Sunday, October 29, 2006

أزمة وسط البلد ..قراءة في المدونات.. أفكار وحلول


انتظرت لاسباب عديدة قبل كتابة أي شيء يتعلق بالاحداث الاخيرة التي ذكرها مالك في مدونته ومدونات أخرى مثل جيمي هود ووائل عباس ... ثم السيل التدويني المتدفق من ردود فعل مختلفة ومتعددة .. فآثرت الانتظار
اولا لاني مالقيتش حاجة مختلفة اكتبها ثانيا لاني كنت اشعر بحالة شديدة من الغضب والغثيان بسبب ماحدث ثالثا كانت لدي رغبة في متابعة متأنية لردود الفعل التدوينية

وكنت قد قررت بعد عودتي لاتزاني وهدوئي ألا اكتب أي شيء خاصة وانه لن يكون مفيدا كثيرا مناقشة الامر في الفضاء التدويني دون مناقشة حلول .. ولن تجيد جميع الردود الغاضبة ومصمصة الشفاة وسب ولعن الجناة ومناقشة القضية .. حيث أشك كثيرا في أن يكون أيا من هؤلاء الرعاع الذين شاركوا في افعال مثل هذه او افعال شبيهة تحدث يوميا أن يكون لهم أي علاقة بالانترنت من الاساس فما بالنا التدوين


فقط كانت لي تلك الملاحظات أو المشاهدات .. التي جذبت انتباهي في محاولة البحث عن حلول .. فما جدوى الكلام بدون الانتهاء إلى حل منطقي في ظل حالة الخوف والغضب التي سيطرت على أغلبنا


1- انقسمت ردود الفعل ما بين مصدوم دفعته صدمته لانكار الحدث بالفعل وآخر لاعلان يأسه وعدم قدرته على استيعاب ما حدث وما بين قارئ للاحداث يرى ان الامر كان متوقعا وآخرين توقفت تعليقاتهم على توجيه السباب للجميع. الملفت للنظر هو تعليقات بعضا ممن يطلق عليهم جدلا (المتنورون) أو من هم على اطلاع على حركة التدوين الوليدة في مصر والتقنية المصاحبة لها .. حيث جاءت بعض الردود تلتمس الاعذار لمرتكبي الفعل وتلوم الفتاة أيا كان موقفها


2- تجلت ابرز عيوب الشعب المصري في مناقشة تلك الاحداث .. وابرزها عجزنا التام عن احترام الاخر حتى في الفضاء الافتراضي وعدم قدرتنا على قبول الرأي المخالف أو تصور الوضع من الجانب الاخر للشاطئ وهي مأساة بكل المقاييس .. طبعا بالاضافة لعدم القدرة على اتمام مناقشة بناءة نخرج منها بعمل ما او قرار ما .. مع فشل ذريع في القدرة على العمل الجماعي والتفكير الجماعي


3-برز جليا تركيز جانب كبير من التعليقات توجيه تركيزه الكامل على الدين واعتباره مصدر الحل الوحيد وان غيابه هو السبب فيما وصلنا إليه


4- تعامل البعض بالكثير من التشكك مع ما أورده مالك من قبيل دفن الروؤس في الرمال وانكار ان أمر مثل هذا قد يحدث في بلد الامن والامان والتدين .. ورأوا أن تكذيب مالك وغيره اسهل كثيرا من كشف عوراتنا وعلاجها. رغم وجود تقارير مستقلة تفيد بحدوث أمور مماثلة في أماكن أخرى بل اني ارى المصيبة الحقيقية في اعتبار ما حدث أمرا عاديا يحدث في كل مكان في المواسم وعيد بقى وكل سنة وانت طيب ... وبغض النظر عن مدى مبالغة مالك والاخرين (والذي لا أكذب ما قالوه ابدا ولا يمكن اغفال صدمتهم لما رأوا في تلك الليلة والتي دفعتهم للحديث بانفعال رآه البعض مبالغة)د

وما نسيناه هو تأكيد البعض على تكرار مثل هذه الاحداث وان البعض ومن بينهم رجال الامن وسكان المنطقة واصحاب المتاجر فيها يعتبرونها أمرا معتادا كل عام .. ولكن ربما رأى مالك ومن معه هذه الامور للمرة الاولى ودفعتهم الصدمة للكتابة بانفعال .. ولا يطلب منهم أحد الحياد على الاطلاق .. فنحن لا نتحدث عن أحداث وقعت في كوالالمبور مثلا)د


ولكن بغض النظر عن مدى خطورة ما حدث وان كان وقع كما وصفه من رأوه أو لم يحدث فارى أن الاهم من ذلك هو فتح باب النقاش في مشكلة التحرش ذاتها وهي كما نعلم جميعا مشكلة يومية متكررة لا تمر ثانية واحدة إلا وتشهدها شوارع المحروسة).د


ويبدو أن السادة الرجال لا يشعرون بفداحة هذه المشكلة لانه فيما يبدو ايضا أن الفتيات لا يتكلمن كثيرا عنها لانها منطقة حساسة بالنسبة للفتاة تستدعي ذكريات لا تخلو من ضيق وإهانة .. لذلك فبعض السادة الرجال لم يتمكنوا من ادراك ابعاد المشكلة .. بل ان بعضهم لا يرى في الامر مشكلة من اصله ....د


5- اختلفت ردود فعل المدونين كل بحسب طبيعة كتابته واسلوبه وتفكيره .. ولكن الحمد لله لم بظهر مدون حتى الان ليكتب أن الجناة معذورين ويحمل الفتاة الذنب باعتبارها المثير والمحرك الاول لغرائز الشباب.


