بنك فقر .. كلاكيت تاني مرة

كثيرا ما نرغب في ان نسمع من الاخرين المحيطين بنا ليس الحقيقة ولكن فقط ما نرغب في ان نسمعه كأن تسألي اصدقائك مثلا ( هو انا تخنت شوية ) ولكن في الحقيقة لا تريدين الا ان تسمعي عبارات من عينة ابدا ازاي انتي كده كويسة .. لا ما تخنتيش ولا حاجة .. إلخ

او ان تسمع من صديقك حينما تسأله (هو انا اتصرفت صح مع المدير) ان يقول لك (طبعا اللي عملته عين العقل)ا طبيعي .. جدا ان نرغب في ان نسمع فقط من الاخرين ما نريد ان نسمعه حتى لو ادعينا رغبتنا في معرفة الحقيقة

وهذا ما حدث معي بالتحديد في زيارتي الثانية لبنك مصر فقط اردت ان اسمع ما كنت اتمنى ان اسمعه

كنت قد عقدت العزم على عدم العودة ابدا للتعامل مع بنك مصر الوطني بعد تلك الواقعة ولكنهم اخبروني ان البنك تحسن كثيرا عن السابق وتم تطبيق أحدث النظم وافتتاح فروع جديدة متميزة في جميع انحاء الجمهورية ..بل انهم افتتحوا خدمة للتعامل مع الجمهور عبر الانترنت وايضا خط ساخن ودلع على مستوى

قلت طيب برضه مش كتير على ربنا صحيح العلقة اللي فاتت لسه معلمة بس معلش .. نديهم فرصة تانية دول برضه مننا وعلينا

ولاني بس كنت عايزة اسمع بس اللي عايزه اسمعه واللي بيؤيد رغبتي في تشجيع مؤسسة وطنية تعتبر الاقدم في المنطقة ولكي لا انضم لطوابير المنادين بكل ما هو غربي بدون تجربة

ولكني لا اتعلم ابدا ولذلك أحبط دائما

توجهت صباح امس إلى البنك لاجراء بعض المعاملات المالية واستخراج ما يعرف باسم كشف الحساب . ولرغبتي في انهاء المعاملات في اسرع وقت قلت مفيش احسن من المركز الرئيسي ..وهو البرج الضخم الكائن في شارع محمد فريد بوسط البلد .. أي مشكلة حلها في المركز .. لما بتروح لاي فرع وتحصل مشكلة يقولك روح للمركز الرئيسي دخلت البهو الضخم ..صالة واسعة شبه محطة مصر
يظهر ان ده طابع مميز لكل المؤسسات المصرية الحكومية ...احنا شعب نحب الوسع

وطبعا مفيش يافطة واحدة توحد ربنا تفيد بإيه بيروح فين ولا انهي شباك بتاع ايه بالظبط

حاولت ان آخذ رقما اليكترونيا من الجهاز المثبت عند المدخل وهو الجهاز الذي تسحب منه ورقة صغيرة مثبت عليها رقم يوضح لك دورك زي تلاجة الجبنة في السوبر ماركت.. ولكن الموظفة الجالسة على الباب قالت لي ان الجهاز لا يعمل .. لا لانه معطل بس هم بطلوا يستخدموه !!!!!!!

توجهت الي احد الموظفين خلف النوافذ الزجاجية السميكة .. توسمت خيرا بعد ان استقبلني بابتسامة فطلبت منه معرفة مكان استخراج كشف الحساب

فدار ذلك الحديث
الموظف: حضرتك عايزة ايه بالظبط
انا: كشف حساب
الموظف: ليه عايزاه ليه؟ا
انا: !!!ا
الموظف : الغرض منه ايه عشان نقدر نطلع لك الورقة المظبوطة
انا: مطلوب لاغراض العمل
الموظف: حضرتك تبع الفرع بتاع حي ....رقم الحساب بيقول كده
انا: ايوة
الموظف: حضرتك ساكنة هناك اكيد .. دي حتة حلوة قوي..اجدع ناس..انما الشغل عايزين ليه كشف حساب
انا: هوففف .. ميرسي . بس فين المسؤول عن اصدار كشف الحساب
الموظف: شايفة حضرتك الشباك اللي قدامنا .. روحي هناك واسألي
انا: جرررررررررررررررر


