اتكلم إليكم اليوم .. في أول أيام تطبيق التخريبات الدستورية بينما يتنامى إلى سمعي صوت سيارة أجرة تسير واعلاها مكبر صوت يتحدث الصوت المزعج الخارج منه باسم عضو الحزب الوطني عن منطقتنا ويقول "اليوم ندعو كل المصريين للادلاء باصواتهم ليقولوا كلمة حق ...ليقولوا نعم لتعديل الدستور" بينما تشير نشرات الاخبار ان معدل اقبال الناخبين اقل من واحد في المئة ....اما السادة الحكوميون فيرددون على التلفزيون الحكومي ان نسب الاقبال تجاوزت 25 في المئة ووقعت بعض حوادث التزاحم على اللجان الانتخابيةاكتب اليوم في أول أيام العهد الجديد
الايام السودا اللي مقبلين عليها
وقد انتقلت المحروسة بفضل الفكر الجديد
من عزبة إلى معتقل كبيييييييييير
أكثر ما سبب لي احباطا عارما خلال اليومين الاخيرين .. ليس النفاق الحكومي والكذب البين والتلفيق الواضح
وليس رخاوة المعارضة وحماقتها وردود فعلها البلهاء
أكثر ما أوجع قلبي حقا كان رد فعل المؤسسات الدينية
التي لم أجد سوى قول الرسول بولس في الكتاب المقدس ( الجميع زاغوا وفسدوا معاً، ليس من يعمل صلاحاً ولا واحد) للتعبير
عما أشعر به من خيبة أمل واحباط وحزن
فها هو شيخ الازهر .. اللي جه يكحلها فعماها .. اراد ان يهرب من الادلاء بالرأي .. فقال معرفش .. مقريتش وماشفتش ومحدش عرضها علي ..طارحا مثالا واضحا على الجهل البين وعدم الدراية بالامور
ولم ينسى العالم الكبير أن يحذر الناس من إثم عدم التوجه إلى الاستفتاء وان من لا يدلي بصوته يرتكب معصية
وأكد السيد المبجل عمر هاشم في صحيفة الاخبار ان مقاطعة الاستفتاء اثم ومعصية ضد الله عز وجل حيث انها امتناع عن الشهادة وفيها ضياع للحق ومن يكتمها فآثم قلبه 
واكد السيد العلامة ان الادلاء بالصوت واجب ومن لا يستفتي لا امانة له ومن لا امانة له لا دين له
يعني كافر والعياذ بالله
ونسى العلماء الاجلاء .. ان يحدثونا عن حكم المزور والمنافق والغاش والكاذب وآكل مال اليتامى والظالم والقاهر ومستبيح دم الغلابة أي حكم على مثل هذا أما الكنيسة فلم يكن حالها بأحسن ... فكلنا في الاستفتاء يا وطني سواء ...............
حيث أكدت قيادة دينية رفضت ذكر اسمها لصحيفة المصري اليوم ان التعديلات مناسبة بل هي من أروع التعديلات
ودعت القيادة الكنسية الشعب القبطي للاستفتاء والمشاركة وأكد ان البابا سيوجه كلمة شكر للسيد الرئيس بعد نهاية الاستفتاء
24 comments:
ماتنسيش يا بلو انهم موضوعين تحت ضغوط رهيبة لا نعلمها نحن ولا تستطيعي ان تجزمي بانك لو مكان احد فيهم لصرحت بشىء اخر. ربما تتعجبي من ردي لكنها دولة تجيد العاب صدقيني لانعلم عنها شيئا وتستطيع ان تتحكم في البشر باساليب غاية في العجب. علي العموم نحن شعب سلبي تماما ولن يمنحنا احد الحرية لانها لا تمنح بل تغتصب هكذا سبقتنا الشعوب الحرة ودفعت ثمن حريتها اما نحن فلم ندفعه بعد. تحياتي
يا عزيز فانتوماس
القيادة الدينية كان أولى بها ان ترأ تماما عن المساخر الدائرة حاليا
من يقول كلام الله ويمسك بكتابه
يجب أن يبتعد تماما عن ألعاب السياسة القذرة
السياسة لعبة قذرة تلوث من تلمسه
كان أحرى بالمؤسسة الدينية أن تمتنع على الاقل عن التعليق
كان أولى بالكنسية ان تترك الناس يختارون ما يشائون وألا تحجر على ارائهم بتلك الصورة المؤسفة ...
