حاجة تقرف بجد -- قراءة في صحافة اسبوع واحد

بالرغم من ان 99.9% من الاخبار اللي بنقراها يوميا مؤسفة وتجيب المرض وبتفكرنا بتقدمنا الرهيب علميا وسياسيا في المحافل الدولية ... وبتذكرنا بقوة الوحدة العربية وراية العرب الخفاقة وطبعا بالاضافة لتمتعنا كل يوم بالانجازات المصرية في كل مجال ومكان واللي خلت المواطن المصري يعيش في رخاء وازدهار وصار موضع حسد كل مواطني العالم لان دولته مريحاه ومكيفاه على الاخر

إلا ان اليومين اللي فاتوا واثناء متابعتي لبعض الاخبار داخليا وخارجيا جذب انتباهي ثلاثة اخبار كانت مثيرة للغيظ ولكنها مرت للاسف مرور الكرام

نبدأ بالحدث الاقدم وهو زيارة الريس لروسيا::د

تصريحات مبارك لصحيفة فيريميا نوفوستي الروسية بصراحة جابتلي الضغط

يعني يا شماتة أبلة كوندي فينا بصراحة ...د

مبارك قال بالنص انه طلب من بوتن التجديد لفترة تالتة في الرئاسة الروسية ليه بقى؟؟؟؟؟د

يعني تعتقدوا ايه السبب العبقري اللي يدعوا الرئيس مبارك انه يشجع نظيره الروسي على مخالفة الدستور الروسي اللي بيمنع الترشيح لاكتر من فترتين.....د

قالك ان بوتن "كويس جدا .. وقائد حكيم .. وروسيا في حاجة إليه" يا حلاوة....د

ايوة قال إن بوتين (فري جوود) بالنص

لا وما اكتفاش بكده راح مأكد انه بينصح بوتن (ألا يستمع لاحد من أجل المصلحة الوطنية)د

وطبعا الاحد هو الشعب طبعا ... يانهار اسود ومنيل .. يعني مش مكتفيين بازهى عصور الديموقراطية كمان بنصدرها

ثم سخر السيد الرئيس (والكلام بالنص للصحيفة الروسية) من نظام الدستور الروسي وقال مازحا انه يشبه النظام الامريكي وقال (هل نظامكم الدستوري هو تقليد للنظام الامريكي؟ فلماذا تنتقدون الامريكان وتقلدوهم؟ هل تفتحون الابواب ام تغلوقها يجب ان تقرروا) شوفتوا الكلام الموزون؟؟؟؟ اللهم لا اعتراض

وعلى هامش المحادثات اكد بوريس آليوشين رئيس الوكالة الاتحادية الروسية للصناعات ان مصر قررت بناء 4 مفاعلات نووية ......تاتاتاتاتااتتتتتتتتتتتتم 4 مرة واحدة وفجأة ؟؟!؟!؟!؟!؟!؟!؟!؟!د
http://www.mosnews.com/news/2006/10/30/mubarak.shtml

الترجمة من الروسي للانجليزي من موقع صحيفة موسكو نيوز الروسية اليومية والرابط أعلاه

والترجمة من الانجليزي للعربي مقدمة لكم من جناب تواضعنا

-----------------------------------------------------------

ده كان بس أول خبر لو حد بدأ يحس ببوادر شلل

PLEASE BROUSE AWAY

--------------------------------------------

مجلس المستشارين (مجلس الشيوخ) في تونس يطالب الرئيس بن علي بالترشح لولاية جديدة في 2009 وهي الولاية الخامسة (ومفيش حد احسن من حد) وقد اجتمع المجلس في جلسة خاصة (للاشادة بالرئيس بن علي بمناسبة الذكرى 19 لتوليه السلطة (اسم الله عليه اسم الله عليه)د
وطبعا مش محتاجين نقول ان بن لي فاز في الفترة اللي فاتت بعد استفتاء تاريخي على تعديل الدستور وتقرر بموجبه ايضا انشاء المجلس المحروس

