Sunday, November 19, 2006

السيد الوزير في عش الدبابير



أولا وقبل اي حاجة أحب اوضح نقطة مهمة للاخوة اللي بيفهموا الكلام على مزاجهم وبيردوا وخلاص
أنا معنديش أي مشكلة مع الحجاب كزي او كرمز ديني ولا تعنيني اي جدليات او مناقشات بشأنه ولست من معارضيه ولا من مؤيديه ايضا ولا اؤيد ايا من الفكرتين بشأنه سواء أمر ضروري ومفروض في الاسلام أم كما قالت لي صديقة ان الحجاب هو حجاب الخلق والنفس
ولا افتي فيما لا اعلم


بالنسبة لي شخصيا ارى ان الحجاب هو زي عادي يرى فيه البعض التزاما دينيا ولا امانع ان يرتديه احد ولكل حريته الشخصية فيما يرتديه سواء ارتدى حجابا او مايوه


ارفض فقط تصنيف الناس او الحكم على اخلاقهم من ملابسهم



كما انه ليس لدي اي مشكلة مع من ترتدين الحجاب ولدي كثير من صديقاتي من المحجبات وانا لا اراه تصنيفا بالطبع ولكن وجب التنويه
كما انه لا يلفت انتباهي لاني اعيش في مصر واغلب النساء المسلمات محجبات وهو امر عادي بالنسبة لي
غير اني قد تكون لدي مشكلة مع النقاب لاني اجد صعوبة في التعامل مع شخص من وراء ستار اسود تتشابه فيه النسوة جميعا ويتحولن إلى غيمة او خيمة سوداء تتحرك لا تميز ولا فرق بين واحدة واخرى


كانت هذه مقدمة منطقية واستهلال لابد منه

ما علينا

لم اكن لادلي بدلوي في الجدل الدائر بسبب تصريحات السيد المبجل وزير ثقافتنا الهمام بالرغم من صدمتي لقراءتي تلك التعليقات في المصري اليوم قبل ايام وتوقعت تلك الحملة الضروس على الرجل ولكني متأكده انها لن يكون لها اي أثر قوي لان الرجل كما نعلم جميعنا محصن وأفلت من أمور أكثر صعوبة وحدة
ولا احد يدري سر بقاءه الطويل في الوزارة بعد كل مصيبة والتانية سوى انه ربما يكون تميمة حظ أو فاسوخة الحكومة المصرية

ما ادهشني حقا ليس طبيعة تلك التصريحات لان الجميع يعلم رأيه جيدا ويعلم ما يتحدث عنه الرجل كما ان اغلبنا على الاقل يفهم القضية الجدلية التي كان يتحدث عنها
ولكن ما ادهشني حقا بل واثار تساؤلاتي هو سبب تلك التصريحات
فالرجل مهما كانت اراؤه وسقطاته فهو ليس احمق ومهما كانت ثقته في ثباته في مركزه فليس من مصلحته استعداء ملايين من البشر عليه قد يصل به الامر إلى حد إيذاؤه
كما اني اشك كثيرا في كونه يهتم إلى هذا الحد بالرقي الثقافي والحضاري للمصريين فكلنا نعلم حالة الانحدار الثقافي التي نعيشها جميعا وان اسهامات الرجل لا تتعدى الحفلات والافتتاحات والمهرجانات وبعض المعارض والحرائق طبعا
أما عن مستوى الشباب والطلبة ومستوى رجل الشارع ثقافيا فبلاش نقلب على بعض المواجع وخلي الطابق مستور

ولم اكن سأتكلم في الموضوع لان الكثير تحدثوا عنه بداية ممن طالبوا بمحاكمته إلى من ساندوه ولكني شاهدته بالامس في حوار خاص على الهواء مباشرة على قناة المحور المصرية في برنامج اسمه (90 دقيقة) وكانت لدي بعض الملاحظات التي اثارت دهشتي وساعدتني في وضع اكثر من سيناريو لتفسير التعليقات العجيبة

