بعدما نصحني صديقي المحاسب -منه لله بقى- اني لازم أكون من المتقدمين واقتحم عصر الديجيتال والميكنة والاستثمار الالكتروني واني لازم ابطل هبل وتخلف واستثمر أموالي (المتلتلة) في بنك محترم بدل صندوق الودائع المنزلي (تحت البلاطة) ومصرف الاستثمار العائلي المتحد (الجمعيات)د
وبما اني ضليعة في أمور الحسابات واستثمار الاموال وكل ما يتعلق بالارقام بشكل عام (حتى إني بعد على صوابعي لما اشتري أي حاجة من السوبرماركت) قررت آخد النصيحة من أهل الخبرة واستثمارها على البطئ في بنك محترم .. وطبعا الاسماء كتير والبنوك الاستثمارية ياما .. ولكن صديقي الخبير نصحني بان اختار بنك مصر
فهو بنك وطني (ولازم نشجع صناعة بلدنا) وبعدين -والكلام لصديقي الخبير- (منه لله) البنك اتطور جدا اليومين دول وبقى فيه بنك شخصي وبنك الكتروني وكروت فيزا وائتمان ومسابقات وتوفير واستثمار وبطاقات وماكينات سحب تقدري تسحبي منها الفلوس إبان الليل وأثناء النهار... وصور لي الموضوع كأني هافتح حساب في بانك أوف أمريكا ولا البنك الدولي
قلت لنفسي يمكن مفيش حاجة بعيد على ربنا وبعدين يمكن القطاع المصرفي المصري تقدم فعلا والواحد مش واخد باله... خصوصا وانه بيتكلف تكاليف مهولة ...د
ما علينا .. ماطولش عليكم قولي طولي ... عملت بنصيحة صديقي (الله يسامحه) ووضعت قروشي المتواضعة في بنك أوف إيجيبت والحقيقة هو كان حاجة أوف خالص ....د
في البداية توجهت إلى الفرع المجاور لمنزلنا العامر ووجدت البشر طوابير .. واسبتشرت خير.. واضح ان البنك ماشاء الله شغال والحالة الاقتصادية للمصريين بخير والكل جاي يحوش ويستثمر .... وبعد ساعتين فهمت طبعا الموضوع .. الاستاذ الموظف المسؤول عن الايداعات يعمل ببطء السلحفاة بالحكمة المستقاة من القصة التاريخية الخالدة ان السلحفاة سبقت الارنب طبعا وان الله مع الصابرين.د
وقد كان وفتحت الحساب وتم استخراج بطاقة الكترونية (للسحب من الماكينات) العبقرية لادخل برجلي اليمين عصر الاستثمار الالكتروني .. وبعد اجراءات مصرية صميمة في صعود ونزول كام دور ,, واختمي الورقة من الاستاذ فلان وظهري الامضاء عند الاستاذ علان .. أخدت الكااااااااااارت ..د
وطبعا مش محتاجة اقولكوا ان دي كانت اضغاث أحلام تصيب الحمقى والخيالين من أمثالي .. فمع أول احتكاك تبخرت أحلامي العريضات على صخور التكنولوجيا المصرية .. فبعد ست محاولات مع ست ماكينات مختلفة فشلت في اخراج جنيه واحد من أموالي .. فتوجهت زي الشاطرة للبنك .. لاكتشف انه قد تم ايقاف العمل بالبطاقة التي احملها وتغيير النظام إلى نظام جديد ببطاقة لونها اخضر وده طبعا دون اخطار العملاء بأي حاجة .. على أساس ان البنك عارف مصلحتهم أكتر منهم ومش مهم الحاجات الشكلية دي ... وطلبت مني الموظفة اللطيفة ان احضر بعد اسبوعين استلم البطاقة الجديدة .. "طيب والفلوس يا ستي انا عايزة اسحب فلوس بقالي يومين". فقالت "تعالي بكره بدري واسحبي من الفرع".د
