القهوة العالية

سامحني يا صاحبي عشان مش بايدي

قريت كلام كتير جدا .. وآخر اخبار المهانة والزل اللي احنا عايشينه بعد ما البطش تعدى كل الحدود .. والبني آدم في بلدنا بقى ببلاش .. بقى حاجة مكملة مالهاش لازمة ممكن يستغنوا عنها في اي وقت .. ولا في حقوق ولا نيلة .. وافتكرت رد ضابط امن على إحدى ناشطات حقوق الانسان لما سألها عن هويتها وقالت له حقوق إنسان .. قالها الضابط .."حقوق .. مش لما يبقى في زفت الاول".

من يومين بحاول افكر اكتب ايه .. كل كام ساعة افتح المدونة ومكتبش ولا كلمة واقفلها تاني يظهر على رأي مالك (اللي دايما بقوله منير) ان كل الكلماء صارت حمقاء .. اتصلت بكل اللي اعرفهم مفيش فايدة .. مش عارفة اعمل حاجة ولا اعرف حاجة .. احساس بالعجز مزعج جدا ...

قريت كلام ناس كتير كتبوا عن آخر اخبار اخواتنا المعتقلين بتهمة الحرية .. ولما عرفت أخبارهم اعتقالهم ذهلت .. رغم اني عارفة ان مالك من المشاركين في الاعتصام إلا اني لم اتخيل ان يقبض عليه ..

صديقة عزيزة قالت لي "اول مرة يقبض على شخص مقرب مني". ربما هي دي المشكلة .. معرفش .. لكن ذهلت .. مش مصدقة .. يقبضوا على مالك؟؟؟؟؟ ليه؟؟؟

ده كل اللي بيعمله شوية هتافات .. كلام يعني .. هو الكلام بيضر حد ؟؟ حاولت مرارا ان اتصل به او باي حد يعرف اي حاجة ولكن فشلت ...

مقدرتش اخرج من دماغي كل صور المعاملة في اقسام الشرطة والسجون والتعذيب والحكايات الفظيعة اللي بنسمعها ونقراها واللي شفناها في الافلام العربية القديمة والجديدة خيالية ولا حقيقية بس هي دي الصور اللي مش راضية تفارق تفكيري .. خفت من التخيل .. وبكيت .. خفت من حاجات كتير .. كل علاقتي باقسام الشرطة لا تتعدى استخراج الاوراق الرسمية .. وغالبا ما يصحبني والدي حتى لا ادخل القسم لوحدي .. لم اتخيل ان بداخلنا كل هذا الكم من الخوف ...

وبعدين؟؟؟

ولا حاجة .. محدش قادر يعمل اي حاجة ...

ده كان لسه معانا من كام يوم .. ضحكنا واتكلمنا وزعقنا وهتفنا كمان .. مالك صديق عزيز وهو اول من قدمني لعالم المدونات .. وانا مدينة له بالكثير وان كان لا يعلم ..

-- حاولت اتصل بيه او اكلمه لكن تليفونه مقفول وده متوقع .. فكرت اكتب له رسالة .. هتوصله قريب ان شاء الله

--

عزيزي مالك . . لا منير

مش قلت لك خلي بالك ؟؟ ماتندفعش عشان الجو متوتر جدا اليومين دول ؟؟

الناس مش حاسة يا مالك .. محدش عارف حاجة ..

سواق التاكسي اللي وصلني البيت قاللي "العيال دي عايزة ايه ؟؟ هو ايه المشكلة اساسا ؟؟ والقضاة مالهم ؟؟"

وبعد ما شرحت له القصة كلها لانه أصلا مكانش فاهم اي حاجة قاللي "يعني هما يقدروا يعملوا ايه؟؟ هم بيستعبطوا؟ محدش يقدر يعمل حاجة ؟؟ الناس الكبار هما بس اللي يقدروا .. هم فاكرين يعني لما يزعقوا للصبح حد هيعبرهم ؟؟". قلت له "يا عم الحج هما يعني بيتبهدلوا عشان مين؟؟؟ مش عشان الحال يتعدل في البلد على الاقل بيحاولوا ؟؟". قاللي "والله صاعبانين علي بس هنعمل ايه؟ اهم اتقبض عليهم".

قلت له "عشان كانوا 30 بس .. لو كانوا 300 ولا 3000 مكانش حد عرف يقبض عليهم ولا هيلاقوا سجون تلمهم".

تفتكر فيه امل ...؟؟؟ بتضحي عشان ايه ؟؟ فاضل ايه يستاهل؟؟

انا متأكدة انك هتخرج اقوي لانك كنت مستعد للي حصل ..

على فكرة عمرو هو اللي قاللي انهم قبضوا عليك .. دكتور بلوة رقم واحد بتسلم عليك كتيير وبتدعيلك يارب تكون بخير ..

واحشني جدا يا منير ,,

سامحني يا صاحبي لان كل اللي اقدر عليه كلمتين وبانر .. ويارب تكون كلمات ليست كمن سبقوها حمقاء !! على الاقل كلماتك لم تكن كذلك ..

البلوة رقم اتنين