أولا:محاولة انتحارية
الرجل قال مرة اخرى انه مستعد للاستقالة
مما يسبب حرجا بالغا للحكومة ولذلك يقال انه صدرت له تعليمات بعدم حضور جلسة افتتاح الدورة البرلمانية التي حضرها الرئيس مبارك وذلك لانه احرج الحكومة باعلانه استعداده للاستقالة
(أول مرة قال الكلام ده كان بعد حادثة المحرقة وقال انه مستعد تماما للاستقالة من منصبه وطبعا كانت سابقة مدهشة للحكومة (واحنا معندناش وزرا تستقيل بسبب اخطاءها) مفيش وزارة هتقعد في الحكومة اكتر من اسبوع
ولانه على ثقة انه لن يقال فكانت تصريحاته العجيبة للضغط على الحكومة واحراجها وربما رغبة منه في اعتزال العمل العام
او في الاحتجاج على الحكومة وبكده يكون الراجل من المعارضة المخلصة ويجب أن يمنح العضوية الفخرية في حركة كفاية

ثانيا: تصريحات لاغراض
ما دفعني للتفكير في هذا التفسير جملة قالها السيد الوزير أمس في حواره على المحور حينما قال في إشارة غير مباشرة لجماعة الاخوان المسملين التي طالبته بالاستقالة (دول ناس بتطالب بالحكم شوفوا حصل ايه لما عبرت عن رأيي الشخصي .. ديموقراطية ايه اللي بيتكلموا عليها طيب لما يمسكوا الحكم شوفوا ايه اللي ممكن يحصل)

والجملة دي رنت زي الجرس في دماغي (الله يسامحه ويكرمه اللي خربش دماغي بنظريات المؤامرة)د


وكانت هذه التساؤلات التي سيكشف عنها المستقبل
-ماذا يكمن وراء هذه التصريحات؟
-ولماذا الان؟
-وهل هناك تلميح او محاولة لاستهداف فكرة الديموقراطية لدى الاخوان؟
-هل محاولة للفت الانظار عالميا لخطورة التيارات الدينية وقمعها لحرية التعبير عن الرأي خاصة وان الكلام عن الحجاب يأخذ هذه الايام مساحات كبيرة جدا من الاعلام العالمي بعد تصريحات عدد كبير من الوزراء الاوروبيين بشأنه وانه موضوع الساعة الان في الاعلام الاوروبي واي كلام هيتقال فيه هيسمع بقوة؟



ده كان رد فعل صحيفة هيرالد تربيون عن الموضوع


The dispute between Hosni and the Brotherhood highlights the growing wave of conservative Islamic practices across the Arab world and among Muslims living in Western countries. It also is an example of the struggle between secular governments, like Egypt, and Islamic opposition groups.

الخلاف بين فاروق حسني والاخوان يوضح الموجة المتزايدة للتيار الاسلامي المحافظ في العالم العربي وبين المسلمين في الدول الغربية. كما انه مثال للصراع بين الحكومات المدنية مثل مصر والجماعات الاسلامية المعارضة



-ام هي مجرد تصريحات شخصية جدا في جلسة خاصة اسيء استخدامها؟ وان الرجل كان يعبر فعلا عن رأيه الشخصي في الحجاب ؟؟؟؟؟؟د

-ام ان الرجل فعلا يرى ان اختصار الدين في مساحة من القماش واختصار العفة والاخلاق في رداء اصبح امرا مزعجا وغير مقبول وان المجتمع المصري كان في فترة ما لم يكن الحجاب منتشر به بهذه الطريقة ولكن كان هناك اخلاق وتدين وان الملابس لا تقدم ولا تؤخر ولا يوجد اهمية لها حتى تشغل هذا الحيز الضخم من تفكيرنا واهتماماتنا بينما العالم يتقدم بسرعة مذهلة ؟؟؟؟؟؟


اعتقد ان الغد سيجيب على الكثير من التساؤلات

كله هيبان

27 comments:

Anonymous said...

كله هيعدى يا بلوستونى. مش شرط يبان لكن كله هيعدى واللى هيحصل بكرة مش شرط يكون لنا فيه يد ومش شرط نفهمه حتى، بس هيعدى وإحنا فى مكاننا قعدين نتفرج ونمصمص شفايفنا!!!!

bluestone said...

