادي في صواب رأيك أو خطئه، وبين حقك في المعاملة وأسلوب التعايش. وبين موقف الدول أو الكيانات السياسية من بعضها، وبين موقف الكيانات من الأفراد. ونص القرآن يفسره في كثير من الحالات سيرة الرسول صلى الله عليه وسلم. فهو قد قاتل اليهود (ككيان سياسي أعلن عداءه للدولة الإسلامية) ولكنه مات ودرعه مرهونة عند يهودي. وهذا عن اليهود. والنصارى (المسيحيين) أشد الناس مودة للذين آمنوا.
وكثير من التفاسير والحكام كانت متعلقة بفترة الحروب الصليبية، فكان الحكم فيها في شأن غير المسلم، يدخل فيه اعتبار أن جزء من ولائه، إن لم يكن ولاءه كاملا لدولة معادية. (وهو الواقع في الشام في ذلك الوقت). ولا يجب أن يظل الحكم ساريا إلى الآن. بعد تغير الظروف، إلا أن تخرج جماعة مسيحية تعلن مساندتها لدولة معادية، فينطبق على أفرادها هذا الحكم، كما ينطبق على أفراد جماعة مسلمة، تفعل الأمر ذاته. بل إن المسيحي عندها قد يطالب بالتوقف عن مساندة العدو، إما المسلم فجزاؤه الإعدام.
أخيرا: من الطبيعي، أن يرى المسلم أن المسيحي ضال (يسير في الطريق الخاطئ)، وكذلك يرى المسيحي أن المسلم ضال. (بنفس المعنى). ولا يمنعه ذلك من التعايش بينهم. فالمسلم يباح له أكل ذبائح أهل الكتاب، (إلا الخنزير)، ويباح له أن يتزوج منهم. وهذا يترتب عليه أن يكون المسلم من أم مسيحية. ولا يؤثر ذلك على مكانة الأم، ووجوب احترامها وبرها.
وكل عقيدة بطبيعتها ترى أنها الصواب. ولا يمكن أن يجتمع في هذا الشأن أكثر من صواب واحد. فلن يرى مسيحي أن المسلم على صواب في عقيدته حتى يؤمن الصلب والفداء مثلا، وهذا هو معنى (لن ترضى عنك اليهود ولا النصارى حتى تتبع ملتهم). وهذا لا يعنى ولا يدعوا إلى الكراهية المتبادلة بأي حال. طبعا الحديث طويل في هذا الشأن. يحتاج إلى درجة من الصراحة، ودرجة من العلم الحقيقي من المصادر الأصلية لكل دين. في الإسلام (القرآن والسنة). ولا يكفي المقام هنا لتفصيله.

تحياتي

جبهة التهييس الشعبية said...

وجبت لك زباين كمان يجاوبوا على الاستطلاع
هو انت رحتي فين؟

bluestone said...

جبهة ::
منور يا فندم .. هستنى الوفد الاحد اكيد
بس قوليلي انتي بتعملي ايه في الوفد
غالبا هنطلع قرايب :)))

انا كنت طعان في رأيك في الاستطلاع كمان
===============================

meremaid"
تحياتي ليكي
وستنشر النتائج في اقرب وقت فور الانتهاء من تحليلها.
==================================

حنا السكران:
منور أولا
وفعلا انها اسوأ مرض عرفته البشرية

ونتمنى ان يعم السلام قلوب الناس في كل مكان
==========================

bluestone said...

بيسوو :
الشعور الغريب ده جديد علينا
وياريت ما ينتشرش ..
اللي انتي بتعمليه هو الطبيعي
ونظرات الناس هي اللي مش طبيعية

ان شاء الله وبتعبنا ومجهودنا كلنا كلنا ربنا هيزيل الغمة ان شاء الله

الاستبيان مش آخر المطاف .. ده بس البداية
===============================
زيزي:
الناس بقت هايفة صحيح
لكن كمان بقى فيه فكر جديد بيتسلل لعقول الناس.. هو ده اللي بيفسد وينشر سرطان الطائفية بهدوء قاتل

bluestone said...

Samuel todros
the results will be posted as soon as they are analyzed

we do have plently of other activities
================================
حسن مدني :
زيارتكم تسعدنا يا استاذ حسن


نعلم تمام بمسألة الخلط في تفسير الايات
ولكنه يمثل انعكاسا للحال في المجتمع

سيكون لحديثنا بقية تفصيلية ان شاء الله

فقد انفتحت طاقة البوح كما قالت بنت القمر .. وستستمر ان شاء الله لها ذلك

يا مراكبي said...