كان لابد ان تكون المؤسسات الدينية اكثر سموا من قذارة السياسة
هي فعلا من اروع التعديلات يافندم
اروع من مروعه طبعا
استهبال متناهي
من الحكومة والازهر والكنيسة والشعب المكتوم كتمه الفول ده
تعرفوش بلد نهاجر لها تكون بتحترم كرامة الفرد وحقوق وحريات شعب هيتقرض قريب اسمو (المصريين)؟
عزيزتى القهوه العاليه
اسفا ف وتجا ره رخيصه لقد وصفتى وضعا مخز يا جعلنى افقد معنى الانتماء لهذا الوطن المسف بكل تفا صيله ونفا قه البغيض والعن هذا اليوم الذى صر ت فيه موجودا فى هذه البيئه الوقحه المليئه بالزيف واستخدا م الانماط الدينيه من اجل تكريس الذل لابنا ء هذا الوطن الوطن برىء
من القس الذى يملى ار ادته على شعب كنيسته بدون وعى غير الاقحام وخدمة المصا لح الفئويه
وذاك الشيخ المنافق الذى هوى حمل المباخر لكل العصور
اسف لالاطا له بس الو احد كفر من البشر دى
سلا م
السماء أدركها التعب
والسحب تلونت كاللهب
كيف لا والحال قد انقلب
عل أمطارها هي دموع من انغلب
لتغسل بها هموم المنسلب
آآه يا خوفي من مستقبل مضطرب
يغلفه ظلمة والنور محتجب
واللص يعيث في سلب وفي نهب
والكريم زاهد من المعركة قد هرب
والجياع زادوا في كل مكان ودرب
وأضحينا ونمسى في عظيم كرب
أين الشرفاء.. أين نخوة العرب
مصرنا تضيع.. تنتهك.. تغتصب
أين الخيول والسيوف.. أين الحرب
حي علي الكفاح.. فالنضال قد وجب
بئس الحياة إذ ضاعت في لهو وفي لعب
وأهلا بالموت.. ف لله وحده المنقلب
يارب يسر لي طريقا قد صعب
أبغي حقا وعدلا ونورا في القلب
لأعيش حرا وليس ذليلا كالكلب
وأموت في عزة وشرف منتصب
اعتقد ان البابا بنفسه اصدر تصريحا يدور فى نفس المعنى حيث ورد بشريط أخبار التليفزيزن الرسمى على لسانه ان المقاطعه سلبيه وعمل غير وطنى
المهم انا احمد الله ان شيخ الازهر لا يمثل الا نفسه واشهد الله انه لا يمثلنى ولا دخل لى بوجوده فى هذا المنصب
الغريب بالنسبه لى وارجو ان افهم هنا بطريقه صحيحه هو موقف الكنيسه فهى فى رأيى تختلف عن موقف الارهر
فالبابا لا يعينه الرئيس فماذا يجبره على تبنى هذا الموقف الا ان كان مقتنعا به فعلا وهذا يؤسفنى ان كان صحيحا
شاهدت احدى المواطنات على الجزيره تقول ان كنيستها قالت لها يجب ان توافقى لان الحكومه لا تعمل شيئا ضد مصالحنا
سؤال لكل اخوانى المسيحيين الذين يتبنون هذا الرأى
ان كانت الحكومه تعمل لصالحكم
اذن اين تكمن المشكله؟
سألت حد كبير ف الحزب قاللي:
العمل السياسي المتواصل للوصول الي بوتقةالحريه المزعومه و المنبثقه من الاحساس الوطني للشارع المصري و الذي من شأنه رفع الحاله العامه للانبعاج التقدمي و التأخري في نفس الوقت و نشر الثقافه اللتي تؤدي الي كل ما هو غير جدي و هزلي و جعل العمق الاستنباطي في مضمون العمليه السياسيه هو التوحد الدولي مع جهود العالم لازاله الكون من علي كوكب الارض.....