6-تصادف مناقشة القضية تصريحات للمخفي (إمام سيدني )وهو وياللعجب مصري الاصل - قبح الله وجهه ورحله إلى القاهرة مخزى ذليل - بعد ما عرنا وفضحنا .. والتي ربط فيها بين المرأة (غير المحجبة) واللحم المكشوف .. ليؤكد نظرتنا المتخلفة للمرأة باعتبارها قطعة من اللحم متعددة الاستعمالات والشراء على الميزان


7- أهم ما في الامر وما دفعني دفعا للكتابة الليلة هو مناقشة الحلول ..دفمنذ يومين كنت أنوي أن اكتب عن رصدي لمشاعري حينما نزلت إلى وسط البلد ثالث أيام العيد (بحكم عملي الذي يقع في قلب وسط البلد) فكان ولابد التواجد في المنطقة. وكنت اشعر أثناء سيري في الشارع في الرابعة مساء بكم مفزع من الخوف والرهبة التي تحولت لدقائق إلى فوبيا دفعتني إلى ما يشبه الركض وقد ارتسمت على وجهي علامات ذعر تنافس تعبيرات أبطال اقوى أفلام الرعب.د

ولكني وجدتني أثناء حواري مع صديقة اسأل نفسي مرارا وتكرارا (الحل ايه؟؟) فبينما انشغل الكثيرون بالتفسير والتبرير ودراسة ظاهرة التحرش بشكل عام واوضح آخرون أهمية تربية المجتمع وجدتني اتساءل (طيب وعقبال ما يربوا أم المجتمع اعمل انا ايه؟؟؟) فقررت البحث قليلا في بعض التدوينات والردود عليها عن اقتراحات منطقية لمواجهة المشكلة. وكان ما وجدت ....د

--
ويلوم صاحب مدونة العدالة للجميع على الخطاب الديني الذي صور المرأة عورة وغواية للرجل وعدو لها وتسببه في تحريف تفسير الدين أو كما قال (صدقوني انا حزين ...لا اصدق او قولوا اريد الا اصدق ان يكون الدين نفسه الذي جاء ليحرم الفجور ويمنع الظلم ويبني الارض هو اداة الذين قاموا بتذكيره وتسليحه وتعنيفه)
بينما تعتبر مدونة ارحم دماغك أن الحل في تطبيق النظام الاسلامي كاملا (معرفش إزاي) ويقول (ليس الحجاب كافيا لحماية الأعراض، بل يجب أن يطبق النظام الإسلامي كله بشكل متكامل وشامل، قبل أن نحاسب الإسلام، وقبل أن نتناول كون الإسلام قادرا على حماية الأنفس والأعراض أم لا..أما قبل ذلك، فلا أعتقد أن محاسبة الحجاب هو من الموضوعية في شيء، فليس الحجاب إلا جزء من مليار جزء ربما، من نظام متكامل يهدف إلى حماية المجتمع)د
بينما نصحت زنوبيا بتفعيل أو استثمار لحملة كلنا ليلى لمواجهة المشكلة ومناقشتها حيث انها في النهاية مشكلة مجتمع تواجهها المرأة يوميا
بينما يرى الفارس الاخير الحل في مواجهة ظاهرة الاستمناء الفكري والثقافي والعقائدي وهي النظرية التي طرحها منذ فترة حتى قبل وقوع هذه الاحداث .. بينما الحل الاقرب والاسرع بالنسبة له هو حمل السلاح لحماية ابنته بما ان الحكومة تعجز عن توفير الامن للمواطن فيتعين على المواطن حماية نفسه
بينما طالبت لست أدري بلو (صاحبة اكثر الحلول منطقية واقناعا في نظري) في تحويل الامر لقضية عامة ثم (التركيز على المبادئ الانسانية الاساسية ولما كل واحد مننا يقد مع نفسه يعلم نفسه بنفسه المبادئ الانسانية قبل الدينية. كلنا قبل ما نكون مسلمين او مسيحيين او حتى ملحدين... كلنا انسان.. ولا يقلل من قدر اى انسان ان كان مسلم ولا مصرى ولا امريكى ولا حتى ولد او بنت.. (ودا كانت أهم مبادئ "يوم: كلنا ليلى" اللى كتير شاركوا فى حملة الاسفاف والتقليل من الفكرة) كلنا مساويين فى الحقوق و الواجبات.. بعد كدة تأتى التقوى والطاعة لله عز وجل. ووتعديل الخطاب الديني)د
بينما قدمت لنا شبابيك حلول عملية جدا من وجهة نظر صاحب المدونة ويقول (الظاهر ان الحل المناسب – غير ابر التريكو بتاعت علاء ان كل بنت تشيل سيلف ديفينس – معاها و سواء كان اسبراى او حتى ساطورده الوقت ان البنات يشيلو سنج ومطاوى , ومفكات انا عن نفسى هدية الجاية لاختى هتبقى مطوة قرن غزال ,و اللى يقرب لها تجيب كرشه كده البلد لا عاد نافع فيها حكومة ولا شعب كده الواحد عاد يخاف على اى حد فى الشارع)د
ومن أكثر الحلول التي اعجبتني تلك التي وردت في أحد الردود على الموضوع الاصلي عند مالك ويطالب صاحبها وقد عرف نفسه باسم حسام وكتب بالانجليزية يطالب بمقاومة المتحرشين. ويقترح تنظيم حملة فضح أو كشف للمتحرشين عن طريق ان يصور أي شخص أي واقعة تحرش يراها ويتم نشرها على الانترنت في موقع خاص بالحملة. ويشجع الجميع على التفكير الايجابي والتصرف وان كل واحد يكون تليفونه المحمول مستعد بالكاميرا لكشف الجناة وفضحهم. مع الاعلان عن الموقع في بانرات على المدونات.د
بل ويدعو صاحب التعليق لطباعة هذه الصور وتعليقها في المنطقة التي حدثت فيها الواقعة .. لكي نظهر أننا لسنا سلبيين ولا نكتفي بمجرد الكلام. ويرى صاحب التعليق الذكي جدا ان المشكلة لاتكمن في الدين ولا الملابس بل اننا نعاني تراجعا اخلاقيا مؤسفا في مجتمعنا.
والاقتراحات الاخيرة دي بالذات اتمنى ان نشارك في تفعيلها لانها فعلا منطقية جدا وعملية جدا يا جدعاااااااان

25 comments:

Lasto-adri *Blue* said...

تعرفى يا بلو انه اقتراح هايل بتاع حسام بجد

لما الحكومة مش قادرة تحمينا احنا نحمى نفسنا بنفسنا بخط دفاعى شعبى بقى

المهم بس تلاقى الناس اللى تأيد وتستمر
الفكرة ان اى فكرة بتتولد فى بلدنا المصون ان ما وجدتش اللى يموتها.. هى بتموت لوحدها، وكانه شئ بيجرى فى العروق


الله معانا كلنا

وحقيقى يا بلو... اكتر شئ ساعدنى دلوقتى ان الناس بتتكلم
كلنا لازم نتكلم ونناقش لحد ما تصبح فى يوم من الايام
"التحرشات قضية رأى عام ويعاقب عليها القانون أشد العقوبات.."