هيعدي آه يا اخناتون
لكن واحنا قاعدين وبنمصمص شفايفنا

تؤ تؤ تؤ
اشك

دي حاجة ترجعلنا .. قراري وقرارك

يمكن ما تقدرش تغير .. بس برضه مااستسلمتش

يمكن قدروا يضحكوا عليك بس بمزاجك

على الاقل اتكلمتا وكتبنا وقلنا
وهذا اضعف الايمان

منور الشوية دول

Anonymous said...

سؤال واحد لحضرتك؟؟

انتى ضد الحجاب ولا معاه!!؟؟

R said...

آخر معلق: " سؤال واحد لحضرتك؟؟

انتى ضد الحجاب ولا معاه!!؟؟"

يا للهول!
ألم تقرأ:
"أولا وقبل اي حاجة أحب اوضح نقطة مهمة للاخوة اللي بيفهموا الكلام على مزاجهم وبيردوا وخلاص أنا معنديش أي مشكلة مع الحجاب كزي او كرمز ديني ولا تعنيني اي جدليات او مناقشات بشأنه ولست من معارضيه ولا من مؤيديه"...

؟

Anonymous said...

يا اخ كازنوفا يفرق ايه مع حضرتك هيا مع الحجاب او ضده

يعني حضرتك لو كلفت نفسك شويه وقريت هتلاقيها قايله ولا مع ولا ضد

حبه تركيز الله يخليكو

karakib said...

:) هو انت مع الحجاب و لا ضده لو سمحتي ؟؟ :)
---------------------------
فعلا الراجل ده مش سهل انه يغلط لكني لاحظته قبل كده في حوارات كتير مش بيقول كلام موزون اوي يعني مره المذيعه بتسأله ما اتجوزتش ليه لحد دلوقت ... رد عليها رد غريب اوي
انتوك

MAKSOFA said...

طبعا بوست وافي وشافي

بس فيه وزيرين في مصر بتتغير عليهم الدنيا وهما ثابتين
فاروق حسني
وبتاع الداخليه
ده نسيت أسمه
المهم

لما فاروق حسني اتولي تاني الوزارة
طلعت عليه نكته
أن كل الوزرا عينوهم

لكن فاروق حسني

خولوة


بس خلاص

abderrahman said...

رأيي الشخصي انه بيتكلم من منطلق حالة الالتهاب اللي عند البعض تجاه التيارات الدينية، لدرجة ان البعض بيضخم فيها وبيساهم في قوتها دون أن يشعر، وهو نفس الأمر المتبادل في التيارات الدينية لما تضخم من التوجهات العلمانية الحادة وتتهمها بالكفر زي ما بيتقال عن الليبرالية كفر مثلا..
يعني زي ما تقولي كده فريقين عمالين يفخموا في بعض ويحسسوا الجماهير ان كل فريق منهم تنين بينفخ ناره اللي حتحرق البلد، وكل فريق بيصور نفسه إنه هو رجل الإطفاء الطيب .
فيه ناس في الفريقين معتقدين إنه فيه هرمجدون قادمة بين التيار الديني والقوى العلمانية (الحكومية غالبا)
المشكلة إن الاتنين أضعف من إنهم يكونوا دولة، لإن مفيش نظريات جديدة وراهم قد ما هو رغي كتير، وللأسف إن الجمهور مطلعش منهم ناس يضعوا الفرقتين في حجمهم الحقيقي .
ويوقفوا حالة التناطح اللي حاصلة دي .
على فكرة الموضوع كبير تقريبا، ويتحمل كلام أكتر من كده
:-)

bluestone said...

كازانوفا:
حضرتك التعليقات كفاية
اقرا تاني
-------

R:
منور يا دكتور
-------
شوشو:
معلش خليها علينا المرة دي
بي إس : انا لسه في انتظار الوعد الذهبي بعمل نيولوك للمدونة

bluestone said...