حدش معاه قاموس ياجدعاااان؟
محمد الهنداوى
بعد أذنك يا بلوستون
عايز أرد عليه
يا عزيزي من قال أن الحكومة تعمل لصالحنا ... ما هو الاشراف و الصوفية قالوا نعم ... و مواطنين كثيرين جدا قالوا نعم ده معناه الحكومه بتعمل لصالحهم
اللي أذاعته الجزيره غريب لأنه أصلا الكنيسة ليست لها أي سلطه سياسية علي المسيحيين سلطتها دينية فقط
و من يتبعها سياسيا فوضعه خاطيء تماما
فليصرح قداسة البابا بما يريد سياسيا و لنفعل ما نريد نحن فلا سلطة سياسية له علي أي مسيحي
اقسم... ان تكون مصالح الشعب و المواطن تحت الجزمه وان حافظ على سلامة النظام الاستحماري و ان اطبق الكوسة و المهلبية
أقسم... ان ارعي الشيطان في عملي وان اقتل ضميري وان تكون ذمتي استك
أقسم... ان احافظ على الهرم الاستحماري وان العب بالبيضة و الحجر.. و ان ابيع كل كل شيء واي شيء للّي يدفع أكتر
أقسم... ان اطبق الاستغفال للاصغر مني وأن اخضع تماما و اسلطح قفايا للاكبر مني في الهرم الاستحماري
أقسم... أن لا أحافظ على الحريات.. و املأ السجون والمعتقلات.. بالشباب و الشابات.. فوق السن و تحت السن و حتى المعاشات.. ولن يخرجوا منها ابدا ما دمت حيا
أقسم... ان اساعد في تخفيف الام ومشاكل الشعب ,وتفعيل حل جذري واخير بالقضاء على الشعب نفسه في البحر بالسفن المضروبة والجو والبر.. جوه البلد وبره.. بالمبيدات المسرطنة.. والمياه الملوثة.. و انفلونزا الطيور
أقسم... أن ادعم الثقافه الاستحمارية.. بقنوات الكليبات الهادفة.. وافلام العرّي و التنطيط.. والشباب الروش و ستار اكاديمي وماتشات الكورة.. ووووو ……… ,وان احميهم من الافكار الهدامة كالتدين و الديمقراطية واحافظ عليهم من الغزو الثقافي و ضلالات امثال عمرو خالد والقرضاوي وعبد الباري عطوان وابراهيم عيسي
والشيطان علي ما اقول شهيد
أولا أحييكي على موضوعيتك النادرة دي
وثانيا .. ده دليل قاطع على نفاق رجال الدين لأنهم أولى الناس بعدم الخوف من السلطة وأولى الناس بشراء الآخرة مقابل الدنيا مهما حدث لهم من تنكيل
لكنه حب الدنيا اللي تغلغل في النفوس .. حتى نفوس رجال الدين
تحياتي
لا ادري لية و انا بقراء الموضوع بتاعك و بتاع الفتة بتاع كلبوزة و لاكن سامباتيك افتكرت فيلم فجر الاسلام و خصوصا المقطع الي اميمة كان بيقول فية لابو جهل اليوم خمر و نساء و غدا نقتل اتباع محمد و الدين الجديد
بس الغريبة مع انهم كانوا بيعذبوا الذين رفضوا الارتداد الا تصدقي انهم كانوا رحماء بيهم برضة يعني لما كان بيجي حد يشتري العبد اللي بيتعذب و هما عارفين ان الي بيشترية دة يا سيدنا عثمان يا سيدنا ابو بكر كان حيطلقة حرا و يعبد من يشاء كانوا مع ذلك بيتمموا البيعة و يسيبوة
الا الي عندنا باعوا البلد و باعونا و برضة مستمرين
يعني الكفرة عندهم رحمة بالعبيد اكتر منهم
السلام عليكم
الاول انا أحب اخد القهوة بتاعتى سادة
