Tuesday, April 18, 2006

فليطلق احدكم النار على رأسي:::::::
بكيت وانا اقرأ مدونات جار القمر وشهادته الحية على الاحداث .. بكيت لاني حتى لم اندهش .. مع ان المفروض اتصدم مش بس اندهش ..
بقيت اتابع ردود الفعل بعد الحدث الصدمة .. ومش عارفة ليه كان الحدث ده بالذات صادم ربما لانه كان نتاج كراهية مجانية ... يعني بلا اي فعل مثير .. مجرد كراهية بيور .. بلا دافع ولا سبب .. مدونات وكلام وردود فعل ومنتديات وبرامج ومقالات .. والكل يحلل ويناقش ويفسر ويلتمس الاعذار والبعض يتساءل والاخر غاضب فقط والكثير والكثير لا يعرفون ماذا يفعلون؟؟؟؟؟؟
بعض مشاهدات ...
-حالة صدمة .. محدش عارف يعمل ايه ؟؟؟ محدش لاقي كلام يتقال
-العديد من المسلمين الاصدقاء يشعرون بنوع من المسؤولية النبيلة وتحول الامر لحالة من الاعتذار والتودد غير المباشر نتيجة هذا الاحساس بينما انبرى أخرون لتبني الموقف الدفاعي ..
-تدوينة موجعة من جار القمر
-كلام كتير يوجع القلب .. وكلام من صديق مصري في نيويورك (هو سيدنا مش هيتكلم ..؟؟ لازم يتكلم .. مستني ايه ؟؟ لما ندخل الكنيسة بتصريح؟ ونصلي في السر؟ لما يقتلونا جوا بيوتنا؟؟؟؟؟ احنا مش هانسكت)
-مايكل منير على الحرة .. كلام معقول وشتيمة في الاخوان
-صور توجع القلب
-الناس لسه بتسأل نعمل ايه .. تليفون من صديق قبطي .. (طيب والعمل؟؟ هم عايزين ينكدوا علينا كل عيد والسلام؟؟؟) ... صديقة أخرى (هم المتطرفين السبب ؟؟ هو احنا كنا عملنا ايه؟ الاخوان دول ولاد كلب) .. ويختم الاثنين كلامهما (هنعمل ايه دلوقتي؟؟؟) رديت على كل كلامهم إلا السؤال الاخير.
-الكنيسة::: حالة من الصمت والكل في انتظار سيدنا هيقول ايه ...
يوم (احد السعف) (عيد دخول السيد المسيح اورشليم): روحت الكنيسة وانتظرت العظة انتظرت ما سيقوله القس ولكن لا شيء ؟!؟!؟!؟!؟!؟
ايه ده .. محدش هيتكلم عن اسكندرية ولا ايه ؟؟ محدش هيقولنا نعمل ايه ؟؟؟
العظة قاربت على الانتهاء .. ابونا بتردد يقول جملتين للاشارة من بعيد لبعيد ويقول (الرب قال ها انا قد ارسلتكم كحملان وسط ذئاب ... خليكم حملان .. وفي يوم من الايام لما الذئاب تبلع الحملان الذئاب ستتحول إلى حملان) وبس ؟؟؟
بس يا ابونا ؟؟؟؟؟ يعني ما نعملش حاجة ؟؟؟؟؟ ولا حاجة ؟؟؟
معجبنيش الكلام ... روحت لابونا ..
-ازي قدسك ؟
-نشكر ربنا.
-نعمل ايه بقى يا ابونا .. قدسك مادريتش باللي حصل في اسكندرية؟
-دريت وربنا يتمجد ويحلها من عنده
-طيب يا بونا نعمل ايه يعني..؟؟ هنسكت..؟؟
-يدافع عنكم وانت تصمتون .. ربنا قال كده .. ولازم نكون حكماء .. ومن ضربك على خدك الايمن ..
-وماندافعش عن حقوقنا خالص ؟؟ ما احنا بناخد على قفانا مش بس على الايسر يا بونا .. عندنا حقوق لازم ندافع عنها.
------وهنا يتدخل رجل وقور من المتابعين للحوار ...(انت حماسية جدا زيادة عن اللزوم ده مش كلام .. دي مش أخلاقنا .. المسيحيين ودعاء .. وربنا هيجبلينا حقنا).
سكت وقلت آههههههههههههه طيب ...
وشعرت بصداع فظيع ..
-مساء الاحد .. اتصالات مع بعض الاصدقاء المسيحيين .. صليتوا فين يا جماعة .. ؟؟ كل واحد في مكان .. طيب في اي قسيس قال اي حاجة ؟؟