عزيزي انتوك:

:) فكرني بمسرحية بديع خيري (انتي جاية تشتغلي ايه؟؟(د

معاك انه معروف عنه ان تصريحاته غير سياسية ولا موفقة بالمرة

يمكن حماقة
وربما جرأة وتحدي للسلطة

هو يدرك يقينا انه لا يمكن اقالته
واكد في حواره مع الجزيرة .. انا عرضت عليهم استقيل اكتر من مرة

واضح انه زهق وعايز يستريح ويعيش في باريس فقالك احرجهم بطريقة ما ينفعش تتصلح

وده ذكاء يحسب له
لا اعتقد انه يهمه كثيرا رأي الناس فيه
خلي بالك انه فنان تشكيلي
مووودي وله طبيعة ابداعية خاصة

واعتقد انه زهق من الوزارة وعايز يعيش حياته في باغييييي
A la Paris comme les fracaises
:)

bluestone said...

مكسوفة:
بتاع الداخلية ده اسمه ايه؟؟؟؟؟؟؟؟د

وده برضه يتنسي ؟؟؟د
عايزين تودونا في داهية

ده حتى اسم على مسمى فيه محبة وكله عدل

bluestone said...

عبده باشا
منور يا باشا

على فرض صحة تفسيرك
ايه اللي هستفاده من استغلال حالاة الالتهاب دي تجاه التيارات الدينية
ماهو اكيد هو مش اهبل يستعدي عليه طوب الارض بالشكل ده

ولو كان عايز ينتقد التيارات الدينية فيه ألف ألف حاجة يعني مثلا يتكلم عن الهجمات المسلحة الديموقراطية
استغلال الدين الفتاوى اي حاجة
مش جاي على الحجاب ويتكلم يعني


معاك حق ان موضوع التناطح اللي بين التيارات الدينية والتيارات العلمانية
موضوع كبير وشائك جدا وفي منتهى الخطورة
طيب يا سيدي إيدي على كتفك لو عايز تفتح النقاش فيه وافتكر انه هيكون موضوع ثري جد للنقاش لو اتعرض صح

tota said...

القهوة العالية

واضح طبعا ان المدعو فاروق يتحدث عن فكره الشخصى البحت ولا اجد بصراحة اى قناعة لهذا الفكر سواء من الناحية الدينية وفرضية الحجاب او من الناحية الشخصية كرداء شحصى ليس من حقه وصفه بأى وصف
ولكن الاعلان اوالاجهار بالفكر الشخصى ليس فكرا سياسيا بالمرة وان دل على شىء يدل على تسرب العته الفكرى المتفشى من اول الرئاسة حتى مجموعة الحاشية
والهجوم الغير مبرر على الحجاب الان ليس الا موجه معتادة لجذب انظار الشعب فى موضوع وتتحرك الحكومة فى موضوع اخر وذلك بتقديم الوزير ككبش فداء هذه المرة مع العلم انه كبش فداء ولكن لن ينته به المئال فى المجزر مثل اى كبش عادى لكنه باقى طالما الرئيس باقى وفى صدره نفس وفى جسده روح
ولا تفسير لبقاء وزير بهذه المواصفات فى الوزارة مؤديا نفس الدور السلبى على مر السنين بدون تغييره غير انه لاصق فى كرسى الوزارة كلصقان الرئيس فى كرسى الحكم
والله اعلم

تحياتى

lastknight said...

راااااائعه كالعاده .. الله يسامحه و يكرمه ؟؟ ماشى .. بس المره دى ميتهيأليش أنها المؤامره خالص .. المسأله لا تتجاوز الغباء التلقائى الناشىء عن استرخاء ذهنى مستمر من فتره طويله .. و ايضا نوع من البرطعه نتج عن أحساس فائق بالأمان فى ضوء جمود الوضع و جنوح الرئيس لمزيد من .. الجمود
أعجبنى جدا تعلي عبده باشا لكن لا أعتقد أطلاقا أن هناك فى الحكومه كلها من هو بهذا الذكاء و العمق الفكرى لينفذ مثل هذه المؤامره للاحتواء و التوجيه الشعبى .. عفوا .. تحليلك يا عبده باشا يفترض فى النظام الذكاء ... و هو شرط غير منطقى
باقولك أيه .. مش هانتجوز بقى ؟ ..