على روح الدستور
ثانيا بقي احنا لو هنشيل اثم على عدم الاستفتاء فده اثم واحد بالنسبة لينا آمال اللى عمال يشيل اثم بقاله ربع قرن على 75 مليون بنى ادم ده ايه بقي
ربنا يرحمنا من اللى احنا بقينا فيه
تحياتى الشديدة
لما ينادوا بفصل الدين عن السياسة و يرجعوا يستخدموه ببلاهة عن طريق الرموز الدينية الرسمية و نصف الرسمية, يصبح أمراً طبيعياً جداً أن تقرأي طالعك في الجريدة و أنت تحتسين قهوتك لتبدأي يومك مستنشقة عبق و أريج 34 زهرة في وطن يعبر إلى المستقبل البمبي المسخسخ على روحه من الضحك اللي شبه البكا
تحياتي
Muslim&Quptia:
:)
هو انا مفكرتش فيها من ناحية اروع دي .. من مروعة يعني؟؟
بس دي تبقى قيادة صايعة اللي بتلعب على الكلام بالطريقة دي :)))
مش مشكلة بلد تهاجرلها .. لانها برضه هتفضل مش بلدك .. وهتفضل طول عمرك ضيف بره وجوه.
---------------------------------
الجحيم هو الحقيقة
صاحب المدونة المغلقة :)
اسوأ انواع المزايدة هو المزايدة على الدين .. ثم الوطن
واحنا والحمد لله عندنا الاتنين بوفرة
ربما لا يجب أن نلوم الوطن
بل نلوم اللصوص الذين يسيطرون عليه
ثم نلوم أنفسنا لاننا سمحنا لهم بذلك
فقد تحولنا لشعب خانع يرضى بالفتات ولا يجده
لا تأسف لاي إطالة ومشاركتك مرحب بها دائما
قنديل في قلبي :
واللص يعيث في سلب وفي نهب
والكريم زاهد من المعركة قد هرب
والجياع زادوا في كل مكان ودرب
جبت التايهة ..
كلمات معبرة وفي الصميم
-------------------------------
محمد الهنداوى:
انا ماسمعتش التصريح
لكن اعتقد ان وارد
وشيخ الازهر قال كلام بنفس المعني تقريبا
لو كانت مصر دولة يغلب المسيحيون على سكانها والديانة الرسمية بها المسيحية كنت ستجد ان شيخ الازهر يمثل جموع المسلمين
ولكنه لا يمثل إلا نفسه لانه لا يمكنه ان يمثل المسلمين في دولة أصلا يغلب المسلمون على سكانها وتسير وفق أحكام الشريعة الاسلامية.
مفيش فرق كبير ...
ما جعل للسلطات الدينية ذلك الزخم والتأثير هو الجهل ولا اتحدث هنا عن القيادات .. ولكني اتحدث عن اي شيخ او قسيس في اي مكان يكون لهم سلطة او نفوذ ما بحكم تمثيلهم الديني .. الناس بتعتبرهم بركة وكلامهم يمثل كلام الله وعلمه
وتلك هي الطامة الكبرى
القيادة الدينية سلطتها روحية فقط ... لا سلطة سياسية لها ابدا
فلا يجوز لشيخ جامع أن يفتي بان عدم الاستفتاء معصية ولا يحق لقس أن يدعو ابناء كنيسته ان يذهبوا للاستفتاء ويصوتوا بنعم
-مين اللي قال ان البابا لا يعنيه موقف الرئيس؟؟؟؟؟؟
يا سيدي الفاضل هل نسيت فزاعة الاخوان المسلمون التي تلوح بها الحكومة لاقباط مصر وللعالم اجمع .. على طريقة اني الحل الاوحد والبديل هو الاخوان
الكنيسة لن ترغب في نظاما اخوانيا ابدا في مصر .. ولا اعتقد ان اي مصري عاقل سيرغب في نظام اخواني في مصر. ماهي مش ناقصة خراب .