وانتظرت الاسبوعين واستلمت الاخضر (تقولش يعني الدولار) .. بلاخيبة ..د
وحدث اني كنت في انتظار تحويل مبلغ مالي من صديق في محافظة أخرى لتسليمه لشخص مسافر. وطبعا انا معايا الاخضر ومايهمنيش!!!!! .. فقلت للصديق بمنتهي السذاجة (ابعت لي الفلوس على حسابي الجاري وانا هديهم لفلان قبل السفر بكام يوم). وقبل سفر فلان بكام يوم بالفعل اخدت الاخضر وحاولت سحب الفلوس... وطبعا لم أفلح فدخلت البنك فقال لي السيد موظف الامن (معلش حضرتك المكنة بايظة شوفي فرع تاني)....د
وتكرر الامر في 4 فروع أخرى مابين (المكنة عطلانة والسيستم واقع .. معلش تعالي بكره)د
وتاني يوم رحت فعلا بدري شوية قبل مواعيد الانصراف مما سبب لي مشاكل في الشغل وكررت المحاولة فلم أفلح .. يادي اليوم !!!! الله ما طولك يا روح .. دخلت للسيد الموظف المبتسم فقال لي (معلش آسفين حضرتك المكنة عطلانة .. معلش اصلها بتاكل كروت .. الفرع التاني في شارع كذا)د
وطبعا زي الشاطرة رحت الفرع التاني والتالت وتكررت المهزلة فقررت امشيها يدوي واسحب من داخل البنك .... عشان الراجل المسافر ده مالوش ذنب وتبقى التكنولوجيا بعدين.د
وبعد طابور طووييل لمدة أكتر من 50 دقيقة انتظار بلا اي تحسن .. قال الموظف ( معلش ياجماعة السيستم واقع)........دد
وكانت الطامة الكبرى .. وانفجرت كالسيل صوتي جايب آخر الشارع ($#@*& مهزلة دي طابونة .. ده اسمه مسخرة وقلة أدب .. بقالي 3 أيام مش عارفة اسحب فلوس ليه ؟؟؟؟؟ شايلاها تحت الكوبري .. لا سيستم برا ولا جوا ..لما انتوا مابتفهموش في التكنولوجيا بتتهببوا لييييييييييييييييييييه $#@^)د
ويظهر ان الموظف افتكر اني حد مهم لما زعقت كده فقالي (حضرتك والله مالناش ذنب .. طيب اتفضلي على الفرع الرئيسي اللي في محمد فريد وهناك عندهم كل التسهيلات)د
وطبعا ان كان رب البيت بالدف ضارب ...!!!!!د فواجهت المشكلة ذاتها ان المكن عطلان برضه .. وهنا لما احتمل وقبل ان احرق الكارت واكسر الماكينة الالكترونية نصحني رجل طيب بالتفاهم مع خدمة العملاء لان مواعيد العمل انتهت ,,د
وردت علي فتاة يبدو من صوتها انهازي بتوع جيل المستقبل .. (.... مع حضرتك ماي آي هيلب يو) معرفش ليه انجليزي مع انه بنك مصر. وانا بقول آلو مساء الخير.د
وكررت عليها القصة السابقة آملا في حلها وخدمتي بما إني العميل
-أنا في منتهي الاسف يا فندم ..مش ممكن اللي بيحصل ده .. طيب رقم حساب حضرتك كام
-.......
