Wednesday, May 10, 2006

كلمتين مالهومش لازمة


اولا انا معرفش علاء .. خااااااالص
ومش صاحبي ولا اتناقشنا قبل كده ولا حتى اتقابلنا .. شفته مرة واحده بس بالصدفة .. ومعرفش ولا حد من الدفعة التانية من المعتقلين معرفش فادي ولا اسماء ولا فادي ولا ندى ولا كريم ولا احمد عبد الغفار ولا احمد عبد الجواد كمان ..
خلاص .. نفينا التهمة ؟؟؟ نتكلم بقى ..
فعلا انا معرفش حد فيهم معرفة شخصية .. لكن اعتقالهم كان فعلا بمثابة القشة الاخيرة .. منذ اعتقالهم انتابتني حالة شديدة من اليأس واحساس بالهزيمة والعجز غير محتمل ..
مفيش اي حاجة تتعمل ومفيش حاجة ليها لازمة اصلا ...
انزعجت جدا لاعتقال علاء .. لاني شخصيا كنت اشعر ان موقع علاء ومنال كان هو بقعة الضوء اللي كلنا كنا بنحاول نتنفس فيها بحرية .. كل يقول ما يشاء من اكثر الناس تحررا لاكثرا تزمتا من اكثرهم اعتدالا لاكثرهم تطرفا من اكثرهم ادبا لاكثر سفالة .. وكان علاء بحكم اشرافه على الموقع والمشاركين فيه يسمح بهذا كله ..
انزعجت جدا لمدى العنف التي تتسم به السلطة في التعامل مع الامر .. انزعجت لاعتقال فتيات لاول مرة .. واسلوب التعامل معاهم كما لو انهم اعداء مش شباب بيعبر عن رأيه (حتى لو كان غلط) بس بطريقة سلمية ...
وما اصابني باحباط حقيقي وشعور مرير بالهزيمة هو موقف الناس في الشارع واسر بعض المعتقلين وموقف الناس العاديين الذي كان اغلبهم لا يبالي اطلاقا بالامر بينما اكتفى آخرون بصب اللعنات على المتظاهرين وانتقادهم بدعاوى مختلفة كما لو انهم كان بيتظاهروا طلبا للافراج عن تامر حسني !؟!؟!؟!
وتساءلت اين المشكلة بالضبط ؟؟؟
هل الغلط فينا وفيما نؤمن ؟؟
ام الغلط في المجتمع كله ؟؟
هل هناك هدف او طائل من وراء كل ما نفعله ؟؟
هل سجن واعتقال وبهدلة منير وعلاء وفادي واسماء وندى وغيرهم كتيييييير ليه اي نتيجة ؟؟؟؟؟؟؟
هل يهتم احد ؟؟؟؟؟؟؟؟؟؟؟؟؟ لا اعتقد ... ولذلك كل الكلام مالوش اي لازمة ...........
يا علاء .. روح بيتكو لمنال مراتك اللي ماعرفهاش ..
يا مالك يا سالمة يا فادي يا محمد يا كل الناااااااااااس ربنا يرجعكوا بيوتكوا بقى
ومتخرجوش منها .. خليكوا جنب الحيط احسن .. لان مفيش فايدة

10 comments:

Geddo Iskandar said...

عارفة ...
أنا عمري ماشاركت في مظاهرة قبل كدة !!
يمكن وقفت وقفة أو اتنين في الكلية أيام أفغانستان و كنت بتلذذ و انا بدوس على علم اسرائيل اللي كانو مبلطين بيه شوارع الكلية عندنا ...
أقصى حاجة كنت بعملها اني أقرأ الدستور كل اسبوع و إني أنا و صحابي لما نتجمع نتناقش ف الي بيحصل ...
وبعدين عرفت المدونات دي صدفة ...
وعرفت علاء و منال و أيوب و مالك و بهية و ناس كتييير أوي
عمري ما قابلت حد فيهم و لا حتى كلمته ... كبيري تعليق ولا حاجة ..
مش بحب اللغة اللي عند علاء و حريته المبالغ فيها
بس فعلا اتأثرت قوي لما مسكوا مالك
لكن كونهم يمسكو علاء!! اللي لا أتفق معاه غير في انه بيحب مصر
كده زادت قوي
مش عارف ممكن اعمل ايه
انا ابتديت أعرف صحابي على المدونة بتاعته
بحاول أعمل نوع من التوعية انه في ناس بتتبهدل علشان تقول كلمة
لو اعتقلوه - لازم مايكونش اعتقاله ده بلاش
كلامي مش مرتب ... يمكن لحد مااعرف ايه اللي ممكن أعمله!

...


بس أكيد مش ناوي أمشي جنب الحيط

حاجات ومحتاجات said...
This comment has been removed by a blog administrator.
حاجات ومحتاجات said...

والله يا بلو جالي نفس احساسك
الواحد يقعد في بيتهم مع اللي بيحبهم وبيحبوة
ولا يشحطط نفسة ولا اللي بيحبوة!
بلا قرف

abderrahman said...

