Saturday, April 29, 2006

ان مقدرتش تضحك ..

في أكثر الليالي ظلمة
واكثر الاوقات ضيقا واكتئابا
وهي لا تختلف كثيرا عن هذه الايام
اتذكر تلك الكلمات الجميلة
واظلل ارددها طوال النهار .. وتساعدني
كما وصفة كلامية لتسكين آلام الضيق

ان مقدرتش تضحك

ان مقدرتش تضحك
مدمعش ومتبكيش
وان مفضلش معاك غير قلبك
اوعى تخاف
مش هتموت هتعيش
وان سألوك الناس
عن ضي جوه عيونك مبيلمعشي
متخبيش
قلهم العيب مش فيا
ده العيب في الضي
انا مش عاشق ضلمة
ولا زعلت الضي
مسير الضي لوحده هيلمع
ومسير الضحك لوحده
هيرجع
مابيجرحش ولا يئذيش

6 comments:

فيها حاجة حلوة said...

احب اقولك ان انا فعلا بسبب ما حدث للجميع احس بالقهر والظلم ولكن كان جد ضديق لي يقول لي دائما خطط ثم سيطر ثم اتخذ قرارك ولا تاخذ قرار فعلا وانت منفعل هل احطات لرويتي انه من الممكن تجنيب الجميغ الاهانة وان نواجه في الوقت المناسب وشكرا علي تفهمك موقفي

bluestone said...

صدقني انا متفهمة موقفك جدا .. لان التعامل مع المواقف وردود الفعل الانسانية تختلف .. وانت تؤمن ان الفعل الهادئ المتعقل اللي يجيب نتيجة ولو بسيطة احسن من ألف فعل عصبي نتيجتهم مش مضمونة ..

انا متأكدة ان الانفعال يؤدي إلى قرارات حمقاء جدا .. لكن قول الكلام ده لواحد اعز اصحابه مرمي في السجن من غير تهمة .. ولا واحد عاطل بقاله 10 سنين ولا واحد ابوه معتقل بقاله 15 سنة ولا واحد مش عارف يتجوز وبيقرا في الجرايد خبر خطبة الامير جيمي وحكاياته الغرامية وازاي قابل الفرست ليدي المقبلة في باريس .. ولا موظف غلبان مش عارف يشتري كيلو لحمة في الشهر وكل يوم يقرا في الجرنال عن رجل الاعمال اللي هرب بكام مليار جنيه .. وحاجات كتير جدا ..

يعني رد الفعل الانفعالي قد يكون احمق لكنه مبرر جدا ...

وجهة نظرك تحترم طبعا .. وقد يختلف معها البعض ..
طيب نلاقي عندك يا باشمهندس اقتراحات للمهزلة اللي احنا عايشين فيها ؟؟؟ الاقتراحات العملية هي اول طريق التنفيذ او على الاقل اقناع الاخرين.

Anonymous said...

حلوة الكلمات ديه. دول لمين يا بلوروس؟

Anonymous said...

Ops, I mean bluestone :)

bluestone said...

حلوة الكلمات ديه. دول لمين يا بلوروس؟

مش اول حد يتلخبط ما بينا .. مالك سمانا البلوتين .. (والله واحشني بجد ابن الايه)

الاغنية كلمات شاعر اسمه محمد الناصر وغناء مطرب جميل جدا اسمه وجيه عزيز.

Anonymous said...

كلمات محمد ناصر
الحان وجية عزيز
تم غناؤها فى فيلم هيستيريا وغناها الممثل الراحل احمد زكى فى ميدان التحرير نفس المكان الذى اعتاد فيه المصريون على التجمع والتظاهر من اجل الوطن

الاغنية المذكورة كتبت ولحنت خصيصا للفيلم ثم غناها وجية عزيز بعد ذلك فى كل مكان وهى موجوده على سى دى من انتاج وزارة الثقافة