كما ان المجتمع الدولي لا يرغب في حماس أخرى في الشرق الاوسط ..
اعتقد ان وضحت لك سبب تأييد الكنيسة للنظام الحالي بحكوماته المختلفة ...
فالبنسبة للكنيسة النظام الحالي اخف الشرور ضررا
وهناك من يقول انه لو اجريت انتخابات ديموقراطية في مصر اليوم فان الاخوان سيفوزون باكتساح وذلك لاتساع سيطرتهم على الشارع المصري وتغلغلهم فيه بالاضافة للموارد الكثيرة التي تفوق اي جهة معارضة ...
وطبعا عن حال المعارضة المصرية حدث ولا حرج ما بين عمالة وسياسات عفى عليها الزمن .. وانفصال كامل عن الشارع ولغة خطابه
SnipER:
واضح انه حد كبييييييييير فعلا
اصل الكلام الكبير ده مايطلعش غير من الحزب الحاكم الطابق على نفوسنا بقيادته الحكيمة
وعلى رأي اسم المدونة المعروفة
مايحكووووووووووومشي
مع مراعاة المؤثرات السمعية والبصرية!
--------------------
كراكيب:
اتفضل رد براحتك
بيتك ومطرحك
الناس اللي صوتت بنعم مش لان الحكومة بتعمل لاقدر الله لصالحهم ولا حاجة
الناس اللي قالت نعم يا إما تم شحنهم من المصانع في اتوبيسات النقل العام على اللجان الانتخابية وخدوا بقيت اليوم اجازة
ودول اصلا ما يهمهش صوتهم ومش شايفين ان له أي قيمة اصلا
وفيه ناس تانية ودول قلة مغيبين تماما
واحد كان بيقول لصحفي بيغطي الاستفتاء انه قال نعم وسأله الصحفي ليه صوت بنعم الراجل قاله (لان الريس ده راجل كويس اللي حواليه هما اللي وحشين) !!!!!!!
التبعية السياسية للكنيسة اصلا وضع مش مظبوط يا كراكيب زي ما انت قلت
الكنيسة مارسته من باب التعود والناس كمان اخدوا على ان حد يقولهم يعملوا ايه
ولكن في النهاية لا يصح إلا الصحيح ألا وهو انه ليس للبابا اي سلطة سياسية على اي مسيحي وليس للكنيسة اي سلطة مماثلة .... السلطة الكنسية سلطة روحية فقط ....اكرر روحية فقط
حول
واحد حزب وطني وانا عارفاه كويس::
يا ألف اهلا وسهلا بالقيادات الحزبية !!
منور يا اخي القهوة ..
بس معندناش بن .. :)
وبما انك منورنا
فنحن نؤيد ونبايع السيد الرئيس
وبالروح وبالدم وبالبتاع وباي حاجة تانية
ومش كفاية
مش كفاية
مش كفاية
:::
حلو كده يا باشا ولا ايه ؟؟
----
حلو قوي القسم ده .. لازم يكون فيه فرق بين القسم المعلن والقسم المطبق ..
وطبعا احب اختم كلامي للاخوة (بكسر التاء) والاخوات (بمد الالف ورفعه للسقف) بالدعاء الوطني
روح يا شيخ إلهي ما يحكمك على شعب
يامراكبي:
منور اولا
ده رأيي بالظبط رجال الدين هو الاولى بعدم الخوف من السلطة والمجاهرة بالحق والحرية ايا كانوا .. هم أولى بضرب مثل صالح للناس.