-لا
-يعني محدش قال نعمل ايه؟؟
-لا ابونا فلان قال خليكوا حكماء وصلوا
-بس؟؟؟؟؟؟؟؟؟؟؟؟؟؟؟؟؟؟؟
-بس
-وانتوا هتعملوا ايه
-والله ماعرف .. مش عارف نولع في البلد ولا نسكت ونصلي ولا نضرب المسلمين ونسخبى ولا نعمل ايه ....
وبرضه سكت .. ماعرفتش اجاوبه
-الاحد والاتنين .. مداخلات ومدونات ومكالمات مع بعض الاصدقاء .. والسؤال هو السؤال .. هنعمل ايه ؟؟؟؟
-مساء الاتنين ::::
بعد قراءة مدونة جار القمر الثانية بكيت .. وقبل ان اهم بالذهاب إلى الطبيب صدمت بكلام احدهم على احد المنتديات شعرت بعد ذلك انه مفيش امل وان المشكلة اعمق مما نتصور ..
وان الاربة اللي بننفخ فيها مسدودة أصلا ومابيدخلهاش اي هوا ..
شعرت بانفعال حاد .. وبعد من احساس كراهية الاخر الذي احاول السيطرة عليه وقمعه ..
منقول من كلامه ...
(حكاوي النصارى مرة أخرى داخل مصر --- فقط يريدون أن يقولوا كلمة أننا مضطهدونفهذا وحده قمة الانتصار . والجديد في الحادثة الأخيرة هو التظاهر مع وجود أعمال شغب من حرق سيارات و تكسير محلات ---الغريب و العجيب أن يتظاهر الأقباط و ينددون بالرئيس مبارك و يحملونه مسئولية الوضع الصعب الذي يعانون منه .. ماذا فعل حسني مبارك للنصارى بمصر حتى يغضبوا منه كل هذا الغضب؟1- اصدر الرئيس مبارك قانونا بجعل يوم السابع من يناير من كل عام أجازة رسمية في مصر الدي بها الدين الاسلامي هو الدين الرسمي، وهذا اليوم لم يكن عطلة رسمية في مصر من يوم أن خلق الله مصر على الكرة الأرضيه، لكن على يد حسني مبارك تم أخذ هذا اليوم عيد رسمي للدوله، وربما قال الناس لبعضهم البعض كل سنه و انت طيب2- تم تعديل قانون بناء الكنائس بعد ان كان ينص على موافقة رئيس الجمهورية – على الرغم من أن النصارى في مصر لا ينقصهم كنائس ولكنهم فقط يريدون إثارة المشاكل ليس أكثر- فقد كانوا يشكون من ان لدوله تعوق بناء الكنائس وكأن النصارى يبحثون عن كنيسة ولا يجدون، أو أن الكنائس لا تفي بأعدادهم و انها مزدحمة من كثرتهم بمصر!!وعلى الرغم من هذا تم تعديل القانون بواسطة مبارك من أجل أن يرضيهمولا تسأل في أي دوله في العالم أمر مثل هذا وفي أي دوله مسيحية على وجه الأرض يصدر فيها رئيس الجمهورية قرارا باعتبار يوم العيد عند المسلمين اجازة رسمية بالدوله أو يعدل من قانون بحيث يصبح بناء المساجد شيء عادي في البلد المسيحي!!3- التليفزيون المصري و قناة النيل الثقافية تنقل يوم الأحد القداس من أحد الكنائس على الهواء مباشرة و يتم إعادة القداس في المساء من أجل النصارىفي أي بلد مسيحي في العالم يتم نقل شعائر صلاة الجمعة في التليفزيون الرسمي للدوله؟.
ولماذا دائما نحاول ان نفعل أي شيء لكي يرضى عنا النصارى في مصر) ...
حينها شعرت بيأس شديد .. وايقنت ان الامر ميئوس منه .. لان الجهل انتشر والفكر المتطرف القائم على تكفير الاخر تسرب كالسرطان ..
ووجهات النظر بعيد جدا .. بل وتقف على اطراف مقص .... الحديث عن الحل يحتاج عشرات السنين وتقريبها مستحيل .. والهدنة والتهدئة اقراص مهدئة تزيد من تدهور الحالة ..
والوحدة الوطنية كائن هلامي يلبسه الكبار لاخفاء عورات الاخرين ....