أنا زيك حزين على الاعتقالات ..
لكن ليا تعليق على الناس اللي بتقف تتفرج على المظاهرات .
عارفة ليه الناس مش بتأيد المتظاهرين..؟

مش مسألة ناس ماشية جنب الحيط ..
لكن المواطن نفسه يحصل في تغيير في جاره المؤذي.. في الصنايعي النصاب .. في التاجر الكذاب.. في الموظفين اللي مش شايفين شغلهم .

الناس مش حاسة إن فيه قانون طواريء أو إنه مفيش .

الناس عايزة حاجة تغير السلبيات اللي موجوده جواهم، حد يوجه اهتمامه ليهم .

أتمنى أكون وصلت وجهة نظري .

bluestone said...

اعتقد يا جدو اسكندر ان النتيجة اللي انت وصلت لها في النهاية (انك عمرك ما هتمشي جنب الحيط) انجاز في حد ذاتها .. انجاز يحسب للي ساهم في مساعدتك في الوصول ليها ..
انا كمان بختلف مع علاء كتير جدا في حاجات كتير .. لغة الموقع كانت صادمة جدا وافكار كتير مكانتش بتعجبني .. لكن كنت بحترم جدا احترامه لمعتقدات وفكر الاخرين .. كنت بستمتع جدا بمساحة الحرية الموجودة على الموقع ..
-مالك صديق عزيز وهو اول من قدم لي عالم المدونات وانا مدينة له بذلك واكثر ..

المشكلة اللي واقفة قدامنا كلنا دلوقتي السؤال المهبب (نعمل ايه؟) ..
من كام شهر كنا بنتكلم مع عدد من المدونين وبندور على اجابة ..
التظاهر مش هو الحل .. التظاهر مش اكتر من فش غل او طق حنق زي ما بيقولوا .. مجرد تفريغ شحنة غضب .. لكن كلنا عارفين ان مفيش اي مظاهرة في البلد دي هتنفع لان اصلا محدش بيهتم بالمظاهرات ولا غضب الناس واحتجاجها بيأثر على مراكز صناعة القرار ..

كمان الناس في الشارع القضية اصلا مش في دماغها .. الناس جهلة ومعندهاش وعي اصلا ..

ومن هنا يمكن تبدأ اول خطوات اجابة السؤال .. التوعية .. لازم نوعي الناس اللي حوالينا .. لو قدرت افهم او أأثر في شخص واحد بس ان شالله مرة كل شهر يبقى انجاز ..

ممكن نساند الناس بالتوعية بحقوقها .. يعني بدلا من التظاهر ممكن نكون جمعيات صغيرة يكون هدفها التوعية .. التوعية بالحقوق السياسية، بحقوق المواطنة .. توعية الناس بشكل عام ..
يعني مقدرناش نوصل لحاجة احسن من كده ..

ربنا يفرج كربهم ويفرج عنهم وعننا كلنا ..

bluestone said...

(والله يا بلو جالي نفس احساسك
الواحد يقعد في بيتهم مع اللي بيحبهم وبيحبوة
ولا يشحطط نفسة ولا اللي بيحبوة!
بلا قرف )

يمكن ده هو الحل الوحيد دلوقتي .. يمكن .. لكن اكيد بكره فيه حاجة تانية ... يا ريت .. لازم يكون في حاجة نقدر نعملها .. عشان نحس على الاقل اننا عملنا حاجة ..
لو فقدت الامل فيها .. هاسيبها وامشي .. وانا بكره الهروب ..

bluestone said...

(لكن المواطن نفسه يحصل في تغيير في جاره المؤذي.. في الصنايعي النصاب .. في التاجر الكذاب.. في الموظفين اللي مش شايفين شغلهم ).
كنت لسه بتكلم على اهمية التوعية .. الناس مش بس عايزة تغير السلبيات اللي جواهم .. الناس بتبص تحت رجليها ولمصلحتها وبس ..
احساس الانتماء بقى ضعيف جدا عند الناس .. الناس مش فارق معاها ..
عندنا فراغ سياسي من زماااان جدا .. ولان الناس مش قادرة تفرق بين البلد والحكومة بين الوطن والنظام بقى الغضب ضد الحكومة دايما بينتهي لشتيمة في البلد.

مفيش وعي سياسي .. احساس متناقص بالانتماء مفيش رمز او مشروع قومي البلد كلها تتوحد عليه .. مفيش سد عالي مفيش قناة مفيش حرب او خطر بنواجهه .. كلها كباري ومشاريع فاشلة .. مفيش حتى قيمة واحدة يتجمع عليها الناس .. قيمة الفرد زادت مقارنة بقيمة المواطن ..
فان لم تشعر بقيمتك كمواطن فعليك انك تبني القيمة دي لنفسك من خلال عملك الفردي .. لان مفيش انجازات عامة اتجهنا للانجازات الفردية باي تمن .. فلما تطلب من واحد عنده 5 عيال وموظف بيقبض 150 جنيه في الشهر انه يسيب شغله ويتظاهر عشان يطالب بإلغاء قانون الطوارئ عمره ما هيسأل فيك .. لانه اصلا مش عارف القانون ده بيأثر عليه ازاي ..