قلم جاف said...

من الخطأ برأيي افتراض حسن النية الزائد في وزراء ملتصقين بالكراسي التيفال..

التاريخ يشهد على ارتكاب العديد من البيروقراط والوزراء الذين اختارهم البيروقراط لزلات لسان قاتلة تتعدى نطاق الغباء السياسي ، ولا تكشف عن حسن نية قدر ما تكشف عن جهل قاتل وشخصيات لا تصلح أصلاً لتولي مناصب عامة..

ثلاث كلمات كانت كافية لإقالة الوزير الراحل زكي بدر تفوه بها والتقطتها الصحافة المعارضة منه .. قبل أن تفكر القيادة السياسية ملياً في إقالته..

الدميري وزير قطار الصعيد تفوه بتصريح لا يخرج فعلاً إلا من الليمبي ، ورغم أن الناس انقسموا على سبب إقالته ، منهم من قال أنه كبش فداء ، ومنهم من قال لامتصاص الرأي العام ، لكن رأيي الشخصي أن هذا التصريح جعل من الوزير والدولة مثاراً للضحك بشكل يهين الدولة فرفعت القيادة السياسية للدميري بيه (رئيس أكاديمية أخبار اليوم الحالي) الكارت الأحمر عن جدارة ، ويستاهل..

وربما يلحق به هاني هلال لو تفوه بحماقة أخرى ، وسجل الرجل كبير في مجال زلات اللسان..

المفارقة الكوميدية أن كل هؤلاء الساسة ، أو الذين في مناصب سياسية ، وحرفتهم أو جزء منها هي الكلام ، ويظهرون بهذا المظهر المضحك كمجموعة من الشتامين لا تعرف قدر الكراسي التي تجلس عليها..

المهم أنني استشعر غضباً في الشارع من البيروقراطية السياسية ، وأن هناك من ينتظر أي خطأ لأي موظف على كرسي الوزارة ليضحك الشعب المصري كله عليه..

تحالف البيروقراطية السياسية والمال السياسي والتيارات الصوفية والسلفية تحالف قاتل ومدمر لأي أمة ، ميزته الوحيدة توفير مجموعة من الكوميديانات ليضحكوننا بعد يوم كئيب بفاصل من التصريحات التي تفتن عليهم!

أراني خرجت عن الموضوع..

قلم جاف said...

أما عن كان هناك أخلاق وتدين ، هذا محل شك.. فالحال كان من بعضه ، سيطرة للمظهرية على العبادة والسلوك ، الفرق أن المجتمع كان مغلقاً ، والإعلام كان محتكراً من جهة السلطة بشكل أكثر قساوة من الآن ، زائد أن المجتمع كان مغلقاً بعض الشيء ، وفي المجتمع المغلق "كله تمام".. لا قلة أدب ولا شذوذ ولا فساد ولا .. ولا....ولو كان المجتمع مفتوحاً لكانت الصورة مختلفة ..

ربما كانت هزيمة 67 فرصة لتعرية هذا المجتمع المغلق المثالي الذي حفظنا صوره من الأفلام فقط ..

والتعلق بالماضي عادة أزلية في مصر ، فغداً سنتحسر ونحن جالسون مع أطفالنا وأبنائنا "الشحوطة" على روبي ونانسي عجرم وحتى جاد شويري!

مراقب مصري said...

القهوة العالية

أتفق مع الفارس في كون التصريخ محض غباء سياسي بحت على أغلب الظن... تصلب الشرايين اللي ماشي في الجماعة اللي فوق دا دمر دماغهم

بس نرجع نسأل... لما الوزير غلطان أوي كدة... ليه كمية المثقفين اللي راهنت على موقف الوزير ووقعوا البيان بتاع تأيد الوزير ومنهم السيد يسين ويوسف شاهين ولينين الرملي ويوسف القعيد وغيرهم الكثيرون جدا من الموقعين على البيان المنشور في أهرام النهاردة؟

تفتكري الوزير فتح الموضوع اللي الناس المثقفة دي كانت محرجة انها تفتحه على مدى أكتر من عشر سنين؟

ولا هما كمان لديهم غباء سياسي جماعي ؟ صعب أوي لأن دي من أتقل الأسماء في البلد
وواضح من توجهاتهم المتباينة إنهم مش متضامنين مع الوزير ف شخصه بس بيعبروا عن موقف وجبهة موحدة للمثقفين الليبراليين في وجه قوى الرجعية والظلامية التي تريد أن تختزل الدين كله في غطاء للرأس

الناس دي أكبر من إنها تنزلق كلها بشكل جماعي ورا واحد بينتحر سياسيا... لازم نقرا البيان بتاعهم كدة

bluestone said...