10 comments:

The Eyewitness said...

I've my comment here http://theeyewitness.blogsome.com/2006/04/18/the-role-of-church/
because you stimulated me to write it.

arabesque said...

Bluestone
أجمل حاجة عجبتني إنك اتكلمتي في النهاية و ماسكتيش لأن الصمت مش هايحل حاجة. وكمان عايزة أقولك إن لسه فيه أمل لأن زي مافي المتخلفين اللي واحد منهم قال الكلام ده في منتدى ما فيه كمان ناس فاهمة كويس يعني ايه مواطنة و عايزة تشتغل مع بعض عشان بكرة أفضل. بلاش نيأس لأن البلد دي تستاهل أحسن من كده

bluestone said...

أرابيسك ,,
تصدق البلد دي تستاهل اكتر من كده .. بس للاسف احيانا لما بتحارب في اكتر من جبهة بتتخنق .. الناس تايهة .. واحنا لسه معندناش ردود على كل الاسئلة ..

فيه نور في آخر النفق انا متأكده .. بس خايفة نتخنق او نتعمي قبل نهاية الطريق .. والاسوأ اننا نتعود الضلمة

حاجات ومحتاجات said...

مساء الخير يا بلو
في الاول عايزة اقول اني مسلمة. متفهمة جدا جدا مشاعر المسيحيين ومقدرة غضبهم. من حقكم تزعلوا لكن يا جماعة مش من العدل انكوا تقلبوا على كل المسلميين. احنا زيكوا مظلومين شفتونا احنا عايشين في قصور وانتوا في بلاعات؟

كنت عايزة اسئلك سؤال كمان
ممكن تنقلي لنا مشاعر المسيحيين حاليا؟ يعني بيقولوا اية على اللي حصل دلوقت؟ هل الموضوع هدي شوية ولا زي ما هو؟ هل بتكرهونا دلوقتي ونفسكوا تولوعوا فينا كلنا؟

احترامي لك :)

bluestone said...

حاجات ومحتاجات ..

اشكرك جدا على التفهم والشعور النبيل ..
محدش قال ان المسيحيين قلبوا على كل المسلمين ولا حاجة ..
مشاعر الغضب والتظاهر كانت طبيعية جدا ومنطقية .. لكن لم تتسم بأي عنف على الاطلاق .. اللي اشعل العنف هما البلطجية وياريت تقري مدونة جار القمر وانت هتفهمي ايه اللي حصل ..

-كلنا بنعاني من القهر بدرجات متفاوتة .. لاننا كلنا مصريين فانت مصري اذن فلا كرامة لك ومالكش تمن لكن بتزيد حدة القهر لما الواحد يكون مضطهد بحكم جنسيته وبحكم دينه في قلب بلده .. لما حد يقولك انك ضيفه في بلدكوا هتعملي ايه .. امال الوطن يبقى فين بقى؟؟؟

-مشكلتنا المرة دي مش مع كل المسلمين وعمرها ما هتكون مع كل المسلمين .. التعميم ده وسيلة الحمقى وغير الواعيين ..
مشكلتنا النهاردة مع الجهل والتخلف والافكار المتشددة ومع التعامل الامني الاحمق فيما يختص بقضايانا ...
-لو رجعتي لكل مشكلة واجهها الاقباط .. في الكشح والعديسات والمنيا واسكنرية والبحيرة وغيرها .. هتلاقي الامن عنصر فاااااااعل واساسي في تدهور الموقف وازدياده سوءا .. فيحنما يحدث اعتداء وحرق منازل المسيحيين كلها في قرية صغيرة جنوبي القاهرة وإصابة عدد من الاقباط والاعتداء على الكنيسة والقس من قبل جموع غاضبة من المسلمين من سكان القرية بسبب أنباء ترددت عن احتمال توسيع الكنيسة القديمة .. فهو امر مزعج جدا ومؤلم للغاية .. والاسوأ والاكثر إيلاما هو ان يرفض مأمور المنطقة عمل محاضر لاغلب الضحايا ..

