Wednesday, June 18, 2008

الضوء اللي في آخر النفق .. ده عمى يا روح خالتك



تدوينة طويييييلة جدا كالعادة مش هتخسر حاجة لو مقريتهاش

ثلاث ايام من أم الاحباط المستمر على مختلف المستويات ..يعني احباط 3 طبقات واستك

حتى تنسيق النصوص الغبي اللي في بلوجر بيستفزني دلوقتي اكتر من اي وقت خصوصا وانا بحط بعد النقطة حرف عشان ماتنلقبش الجملة

حاجة بايخة قوي قوي

قطع اول--احباط رسمي:ا
في بيت العرب في يوم حر زي الزفت .. جلسنا مع مجموعة من البني آدمين من شوية دول في العالم ودخلت علينا واحدة ست لابسة ابيض بس مش في ابيض ..بدلة بيضا وشعر اشقر وعود نحيف..عرفت نفسها كمسؤولة مهمة خالص في بعثة الاتحاد الاوروباوي في مصر ..وعلى المائدة المستديرة جلسنا نلت ونرغي بما اننا في بيت العرب وجاء الدور على الست عشان تدلي بجردلها .. ولانها جاية من بلدها وتاعبة نفسها عشان خاطرنا ان المصريين المعفنيين اللي مش بنستحمى طلبت ان تعرف فيه كام مصري قاعد في الاوضة عشان كان فيه ناس من الهند وناس عرب والالوان مش واضحة .. اللي كانوا واضحين قوي كانوا بتوع اوروبا والافارقة المهم .. بدأت كلامها ولمدة 15 دقائق في تقريع مستمر للمصريين على مشكلة اطفال الشوارع رغم عدم علاقة المشكلة بموضوع الاجتماع ثم قالت ان الاتحاد الاوروباوي (كتر خير ابوه) تبرع لمصر بمساعدات قدرها 40 مليار يورو عشان مصلحة البلد دي .. قالتها كده فعلا دي ترجمة حرفية (مصلحة البلد دي)ا وبعدين وهي تنظر في عين الكام مصري اللي قاعدين قالت (انتوا عارفين يعني ايه 40مليار يورو ..دول يبقوا قد ايه بالمصري؟)ا
وبعد عاصفة من الانتقادات والمناوشات وشبه الخناقات شملت انفعالا في غير مكانه من طرفي ومن طرف ضيفة اوروبية اخرى كانت اكثر جرأة وانفعال شتمت الست في وشها وانسحبت المسؤولة المهمة وسابتنا نهري في نفسينا!!!!!!!ا

انتهى اليوم البايخ ولاني اعرف ان ما اسخم من ستي إلا سيدي وانه ان الحكومات العار تجيب لشعوبها النعيلة
دعيت عليهم جميعا يحرقهم بأنضف انواع الجاز والبنزين (اللي مش لاقينوا)اذا كانوا اللي بيدوا اليورو والدولار ولا اللي بياخدوه


قطع تاني--احباط محلي ونصف محلي:ا

محاولات مستمرة لشيء من التنظيم تنتهي ببوادر سكر وضغط .. مع شعور باني اقوم بواجبي على اكمل وجه في عمل قررت التطوع لاجله اتصل بصديق وزميل لانفجر فيه واشرح له ازاي اننا بنهرج ومش بنشتغل ولا حتى بنص قلب ولا ربع حماس ..والمحصلة فشل تنظيمي مريع يهدد بانهيار ما لم يتم بناءه بعد



قطع تالت:ا
انتظار طويل ينتهي على ولا حاجة اكره الانتظار في كل حالاته ورغم ذلك علي أن انتظر كل شيء في حياتي
هامش:::ملعون ابو الصبر