فارس باشا:
منور
انا كمان مع الحاج جرجس .. مش شايفة انها غباء سياسي لكن كمان مش شايفاها مؤامرة من النوع التقيل ..
احساسي الشخصي ان الرجل زهد في العمل العام وعايز يستقيل لاي سبب .. والمصيبة طبعا ان مفيش وزير عندنا بيتسقيل اللي جايبه هو اللي يقيله

الراجل راح عامل عملية انتحارية
وخبط في حتة صعبة جدا يتلعب فيها .. مقتل .. واحرج الحكومة .. ومفيش دفاع منطقي يهدي الشارع

وقالهم انا هستقيل ..

التفسير بشأن كون التصريحات جزء من توجيه الرأي العام ضد التيار الاسلامي واتهامه باللاديموقراطية كان واحد من التفسيرات وده لا يعني اقتناعي به ..لكن كان من الواجب طرحه

خلي بالك .. ان مع صحة افتراض عدم ذكاء النظام فلا تنسي الميدتشي .. وهم بالفعل اذكياء ..
كما اني لا اعتقد ان رجل مثل فاروق حسني من الاغبياء سياسيا .. هو فقط فنان ومووده قلب على الحكومة :)

bluestone said...

tota
تعبير الفرد عن رأيه الشخصي حق مكفول المفروض للجميع
ومن حق الوزير كما انه من حق اي شخص آخر ان يقول رأيه في كل شيء
وان كان موقعه كوزير يتطلب بعض الحصافة والحكمة في التصريحات

وان كنت اعتقد ان الموضوع ابعد من قضية الحجاب .. وان الوزير ليس بأحمق حتى يدخل نفسه في عش الدبابير بتصريحات زي دي ...

-ربما دي وجهة نظر ان التصريحات مش اكتر من تغطية على حركة تانية او مصيبة الحكومة عايزة تمررها من تحت عنينا .. وجهة نظر برضه.. وكله هيبان

بقاء فاروق حسني في منصبه له اسباب كتيرة منها انه بيطلب الاستقالة,, ودي مصيبة .. مفش وزير يستقبل .. مفيش مسؤول في بلدنا بيستقيل ,,,

bluestone said...

قلم جاف:
هو ده مش افتراض حسن النية .. ربما افتراض بعض الذكاء السياسي ..
بغض النظر عن كونه وزير او شخصية عامة
اي بني آدم بيفهم سليم العقل ماشي في اي شارع مصري عارف يعني ايه حجاب وايه اللي ممكن تؤدي إليه تصريحات من النوع ده حتى لو سليمة النية

قبله باسبوع الدكتورة بتاعة الشريعة لسه كانت بتنتقد النقاب وكانوا هيولعوا فيها ...
دي مش محتاجة ذكاء سياسي ولا سياسة اصلا .. دي حاجة بديهية جدا

في دولة زي مصر مع انتشار الجهل والتخلف والممارسات السطحية للدين مع كمية التراجع المذهل للثقافة والمدنية واحترام الحرية وقيمة الفرد تصريحات زي دي ممكن تكلفه كتييير

-ممككن يكون الامر غباء سياسي
ولكن ان كنت من المؤمنين بنظرية المؤامرة فالوضع هنا مختلف

خلي بالك ان حتى زلات اللسان عادة لا تؤدي باصحابها في التهلكة
السيد رئيس الوزراء طويل خالص ونظيف اول تصريحاته بره مصر قال فيها ان الشعب المصري ناقص سوا وغير ناضج سياسيا وان بدلة الديموقراطية واسعة عليه ومحتاجة تأيييف