Anonymous said...

طيب إيه إلي خلاكي تشتمي في الراجل بتاع سيندي ، هوه ده فعلا الشعب المصري لا يتسطيع تقبل الرأي الأخر ومناقشته .

مع إن الراجل إعتذر علي تصريحاته
لكن مافيش فايده ، لما تشتمونا تطلعوا تقلواو فيها إيه ، ولما نغلط غلطه ونعتذر عنها تاني يوم تشوولوها لينا طول العمر
حاجه قرف

Anonymous said...

في موضوع الرأي و الرأي الآخر و التقبل و الكلام ده

لازم كلنا نعترف أن فيه حدود لاحترام الرأي الآخر، يعني لو حد بيكلمك على أن الأرض قرص مسطح شايلاه سلحفاة ضخمة مفيش أي قيمة من احترام الرأي ده. في السياسة حد نازي؟ صهيوني؟ واحد رأيه أن المسيحيين كلهم لازم يتقتلوا؟ أحترم رأيه ليه؟

أتقبل وجود أشخاص عندها الرأي ده، أتسامح مع وجودهم ولا أدعوا للعنف ضدهم مثلا حاضر، لكن أكثر من أني أبلع وجودهم في نفس الكون بالعافية مينفعش.

في ظني من يلوم ضحية التحرش ميفرقش عن من يجرد الأسود أو المسيحي من انسانيته و حقه في الحياة، شكرا مرسيي معنديش أي احترام لأفكاره ولا لرأيه و بحتقره و أحب أعرفه أني بحتقره و مستحمل وجوده بالعافية و حاسبه بني أدم بسبب الأدلة البيولوجية فقط.

اللي هيقترح احترام رأي من يلوم الضحية يا ريت يكون من النوع اللي بيحترم رأي كل مشعوذ و دجال و مخبول و عنصري عشان بس يبقى فيه اتساق مع النفس.

Anonymous said...

مش عارف ليه دايما الكونتربيوترز بتوع المدونة دي مش بيفهموني..

موضوعي لم يتناول أو يقدم أية حلول لأزمة وسط البلد، موضوعي كان تعليقا على فكرة أساسية موجودة في مقال آخر وضعت رابطه لبنت سعد..يتناول موضوعي مسألة الردع وأهميته إذ لا يمكن التعويل على وازع داخلي لدى كل فرد..هذه النقطة الأولى..

أما النقطة الثانية فكانت تطرقي إلى نقطة أثارتها المدونة بنت سعد، وهي الشامتين الذين وجدوا أخيرا دليلا على أن الحجاب لا يحمي المرأة وأن ادعاءات أنصار تطبيق الشريعة ذهبت أدراج الرياح، فوضحت أن نظاما في غير محل التطبيق لا يمكن أن يحاسب بتهمة التقصير في حماية المنتسبين إليه، ولأن الإسلام -كدين ونظام- لا يقبل التجزئة، فلا يمكننا محاسبته على ما حدث، وأن ذلك لا يكون موضوعيا، لأن الحجاب هو مجرد تشريع من التشريعات التي جاء بها الإسلام، في حين هناك عقوبات مفروضة على هكذا جرائم لم تطبق، وهناك تشريع بأحكام كثيرة لا تأخذ مجراها، وقد أشرت إلى مسألة تطبيق الشريعة أيضا في موضوع سابق على مدونتي وأوضحت "إزاي" وهو سؤالك هنا :)

شوية تركيز الله يكرمكم :)

Anonymous said...

الراجل بتاع استراليا ده تعبان في مخه زي اللي ما يتسمى ياسر
كونا أخدنا ايه من بنات الحجاب المودرن لما هيجي يكلم عن واحدة مش منافقة زي دول
حاجة تفطس من الضحك

Tamer Abdel Aziz said...

في الواقع انا من انصار القائمة السوداء للمتحرشين..
في الولايات المتحدة قانون ضد المتحرشين بالاطفال بيجبرهم علي تسجيل نفسهم في اقسام الشرطة مدي الحياة في اي منطقة يسكنو فيها وتسجيل صورهم علي موقع خاص علي الانترنت مصحوب بعناوينهم واي تعديل عليها بل في بعض الولايات بتوضع علامه تحذير علي بيوتهم ان دي منازل اشخاص تم معاقبتهم مسبقا بتهم التحرش..
ممكن قانون زي ده يتم تطبيقه في مصر ضد المتحرشين بالنساء
السعودية طبقت الحد الاسلامي ضد 3 متحرشين السنة اللي فاتت مما قتل تماما حوادث التحرش في السعودية وهي تطبيق حد الحرابة اللي بيعتبر التحرش من الفساد في الارض وبالتالي اجاز لولي الامر اعدامهم تعزيرا في ميدان عام - ساحة القصاص او ميدان العدل في الرياض -
انا مع كلا الحلين الصراحة وان كنت شايف ان التاني - علي انه عنيف حبتين - الا انه انجح العلاج الكي في نظري ودي مخلوقات لازم تستأصل عشان الجنس البشري يعيش

الصين علي فكره كان ليها تجربة فعالة في التمانينات قضت علي النوع ده من الجرائم عن طريق اخضاع اللي يرتكبها 3 مرات في تسجيلة الجنائي لتعقيم جراحي - اخصاء طبي - يفقده الخصوبة اصلا زي مابيحصل مع الكلاب
- يعني منال وعلاء مجابوهاش من عندهم :)

عشان الصنف ده من المخلوقات بيخاف اوي علي اخر مظاهر الذكوره في حياتهم فأكيد هيتلمو ويقعدو ف البيت لو سمعو مشروع قانون زي ده:)

فانتوماس said...

عجبتني مدونتك جدا بس حاسس ان الحل مش عملي وبصراحة اتفقعت من معظم الردود كاننا بنؤذن في مالطا. انا مش شايف علي المدي القصير غير حلول امنية بمعني ان الامن يتواجد ويعاقب المخطيء اما علي المدي البعيد فدي تغيير ثقافة مجتمع ودي حاجة كده عايزة عشرين سنة مثلا عشان الناس تتغير من جوه

bluestone said...