-آه انا فهمت المشكلة .. هوبطاقة حضرتك كانت محتاجة تفعيل من الفرع الاول
-طيب يا ستي وانا مالي بالمشكلة دي ...د
-لاحضرتك دي غلطة الفرع احنا آسفين هما للي مش عايزين يشتغلوا
-يا ستي برضه وانا مالي انا عايزة الفلوس دلوقتي لاني لازم اسلمها لشخص على سفر
-منقدرش يافندم لازم حضرتك تروحي بكره الصبح وتفعلي الكارت ACTIVATIONد
وهنا لم اتمالك نفسي من الغيظ
شوفي بقى يا باردة انتي انا ماليش دعوة بكل الكلام الفارغ ده .. انا مش بشتغل عندكوا.. وماليش ذنب مصالحي تتعطل بالطريقة دي الفلوس لازم تكون عندي بعد ساعتين لاني ملتزمة بتسليمها .. بلاش تهريج واهمال بقى .. انا مش هاسكت .. ولو الموضوع ده ما اتحلش انا هتصرف
وطبعا مع نبرة الصوت العالية وأسلوب (انت مش عارف بتكلم مين) يظهر انه جاب نتيجة .. مع اني مكنتش عارفة هتصرف اعمل ايه يعني غير اني اعتذر للراجل وابقى في موقف محرج جدا
لكن لما سمعت كده قالت لي (احنا هنبعت حد مخصوص والمشكلة هتتحل حالا .. معلش لازم حضرتك
تتعاملي مع خدماتنا ببساطة شوية .. بالبركة يعني) الكلام ده كان من موظفة خدمة العملاء في بنك مصر.د
تتعاملي مع خدماتنا ببساطة شوية .. بالبركة يعني) الكلام ده كان من موظفة خدمة العملاء في بنك مصر.د الله يرحمه زمانه بيتقلب في تربته
وفعلا اتحلت المشكلة بعد شوية صوت عالي وتهديد
ورغم ان مشلكتي اتحلت في ساعتها إلا اني اتضايقت اكتر لاني بتأكد يوم بعد يوم ازاي ممكن الواحد ياخد حقه في البلد دي
وتوبة ان كنت احط فلوسي في بنك فقر .. ما هي مش ناقصة
ويا اهلا بسي آي بي وامريكان بانك وبريتيش سيتي بانك .. وكل البنوك الخواجاتي اللي في البلد
18 comments:
بصي يا ستي
إنتي الغلطانة وانتي اللي تستاهلي
عارفة يا أستاذة قهوة؟
أنا حليت لمشكلة دي مع نفسي من فترة
اعتبرت إن مافيش دولة أصلا
وبما إن مفيش دولة يبقى كل مؤسساتها برضه منعدمة وغير موجودة
رايحة لبنك مش موجود أصلا
اشربي بقى
وبعدين بتترحمي على طلعت حرب؟
طلعت حرب النهاردة الناس بتذكره بإنه كان شاهد العيان الأساسي على تفعيص البنات في وسط البلد الأسبوع اللي فات
(أصله كان واقف باصص من فوق وشايف كل حاجة)
قلبتي علينا المواجع الله يسامحك
غياب الدولة أزمة مرعبة
مش متخيل الحالة دي ممكن تستمر أد إيه قبل الانفجار ما يحصل
صدقيني الانفجار لما يحصل مش هيكون إيجابي خالص.. وهياكل في وشه كل حاجة
إرهاصات الانفجار دا شوفناها في أحداث الاعتداء على والدي القسيس وكذا في أحداث التحرش بالبنات بشكل جماعي
فيه مصيبة سودا داخلين عليها والله هو المنجي
بصي البنوك المصرية دي أصلا
البعد عنها غنييييمة
ربنا مايحوجك ليهم تاني يا بنتي يااااااارب
على فكرة السي أي بي ميفرقش كتير، هو أكيد أرحم من بنك مصر بس بردو ميفرقش كتير. على حد معلوماتي البسيط في موضوع بنك مصر ده لأن سمعته سابقة، فرع البنك آلي في هيلتون التحرير هو الوحيد آلي ممكن تلاقي فيه حاجة سليمة.