-اوافقك في اننا نمسك السكاكين في انتظار سقوط اي كرسي .. وده حق الشارع اللي اتخنق منهم ومن وجودهم طويلا

انا شخصيا لا امانع بوجود تصريحات كوميدية كده كل يوم .. ياريت حد يطول يضحك كل يوم وهو بيتفرج على الاخبار .. يا بخت الاشقاء الليبيين

لم نكن يوما مجتمعا محافظا .. انما نحن نجيد التمثيل .. في الدين والسياسة وفي كل حاجة تانية
الحجاب يحتل تلك المنزلة المهمة جدا والخطيرة جدا كما لو ان قطعة من القماش اصبحت هي رمز الدين والتدين لاننا اختصرنا الدين في رموز وشعائر وممارسات فاصبح الامر ان من يلمس رمزا كأنه يضرب الدين في مقتل وهذا غير صحيح

ولكننا ممثلون بارعون
واليومين دول مقضينها كوميديا

bluestone said...

الحاج جرجس بذات نفسيته يجلس على قهوتنا المتواضعة
يا مرحب بنجوم التلفزيون

خليني اختلف معاك في ن الامر يقتصر على كونه نوبة غباء سياسي .. فتصريحات مثل تلك لا تصدر من شخص بملك الحد الادني من المعرفة بالشارع المصري
وبعض العقل

انا لا انفي ان يكو ن ذلك رأي الوزير فعلا .. كما لا انفي ان فعلا يرى في اختصار الدين في قطعة قماش تخلف ومحض تأخر ... ولكني ارى للامر ابعاد اخرى

ارى فنانا ذهد في السلطة ومل العمل العام
عايز يستقيل ومش راضيين .. يعمل ايه؟
يعمل مصيبة يقلب بيها الدنيا على دماغ الحكومة؟ لانه يعلم تماما انه لن يستطيع الاستقالة ومش هامه .. لانه ابسط شيء سيتوجه إلى باريس التي يعشقها ويعيش هناك ما بقىله من ايام
كفنان تشكيلي كره اروقة الوزارة

اما التفاف الفنانين والبيان والهيصة دي فهي موجهة طبعا يا عم الحاج

لسببين : الاول ان الرجل باقي ولن يقال ومش هيرفدوه لانه طلب الاستقالة ومفيش وزير عندنا بيستقيل .. انت قاعد قاعد غصب عن عينك

طيب نعمل ايه لازم الشارع يبلع القصة هاتوا الوجوه الملونة .. هاتوا الاعلاميين واعملوا هيصة واقبلوها مظاهرة للديموقراطية والحرية وقد ايه بقينا في حرية نعبر عن رأينا
ويا حلاوتك يا مصر يا كبيرة اخواتك
ونورت مصر

زومبليطة موجهة

تاني سبب وده في رأيي استغلالا لمولد تصريحات مسيو دو حسني وهي ان الحكومة تضرب عصفورتين بزلطاية واحدة

وعلى فكرة الفنانين دول اجبن من انهم يعملوا كده لوحدهم خوفا على شعبيتهم
حسين فهمي بعد ما كان بالع حباية شجاعة اول امبارح على المحور
طلع النهاردة وعمل عيشة وقال انا آسف مكانش قصدي

الحكومة قررت تستغل شهرة الاعلاميين والتلميع الاعلامي في الشارع للترويج لورقة غياب الديموقراطية وعدم قبول الاخر لدى التيار الاسلامي الممثل في الاخوان المسلمين

اللي هما اكدوا فعلا درس في الغباء السياسي لما قدموا بلاغ للنائب العام في واحد قال رأيه
هاهاهاههاهاها
وسلم لي على الرأي والرأي الاخر

فانتوماس said...

