شغل البتنجان للوصول لليعقوبيان

التعليق الوحيد اللي عندي على اللي حصل .. ورأي في الاوضاع هو :::

ايه القرف ده !!!!!!!!!!!!!!!!

من كام يوم دار بيني وبين صديقتي الانتيم هذا الحوار المتمدن ::

ل: هتروحي عمارة يعقوبيان ..

انا : (بكل ثقة) طبعا يا امي .. بتككلمي في ايه ..الفيلم جامد جدا .. وبعدين علاء الاسواني ومروان حامد وموسيقى خالد حماد ... الرواية لوحدها حاكية .

ل: طيب هايل .. نروح سوا .. نكلم البشرية (بعض الاصدقاء يعني) ونلم بعض ونروح سوا

انا : (لنفسي) هيبقى يوم جميل وممكن نقعد مع بعض بعد نناقش الفكرة الرائعة للفيلم وازاي ان العماره هي مصر وقضايا تانية كتير في الفيلم.. واكيد هتكون مناقشة ثقافية ممتعة .. !!! هتبقى وجبة فنية ثقافية حكاية ..

انا برضه بس ليها : هاضحي واتفرج على يسرا وعادل امام وامري لله لولا اني مابحبهمش .. بس كله يهون عشان خاطر مصر .. يووه قصدي عشان خاطر الفن !!

(وتم الاتفاق على الموعد) اما المكان فجرت بشأنه بعض مناقشات .. انتهت إلى القول الخالد لاحد اصدقائنا (شوف البنات عايزه ايه)

وجرى اختيار سينما في مكان انيق جدا .. يرتاده علية القوم وكريمة المجتمع والشيكولاتة كمان .. تجنبا لاي مشاكل من اي نوع .. ودرءا للاحتكاك بجمهور الدرجة التالتة .. خلينا في المقصورة ..

وبعدها بأيام .. قابلت صديقا وسألني اذا كنت ناوية اشوف الفيلم ..

وبنفس الثقة ,., انسحبت من لساني وقلت (طبعا .. لازم اشوفه ومش هيفوتني .. انا اتفقت كمان مع بعض الاصدقاء على اننا نشوفه سوا واتفقنا على انه يستنى ويغير جدول حياته ويجي معانا).

(واتفقنا ان يصحبنا صديقي في اليوم المتفق عليه.. وكلما زاد عدد اللي بيفهموا في مكان واحد ضمنا سهرة ممتعة وحوارات على مستوى .. واكيد الواحد هيسخن دماغه وهيكون فعلا يوم هايل )

وزي ما بيقول اخوتنا الانجليز

The more the merrirer

يعني بالبلدي .. اللمة حلوة برضك ..

بس .. وظللنا في الانتظار بلوعة المشتاق لدخول العماره بالسلامة زي اليتيم ما بيستنى يوم العيد ..

ولكن قبل ايام بدأت الغيوم تلوح في افق المتعة الثقافية المنتظرة ... تمثلت الغيوم في عدة مواقف ... قاومت خلالها بعنف حتى انهارت مقاومتي امام تيارات المجتمع الهادرة .. !!!

-في ليلة ليلاء كنت انا والست امي ربنا يكرمها قاعدين نشاهد التلفاز اللعين .. ولانها كانت تشعر بالنعاس ومش عايزه تنام قررت تتفرج على الست هالة سرحان في روتانا .. عشان متقدرش تغمض عينيها

وجلست انا اتململ واتبرم واظهر غيظي الشديد لكراهتي لهذه الظاهرة غير الصحية المسماة هالة سرحان في الصرح الاحتكاري الذي يثبت ان الزواج بين الزيت وبين الفن بااااااااااطل وانه زواج عرفي مهبب اسفر عن جنين مشوه اسمه روتانا ..

ما اطولش عليكم قولي طولي

وامي مش قادره تغمض عينيها اتى الفاصل اللعين .. وكان الفاصل في البرنامج هو اعلان عن فيلم عمارة يعقوبيان .. وبدأت امي تتابع باهتمام .. وقلت خير .. لسه هاستجمع شجاعتي وافتح بقي واقولها "انا رايحة اتفرج عليه يوم السبت اللي جاي" مع اصدقائي وبدون اي "شنب" من العائلة خالص وقعدت اجهز خطبة عصماء مفادها اني كبرت واني امرأة حرة مستقلة واطالب بالاستقلال التام وحقي الدستوري في الذهاب إلى السينما بدون (محرم)

وقبل ما انبري في الخطبة .. وجدتها فجأة تقول تعليقا على الاعلان (ايه القرف ده؟؟؟ ازاي يجيبوا الحاجات دي كده؟؟؟) ...

فانهارت كل صنوف المقاومة التي اعددتها بعد ان اكتشفت عبثية محاولاتي المسكينة ... ولكني قررت ان اخوض التجربة واعلنت اني هشوف الفيلم يعني هاشوفه وانطلقت من الغرفة متمنية قبولها بالامر الواقع.