بالامس كنت ارتب حاجياتي القديمة فعثرت على حقيبة صغيرة برتقالية اللون من القطيفة الخشن كانت تلك التي كانت صديقتي الوحيدة اهدتني اياها في احد اعياد ميلادي ثم لامتني واغضبها كثيرا اني لم اهتم بها واظهر لها فرحتي بالهدية ولم تراني ولا مرة احمل تلك الحقيبة وبهذه المناسبة التي هي بلا مناسبة اقول لها:ا -انا مرضيتش احرجك لان الشنطة فيما يبدو كانت من محل مضروب شيلتها مرة واحدة فانقطعت ودابت الخيوط بتاعة الايدين . ومرضيتش اقولك ساعتها عشان ما احرجكيش .....فهمتي؟؟؟

قطع رابع:ا

للمرة الخامسة في شهر واحد اقرر بمطلق حريتي اني احتقر مهنتي وابناء مهنتي جدا فيما عادا القلة القليلة منهم اتأكد للمرة المليون ان العمل مع المصريين والعرب من اسوأ واسخف ما يمكن وهي حقيقة تصيبني باكتئاب شديد كلما تأكدت منها فالعمل مع الصريين او العرب يعني لا نظام ولا احترام ولا كلمة ولا انجاز ولا عمل
فاعود حيثما انتمي مهنيا لاعمل مع من احترم ويقتلني الاحباط مرة اخرى

احباط اعلامي:ا
صرح اعلامي كان مقدرا له ان يكون بيت الحرية تحول إلى بيت الداخلية وشوية هشك بشك لزوم الترفيه الاعلامي يوسف جاهين عيان قوي وتامر أمين بيشحت عليه في التلفزيون في البيت بيتك ومصطفى بكري يؤكد على كلام تامر امين بان "الرئيس لو عرف واكيد هو بيتفرج لا يمكن ابدا الا ان يستجيب ويتدخل بقلبه الرحيم لانه تدخل في حالات قبل كده لناس اقل بكتير"ا فيلم (ليلة البيبي دول) من اسوأ ...بل تاني اسوأ فيلم اشوفه بعد كركر محدش استفز عقلي وحسسني انه بيستغباني للدرجة دي آل أديب ..الله يحرقكم بجاااااااااااااااااااز


هامش على هامش --حاجات محبطة::ا

-ان يصمم مخطوبان جديدان على عزومتك على العشا وحدك معهما لمدة 4 ساعات ويعتبران ان في ذلك متعة لك وانهم موجبين معاك

ن يقطع طريق سيارتك سائق سيارة آخر مبرشم ويخرج من سيارته ليقف امام كابوت سيارتك لمنعك من التحرك عشان هو عايز يرجع بضهره الساعة 3 الضهر في شارع رمسيس يوم التلات

-انك تكون عارف كويس وحاسس كمان انك تعرف حد كويس جدا وانك في نفس الوقت حاسس وعارف انك ماتعرفوش خالص ومابين كده او كده مش مرتاح انا على راي منير

-ان تعاني من يوم شعر سيء (ترجمة سيئة ) يعني شعرك منكوش وتكتشف في نص اليوم ان مش معاك توكة

-انك تشتغل 13 ساعة متواصل في يوم واحد من غير ما حد يقولك شكرا

-ان السايس بتاع المكتب بياخد منك 50 شهريا وسايس البيت بياخد منك 70 جنيه شهريا وسايس المكتب التاني اللي بتروح له احيانا بياخد برضه 50 جنيه شهريا عشان الركن كتسعيرة المنطقة وبعدين يقولوا عليك انت اللي غني

-انك تسوق عربتيك من الزمالك لوسط البلد 4 مرات اسبوعيا الساعة 2 ل3 ظهرا رايح جاي واحيانا اكتر وعربيتك تكون مش بتحب طعم الفريون وكل ما تملاه تسربه

-انك تكون مضطر تسمع واحد مهم بيقول كلام كبييييييييييييير قوي في شغلك قدام ضيوف وانت عارف كويس ان 99 في المية من الكلام اونطة رسمي

-ان اهلك يتضايقوا انك شايف متعتك الوحيدة كتاب وشوية قهوة ويبدأوا يسألوك مالك قاعد لوحدك ليه؟ا

-انك تشتري ديوان شعر لشاعرة شابة وتطلع حمارة والكتاب مليان اخطاء املائية ونحوية ومواعظ والشعر رديء جدا