---------------------

-------------------------------------

اتشليتوا ولا لسه؟؟؟؟د

طيب خدوا عندكوا

----------------------------

الخبر التاني كان امبارح وهو استخدام أمريكا لحق الفيتو ضد قرار بإدانة القصف الاسرائيلي لبيت حانون والدعوة لسرعة الانسحاب من قطاع غزة
وبغض النظر عن رأيي الشخصي في القضية الفلسطينية إلا اني اتعجب بشدة للتأييد الامريكي المستفز للحكومة الاسرائيلية ... اولمرت بنفسه اعترف اول امبارح ان الجيش ارتكب خطأ بالغارة على بيت حانون واعتذر وحكومة حماس رفضت الاعتذار
وطلعتنا الست كوندي حُق الهباب بتصريح مستفز مالوش أي معنى قالت فيه ان القرار اللي اقترحته (الدولة القناة) قطر "يخدم برنامجا سياسيا احادي الجانب ..وتضمن ادعاء لا يدعمه دليل بخرق اسرائيل القانون الدولي" وأضافت "لا نعتقد ان مشروع القرار كان يهدف الى الاسهام في قضية السلام." بينما قال السيد جون بولتون السفير الامريكي في الامم المتحدة ان لغة المشروع جاءت "متحيزة"د
وعلى فكرة دي تاني مرة تستخدم أمريكا فيها الفيتو السنة دي بس والمرة الاولى كان ضد الاجتياح الاسرائيلي لغزة
ولمحة تاريخية لاثراء معلوماتكم والضغط على اعصابكم ان امريكا استخدمت الفيتو 82 مرة منذ انشاء الامم المتحدة من 61 سنة وكان آخر 7 مرات فيهم كانوا ليهم علاقة بالصراع الفلسطيني الاسرائيلي.

-------------------------------

اللي لسه ضغطه ماعليش

--------------------------

بعد الكام رابط اللي شفتهم عن وائل عباس على الوعي المصري (منه لله بقى) مابقاش فيه حاجة ينفع تتقال بس انا مش هتكلم عن التحرش تاني ولا حاجة متخافوش

انا بس فيه حاجة لاحظتها .. صور أقل من كده بكتير هزت حكومات كاملة يعني الحكومة البريطانية كلها اتزلزلت لما اتنشرت صورة لجندي بريطاني يضرب مواطنا عراقيا بمؤخرة بندقيته ..د

واعتقد ان المشاهد اللي بنشوفها وبنسمع عنها كل يوم مش عند وائل بس .. اكتر من كده بكتير

الحكومة الامريكية اتفضحت بعد ابوغريب واسمه حاجات بتحصل بره أمريكا

يعني لو كان اللي بيحصل جوا أمريكا كان حصل ايه ؟؟؟؟د

وعندنا لا حس ولا خبر .. لا اعتذار ولا حتى استنكار

المصيبة السودة واللي فعلا حاجة مقززة ان الناس بتتبادل المقاطع المصورة دي على الموبايلات كما لو كانت حاجة لطيفة ونادرة .. افتكرت من كام اسبوع ان قريبي طالب الجامعة قال لي في احد الايام (تعالي هفرجك على حاجات جامدة) وكانت بعض مقاطع على المحمول من بينها مقطع فيه ضابط شرطة زي العجل بيضرب شاب نحيل على وجهه اكتر من مرة حتى سقط الشاب على الارض .. والمقطع واضح جدا وصوت الشاب وصوت الضرب كمان واضح .. والمقطع ده اسمه (تحري)د

ولما فزعت لهول ما رأيت (طبعا مكنتش لسه اتفرجت على المهازل اللي وائل عمال يتحفنا بيها كل يوم) صرخت في الولد وقلت جبت الكلام ده منين المفروض نروح نبلغ او على الاقل ننشر الكلام ده او نبعته لجرنال ولا لبتوع حقوق الانسان الولد بص بصه تحمل من الدهشة والذهول وقال لي "ده كليب قديم وكل الناس بتبعته لبعضها عادي يعني"د

وتعجبت بل اشمئزيت إزاي الناس بتتبادل المقاطع دي على انها نوادر طريفة زي ما تكون الكاميرا الخفية .. ازاي ممكن نعتبر إهانة انسان وقهره نوع من انواع التسلية والترفيه ... حاجة تقرف بجد

-------------

كفاية عليكو وعليا كده النهاردة