اهو أنتى لو كنتى وافقتى تتجوزينى كنت هاقولك تعملى أيه .. لكن معلش .. برضه ينوبنى ثواب فيكى .. شوفى ياستى .. مسألة كارت الصرف الآلى دى كلها تأليف و فطشه من الأول .. طلعيه من أى بنك يكون مشترك فى شبكة الصرف الموحده 123
يعنى الكارت لازم يكون مكتوب عليه 123 من فوق .. وده عناه أنك تقدرى تسحبى من أى ماكينة صرف آلى من الشارع من أى بنك مش بس بنك فقر .. الحاجه التانيه أن شبكة 123 دى ليها خط ساخن .. يعنى لو حصل عطل فى أى وقت تقدرى تتصلى بيهم و تشبشبيلهم بكل اللغات لأنهم قطاع خاص .. و لو مشكلتك ماتحلتش تقدرى تخربى بيت أمهم فى أى وقت ..برضه لأنهم قطاع خاص
الرأسماليه و الأقتصاد الحر ليهم فوايد .. لازم نستغلها .. بالنسبه للبنوك اللى ممكن تتعاملى معاها فى المسأله دى أنصحك بأى بنك يكون له فروع خارج مصر أو جزء من ملكيته يكون لبنك عالمى .. عن نفسى باتعامل مع البنك العربى , و المصرى الخليجى و المصرى الأفريقى و المتحد .. طبعا فيه بنوك جديده زى كاليون بنك .. أو البنك اليونانى .. و أعتقد كلهم بنفس الكفاءه .. يمكن يكون فيه شرط الحد الأدنى لمبلغ فتح الحساب .. لكن ببساطه تقدرى تقوليلهم أنك مش محتاجه دتر شيكات .. و المسأله حشاب شخصى للمصروفات الجاريه فقط
مش هاتتجوزينى بقى ؟
REFORMER
ممكن اكون كده فعلا .. وتبقى غلطتي كل ما اقول ان عندي أمل في حاجة تطلع أونطة واقعد اقول لروحي بلاش خيابة مفيش أمل .. وبعدين مابتعلمش ابدا
انت عندك في حالة انهيار يمكن واخدة وقت شوية لكن واضح ان الشارع والمؤسسة نفسها بدأت تنهار تدريجيا .. لما اتلغت القيم والخطوط الحمرا فبقى مافيش احترام لا لرجل دين ولا لسن ولا لحرمة بيت او واحدة ست واصبحت جرائم قتل الاباء او الجرائم الجنسية والانتهاك خبر عادي جدا بنسمعه كل يوم .. ولو اتكلمت هتسمع حكمة معروفة (ان كان رب البيت بالدف ضارب ..) فإذا كانت الحكومة عملت كده سابقا في الصحفيات يعني الشعب معذور
WANNA BE A BRIDE
عندك حق .. مفيش احسن من جمعيات الست ام فاروق والحاجة اعتماد
THE EYEWITNESS
طيب اعمل ايه أنا؟؟؟ يعني الواحد يعمل ايه في البلد دي عشان ياخد خدمة محترمة من أي نوع .. لازم يبقى عندك اتصالات وتبقى مهم وتهدد وتتخانق وتزعق عشان تاخد حقك؟؟؟د
وبعدين يرجعوا ينصحونا في الكنيسة بالسلام الداخلي والهدوء وعدم الغضب والتواضع
طيب تيجي إزاي يا عالم
يا عم فارس
طيب حقك على يا عم .. هو انا اقدر اقول لا برضه ..
بطاقة 123 أول مرة اسمع عنها .. معلش انا خبراتي الاستثمارية لا تتخطى بوابة السوبرماركت وجولات الشوبينج الحرة
بس عاجبني قوي موضوع الشبشبة بكل اللغات .. أورينتال جدا
متشكرين يا فندم على النصائح الغالية .. ولو نجحت زبائن القهوة كلهم المشاريب على حسابي
وسيادتك عشاء كمان
موضوع الجواز ده بقى .. ممممم .. ده موضوع كبير .. يعني مش بنصيحة.. احنا عايزين الحساب بفلوسه .. اظن مفيش جشع اكتر من كده .. ما احنا دخلنا عصر الاستثمار الديجيتال بقى ..
تحياتي
عندك قرشين ومش عارفه تعملي بيهم ايه ابعتي هم لي وانا نشيل هملك في الحفظ والصون
:))
انتى بقيتى ماديه قوى ..