-انك تحس فجأة ان كل الحاجات اللي كنت عارفها كويس قوي طلعت مش عارف عنها حاجة خااااااالص ومش عارف تعرف ايه دلوقتي وازاي؟؟؟؟؟؟؟؟؟؟؟؟؟ا

-ان كل المتع اللي بتحبها في الحياة مؤذية


-انك تروح ل7 دكاترة سنان مختلفين وكل واحد يقولك تشخيص مختلف ويوجعك اكتر وانت اصلا عندك فوبيا مرضية منهم

-انك تسمع من احد افراد اسرتك حكاية المفروض انها مذهلة بس انت مش مندهش على الاطلاق ولا حتى متأثر

-ان المحامين في باكستان بيفهموا ومحترمين وعاملين مسيرة بطول البلاد وعرضها لحد ما القضاة الشرفاء اللي رفدهم الرئيس يرجعوا ..
والاكثر احباطا ان المسيرة اللي ضمت اكتر من 20 ألف سيارة يستقلها المحامون قوات الامن الباكستانية ماعملتش حاجة خالص خلالها

-لما الشغالة تخبي ديوان احمد مطر تحت مرتبة سريرك لمدة 6 شهور ولما تسألها تقولك انها كانت خايفة ليضيع

-ان الصلاة اللي كان بيوجع قلبك ويطهرك من جوا ما بقاش بيعمل كده

-انك تحس انك كبرت والناس بتعاملك على انك كبير

-لما تحس ان كل الحاجات اللي كنت عايزها خلاص مابقتش عايزها بس كمان مابقتش عايز حاجة تانية


-انك تكتشف انك احيانا بتببقى غبي ومش شايف كويس

-لما تكون شايف وعارف الحاجة اللي في صالحك ومش عايزها

-انك احيانا تحس انك عايز تطفش من البلد رغم انك بتقول دايما انك بتحبها ومش عايز تسيبها

-لما تكدب على نفسك وتقول انك كويس

-لما تضطر تبقى سخيف عشان تقنع زميل ان دمه مش خفيف زي ما هو متخيل

-لما تسمع كلمة جامدة وموزة وشديييييد 89 مرة لمجرد انك مشيت في شارع التحرير لمدة 7 دقايق والاسخف ان كل واحد فاكر انه مهم وهو بيقول الكلام ده

-لما يكون مزاجك معووج وتبقى بايخ مع كل زمايلك بلا سبب


- لما تسوق عربيتك 3 ساعات وانت مضطر تسمع نجوم اف ام

-لما تشوف اعلانات ميلودي وتبقى فاهم ايحاءاتها القبيييييييحة جدا ومش عارف تفهم الناس اللي حواليك قد ايه دي قلة أدب


-لما تقرا تدونة طويييييييلة جدا وتكتشف انك مكنتش هتخسر حاجة لو سمعت كلام كاتبها لما قالك مش هتخسر حاجة لو مقريتهاش



23 comments:

Rivendell** said...

كان الله في عونك

صباح الخير يا مصر said...

القهوة العالية
****************
اراها ازمه نتيجة احباطات متكرره و متواليه....وهكذا يكون رد فعل الاشخاص المثاليين الذين يريدون ان تسير الامور بالمنطق و النظام

تماسكى فانت قويه بما يكفى

تحياتى

... said...

حاسة بيكي
ربنا معاكي

lastknight said...

حاله من الأحباط المتشابك المتغلغل .. بس أكيد بعد ماقريتى اللى كتبتيه فطسطى من الضحك.. فشيتى غلك فى الكتابه يعنى

عموما .. أجازه فجائيه و الرحيل بلا هدف ولا أى ترتيبات سوى ملابس احتياطى و شىء من المال .. أظنه حل مفيد فى تلك الحاله .. ربنا معاكى

بنت القمر said...