لست أدري بلو:
الكلام لوحده مش كفاية ولو انه خطوة ضخمة في طريق اخراج رؤوسنا من الرمال .. والاعتراف بان فيه مشكلة خطيرة وان الموضوع مش شوية معاكاسات وخلاص ... بس لازم نستثمر الموضوع بصورة أكبر ونوصل للناس اللي مش قادرة توصل لنا واللي معنية فعلا بالموضوع ..
انا مش بتكلم على موضوع وسط البلد إذا كبير ولا صغير ولا حتى متفبرك .. لان ده مش هاينفي ان فيه مشكلة كبيرة في الشارع المصري ولازم نتكلم عنها

bluestone said...

يا ست بتنجانة :::
على رأي علاء اللي معلق بعديكي على طول احترام رأي الاخر لما يكون رأي أصلا مش تخريف .. ولما الاخر مايحاولش انه ينتقص من قدري ويحقرني برأيه ده.
الراجل بتاع سيدني عرنا وفضحنا قدام الناس ..لما يشبه حضرتك وانا وغيرنا باننا مش اكتر من حتة لحمة مكشوفة يبقى ده اسمه رأي برضه ولا تخلف كامل

الراجل ما اعتذرش هو قال ان تصريحاته اسيء فهمها .. وده مش هينفي مفهومه وتصويره للمرأة باعتبارها قطعة من اللحم.

(لما تشتمونا تطلعوا تقلواو فيها إيه ، ولما نغلط غلطه ونعتذر عنها تاني يوم تشوولوها لينا طول العمر)
مين دول ؟؟؟ احنا مين ....؟؟؟؟
يعني انتي بتخاطبي مين بالظبط؟؟؟؟
يادي البتنجان

bluestone said...

طبعا انت عندك حق يا علاء بس فيه حاجة مهمة ان احترام الرأي الاخر ليه شروط وهي انه يكون رأي من اصله مش هبل وتخريف على الفاضي وان الرأي ده لا ينتقص من قدري ولا يحقرني .. يعني مش هاعتبر الشتيمة رأي مثلا ..
الناس اللي دخلت وسبت لاهل مالك مثلا وغيره من الناس اللي فجرت الموضوع مقدروش يستحملوا كلام مختلف من اي نوع ,, وبرضه كان فيه ردود بتختلف مع كلام مالك ولكنها ردود منطقية على الاقل وفقا لاراء أصحابها ومالك رد بشتيمة من اللي قلبك يحبها ...

وانا مش بتكلم طبعا عن مالك انا بطرح مثال لان تدوينة مالك عن الموضوع كانت الاشهر والاكثر جذبا للتعليقات.

احنا فعلا عندنا مشكلة قبول للاخر ورأيه وبأي حدود .. يعني انا شايفة اني ممكن اقبل الشخص الملحد أو غير المتدين مثلا طالما لا يكفرني أو يستهزئ بما اعتقد .. هاحترم الشخص اللي بيحاول يلوم الظروف اللي دفعت المتحرشين لما فعلوه وانهم معذورين (رغم رفضي للمنطق) او الاحتشام مثلا في الملابس هو الحل (رغم عدم قبولي للفكره دي كحل) لكن مش هاقبل أي جحش يقول ان البنات هي السبب في المطلق وان الرجالة يا حراااااام معذورة.

غير كده انا بتفق معاك في كل الكلام اللي قلته .. وان النماذج اللي ذكرتها يمكن اعتبارها بشر (مجازا) بحكم الطبيعة البيولوجية

سؤالي يا عم علاء لو لسه متابع وهو السؤال المهم في الموضوع .. النماذج دي تقدر توصلها إزاي ...؟؟
يعني هم أهم طرف في المشكلة الفئة المشابهة للعيال بتوع وسط البلد .. هتوصلهم إزاي ؟؟
ولا هنكتفي بالحماية الشخصية والسلف ديفنس وبس ؟؟؟

bluestone said...

ارحم دماغك
ايه اللي اداك انطباع اني فهمت غلط
انت اتكلمت عن اهمية تطبيق النظام الاسلامي كاملا أولا قبل محاسبته وانه لا يجب اختزال النظام الاسلامي في مجرد الحجاب .. صح كده ولا ايه؟
وفي بداية كلامك ذكرت ان الاسلام (شرع عقوبات على الجرائم الأساسية، وهي عقوبات جميعها رادع وكفيل بحفظ الأنفس والأعراض والممتلكات “الأموال” وكافة مقاصد الشريعة بمنتهى الحزم)د

صح الكلام؟؟؟
طيب ايه اللي انا قلته مختلف
انا لم اذكر رأيي مطلقا في أي من التدوينات التي ذكرتها .. فقط أوردت رأي صاحبها مع المقتبس المناسب وما افتكرش اني اسأت فهم تدوينتك إلى هذا الحد .. لم أقل انك قدمت حلول ولكنك طالبت بتطبيق النظام الاسلامي كاملا أولا قبل محاسبته ثم ذكرت انه نظام متكامل وكفيل بتوفير الحماية المطلوبة .. مش كده برضه؟؟

انا أيضا لم اقدم اي حلول لازمة وسط البلد .. مفيش حاجة اسمها أزمة وسط البلد اصلا
انا تحدثت عن التحرش كمشكلة عامة كان ما حدث في وسط البلد جزء منها

(إذ لا يمكن التعويل على وازع داخلي لدى كل فرد..هذه النقطة الأولى..)د
مش ده حل برضه .. ومناقشة الرادع هي الاخرى احد الحلول

(لا يمكن أن يحاسب بتهمة التقصير في حماية المنتسبين إليه، ولأن الإسلام -كدين ونظام- لا يقبل التجزئة، فلا يمكننا محاسبته على ما حدث، وأن ذلك لا يكون موضوعيا،إلخ ....)د

بيتهيألي لو سيادتك ركزت معايا برضه لن تجد في كلامي أي إشارة ليها علاقة بالنظام الاسلامي والحكم عليه لاني ارى بشكل شخصي انه غير مطبق في مصر .. احنا النظام عندنا ولومؤاخذه سلطة

اشرت فقط ان الحجاب او النقاب او الاسدال (أو اي رداء آخر ذو خلفية دينية ما) لا يحمي .. وليس سوى قطعة قماش لا اكثر

bluestone said...