انتقلت للشباك الاخر وسألت الموظف 2
انا: عايزة اطلع كشف حساب
الموظف2: طبعا حضرتك رقم الحساب كام
انا: .......ا
الموظف2: فين البطاقة البنكية حضرتك
انا: نعم ؟!!!ا
الموظف2: ده كارت ورقي كان لازم تستلميه مع فتح الحساب
انا: والله محدش قاللي على حاجة زي دي في البنك
الموظف2: كان المفروض يقولوا .. معلش حضرتك هتروحي لاستاذ صلاح اللي في الشباك اللي هناك وهو هيساعدك


انا وصلاح والورقة:ا
انا: لو سمحت انا عايزة ....كيت وكيت
صلاح: آه .. هو حضرتك كان لازم يبقى معاكي الورقة (الكارت الورقي) بس معلش احنا هنتصرف ..امضي الورقة دي
انا: ماشي.. كشف الحساب بقى
صلاح: بس هو معلش انا آسف اصل السيستم عطلان ..معلش

ثم غاب صلاح ل5 دقائق تحدث فيها مع 4 اشخاص بشكل متقطع وفي وقت واحد لم يحل لاي منهم مشكلته واثناء ذلك 3 مكالمات تليفونية
آه نسيت اقولكم ان صلاح ده مسؤول خدمة العملاء في بنك مصر

انا: يا استاذ..يا باشمهندس ..يا سطى
صلاح: ايوة ايوة ..معلش السيستم عطلان والله كان نفسي اساعدك .. تعالي يوم تاني
انا: ماينفعش .. الورق مطلوب بكره الصبح
صلاح: طيب ومابتجوش بدري ليه تخلصوا حاجتكم ا
نا: افندم!!!!!!!!!!!!!!!!!!ا
صلاح: خلاص تعالي كمان ساعتين .. اي خدمة تانية ؟ بنك مصر في خدمتك

!!!!!!!!!!!!!!!!!!!!!!!!!!!!!


ساعتين ورقية وصلاح
وبعد اكتر من ساعتين من الوقت الضائع عدت مرة اخرى لصلاح

انا: ياترى السيستم اتصلح
صلاح: جزئيا
انا: يعني الورقة بتاعتي هتطلع ولا ايه
صلاح: طبعا يا فندم احنا في خدمة عملائنا مدام رقية هتعملها حالا
انا: يعني اروح لشباك الست رقية
صلاح: مكتبها اهه (واشار الي امرأة تقف بجواره تماما في نفس المكتب كانت تنظر وتبتسم)ا

اخذت خطوة لليسار .. ونظرت إليها .. وطلبت مني ان احكي الموقف بالكامل مرة اخرى

وقد كان .. ولكن تلك المرة اخرجت من الطابعة ورقة وقالت لي: الورقة دي زي كشف الحساب بالظبط بس لازم تختميها من الفرع اللي جنبينا

انا: ليه يا مدام .وليه ماتتختمش هنا. ؟ هو مش ده الفرع الرئيسي؟ طيب هو مش اللي في الدرج ده ختم ؟؟ا
رقية: ايوة بس لازم تختميها من الفرع القديم
انا: ا!!!!!!! يعني ايه وليه ؟؟؟؟؟ا

وهنا تدخل صلاح وبابتسامة صفراء: لا ازاي يتختم حالا هنا مخصوص عشان حضرتك

انا:طيب هو لما ينفع تتختم هنا ليه عايزين تبعتوني طيب؟؟؟؟؟؟؟؟؟؟؟؟؟؟؟؟ا

واخرج من درجه ختما وختم الورقة واخذتها وانصرفت ومازال السيستم معطلا
==================


معلومات على الهامش:::::زي حاجات كتير بقت على الهامش

-انشئ بنك مصر على يد طلعت حرب باشا سنة 1920 .

-انشئت المملكة العربية السعودية وعرفت بهذا الاسم في عام 1932

-تم اعتماد اول نظام الحكم في دولة الإمارات العربية المتحدة في دستور تم التوقيع عليه في 2 ديسمبر 1971

اللي هيقوللي أم الدنيا تاني هاخده على أم راسه

!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!