Friday, June 09, 2006

مولد سيدي الكاس اهو حان.. بين الوطني والاخوان


وينطلق اليوم مولد سيدي الكاس ..
الذي يطل على جموع الشعب الغلبان في هاذي الاوطان في تلك الايام الميمونة ..
ولا ناقة لهم به ولا جمل ..
ولكن الكل مجذوب والحمد لله
وبعد فشل مداولات الوطني الهمام مع الحاكم بأمر الزيت الشيخ يا شيخ!
الذي انبرى واتلوى وتمنع وتبرطع ورفض
اسعاد جموع المجذوبين ..
فقرر الوطني وطني وبطنطن انه لن يستسلم لتعنت قوى الشيخ
والخضوع لامارات الايه آر تي ..
واكد انه سيبث فعاليات المولد في الساحات والميادين لجل المجذوبين
خاوي الجيوب المساكين من المواطنين اهالي اكبر صفر في العالم يا كرام ..
لان في الرياضة افادة ..
ولازم نساند ونؤيد البرازيل في كفاحها المرير
في مسيرتها الطويلة نحو تحقيق حلم الكفاح ...
قوووووووم ايه ...
قام الاخوان مدعمون بكل نداءات الجهاد
وقرروا ألا يفوتوها فرصة على الوطني
ليكسب بونت على حساب مولد سيدي الكاس
بينما هم يطلعوا من المولد بلا ناس ..
قرروا هما كمان يلبوا نداء الاوطان
ويعلنوا انهم هيبثوا فعاليات المولد
بتاع شعوب بلاد العجم والجرمان
وبلاد بتحكم المباريات بالكمبيوتر ..
ولا بتشوفش الصفر لوحدياته ابدا دايما جنبه رقم صحيح ..
وعليه فقد تقرر لصالح الوطن تأجيل كل امور الرعية والشؤون الحياتية
او اجراءها في هدوء حتى لا نزعج انبساط محاسيب الكاس ..
وكل مولد واحنا مشتركين
في الايه آر تي طبعا

9 comments:

She said...

مش عارفين يتاجرو بايه ولا بايه

bluestone said...

بالعكس يا شيماء .. هما عارفين يتاجروا كويس قوي .. بيتاجروا بينا وبعجزنا وفقرنا وخيبة الامل ..
وبالهبل

Anonymous said...

ما إحنا قلنا كفايه إحتكار
كفايه تفاهه
كفايه كأس عالم

Anonymous said...

حلوة :). عجبتنى لغة السخرية بتاعتك

admin said...

السخرية مش فى محلها

اقولك لية لان الوطنى غلطان حتى لو عمل الللى

همة المسؤولين واهى فرصة يلهوا الناس عن المعقلين والفساد وخلافة وكأنها منحة من ابوهم لينا
هو نقل كأس العالم دا مش مهمة الحزب الحاكم؟؟ وحكومته
لما يتنيل بخيبة كدة وميعرفش ينقلها فاكر انه هيضحك علينا بكام شاشة عرض

اما الاخوان فانا رأى ان زيهم زى اى معارضة تانية
وان النيل من سمعتهم مش لمصلحة المعارضة الا لمصلحة واحد بس رفعت السعيد اللى على طول الخط ضد اى حاجة اسلامية على فكرة انا مش اخوان بس بتغاظ من رفعت السعيد لانة افكاره هو وشلته ضد كل حاجة اسلامية

مجرد وجهة نظر

محمد السيد..مش حاسكت said...

مش عارف طيب ...ايه اللي فيه يتهاجم عليه الإخوان دلوقتي ؟
ياجماعة مفيش حد مستفيد من الكلام ده غير النظام ونادي أصحاب المصالح " الحزب الوطني سابقا وحاليا "
يبقي ايه لازمته كلام زي ده ...
وبعدين الرد موجود ..أمال ال650 معتقل اللي جوه السجن دول منين ؟؟ ماهم إخوان مسلمين ؟؟؟ يبقي مين الي بيضحي ؟؟
ساعتها حيكون كويس إن كل مجموعة ترد علي الثانية ؟

لا للتمديد ... لا للتوريث ... نعم لتعديل الدستور المصري

bluestone said...

انا لا اهاجم الاخوان وحدهم ولا حتى الوطني ,, ولكني ضد سياسة ومبدأ استغلال الفرص لتحقيق مكاسب شخصية .. لا اعتقد ان اي من الطرفين لديه ادنى اهتمام بكأس العالم وبثه للمصريين الفقراء او الذين لا يملكوا اشتراك في الايه آر تي او حتى اللي معندهمش ولا دش ولا حتى تلفزيون ..

كل طرف حابب يظهر انه اكثر اهتماما برغبات الناس .. وده مش دايما صح .. وان كان صح ,, اعتقد ان فيه حاجات كتيييييير جدا اهم من كأس العالم ..

كما ضرب شيخ الايه ار تي صورة مثالية في استغلال الفرص والظروف اسوأ استغلال وبطريقة سخيفة فعلا .. وبصراحة يستاهل المصريين ينصبوا عليه ويمدوا وصلات اونطة ويتفرجوا عليها ببلاش كمان ..

انا شخصيا قررت اقاطعها تماما حتى لو ادوني عليها فلوس .. لاني فعلا بكره استغلال حاجة الاخرين لاي سبب من الاسباب.

Anonymous said...

طب أنا بهاجم الأخوان وبئول عليهم استغلاليين ايه اللي حمئك أوي كده يا سيدنا محمد هو أنت من اللي بيبوسوا يد المرشد
ولاهي محدش مستفيد من كلامك ده غير هما وهما والنظام وجهان لعملة وحدة
وابئى سلملي على مرشدك و فكره مايشتمش مصر تاني احسنلوه
هي مش سداح مداح

Anonymous said...

" لا اعتقد ان اي من الطرفين لديه ادنى اهتمام بكأس العالم وبثه للمصريين الفقراء او الذين لا يملكوا اشتراك في الايه آر تي او حتى اللي معندهمش ولا دش ولا حتى تلفزيون .. "

مع كامل احترامي, لكني لا اعتقد ان عدم اعتقادك ده يكفي كي نبدأ الإتهامات على حد عمل حاجة, في حين اننا كلنا محلك سر!


وبالنسبة للشيخ صالح, فانا مش شايف ان الراجل غلط في حاجة!, ده بيزنس ياجدعان!!.. والكورة مش حرام فيها الاحتكار لانها ماهيّاش سلعة أساسية لا نستطيع العيش بدونها!.. فكون حكومتنا خايبة بقى ومعرفتش تجيبها عشان فلوسها كتير ( آل يعني مفيش اعلانات) او خلافه.. فدي مشكلتنا احنا مش مشكلته هو.. بالمناسبة.. كاس العالم اللي جاية واللي بعدها معاه كمان :)