معلش يا بنتي ... كل الناس بتعاني من الموضوعات دي ... تخلف مالوش حدود .. وعلى فكرة مصر مصنفة طبعاً من الدول المتخلفة مصرفياً ... في سلطنة عمان مثلاُ مافيش حد هنا مالوش حساب في البنك مهما كان فقير - والفقرا كتير على عكس ما الناس تتصور - والتعامل بالكارد هو الاصل والاساس
تقدري تعملي كل حاجة تقريباً بماكينة سحب الفلوس .. حتى لغاية شحن الموبايل من الماكينة ولا كروت ولا دياولو ( مش كل البنوك)
امتى بقى يا رب امتى - الله يحرقهم قولوا آمين
تحياتي على كلامك المرتب وتفكيرك المنظم وروحك الحلوة اللي باينة من بين السطور
القهوة العالية من تاني
عجباني فكرة إنه إذا كانت الحكومة بدأت بتفعيص الصحفيات فيبقى الشعب معذور
يا سلام على حلاوة وجمال التحليل
دا ولا تحاليل الدم والبول
ده يرجعنا للسؤال الأصلي
هل الحكومة بنت الشعب؟
أم أن الشعب هو إفراز النظام؟
(ما دام بدأناها تحاليل يبقى طبيعي نتكلم عن الإفرازات)
ههههههههههه
السؤال بصيغة أخرى
هل البيض أولا أم الفرخة؟
طبعا دا سؤال تاريخي عتيد
ربما لن نصل إلى إجابة نهائية له في ظل الجدل الديالكتيكي السرمدي
ولكن ببساطة شديدة جدا
الإجابة إنه الاتنين مفتحين على بعض
يعني هي الحكومة والنظام جاي منين؟
ماهو من الشارع
(لأ مش قصدي انهم اولاد شوارع)
بس أقصد إنهم جزء من المجتمع وتجسيد لثقافته وطبيعته وقرفه وكل حاجة
وأيضا الشعب والناس بسبب تغول السلطة صارت تعكس نفس أنماط فساد السلطة
فلو الكبير بيسرق يبقى الصغير عادي جدا إن إيده تبقى طويلة
(يا أمي فيه بلد في الدنيا لما يسألوا رئيسها في حوار متلفز إنه عسكري المرور بيمد إيده وياخد رشوة من الناس.... قوم يرد رئيس هذه الدولة بسخرية وابتسامة صفرا... طب الراجل هيعمل إيه ماهو مرتبه مبيكفيهوش!)
أنا عايز أكتب في الموضوع بتاع انهيار أو غياب الدولة ده لأن دا هو الخطر المرعب اللي بيحدق بينا اليومين السود دول يا أختي
حياكي الله
ابقي شرفيني في مدونتي وبرضه عندنا قهوة وينسون وسحلب
كل الناس تلعن الخصخصة وسنينها حتى أول تجربة مع القطاع العام!
وساعتها حيكتشف بنفسه الحقيقة المرة!
وقال فيلسوف الغبرة: البنوك (في مصر خاصة بنوك القطاع العام) تهذيب وتأديب وإصلاح.. أو كما قال : سك ع البك!
القهوة العالية
واضح ان الصديق صاحب وصفة بنك مصر بيعزك كتيير وكان بيحط فلوسه فى صندوق البوسطة وبعدين الموضوع تطور ووصل الى بنك مصر والنتيجة هى كما وصفتى نتيجة الانتماء الى مصر
بصراحة يحدث هذا تقريبا فى كل البنوك المصرية ونادرا ما يحدث فى الاجنبية
بس بنك زى سيتى بنك مهما كان حسابك هناك وقلتى وفتحتى وعليتى صوتك هتقابلى جليطة غير عادية فى المعاملة فيما معناه يعنى مش فلوسك اللى بتمشينا
ولو وسعت فى الكلام وقلتى انا عايزة اقفل حسابى دى مش معاملة الف واحد يدلك على خدمة العملاء علشان تقفليه بالهنا والشفا
بصراحة مش عارفة ولا بنك كويس
البنك العربى ساعات كتير يسحب الكارت وتتوقعى ان يطلعلك لسانه وما يطلعش الكارت الا بمصيبة مع البنك والالطف انه ممكن يطلعلك بدل خمسين جنيه سليمه فى وسط الفلوس ممكن يطلعلك نص والمرة الجاية النص التانى منتهى العجب بصراحة
حبيبى بقى الاهلى سوسيتيه
مش هقولك على الزحام الغير عادى بس بصراحة الماكينة بطلع فلوس
هو انا شايفة ان اى فلوس نصرفها بقى كلها ومفيش داعى لاى بنك منهم لله كرهونا فى التحويش
تحياتى
ابن مصر:
يا سيدي متشكرين هنبقى نبعتلك لما نحولهم دورارات عشان يبقوا أخف في الشيل برضه
----------------------
باركودا
ميرسي على الكلام الجميل ده
العشا على حسابي والسحلب كمان
طبعا الموضوع في السلطنة مختلف
اكيد آخر سلطنة !!!د
طبعا انا لا احلم اصلا اننا نتعامل بالماكينة في كل شيء ولا احلم انه في يوم من الايام مثلا هدخل الكارت يطلع قماش
مشتهى أملى ومنتهاه هو اني ادخل الكارت يطلع فلوس مش يطلع حاجة تانية ...!!!د
صديق حكى لي انه ادخل الكارت في الماكينة والماكينة سحبت 500جنيه من رصيده ولم تخرجهم واكلتهم يعني واخرجت له لسانها بس
منور ..