ياسر::
قبل ما اقولك كلام يضايقك خالص خالص
ياريت تقوللي أمثالنا دول اللي هم مين وحياة الغاليين عليك .. عشان مش اغلط واظلمك

(وبصراحة كلامة كله مظبوط وصحيح
والراجل مقلش كلمة عيب ولا حرام)
يعني سيادتك موافق أن والدتك واختك تعبر عنهم انهم حتة لحمة مكشوفة لا عقل ولا تدين ولا شخصية ولا كيان ولا اي حاجة .. مجرد كام كيلو لحم مكشوف ؟؟؟؟؟؟د

يا اخي ده حتى عيب

بلا صادم بلا موجع بلا بتاع بقى
لا الراجل اللي ينظر للمرأة على انها مش اكتر من قطعة من اللحم يبقى حيوان
لانه لم يرى الانسان فيها بل رأى كتلة من اللحم وظيفتها تحريك غرائز سيادته

مجرد انه يعبر أمام الناس عن نظرته للمرأة بالصورة دي يبقى بيدي للعالم صورة زي الزفت عن العرب أولا وعن الاسلام .. ده راجل دين .. لما اكون شخص اجنبي واسمع رجل دين مسلم بيقول الست زي حتة اللحم مكشوف أو متغطية يبقى ايه هيكون رأيي في نظرة الاسلام للمرأة يا أستاذ يا متعلم ؟؟؟؟؟؟د

كان فيه مليون طريقة الراجل يتكلم بيها عن الاحتشام باسلوب انضف وارقى من كده

بلاش فضايح بقى

bluestone said...

ANNON
(الراجل بتاع استراليا ده تعبان في مخه زي اللي ما يتسمى ياسر
كونا أخدنا ايه من بنات الحجاب المودرن لما هيجي يكلم عن واحدة مش منافقة زي دول حاجة تفطس من الضحك)
اكدب عليك لو قلت لك اني فاهمة اي حاجة من التعليق ده خالص

bluestone said...

SNIPER::
هو فكرة القانون طبعا اكتر من ممتازة وربنا يكرمنا في يوم من الايام واحفادنا يحضروا مناقشاته في البرلمان :)
لاننا لو انتظرنا رد فعل رسمي يبقى حللني بقى .. لكن طبعا ده حلم وردي انه في يوم الايام يكون عندنا قانون ضد المتحرشين

المشكلة اعتقد انها حتى لو تم تطبيق قانون مشابه في مصر مش هينفع لاننا نظام حكم مركزي ومعندناش أجهزة محلية مستقلة تقدر تتعامل مع مشكلة زي بشكل عملي .. وفي نفس الوقت اعتقد انه من شبه المستحيل تطبيق الفكرة على نطاق البلد كلها .. حيبقى الموضوع مش عملي

لك ان تتخيل كمية البلاغات اللي ممكن ترد على منطقة واحدة يوميا

اللي حصل في السعودية منطقي لو قدرنا نحدد حد التحرش .. يعني أوافقك على اعدام مرتكب جريمة الاغتصاب لانه عمليا بيقتل نفس تانية ,, لكن هل نعدم كل متحرش ؟؟ خلي بالك ان التحرش يبيدأ من الكلام النابي الخارج في الشارع إلى المضايقات باللمس مثلا في الاماكن العامة وحتى الشروع في الاغتصاب؟؟؟؟د
ودي شريحة كبيرة جدا هيعدموهم كلهم ولا هيكون عقابهم ايه؟؟د

افتكر ان عقوبة اعدام المغتصب بتطبق في مصر فعلا بس على نطاق ضيق لانه في اغلب الحالات الجاني بيتزوج الضحية والموضوع بيتلم

بيتهيألي الحل الصيني ده هو اللي اكتر من مدون اتكلموا عليه ولكن بما اننا شعب كريتيف وعندنا مواهب كان الاقتراح يكون الاخصاء الشعبي في موقع الحدث بدل انتظار الحل الحكومي :)د

ما اعتقدش ان حل مماثل قابل للمناقشة اصلا في مصر .. يعني يبدو انه بعيد قوي عن التخيل

المهم دلوقتي واللي احنا بنحاول نناقشه بجد هو الحلول الفردية .. لان انتظار الحلول القانونية عامل زي انتظار المانجة في شهر يناير ...
وواضح جدا انه لا حل أمني ولا قانوني متوقع وان حصل فالتنفيذ دايما في قصور

الحل دلوقتي اننا نبحث الوسائل الفردية
يعني توعية
تخويف
وسائل دفاع عن النفس من أسلحة ورياضات عنيفة
حملة من اي نوع تفضح المتحرشين
يعني كل الاقتراحات مفتوحة

bluestone said...

فانتوماس :

متشكرين يا فندم على الزيارة
واتفضل اشرب شاي

ممكن يكون الحل صعب او مش عملي .. يمكن .. رغم اني شايفة غير كده
لانه افضل الحلول اللي هتخلي في عمل في الشارع فعلا

ما هو مش معقول ابدا نقعد نكلم نفسينا كده

يعني انا لو اكتفيت بالتدوين هبقى كسبت ايه مش اكتر من اني نفثت عن غضبي وبس وناقشت الامر مع مجموعة من الناس
لكن من غير حلول

ما هو مااعتقدتش ان الشخص الذي لديه التدني الاخلاقي الذي يدفعه لارتكاب مثل هذه الافعال ممكن يكون ليه اي علاقة بالانترنت ولا بالتدوين اصلا

ومن خبرتي كبنت مع هذه النوعية من الكائنات اعلم تماما انهم من محدودي التعليم والثقافة والمستوى الاجتماعي المتدني .. لازم يا نوصلهم ونغير الفكر ده يا إما نحاول نفضحهم قدام الناس كلها

مش قدام المدونين بس .. او نحذر البنات في الشارع ازاي يدافعوا عن نفسهم

ما هو احنا يا فانتو لو استنينا الامن يبقى كل سنة وانت طيب ابقى قابلني .. التواجد الامني في قلب العاصمة في أول أيام يعد الفطر في دولة إسلامية كان شبه معدوم
بينما كان المفروض ان دولة بالتعداد ده اغلبها بيحتفل بهذا العيد وفي قلب العاصمة كان لازم يبقى فيه تواجد أمني مكثف .. فانتظار الحلول الامنية هو ده اللي بجد مش عملي ابدا

وبعدين ما هو انا مش هامشي ورايا عسكري
الحل على المدى القصير استخدام وسائل الحماية الفردية زي الرياضات العنيفة او السلف ديفنس او علبة الفلفل بتاعة السفرة او صاعق او اي حاجة من النوع ده .. ولازم البنات يكون عندها وعي كافي انها تتكلم وصوتها يعلى وما تتكسفش انها تمسح بكرامة اي كلب يتحرش بيها في الشارع بلاط الاسفلت

ولازم الناس تحاول تفهم ان البنت مش هي المسؤولة وانها مش مجرد كتلة لاثارة الغرائز ماشية على رجلين ..