وبنشوة المنتصرين بدأت ارتب جدول الاسبوع من حيث العمل وخلافه لافساح الوقت للقراءة اولا عن الفيلم وعن الرواية (لاني ماقريتهاش) والاستعداد لمشاهده الفيلم ..

فاذا بانتصاراتي الصغيرة تصطدم بالاحباطات الكبيره .. لتتحطم آمالي العريضاااااات على صخور والواقع المؤلم ...

اثناء مناقشة عادية مع صديقة عن الفن والسينما والموضة وشوية كلام بنات .. تطرق الكلام للفيلم المذكور اعلاه ..

فقلت ببراءة الاطفال (انا هاروح اشوفه بعد كام يوم مع العيال) .. ففوجئت برد هادر بعد ارتفع حاجبيها من الدهشة والاستنكار وسألتني سؤال مباغت (العيال مين ؟؟؟ )

قلت لها (اصحابي يعني .. بعض الاصدقاء من المهتمين بالفن والدراما وكده) فردت بنفس الحدة (ولاد وبنات ولا بنات بس؟؟) .. رديت ببراءة الحملان (لا يا حاجة ولاد وبنات)

فصرخت (ما ينفعش طبعا .. الفيلم كله مناظر زي الزفت وزيادة جدا مش هتقدروا تتفرجوا .. انصحك بلاش) ..

يا صباح الاحرااااااااااج ..

طيب مش مشكلة ... بلاها شنبات خالص .,.. طالما فيها احراج ادبي .. خليها بنات بس .. احنا مش شوية .. وعادي يعني .. تجنبا لاي احراج ...

فوجدتها صديقة أخرى بنفس القوة (لا طبعا مش هينفع ده كمان)

ليه يا جدعان (فكرتوني بقصة جحا وحماره !!!)

قالت (ازاي تروحوا بنات لوحدكوا .. ما ينفعش طبعا .. الفيلم فيه حاجات ومناظر مهببة وكل اللي راحه قال كده .. ازاي تروحوا بنات لوحدكوا مش هتسلموا من التعليقات المخلة جوا السينما .. وفيه ناس اصلا مش رايحة عشان الفن اكيد .. ده غير الموسم والعرب وجمهور عادل امام ...الناس دي مالهاش علاقة لا بالعمارة ولا بالاسواني ولا بالتايلاندي حتى .. )

بينما قالت زميلة أخرى وعلى وجهها ابتسامة صفراء (هو ده فايدة الجواز بقى !!)

يا ستي روحي اتلهي على جنب دلوقتي .. ده انا (في سري طبعا)

فلجأت كالمستجير من الرمضاء بالنار إلى زميلة من علية القوم كانت تعيش في بلاد الفرنجة حتى وقت قريب شافت الفيلم من يومين فقالت في إباء وشمم

Don't go I was very offended

الفيلم فيه حاجات كتير والناس اللي بتتفرج بهايم"

وبصراحة اغلب الكلام اللي سمعته منهم كان منطقي .. وده اللي زعلني اكتر .. حسيت ساعتها بكمية القيود اللي بتكبل البنت في مجتمعنا طالما مش معاها (شنب) قصدي راجل يعني اي كانت صفته ... وفكرت جديا تحدي القيود المقرفة دي .. لكن في النهاية اتأكدت ان ده مش ممكن يكون من غير خساير هتتمثل في قلة ادب وتلوث سمعي وبهدلة وخدش حياء كمان ويمكن اكتر ..

واضطريت وانا اجرر اذيال الخيبة .. ان اعتذر للاصدقاء ومنهم من تفهم الموقف وتقبله تفهما منه للواقع المرير حتى لو كان رأيه غير كده .. وتوقعت ان يتهموني باتهامات من عينة انهزامية متراجعة متخاذلة متخلفة ... والى آخره من الالفاظ اللطيفة ..

ساعتها حسيت فعلا اني مخنوقة ..

حاجة تقرف .. انا مش عضوة في اي جمعية نسوية ولا اؤيد حركات المساواة والكلام الملعبك ده لاني مبادئي في القضية دي مختلفة تماما ..

لكن بانزعج جدا من حجم القيود والحدود اللي بتفرض على البنت لمجرد انها بنت .. مش من حقها تمارس حياتها بحرية .. او تحس حتى انها بني آدم كامل .. دايما ناقصة ومحتاجة حاجة عشان تكمل الديكور الاجتماعي .. وتحظى بالاحترام الكافي من الاخرين ... حاجة تقرف ..

وفي النهاية تعاملت كعادتي مع الامر الواقع .. وسأتوجه ان شاء الله مساء اليوم لشراء الفيلم دي في دي من على الرصيف من عند الباشمهندس محمد .. وامري إلى الله .. بس يا رب الاقيه.

على الاقل قدرت اتحدى اللي قدرت عليه .. والبركة في الدي في دي .. ولا الحوجة للشنبات !!!