هم أولى فعلا بشراء الاخرة .. بقول الحق ونصر الحرية والعدالة التي كفلهما الله لكل إنسان
ربما حب الدنيا ربما الخوف ربما الضغوط ربما حسابات أخرى لا يعلمها إلا الله
ولكن في النهاية لا شيء يساوي أن تسير في الحق ولا تخشى لومة لائم.
--------------------------
yasser_auf :
ما هم بعد ما باعونا واخدين توكيل من المشترين ...
احنا مالناش غير بنا يرحمنا دلوقتي ..
بس لو كنا نستحق.
----------------------------
عاشقة الوطن:
قهوة سادة هنا للاستاذة يابني ..
البقاء لله يا ستي
ومانجلكيش في حاجة وحشة..
والله الفقيد كان ابن حلال .. رغم انه كان زي اللهو الخفي .. موجود ومش موجود ..
طبعا ده من التهريج اللي على العالي قوي .. المتاجرة بالدين وتحويل كل حاجة في الحياة لحلال وحرام
وبكره ان شاء الله هيبقى انتقاد الحاكم او التعرض له باي هجوم إثم ورجس من عمل الشيطان
منورة يا ستي
وان شاء الله المرة اللي جاية
نشرب شربات على روح اللي بالك فيه :))
ابو الليل:
السيد ابو ليل صاحب المبدأ الفلسفي الخالد (أرفض حدوث هذا)
منور كافي شوبنا المتواضع :))
يا مرحبا يا دي الهنا
اسوأ ما وصلنا ليه هو ان الدين اصبح زي اللعبة يستخدم وقت الحاجة إليه
اما المسخرة الاعلامية بتاعة حظك اليوم (غدا.. التجمع الشعبي الكبير فأنت مصباحه» «كثيرا ما تبدع بأفكارك الجديدة خاصة ما يتعلق بالوطن» تبقى مسخرة رسمي .. حاجة في نطاق العبث الكامل
يا لهوي على السخسخة اللي هنشوفها
ده احنا مقبلين على ألوان ما يعلم بيها إلا ربنا
أعود بعد انتهاء العيد لارد على ردك
وجدت صعوبه فى فهم الجزء الاول من ردك الخاص بلو كانت مصر يغلب على سكانها المسيحيه ولكن على حسب فهمى انك تقصدين ان البابا يمثل المسيحيين لانهم الاقل وشيخ الازهر لا يمثل المسلمين لانهم الغالبيه فى البلد
والواقع ان البابا يمثل المسيحيين بحكم انه منتخب من القيادات الدينيه التى يرتضيها معظم ان لم يكن كل المسيحيين وبحكم سلطته الروحيه المستمده على ما اعتقد من العقيده المسيحيه
اما شيخ الازهر فهو معين من قبل رئيس الدوله مثله مثل رئيس الوزراء وبالتالى هو يمثل من عينه بغض النظر عن فكرة الاقليه والاغلبيه
وبعدين مين قال ان مصر تسير وفق الشريعه الاسلاميه؟ هو فين ده؟
وشيخ الازهر لا يمثل الشريعه الاسلاميه ولا يمثل الاسلام اصلا حيث لا كهنوت فى الاسلام ولا وجود لرجل الدين
هو ان اصاب فله الاجر وان اخطأ فحسابه على الله انما كلامه وفتاواه هو وغيره من علماء الدين غير ملزم لاحد طالما لا يستند لنص صريح من القران والسنه
لا سلطة له علينا او على انا على الاقل
ومن الخطأ ان نعمم ونقول ان السلطه الدينييه سببها الجهل
فاحترامى لعالم الدين(وليس رجل الدين) قد يكون منبعه التقدير لمكانته او علمه وليس لجهل منى او لسلطة له على