تحياتي

Anonymous said...

حضرتك مش أسأتي فهم تدوينتي، ده حضرتك واضح انك مش فاهمة منها حاجة خالص:)

كفاية آخر جملة :) أنا قلت انه الحجاب مجرد قطعة قماش؟!..ولا قلت انه جزء بسيط من نظام كبير؟!
ازاي بقى تقولي اني أشرت إلى انه لا يحمي؟!..أنا قلت: انه غير كافي..والفرق واضح:)

الجملة السليمة هنا:
"انت اتكلمت عن اهمية تطبيق النظام الاسلامي كاملا أولا قبل محاسبته وانه لا يجب اختزال النظام الاسلامي في مجرد الحجاب .. صح كده ولا ايه؟"

هو كدة صح..وده يختلف عن أني أوضح الحل من وجهة نظري لموضوع زي التحرش، أي مشكلة، عشان أوضح الحل لها من وجهة نظري، مش هاجي أرمي شعار زي "تطبيق النظام الإسلامي" وأجري!!

أنا مطالبتي لتطبيق النظام الإسلامي لها حيثيات أخرى أشمل من موضوع التحرش لوحده، ومشكلة ما حلها بيكون حل عملي، مش مجرد اني أقول طبق النظام الإسلامي وخلاص، طبعا أنا أدّعي انه في ظل نظام إسلامي مش هيجروء حد على الفلتان اللي حصل، على الأقل بسبب ما يشتهر به النظام الإسلامي من الحزم تجاه مثل هذه القضايا، لكن حل المشاكل لا تتطلب مجرد شعار أو عقيدة وحسب، وإنما تتطلب إلى جانب ذلك إرادة لحل المشكلة، وآليات فعالة لإنفاذ الحلول..

"يا رب متقوليش اني باقول انه الأيديولوجية مبتحلش مشاكل، كلامي واضح ولا يحتمل غير معناه الحرفي"

كان ممكن أقترح الآليات، كان ممكن أقترح طريقة، ساعتها كنت أقول لحضرتك اني اقترحت حل، لكن أنا لم أقترح أي حل، وإنما توقفت عند حدود واضحة، معرفش ازاي حضرتك فكرتي اني تجاوزتها إلى غيرها!!

karakib said...

فكره قبول الاخر لها حدود زي ما كان علاء بيقول يعني مش ممكن ابدا اقبل واحد تفكيره و افعاله بتقول انه قتلي شيء صحيح !!
انتوك

bluestone said...

ارحم دماغي
هو واضح انك بتقرا اللي على مزاج حضرتك وبس .. انا ماقلتش ان سعادتك قلت ان الحجاب قطعة قماش .. انت فهمت بالشقلوب زي ما هو واضح
الجملة دي كنت بعبر فيها عن رأيي الشخصي ...انا قلت (فقط اشرت) اشرت هنا تعود على المتكلم .. انا اللي بقول .. فقبل ما تتهمني بعدم فهم التدوينة اسمح اطلب من حضرتك تقرا كلامي الاول كويس

وانا ماقلتش ان سيادتك قلت ان الحجاب جزء من نظام كبير .. انت بتجيب الكلام ده منين ياعم الحاج .؟؟؟؟د
برضه نفس الفهم المعووج .. يا عم انا اللي قلت الكلام ده انا رديت على حضرتك في الجزء الاول من الرد فيما يتعلق باللي قصدته من الاشارة لتدوينتك .. والجزء ده قمت باستعارته من مدونة حضرتك برضه .. أما فيما يتعلق بارائي الشخصية .. فقد قمت بالتعبير عنها بصورة واضحة

(طبعا أنا أدّعي انه في ظل نظام إسلامي مش هيجروء حد على الفلتان اللي حصل، على الأقل بسبب ما يشتهر به النظام الإسلامي من الحزم تجاه مثل هذه القضايا)
طبعا انت تدعي براحتك .. الادعاء ببلاش
انا ماقلتش ان العقيدة فحسب يمكنها حل جميع المشاكل .. كل اللي قلته هو اللي حضرتك قلته وهو ان النظام الاسلامي فيه ضوابط حاسمة تكفي لحل هذه المشاكل إذا توفرت إرادة الحل ...
هو ده اللي انت قلته .. يا إما كنت تقصد حاجة تانية وبعكس المعنى الوارد في الكلام

انا معرفش انت فهمت ايه اصلا من الكلام اللي قلته وواضح ان حضرتك مافهمتش اي حاجة من اللي انا قلتها .. او غالبا فهمت الكلام بالطريقة اللي عجبتك .. عامة انا لم افسر الكلام ولا احمله اكثر من معناه في التدوينة نفسها واقتصر الامر على الاقتباس مع الاشارة لصاحبه اللي فيما يبدو لم يقصد ما فهمناه من معنى الكلام .....

ما علينا بتحصل
انا شخصيا هارحم دماغي

bluestone said...

ياسر
شوف يا سيدي
اولا وانا مش هتكلم على اللي زي ولا حاجة لان التعميم ده آفة الجهلاء .. انا هتكلم عن نفسي وماليش دعوة بحد.

أولا انا معنديش فوبيا من الحجاب ولا حاجة .. انا بقالي 26 سنة عايشة في المحروسة وشكل الحجاب والنقاب كمان مألوف بالنسبة وبتعامل معاه يوميا واغلب صديقاتي من المحجبات لولا اني لا اصنفهم هكذا محجبة وغير محجبة عادي يعني
الشكل اللي جديد عليا هو الاسدال لاني بحس انه افغاني .. ما علينا
المهم إني معنديش فوبيا من الحجاب ولا حاجة ولا مشكلة عندي في أن يرتدي اي شخص الحجاب او يخلعه دي مشكلته وهدومه ماليش دعوة لكن ما يزعجني ان يفرضه احد عليا او ان يدعي البعض ان الحجاب كافي لحماية البنت من المعاكسات او البنت اللي مش محجبة تستاهل تتعاكس ..