ابقي تعالي تاني
عندنا سحلب مش هتلاقيه في السلطنة
Reformer
اعتقد والله اعلم التعليق ده كان بتاع البوست الاخير مش بتاع هنا .. ما علينا
لو بتتريق على عبقرية تحليلي الطبي العلمي المعملي الفذ ... فطبعا كان تريقة .. لما الحكومة بتعمل كده يبقى ماينفعش نلوم على الشعب
زي ما يكون الانتهاك اصبح وسيلة متعارف عليها للعقاب او الاهانة
تقصد تقول اننا بنلف في دايرة مغلقة مالهاش مخرج
ربما ..
اعتقد كمان انها مش دايرة لا دي تشبه الحلزون مجموعة من الدوائر المتصلة المتجهة لاسفل .. يعني بنتجه بحركة دائرية لا فكاك منها نحو الاسفل
ربنا يستر على اللي جاي
قلم جاف:
طبعا
انا عمري ما لعنت الخصخصة .. بالعكس ارى انها احيانا الحل الوحيد لتردي قطاع الخدمات العامة بأكمله.. ولكن دي نظرة طبقية .. ونظرة من يملك القدرة على الدفع .. ولكن الخصخصة شئنا ام ابينا خربت بيوت كتير
أما القطاع العام فالبعد عنه غنيمة .. انا اتنازل عن حقوقي حينما تكون من القطاع العام .. وحينما اضطر للتعامل معه استخدم كافة أنواع الاتصالات والمعارف والاصدقاء لاجنب نفسي خبرات أليمة
---
tota
انا برضه بقول كده وبدعي عليه الله يحرقه
بلا صندوق بوسطة بلا بتاع
مفيش احسن من الجمعيات بتاعت الست اعتماد النظام المصري الاصيل
معاكي المعاملة في اي مكان قطاع عام كده واعتقد ان ده اتجاه عام .. احنا مش بنشتغل عند اللي خلفوك احنا بنشتغل عند الحكومة ..حتى في المدارس هتلاقي مدرس المدرسة الخاصة شكله وصوته وابتسامته مختلفة .. كنا زمان لما بنشتكي في المدرسة بنقول (انا بتعلم بفلوسي) والمدرس عارف كده كويس
الحمد لله ان موظفين القطاع العام لسه معرفوش مبدأ (الخدمة بابتسامة
serve with a smile
وإلا كنا هنتنقط بجد من البرود
تحياتي
سيدتي الفاضلة
رغم اني وطني
وبأموت في تراب..لا تراب ايه
في طين البلد دي
لكن
تحيا
HSBC
وتحيا
بنك المشرق
و
بنك راس الخيمة الوطني كمان
دول عالمة زبالة يا راجل
انا اوقفت التعامل مع كل البنوك الوطنية
مع احترامي لطعت حرب
لكن
بنك القاهرة
عمل معايا كام حركة من دول
لغاية ما دخلت على المدير الاقليمي
وحل لي المشكلة
وبعدها
شديت عليهم السيفون
Post a Comment