وبالنسبه للاخوان اتفهم تماما ان يكون موقفك وغيرك وقد اكون انا منهم رافضا لوصول الاخوان للسلطه وان كان غير مطروحا اصلا فى المدى القريب
ولكن رفضى لهم لا يتعدى عدم انتخابهم فى انتخابات وفقط وليس تأييد مرشحى الحكومه
كيف نؤيد استبدادا قائما بالفعل خوفا من استبداد لم يتعدى كونه مجرد احتمال؟
انه تفتيش فى النوايا لا اكثر
وبعدين لما هى فزاعه؟ وكلنا عارفين انها فزاعه
بنصدقها ليه؟
انا نفسى يكون فيه موقف صريح من الكل
ارفض الاخوان ده حقك
بس ما تقنعنيش انك ضد الاستبداد وانت بتصوت للحكومه
ما تجيش ابدا
كنت اتمنى ان ينادى العقلاء بمناخ حريه وديمقراطيه كامله وليأت من يختاره الشعب
ان اختار الاخوان او اختار حتى كل المجلس من المسيحيين ولكن بشفايفه
اقدر الحيره التى تصيبك عند الحديث فى موضوع شائك كأى موضوع قد يتطلب انتقادا للبابا
ولكن الحق له قدسيه ايضا
تحياتى يا صديقتى
ومعذره لطول الرد
محمد الهنداوي:
قصدت يا محمد ان الاقلية في اي مكان تميل لان يكون ليها قيادة ترجع لها قدام الكيان الاكبر.. يعني لو كان مصر دولة يغلب على سكانها المسيحيين وكان رئيسا مسيحي وحكومتها 99 في المية منها اقباط كنت ببساطة هتلاقي المسلمين اصبحوا اكثر ارتباطا بقيادتهم الدينية باعتبارهم اقلية وده نوع من انواع تحديد الهوية. وفي هذه الحالة مكانش القيادة الدينية المسلمة هتكون متعينة من قبل النظام الحاكم بل هتكون مختارة داخليا داخل المؤسسة الدينية باعتبار الافتراض بان المسلمين هم الاقلية وليهم نظام او قانون خاص مختلف عن النظام العام للدولة في بعض الامور منها اختيار القيادات داخل المؤسسة الدينية والاحوال الشخصية.
--لازم نكون متفقين ان البند التاني في الدستور يا محمد بيقول (الشريعة مصدر التشريع) ولساننا نشف نطالب بتعديل ام المادة دي على ان تكون (الشريعة الاسلامية أحد مصادر التشريع) لان ده الواقع
الدستور بيخالف الواقع لان الشريعة وحدها مش هي بس اللي بتطبق .. فيه القانون الفرنسي مثلا.. ده غير ان الاقباط بيرجعوا لقوانينهم في الاحوال الشخصية مثلا ... ده معناه ان الشريعة فعلا أحد مصادر التشريع وليست المصدر الاوحد ...
فكرة المبدأ نفسه بيكرس الطائفية
--هو واضح اننا هنكون محتاجين واحنا بنتناقش نفسر اكتر مسألة الكهنوت دي ..
الكاهن او القسيس في الكنيسة ليس ممثلا لله على الارض ولا يتمتع بصفات الهية وليس معصوما ....
الكاهن وظيفته هي الارشاد الروحي وتطبيق فكرة ما يعرف بالاعتراف في الارثوذكسية
ويجب التأكيد على مسألة الارشاد الروحي
القيادة الدينية متمثلة في الكاهن او الاسقف وحتى البابا لهم قيادة روحية فقط تتعلق بالارشاد الروحي
وهذا لا يعني ان كلمتهم قانون يسري على الرقاب او انهم معصومون (وان ظن البعض عكس ذلك)
فالبابا نفسه ليس معصوما وقد قال هو ذلك اكثر من مرة وافتكر انه كتب مقال عن عصمة البابا...
