طلب حضور

طلب حضور

على البدن المعاند انه ينزل من حصاره
ويغوص في تمتمات الروح
ويواصل الحزن الشفيف
بنفس الصبر

على الروح المعافرة
بنفس الرقة
توصلني من طرف السما بالخيط
وتبكي بحرقة لحد ما تحن السما
وتعيد لها نعمة بكاها بجد

للبدن والروح
انهم يرجعوا
ماعادش فيا احتمال
اني افضل وحيد

زي الوقت والسكر كان هنا..ومكانش:

واللي بيني وبينك ..ومش مالكه
ده حتة سكر
كان ممكن في ليلة واجعاك زي الليلة دي
يعصر لك عنب احلامه
ويخلي خطوتك في الرقص
أنعم
كان ممكن في ليلة حساك ..زي الليلة دي
يغطيك بالقطيفة
ويتقاسم معاك
كل اللي كان حيلة قلبه
كان ممكن في ليلة تشبهلك.. زي الليلة دي
يحط حصوة
في عين كل اللي شافك
ولا سألش عنك
كأنك قرش قديم
او امنيات بتموت


صلاة:
من غير تفاصيل زيادة
او تعريجات
او إزاز مكسور في رجليها
من غير مطالب عشان وقفة المراية
من غير ماتحسب
هتقول ايه لروحها
عشان تعرف تنام
من غير زمبلك
او اعلانات نيون
او سيرك
من غير كل دول
هتعرف تبتسم وتبكي


من ديوان أحمد الفخراني
ديكورات بسيطة

ملحوظة:اسماء القصائد مختلفة بالديوان