والكلمة اللي ذكرتها بانه الحجاب ليس اكثر من قطعة قماش هو انه غير كافي ولا يحمي صاحبته وليس ضمانا لا على الاخلاق ولا العفة ولا حتى الحماية

بدليل ان بعض من تم التحرش بهن محجبات .. كما اني لا اعتبر الحجاب ضامن او معبر عن اي حاجة

يعني مش كل بنت مش محجبة تبقى عديمة الاخلاق وكل بنت محجبة تبقى ربة الصون والعفاف ,,,,,

الحجاب حاجة والاحتشام في الملابس حاجة تانية خالص .. بدليل ما قالت عنه احدى المدونات (حجاب نص كم).. وعشان كده لا اعتبر ضامن لاي حاجة
ممكن يكون التزام ديني رغبة شخصية حرية شخصية من الاخر ...

--(واللي زيكو اللي هما لقوا في الاحداث الاخيرة لنص البلد والتحرش فرصة في مهاجمة ما تسميه سيادتك بقطعة القماش والتي يسميها امثالنا الحجاب)
يا بني انا مش قلت لك ألف مرة قبل ما ترد تقرا كويس عشان ما توجعش قلبي... هاجمت فين الحجاب يا بني انت؟؟؟؟؟د
كل اللي قلته ان الحجاب ليس ضامن وان اللبس مش هو السبب وان البنت مش هي السبب في التحرش لان بعض من تم التحرش بهن كن من المحجبات...

هجومي كان على المتحرشين لاثبات ان المتحرش هو إنسان منحرف لا يفرق بين محتشمة وغير محتشمة او محجبة وغير محجبة ولا اي حاجة خالص .. يعني العيب مش في البنت مهما كانت لابسة .. فهمت؟؟؟؟ ولا نقول كمان؟؟

-وطبعا لازم اتفق معاك في ان كلامك مظبوط عن ان التحرش غير مبرر مهما كانت البنت لابسة وهو ده اللي كنت بقوله بالظبط

-أما مسألة الاحتشام في الملبس (وده مالوش علاقة بالحجاب) يعني ممكن واحدة تكون محجبة ومحتشمة وممكن تكون غير محجبة ومحتشمة برضه .. المهم ان دي حاجة تخصها وهي حرة.. ان تكون ملابسها من مرجعية اقتناعاتها الشخصية والاخلاقية فدي حاجة تخصها.. تكون محتشمة او غير مالناش دعوة .. وده زي ما انت قلت مش مبرر ان اي حد يتعرض لها

-أما كلام السيد مفتي سيدني رغم ان ده مش موضوعنا الاساسي فده كلام يدخل في نطاق الجهل المطبق .. لما المرأة تتحول بقدرة قادر إلى قطعة من اللحم المكشوف .. فده تشبيه وقح جدا يختزل إنسان في مجرد شيء يتم استعماله

واحرى به كرجل دين متعلم ولديه قدرة على فهم المجتمع من حوله ان ينتقي ألفاظه.


(لكن اللي حصل ان بعض الكارهين للاسلام اقتطعوا جزء صغير من كلام الامام وخرجوة برة سياقة وبنوا علية كلام باطل وادعاء ان الشيخ يحرض علي الاغتصاب)
احنا مش قلنا نقرا الاول .. الراجل كان بيقول خطبة في المسجد واثار استياء بعض المسلمين من اللي كانوا حاضرين الصلاة,, مش الكارهين للاسلام..
يعني الكارهين للاسلام دول بيحضروا الصلاة إزاي يعني؟؟؟د

الكلام ماعجبش بعض المسلمين الاستراليين لانهم رأوا انه يحقر من شأن المرأة في اختزالها إلى مجرد قطعة من اللحم مش بني آدمة ويعطي مبررا للعنف ضد المرأة ان لم تكن محجبة

والراجل مقالش كده بس الراجل قال بالحرف ان من لا يرتدين الحجاب يشبهن (اللحم المكشوف ويجلبن لانفسهن لاعتداءات الجنسية) والجملة الاخيرة قلبت عليه الدنيا لانه بيقول ان اللي مش محجبة بتجيب لنفسها الاعتداءات الجنسية يعني هي السبب في الاغتصاب ودي قمة التخلف لانه التمس العذر للمغتصب وده اللي انت كنت لسه بترفضه من شوية
الراجل قال بالظبط (اذا عرضت لحما غير مغطى في الشارع او في حديقة او متنزه او في الفناء الخلفي وجاءت القطط لتأكله.. على من يقع الخطأ على القطط ام على اللحم غير المغطى.")

وعلى فكرة كل الناس اللي شتمته وطالبت بترحيله كانوا من المسلمين يعني الحكومة الاسترالية طالبت الزعماء المسلمين بالاعتدال انما المسلمين نفسهم طالبوا بترحيله لان دي مش أول مرة يعك في الكلام.. المتحدثة باسم المجلس الاسلامي في فيكتوريا شيرين حسن وصفت تصريحاته بانها "كريهة للغاية" بينما طالبت اكتمال حاج علي وهي مستشارة حكومية سابقة في القضايا الاسلامية بتنحيته عن منصبه.د

الواحد ممكن يلتمس العذر لما شخص عادي او جاهل او غير مهم يقول الكلام ده لكن لما رجل الدين الاول في الولاية ومفتيها مايعرفش ينقي الفاظه كويس بما يناسب المجتمع اللي بيحاول يرشده يبقى مالوش عذر وترحيله احسن بلا فضايح
وخليه ينضم لجحافل الجهلة في بلده ما احنا ناقصين


كلامه كان سخيف ومش مناسب وفيه فرق واضح بين المثال اللي انت قلته وبين كلامه هو شبه المرأة بقطعة اللحم واوجد عذر للمغتصبين .. كلام الراجل واضح ومش محتاج تفسير اكتر من كده
وبعدين إذا كان هو نفسه ادرك غلطته وفهم ان كلامه ده كان في غير محله تماما