وليس لاي شخصية دينية سلطة في مسيحي في شؤون الدنيا .. يعني لو واحد عايز يتجوز مثلا لا يجوز ان يقول له الكاهن اتجوز دي مثلا .. ولا يملي عليه اي من الاختيارات الحياتية الخاصة بالعمل والانتماء السياسي والدنيا بشكل عام
ولكن تتلخص مهمته في الارشاد الروحي وما يطلق عليه في علم النفس
councling
يعني لو حد شايف ان الكاهن هذا او ذاك يتمتع بحكمة فلا مانع من استشارته كصديق او أخ اكبر .. إلخ
-لما بنتكلم عن الناس اللي بتتمتع بوعي في المجتمع يا محمد يبقى بنتكلم عن قلة .. فيه ناس لحد دلوقتي لسه بتجري على اي واحد ملتحي في الشارع لابس جلابية قصيرة وتقول له يا حاج وتستشيره في الدين والدنيا.
-مسألة الاخوان والاستبداد القائم والمحتمل..
اؤيدك تماما .. منطقك سليم
لكن مين اللي قال ان اللي بيحصل في بلدنا منطقي اصلا
النظام استغل ورقة الاخوان كويس جدا
وتاريخهم بيلعب ضدهم طول الوقت
انا شايفة مثلا انهم لو وصلوا للحكم (وده مستبعد جدا على الاقل دلوقتي) فآخر هم ليهم هيكون الاقباط .. هم هيتفرغوا للقضاء على المختلفين معاهم من المسلمين الاول .. ولا اعتقد انهم هيحتكوا بالاقباط بشكل مباشر على الاقل خوفا من الضغوط الخارجية .. ما علينا
لكن في النهاية عقلية الشارع حكمت بكده .. وكلما قل الوعي كلما سهل العبث بعقول الناس.
والمنطق اللي الناس دي بنت عليه ان النظام الحالي ارحم من الاخوان لانهم على الاقل مش بمرجعية دينية واضحة.. هيكون اول ضحاياها المساواة .. على الاقل احنا متساويين إلى حد ما دلوقتي في الظلم والقهر ..
ده غير التراجع على جميع المستويات في حالة حكم الاخوان ... الاقتصاد أول الضحايا يتبعه الفن والمجتمع ..إلخ
واكيد مش كلنا عارفين انها فزاعة ...
انت عارف يا محمد لسه في ناس مصدقة حاجات كتييييير احنا بعتبرها مسلمات ..
يعني انا فاكرة اني قريت تقرير لصحفي اجنبي اعرفه شخصيا نزل عمل تقرير عن الانتخابات .. واكد لي ان بعض الناس في الشارع قالوله انهم بيثقوا في النظام الحالي وان الحكومة فعلا بتعمل اللي عليها .. وان عددنا الكبير هو السبب وهو يعني الريس هيعمل ايه ولا ايه ؟؟@!!!!!!
يا محمد لا يمكن ان ننكر ان 90 في المية من البلد تقريبا عايشة في مية بطيخ سياسية
معذرة على تأخر الرد
فلم انتبه إليه الا اليوم فقط
شكرا يا ماريان لاهتمامك بالرد حتى وان كان متأخرا
اثرتى اكثر من نقطه ربما يصعب الاخذ والرد هنا فى المودنه لانه بانيه ان وقتك مش بيسمح بمتابعتها بصفه منتظمه
جايز فى فرصه تانيه
نقطه واحده قلت لازم ارد عليها هنا وهى فكر ةالاقليه
صحيح المسيحيين اقل عددا من المسلمين ولكن هذا لا يعنى انهم اقليه
اعتقد الاقليه لها تعريف محدد وليست مجرد قلة العدد
وهم طبعا ليسوا جاليه مسيحيه فى بلد مسلم
هم مواطنون كاملو الحقوق ولهم فى البلد كما لاى مسلم- على الاقل من وجهة نظرى عشان ما تقوليش ان ده مش واقع
حتى وان كان المسيحيين عندهم مشاكل فهم ليسوا اقليه
ليسوا جيتو يعنى
ولا ايه؟
ونكمل لو حبيتى
تحياتى
Post a Comment