احنا مش هنغير اي حاجة .. احنا يادوب بنحاول على الاقل عشان لما نبص لنفسنا في المراية بعد 20 سنة من النهاردة ما نحسش بالسلبية واننا معملناش اي حاجة غير الشجب ومصمصة الشفايف

Anonymous said...

يا اخوانا
الراجل دخل السجن عشانا، وإحنا بدل ما نكمل مشواره نتخاذل ونقول ما فيش فايدة - لأ فيه وفيه ونص كمان - يكفي نشاط البلوجات وحركة الشباب...

في فيلم قلب شجاع - بريف هارت- لما كان ميل جيبسون بيسخن المعركة، قال إيه: ممكن تهربوا على بيتكم، وحتعيشوا فترات طويلة، لكن لما الموت ييجي وقته، وكل واحد فينا بيحط راسه وبيفكر في ماضيه - حيبقى نفسه في إيه، يعيش جبان جنب الحيطة، ولا يصرخ بأعلى صوته، أنا حر ولو حبسوني في سابع أرض، أنا حر شجاع ولو حبسوني وسط الجبناء...

لنصرخ مطالبين بالحرية !!!

bluestone said...

الراجل دخل السجن عشانا، وإحنا بدل ما نكمل مشواره نتخاذل ونقول ما فيش فايدة.

اولا الراجل ده (اللي هو علاء) دخل السجن عشان افكاره ومبادئه .. مش عشان الناس .. المسألة مش زعامة وانا قلت قبل كده انا ضد تأليه الاشخاص هو نفسه بيقول انه مش زعيم ولا حاجة ,, هو واحد بيعبر عن رأيه الخاص بحريته .. ومش لازم اي بني آدم يتعاقب لانه بيعبر عن رأيه ..

(- لأ فيه وفيه ونص كمان - يكفي نشاط البلوجات وحركة الشباب...)

احنا ماقلناش مفيش فايدة .. ساعات الواحد بيصاب بيأس او احباط لما يبقى مفيش اي تغيير وكل الاخبار والتطورات تغم .. والناس ولا على بالها ..
اصحاب البلوجرز بيكلموا نفسهم ويسمعوا نفسهم وبس .. يعني بيكلموا ناس متفقة معاهم في الفكر ومش بيضيفوا اي جديد .. لازم الناس اللي معندهاش بلوج ولا تعرف يعني انترنت اصلا تعرف حقوقها وتفهم الدنيا ماشية ازاي ..
وده مش حاصل في الواقع وعشان كده مفيش فايدة من جهود كتير مش منظمة ومش بتستهدف اصل المشكلة ..
الناس لسه مش منتبهة ومش فارق معاها اي حاجة او خايفة جدا زي كتير مننا يبقى ايه فايدة ميت مظاهرة الا اعتقال الف واحد ؟؟؟؟

(في فيلم قلب شجاع - بريف هارت- لما كان ميل جيبسون بيسخن المعركة، قال إيه: ممكن تهربوا على بيتكم، وحتعيشوا فترات طويلة، لكن لما الموت ييجي وقته، وكل واحد فينا بيحط راسه وبيفكر في ماضيه - حيبقى نفسه في إيه، يعيش جبان جنب الحيطة، ولا يصرخ بأعلى صوته، أنا حر ولو حبسوني في سابع أرض، أنا حر شجاع ولو حبسوني وسط الجبناء)

الحماس جميل جدا .. ودي احلى حاجة فينا كشباب ..
لكن صدقني مش منطق ابدا اني اعمل حاجة توديني في 60 داهية وماتفيدش اي حد ..
يعني انت لو رحت دلوقتي ووقفت قدام قصر الرياسة وقعدت تطالب بالتغيير وتتظاهر لمدة سنة قدام .. هتعمل ايه يعني ؟؟ هتتبهدل بدون هدف ومحدش هيحس بيك ؟؟
المجهود المفيد هو بس اللي ليه قيمة .. لو قدرت اتناقش واوعي شخص واحد بس احسن من نزولي الف مظاهرة ,,,

قلم جاف said...

سطرين بلو روز في الجون ، وكيفوني أكثر من جون عبد الوهاب في الإسماعيلي (بيب بيب أهلي(!

وأضيف :
احنا بنهدر آدميتنا زي ما الحكومة بتعمل..
بنستغل بعض زي ما الحكومة بتعمل..
النقد الذاتي فريضة مجتمعية غائبة في بلادنا..
احنا كمدونين ما خصصناش جهودنا لمحاربة الممارسات ، لانتقاد الواقع الاجتماعي ، والسياسي ، والاقتصادي والتعليمي والثقافي والإعلامي بشكل موضوعي ..
احنا كمدونين .. جند في المعركة الخطأ..