(لما البنت تخرج من البيت ساترة لجسدها او لحمها علي الاقل بتخلي العيون الوسخة تبعد عنها)د
هنا بقى لازم اختلف معاك لان المحجبة بتتعرض للمضايقات زي غيرها .. انت كده بتناقض نفسك .. انت قلت ان اللبس اي كان مش مبرر للتحرش .. واظن اللي حصل في وسط البلد كان دليل كان فيه منهم محجبات ولابسين عبايات كمان

(اللي اغلب اللي بتحصل معاهم الحوادث دي بيبقوا متبرجات او ظاهرين لمفاتنهم بشكل صارخ)د
مش صحيح.. لان من يرتكب جريمة حقيرة زي دي بيكون إنسان مريض ومش بيفرق ما لا في لبس ولا شكل ولا حتى سن.. وجرائم الاغتصاب في مصر بلدنا بتقول كده .. لو سيادتك تابعت او قريت هتلاقي حوادث اغتصاب بترتكب بحق سيدات متقدمات في السن وريفيات ومحجبات وغيرهم .. بالنسبة للمنحرف اي ست والسلام لانه مريض وكمان معندوش اخلاق ولا دين فمش هيقف عند حجاب ولا اي رمز ديني تاني

(يعني اية مش شايف فيهم لا عقل ولا تدين ولا كيان ولا شخصية حضرتك وانتي ماشية قصادي مبشوفش منك غير اردافك وصدرك ووسطك اللي بيلعب من الاخر ايوة كام كيلو لحم مكشوف لكن الكيان والعقل والشخصيةاشوفهم ازاي وفين وامتي
ولا هو مكتوب علي جبين حضرتك انك شخصية)
امال احنا بنقول فيه حيوانات في الشارع ليه ..
يا استاذ يا محترم بغض النظر عن اسلوبك المهذب في الكلام .. محدش طلب ان الراجل اللي ماشي في الشارع يعمل للست اللي ماشية تحليل شخصية لكن يشوفها على انها بني آدم زيه مش وسيلة لاثارة الغرائز يا محترم

وبعدين انت انبريت واتنيت تدافع عن الراجل مع انه هو نفسه اعترف انه كان غلطان وعك في الكلام وطلب السماح يعني هو يعترف بانه اخطأ وسيادتك بتقول لأ مغلطش .. وجليل وفاضل وبتاع

ارحمونا بقى ... مش كل عمة (في أي دين) تبقى بتقول كلام منزل

ارحمونا التخلف رجعنا ألف سنة ورا
أووووووووف

Anonymous said...

عجبتني الفكرة الأخيرة ده، عمرها ما جت في دماغي قبل كده وممكن نبتدي التفعيل فعلاً. بس أنا خايف ليتحول الموقع ده لنوع من أنواع التباهي بين أصحاب صور التحرش.

bluestone said...

eyewitness
من واقع خبراتي كبنت اعتقد ان المتحرش جبان بطبعه .. ومهما كان خلفيته الثقافية والاجتماعية فمازال التحرش بالنسبة له نوع من أنواع السلوك المرفوض المنافي حتى لاعراف الشارع الاجتماعية ولمفهوم ،الجدعنة، كما يراه البعض
المشكلة اعتقد انها هتكون في صعوبة تنفيذ الفكرة وتردد البنت نفسها في تنفيذها
كان فيه اقتراحات أخرى زي البوسترز ومنشورات التوعية اللي ممكن تتوزع على البنات في المدارس والسيدات في وسائل المواصلات او دور العبادة
واعتقد ان دي ممكن تكون فكره اقوى وتنفيذها اسهل

مشكلتنا الرئيسية العمل بروح الفريق والتنسيق ودي مشكلة مصرية أزلية طبعا

abderrahman said...

انا رايي إن فيه مشكلة إنه محدش فكر في "مين اللي ممكن يتحرش بفتاة ماشية في الشارع..؟" وده ممكن يسبب تعميمات، وإهانة للشباب عموما، فتيات وولاد.
**
عايز أقول إن الفئات دي، واللي بتبقى موجودة في الاستاد وفي الأعياد موجودة في جنينة الحيوانات والقناطر، وسينمات وسط البلد، دي فئات بيبقى فيها منحطين كتير وجهلة .
وآسف إني بتكلم بصورة قد تبدو متعالية إنما ده مش مقصود، أنا بعبر عن مشاهدات .
**
عايز أقول إن الفئات المنحطة دي، اللي ممكن تمد إيدها على بنت، هي نفسها اللي ممكن توقف ولد وتبثته وتقلبه، وتاخد منه كاب، أو ساعة، أو موبايل، وهي نفسها اللي بتعمل خناقات مع ناس تانية، وهي اللي بتبقي ماشية في الشوارع في العيد وتلاقي واحد عمال يخبط على العربية وهو في حالة هستيرية .
وهي اللي منها أمناء شرطة ومندوبين شرطة بيعملوا تجاوزات وفيه منهم بيتفصل عشان كده .
**
الفئات دي مش حتتجرأ كده إلا في أوقات معينة، ولأسباب معينة، أتمنى إننا نفكر فيها .

lastknight said...

العزيزه القهوه العاليه
كرا لذكرك مدونتى خلال استعراضك للآراء حول الكارثه ..طبعا تأخرت فى التعليق لأسباب ذكرتها مؤخرا فى مدونتى .. عموما أدعوكى لمراجعة مدونتى الأخيره و أيضا مدونة عشتار .. فالمظلمين الظلاميين هاجمونى و هاجموها كما هاجموكى الأن .. و أصرح لك بنقل أيا ما ترينه مناسبا ليكون ردا من مسلم على هؤلاء المدعين
و شكرا

bluestone said...

سلامتك من الاكتئاب ريس
مش انا قلت لك من زمان
العلاج الوحيد هو شوية تهييس على هيافة كل كام شهر
والامتناع عن قراءة أي صحيفة قومية او حزبية او مستقلة منعا للامراض المختلفة من اول الضغط لحد العته العقلي على حسب توجه الصحيفة
وان تقتصر مشاهدة التلفزيون على روتانات بن طلال وخبالات الشيخ صالح
لمدة كام اسبوع هترجع منتعش وزي الفل

دي الوصفة السحرية يا عم فارس في الدنيا الملعبكة بنت الصرمة دي

lastknight said...

سمعت كلامك .. أقرى موضوعى الجديد