احلي حاجه في البوست ده
ان كان ممكن نعتبر ان حد ممكن يستمتع اصلا بمعاناه الاخرين
:(
ان في انسانه لحم ودم كانت مختبئه خلف ما رأته يستحق ان يتقدمها
!!
هي الان تقدم نفسها عليه وتنتصر لنفسها وتبوح بما في ذاتها
ولو لبرهه قصيره
او لتدوينه واحده
!!

جبهة التهييس الشعبية said...

ايه ده؟ مين طفى النور؟
وانا اللي بيقولوا عليا كئيبة؟
:)

Bella said...

عبرتي عما اريد ان اقوله

مش عارفة صراحة كل سطر انت كاتباه شايفة نفسي فيه

رغم ان التدوينة مرهقة نفسيا

لكن مريحة برضه

يعني فضفضتي لنفسك ولي معاكي

The Son of Man said...

اضم صوتى لصوتك واصرخ زى الغول وازعق واقول ..ملعون ابو الصبر

وامة كمان

^ H@fSS@^ said...

بلو
انا ملاحظة ان اغلبنا اذا مكنش كلنا مصابين باحباطات لها اول مالهاش اخر
و لها بداية حدوث لكن مش باين لها نهاية و عودة لحالة اقل ارهاقا
مش عارفة فيه ايه في الجو
و لا المية؟؟
ولا الدي دي تي اللي بيشمموهلنا هو كمان بقى مضروب

اما عن الصبر
فالله يخرب بيته
حاجة اخترعوها علشان يضحكوا بيها علينا و نفضل مسطولين لا نعمل حاجة و لا نعترض على شئ و نستنى سي صبر افندي يعدي يحللنا مشاكلنا
و زي ما بيكيت كتب في انتظار جودو احنا نالف و نقول في انتظار الصبر
كله واحد
و كله مش حيجيي

تحياتي و معلش
اصبري
:D
شفتي الغتاتة

karakib said...

مسئولة مهمه خالص في بعثة الاتحاد الاوروبي ... شعر اشقر و عود نحيف
مش انا قلت لك لما تقابلي واحدة بالمواصفات دي تدي لها تليفوني علي طول !! ليه كده تزعليها !؟ ليه
-----------
لا مفيش فشل و لا حاجة ... بس شوية صبر و كله هيبقي تمام :) ما تضايقيش نفسك
----------
كان المفروض تنزلي بالشنطة البرتقالي المقطوعة قدام صاحبتك ... كان الموضوع هيبقي اوقع ... و كان هيخليكي تضحكي مش تضايقي :)
---------
اما عن طبيب الاسنان فاصحاب المهنة دي بيصعبوا عليا
كل اللي داخلين لهم مكشرين و قرفانين منهم و مش عايزين اساسا يروحوا و جايين بالقوة و هما قاعدين طول النهار قدام افواه مفتوحه
مش بالذمة المفروض تكتبي عنهم قصة قصيرة علي لسان كبيب اسنان قاعد قرفان من انه محدش بيضحك في وشه و كل اللي داخلين له قرفانين منه و موجوعين جدا من سنانهم
---------
:) الحياة حلوة
و اللهي حلوة
بس مش اوي
هههههه

abderrahman said...

تقريبا.. أنتِ في منتصف الطريق إلى النرفانا
شهر من هذه التدريبات الروحية ستختصر الطريق، وستجديني هناك، في أرض النرفانا
في آخر النفق

bluestone said...

RIVEDELL**
:)
===================
صباح الخير يا مصر:
هي ازمة .. كل حاجة سليمة صحيح
بس مستقلة بذاتها :)
مش مثالية حقيقي
فقط رغبة في قليل من التوازن

اشكرك ع التشجيع

bluestone said...

بثينة:
:)
===============
الفارس الاخير:
بصراحة ضحكت وفطست من الضحك كمان
ماهي الكتابة نوع من انواع العلاج
بعد اسبوع بدء بصلف اوروبي وانتهى ببلطجة مصرية

ياريتني امتلك ترف الرحيل المفاجئ

Anonymous said...