تفتكري لو كنتي مكان اي واحد فيهم ورحتي تعملي محضر والظابط رفض هيكون رد فعلك ايه؟؟؟
ولو الضابط المسلم ده عاملك كويس واهتم بشكوتك واتخذ الاجراء اللازم هيكون رد فعلك ازاي؟؟؟؟ مجرد سؤال

---
ردي على سؤالك الثاني :::
لا ما بنكرهش حد .. انا ضد التعميم بكل صوره .. اكيد في غضب جوانا تجاه المتسبب عن ده وتجاه تجاهل الحكومة حماية الاماكن المقدسة المسيحية ويمكن الناس البسيطة او الجاهلة يختلط عليها الامر لكن في النهاية وبعيدا عن الشعارات احنا عايشين مع بعض وبنشتغل مع بعض وفيه بنا صداقة متينة يمكن تتأثر لكن لا تتحول لكراهية .. فيه ناس كتير عاقلة ومقدرة .. والتعميم حماقة ,,

بالاضافة إلى ان تعليم المسيحية الحقيقية تدعو إلى المحبة الكاملة .. حتى محبة الاعداء مش الاصدقاء والجيران ..

bluestone said...

Dear youssra...
We should never give up the dream of better everything ...

-Don't ever lose hope or start thinking of leaving .. this is what the forces of terror and darkness want and work for ... I won't leave, I won't give till I die at least when I look at the mirror I can respect what I see.

حاجات ومحتاجات said...

لما حد يقولك انك ضيفه في بلدكوا هتعملي ايه .. امال الوطن يبقى فين بقى؟؟؟
------------------------
كلامك صحيح مية في المية يا بلو طيب لما يتقال لك انتي محتلة جيتي علينا قرفتينا في عيشيتنا؟

تفتكري لو كنتي مكان اي واحد فيهم ورحتي تعملي محضر والظابط رفض هيكون رد فعلك ايه؟؟؟
ولو الضابط المسلم ده عاملك كويس واهتم بشكوتك واتخذ الاجراء اللازم هيكون رد فعلك ازاي؟؟؟؟ مجرد سؤال
-------------------------
هتضايق جدا طبعا
بس اللي انا عايزة اقول لة ان المسلم مش بيتعامل معاملة درجة اولى والمسيحي معاملة درجة تانية. ما المسلمين معتقلين ومرميين في السجون وبيتعاملوا ازفت معاملة.
لكن انا فاهمة انك تقصدي ان لما الحكاية بيبقى فيها مسلم ومسيحي المسلم بيتعامل معاملة افضل. لكن يا بلو مين قال ان دة بسبب ان الضابط بيحب المسلم؟ مش يمكن دة جاي لة من فوق؟



بالاضافة إلى ان تعليم المسيحية الحقيقية تدعو إلى المحبة الكاملة .. حتى محبة الاعداء مش الاصدقاء والجيران
---------------------------
جميل يا بلو طبعا
بس مين بيطبق؟


تحياتي ليكي :)

Bent El Neel said...

لو سكتنا يقولوا جبناء و لو اتكلمنا يقولوا خونه و عملاء.
شوفى الكلام اللى كاتبه
Ikhnaton

bluestone said...

بنت النيل

فكرتيني بحكاية جحا وحماره وابنه ..
لما كان ماشي في الشارع راكب حماره وابنه ماشي جنبيه الناس قالت له يا جحا عيب عليك الولد المسكين انت راكب ومستريح والولد ماشي على رجليه
فنزل من على الحمار وركب ابنه ومش هو .. الناس قالت يا اخي انت معندكش زوق فين احترام الكبير أزاي ابنك يركب وانت ماشي عيب ..
فركب جحا وابنه الحمار .. الناس قالت له يا اخي انت ماعندكش رحمة الحمار الغلبان ده انت وابنك راكبين عليه انتوا معندكوش قلب ..

فنزل جحا وابنه مشيوا جنب الحمار .. الناس قالت له يا غبي طيب اشتريت الحمار ليه؟ عشان تمشي جنبه ؟؟

تفتكري لو انت جحا تعملي ايه ؟؟

-الفكرة مش مين هيقول ايه ؟؟ الفكرة في اننا اصلا نعمل ايه ؟؟

عزيزيتي احنا محتارين في الفعل .. رد الفعل مش هو القضية دلوقتي ...

--انا كنت لسه برد على اخناتون .. ان يكون لك موقف هيفرق كتير .. كلامي هناك ممكن يكون اوضح شوية

ابن السبيل said...

الأغلبيه المقهوره تقهر الأقليه المقهوره
هذا هو حال البلد
ومتهيألي مالهاش لازمه حكابة الأخوان ولاد كلب دي
ولا ايه