لو اللي انت بتقوليه ده صح انه عايز يستقيل وبيلعبها كده تبقي استاذة ورئيسة قسم ويجب ان نرفع لك القبعة. معلومة استحالة استقالة الوزير الا بالامر المباشر دي سليمة بس البيع العلني من قبل الحكومة لفاروق في مجلس الشعب ماكنتش متوقعه قوى كدة ,اما عن بيان الفنانين والمثقفين فانا اعتقد ان فيه تيار بداء يكبر في مواجهة التيارات الدينية ويشعر انه يجب ان يقاومهم لانهم متي حكموا سوف يذبحون الثقافة والفن , وطبعا الاخوان ممكن يسكتوا لو الحكومة عقدت معاهم صفقة من اياهم زي مثلا يفرجوا عن شوية من الممسوكين فحيبيعواالقضية كلها
تحياتي والقهوة نارها هادية قوى النهاردة

قلم جاف said...

أخاف أن يتسبب ذلك في إرساء مبدأ إعطاء الحصانة كاملة لأي وزير موظف وتصوير كل شيء يقوله على أنه رأيه..

لنفترض أن صحفياً سأل على الهواء وزير النقل عقب كارثة قطارات عن أن القطارات تعمل بـ"المنافلا" .. فقال له الوزير "الفِلة في المنافلا"..

العبارة مقبولة من ممثل كوميدي في فيلم كوميدي ، وليست من وزير ، .. وبالتالي هذا ليس رأيه ، وتصريحه الأهبل جريمة سياسية وإهانة فاضحة لهيبة الدولة..

كما قلت التاريخ المصري المعاصر مليء بتصريحات متباينة الغباء ، لم نجرؤ على عرضها على العقل والمطالبة بمحاسبة أصحابها .. والمصيبة أننا نجد كل الصحفيين (المدافعين عن حرية الرأي) يشتمون الوزراء ونظيف ثم نفاجأ بهم عندما تحين ساعة محاسبة بعض هؤلاء الوزراء نجدهم يدافعون عنهم رافعين شعار المسامح كريم!

حتى لو اتفقت معك جزئياً على أن فاروق حسني قال رأيه ، لو اعتبرناها سابقة ترتب آثاراً على مثيلاتها في المستقبل وأفرطنا في التعميم نكون قد منحنا الفاسدين والفشلة من البيروقراط في الوزارات صك غفران لا يستحقونه ، ثم نرجع بعد ذلك نلطم على فساد الوزراء وفشلهم!

مراقب مصري said...

أنا الموضوع كله مش راكب في دماغي خالص من فرط عبثيته.... في بلدنا لا يمكنك على الإطلاق الوصول إلى الحقيقة ... وكله بيمث على كله والبلد ما فيهاش راجل بجد وكل ده بيوصلنا للكوميديا العبثية التي نشاهدها الآن

bluestone said...

فانتوماس:
هو فعلا انقلاب نواب الوطني مكانش متوقع
بس خللي بالك ده مولد سيدي التصريحات وكل واحد لازم يعلن ولاءه الديني قبل الاخرين
يعني لو نواب الوطني ساندوه نواب الاخوان هيتهموهم بالكفر والزندقة والتأثير على اخلاقيات المجتمع المصري وانت عارف نواب الاخوان والمسلسلات الهندي
احتجاج نواب الوطني منطقي ومطلوب


-النظرية القائلة بان فعلا فيه تيارات ليبرالية بدأت تواجه التيارات الدينية الرجعية وسيطرتها على المجتمع دي حاجة حلوة خالص .. وياريت يكون صحيح

منور دائما يا فندم
والحساب علينا النهاردة

bluestone said...

قلم جاف:
طيب يا ريت .. يبقى فيه اي نوع من الحصانة لاي حد يقول رأيه
ده يبقى يوم الهنا
ما احنا عارفين اللي فيها كل تصريحات السادة الوزرا والمسؤولين تبدأ بتوجيهات السيد الرئيس وتنتهي بقيادته الحكيمة


تصريحات حسني ربما كانت غباء سياسي لكنها مش هبل .. دي قناعات شخصية مهما كان تطرفها .. وزي ما قلت قبل كده انا لا ارى انها مجرد تصريحات وبس


سيبك من الصحفيين والاعلام والمشوار ده كلنا نعللم جيدا ان الصحافة القومية والاعلام الوطني موجه ..

bluestone said...

reformer
يبقى انت اكيد اكيد في مصر