أنا بجد متضايق إن وقتي ضيق جدا ومش هأقدر ألاقي وقت أرد فيه على الإستبيان إلا بعد إسبوع .. لكن اللي يهمني دلوقت إني أحييكي وأحييكم على موضوع مهم ونادر جدا ألا وهو الموضوعية وإحترام الآخر وإعمال العقل دون تعصب

إنتم فين من زمان؟

weswes said...

انا اول مره ازور المدونه بتاعتك البوست تحفه جدا
حسسنى انى فى دماغ شغاله
وفاهمه ان لانسان لا يقاس عن طريق ازاى بيصلى لربنا لان كل واحد حر

bahry said...

يااااه
من زمان اوي الواحد معلقش عند حد
بس الفكرة والاستبيان اجبروني اعلق
يلا بقا ما علينا
بصي اولا الفكرة اكثر من رائعة
والاستبيان باين عليه انه معمول فيه شغل وجهد محترم
بس كان في بعض الحاجات اللي مش مفهومة او مش مكانها او الاجابة عنها مش حتكون معبرة عن حاجة اصلا

مثلا
هل دخل مسيحي بيتك؟
السؤال فضلا علي انه بايخ بس الاحابة متعبرش عن عن حاجة
لانه ممكن محدش دخل بيتي اساسا لاني شخص غير اجتماعي مثلا او بيتي ضيق او ميت سبب اخر غير اني لا اقبل دخول المسيحين بيتي

وكان المفروض تكون صيغة السؤال
هل تقبل دخول مسيحي بيتك؟
او هل تجد مشكلة في دخول المسيحي بيتك؟

وكثير من الاسئلة هل نفس المنوال

في فرق بين الاتجاه والسلوك يجب ادراكه
كان ممكن تعرضوا الموضوع علي حد متخصص في علم الاجتماع ويا حبذا لو واحد اجنبي علشان يتقبض عليكم في قضية تخابر ونرتاح منكم بس تبقا تخدوني معاكم

bahry

Anonymous said...

See Here or Here

Z_Diva said...

bgd mowdo3 rw3a
ana etbst gidan mn r2yk we kman shrkt felistbyan
yaret kl elnas tfkr kda
ana 3latoul btab3 blog bta3k weymkn msh b3l2 kteer
bas daymn btbset mn tfkeerk
we ana myhmnesh ntegt elistbyan ad myhmny in elnas tfhm we tet7sen fe fhmhmha lela5reen 3ammatn we ysebo el3nsrya bkl ashkalha
best wishes for you :)

جبهة التهييس الشعبية said...

nawaranegm@yahoo.com

Moon-baby said...

Maybe i'm the last to express my joy and support for you and your partners who initiated all this. But i just wanna say that this is a great step...it drew a smile on my face :) and it made me feel that there are still people who really care for egypt,egyptians and humanity.

You paved new paths.

For all we want is heaven on earth.

And you did great in el 3ashera
mas2an :) Flawless.

(I'm Mary..that girl u met at the bookfair on that gloomy rainy day :)

micheal said...

الله ينور عليكي...يا ريت أصحي من النوم ألاقي مصر كلها بتفكر زييك...أنتي عارفه أني برضه لما بدافع عن أي حد غير دينه بلاقي نفس السيل من الهجوم و الدهشه من أي حد مسيحي لما يسمعني و بالذات في موضوع وفاء قسطنطين اللي ولع البلد حريقه و كأن ديانه وفاء قسطنطين هي أهم موضوع في البلد
أنا مقتنع أن كل واحد حرف في إختياره و هو بس المسئول و مفيش حاجه إسمها عار و فضيحه و جلسات نصح و إرشاد..الخ
تحياتي

Unknown said...

تحياتى
الموضوع جميل جدا ادعوا الله ان يكتمل ويستمر وهناك بعض الاضافات او اتعديلات على الاستبيان كأن يضاف على سؤال هل المسيحيين يكرهون المسلمين
اختيار اخر وهو بعضهم
وانا تحت امركم فى اى مساعده وايميلى هو
w3ab@hotmail.com
وقد قرات كثير كتب اسلاميه وكتب مسيحيه
ويجب ان يعلم الجميع ان الله لم يدعو فى اى ديانه الى البغض والكراهيه ولا التعصب والعلاقه بين الشخص وربه ولا دخل لاى انسان بديانة الاخر فكلنا نعبد الله ولكن نحتاج لفهم النصوص كما ارادها الله وان نستخدم العضو الذى وهبنا الله اياه الا وهو العقل فكلنا اخوه فى الله ويجب ان نناقش الامور بعقل وموضوعيه ولا نخاف من الاختلاف فى الرأى
فلن يزيد الاسلام بأسلا مسيحى ولن تنقص المسيحيه والعكس صحيح
دمتم ولنا لقاءات اخرى

^ H@fSS@^ said...