-لما تحس ان كل الحاجات اللي كنت عايزها خلاص مابقتش عايزها بس كمان مابقتش عايز حاجة تانية

أكثر جملة حسيت فيها من اللى كتبتيه. لم أكن سأخسر شيئا كما قلتي لو لم أقرأ هذه التدوينة ولكني شعرت اني فضفضت اللى في قلبي بس بلسان شخص آخر .. يعني وفرت كتابة تدوينة :)

على فكرة البانر الجديد (القهوة) رائع ومناسب لجو ومواضيع المدونة

bluestone said...

بنت القمر:
لا تعليق ع التعليق :))
=============================
جبهة التهييس:
لا فيه اكئب منك بس انتي مش واخدة بالك :)

اللي طفا النور اول الاسبوع الست بتاعة الاتحاد الاوروبي
-=================================

bluestone said...

بيلا:
الكتابة فضفضة
نوع من العلاج
===============================

The Son of Man :
هو ده :)
==================================

bluestone said...

حفصت:
:)
انا مكنتش متخيلة ان فيه ناس كتير محبطين قوي كده
طلعت البلد كلها والبلاد المجاورة كمان محبطة

انتي عارفة ان المسرحية دي بالذات بتخنقني قوي .. والتخلف اني بقراها كتير جدا
وكل ما اشوف عرض مسرحي ولا اقراها كنص ابقى عايزة انط اقول للابطال
جودو مش جاااااااااااااااي
جودو مش جااااااااااااااي

بس مش فالحة اقولها لنفسي :)
اصل لسه عندي شوية امل في جودو
==================================
كراكيب:
:)))))))))
بس
مسؤولة الاتحاد لو شفتها مش هتقول كده خالص
الست من كتر ما بتبص من طرف مناخيرها مناخيرها اتلوحت
-------
هو كان لازم اقولها فعلا ان الشنطة رخيصة وباظت بسرعة بس هي كانت الله يرحم ايامها شخصية حساسة جدا ومكانش في داعي للغلاسة تبقى جايب هدية لحد ويقولك الهدية مضروبة
--

دكاترة السنان بكرهم بكرهم بكرهم
----------

ابقى اكتب انت هبقى اكتب عنهم لما اتعالج الاول
---------
الحياة حلوة في شرم بس
==================================
عبده باشا :
نبي النيرفانا المعاكسة
ياريت ماوصلش لنهاية النفق
ولو وصلت ياريت ماتكونش انت هناك

:)

حاجات جوايا said...

هى صحيح تدوينة طويلة
بس جميلة

وعندك حق فى حكاية تنسيق بلوجر
حاجة تضايق فعلا

بس كنت عايزة اعرف لما انت مش بتحب نجوم اف ام بتسمعها ليه ؟ مفيش فى العربية كاسيت ولا ايه ؟

دمت بخير اخى

سالى

Anonymous said...

بس انا اتقلبت على بطني من الضحك
ومن الوجع
الوجع اللي جايبلي إحباط


مش ممكن
انا كنت ناوية اكتب
معرفش لو هقدر بعد التدوينة دي.. بس هحاول

وحشتيني

shiro said...


لما تحس ان كل الحاجات اللي كنت عايزها خلاص مابقتش عايزها بس كمان مابقتش عايز حاجة تانية


وعلى فكره إنتى غلطانه أوى فى حاجه : أنا كنت هخسر كتير لو ماقريتش التدويه دى

شكرا على المشاركه , و يمكن يكون فيه بعض العزاء لو قلتلك إن همومك هى هموم ناس كتير

م said...

انا قريت التدوينه للآخر برغم التحذير اللى فى الاول ده
انطلاقا من مبدأ ألا شئ عندى لكى أخسره
ايه رأيك فى الكلام الكبير ده
وكمان عشان انتى عارفه رأيى فى كتابتك فى الحاجات الشخصيه والانسانيه دى وقد ايه بتعجبنى
حاجات كتير من اللى كتبتيها بتتكلم عنى:(

Anonymous said...

or it can be a freight train coming your way..

أُكتب بالرصاص said...

بصراحة \

كنت هأخسر كتير
لو ما قرأتش