ماريان
حبيتك اوي بزيادة بعد ما شفتك و سمعت عقلك اكتر بشكل حي و مباشر

تحياتي

Anonymous said...

Hello. This post is likeable, and your blog is very interesting, congratulations :-). I will add in my blogroll =). If possible gives a last there on my blog, it is about the SBTVD, I hope you enjoy. The address is http://sbtvd.blogspot.com. A hug.http://sbtvd.blogspot.com/

bluestone said...

يا مراكبي :
رد براحتك وقت ما تلاقي وقت
النسخة الحالية هتقعد فترة اونلاين لحد ميعاد رفعها وتنقيحها وطرحها مرة اخرى

اشكرك مرة تانية وتابعنا
=================================
weswes:
اشكرك وبالظبط زي ما قلتي الانسان لا يقاس بطريقة صلاته وبلا بدينه
================================
بحري:
طيب ده يشرفني انك تعلق عندي بعد غياب عن التعليق

الاستبيان نسخة اولية .. تجريبية يعني

شوف انا فاهمة ان فيه اسئلة كتير قد تبدو سخيفة للبعض
وده عادي لا طبيعة علاقتك بالناس اللي حواليك مختلفة عن الآخرين
انت ممكن تشوف انه مش مشكلة تدخل بين مسيحي ودي حاجة عادية اصلا لكن غيرك ممكن يشوفها مشكلة كبيرة ومسألة غير واردة اصلا

ولما هتجاوب على السؤال هتجاوب من حيث قبولك او رفضك للمبدأ
هو احنا مش محتاجين اجانب عشان الاستبيان
بس اكيد دي نسخة اولية تجريبية
==========================
za diva:
اشكرك وتابعينا على موقعنا ضروري المنتدى مفتوح والمقالات كمان قابلة للتعليق
اشكرك تاني ويهمنا دايما مشاركة ناس عايزة تعمل حاجة بجد
في انتظارك
=============================
Moon-baby ...
hey girl :)
how are you ??

Thanx a million
We want and have in mind to draw more than smiles :)
We did it all because we care and we are counting on other people who care too ,,,
you gotta be out there
===================================

مايكل:
مش هاينفع نصحى من النوم نلاقي مصر كلها متغيرة
بس ينفع ننصحي من النوم الاول
وبعدين نشارك في التغيير :)
على العموم احنا عندنا غير الاستبيان ..
شرفنا موقعنا وشاركنا نوبة الصحيان
================================

bluestone said...

سامي:
اشكرك على التعديلات وجاري إيصالها للقائمين على الاستبيان
لدينا ما هو اكثر
شرفنا على موقعنا معا امام الله وشارك معنا حوارنا المفتوح
بالتأكيد ستفيدنا بعلمك وقراءاتك.
====================

حفصة الجميلة:
كيفك؟
متشكرين يا فندم ومنتظرين المشاركات

حازم فرجانى Hazem Fergani said...

وقت طويل مضى لم أقرأفيه شىء يسعدنى ويطمئنى على مصر مثلما قرأت تدوينتك والمبادرة التى قمتم بها. أنت وأمثالك الأمل الوحيد والأخير حتى تعود مصرنا الى جمالها وطيبتها ودفئها الذى أفتقدناه كثيرا سواء كنا فى الداخل أو الخارج

HardwireKinetic said...

أنا ملحد، أعمل إيه؟

Anonymous said...

تحياتي للحجر الأزرق أسلوبك راقي وتفكيرك عميق وجميل ومناقشتك مع والدك وعمك ونشرها في المدونة قمة في التحضر لايقوى عليها إلا من صدق مع نفسه( على فكرة أنا مسلم) لقد فتحتي نفسي لعمل مدونة وعندي اقتراح للذي وقع بانه ملحد وعايزيعرف يعمل ايه انه يدخل مرة مسلم ويجاوب ومرة مسيحي ويجاوب وبكده تتحقق العدالة تحياتي مرة أخرى.. مدحت

Anonymous said...

I couldnt read your blog.
arabic?
please visit me at
www.celestic.blogspot.com
prof Ajit Kumar