Wednesday, September 19, 2007

قطعة لحم متعددة الاستخدامات-ليلي2 جايز برضه

أولا اعتذاراتي للتأخير .. لان ليلي بتاعة القهوة كانت في أجازة مستحقة ..
عقبال عندكم يا حبايب ..
ومن غير رغي كتير دي كانت مشاركتي اللي محضراها من مدة :)
=================================================================
كنت في المدرسة الاعدادية تقريبا حينما طرق سعد باب جدتي قاصدا إياها في أمر مهم وخدمة ضرورية
وكنت اقضي اغلب اجازاتي الصيفية حتى بعد بداية دراستي الثانوية في بيت جدتي الذي طالما تصورته مسكونا بالسحر والاساطير
صبت جدتي لجارها سعد الشاي وبدأ سعد وهو شاب في الثلاثينات من عمره لم يتلق من التعليم إلا قدرا زهيدا يسمح له بكتابة اسمه وتوقيعه ببراعة
وبعد بضعة رشفات موسيقية من سعد قال لجدتي
ه"مش هاتشوفيلي عروسة بقى يا مقدسة؟".ا
(ومقدسة لمن لا يعرف هو تعبير يطلق على السيدة المسيحية المسنة وهو مثل تعبير حاجة)د
اعتدلت جدتي في جلستها وقالت له "طيب يا بني انت بتدور على ايه؟ يعني ايه طلباتك؟". فلم يفكر سعد كثيرا وانطلق بابتسامة حالمة يقول "عايزها سمينة كده ومربربة؟". فصمتت جدتي قليلا ثم ابتسمت وقالت له "معاك تدفع على الميزان؟؟".ه
وأضافت قبل أن يبادرها حيث لم يفهم مقصدها باي رد "روح يا ابني انا مابشتغلش خاطبة.. ربنا يوفقك".د

ونظرت لي جدتي وكان فمي مازال مفتوحا مشدوها من المفاجأة وقبل ان تنطلق مدافع لساني الحاد كالمبرد كما كانت تقول أومئت لي بالانصراف إلى الحجرة الاخرى بعد ان انقذت سعد من وصلة توبيخ حادة من صبية عمرها اقل من نصف عمره.ا
وما ان انصرف سعد حتى خرجت من الغرفة وقلت لها "ايه التخلف ده هو بيشتري جاموسة؟ ده طلب عجيب جدا؟". فاوضحت لي جدتي انه "عقله على قده" وان معايير الحكم على الامور مختلفة لديه. كما ان هذه كانت بعض التقاليد القديمة التي مازال البعض يتمسك بها. وشرحت لي كيف ان البدانة كانت دليلا على العز وربما مازال سعد يؤمن بهذا.د

وبعد اكثر من 10 سنين كنت اجلس في ذلك المقهي الانيق مع صديق عزيز وهو شاب جامعي يشغل وظيفة مرموقة زار بضعة بلدان في العالم ..ويبحث عن بنت الحلال بعد أن قرر ان يفكر جديا في الارتباط. وكنت أحاول مساعدته والقيام بواجبي كصديقة. فقلت له "ايه المواصفات اللي بتدور عليها يمكن اعرف اساعدك؟". وهنا قال لي (م) "عايزها رفيعة .. رشيقة يعني وشعرها طويل".ا
وهنا قبل ان ابدأ خطبة عصماء قد تنتهي بخسارتي لاعصابي.. وصداقته.. تذكرت قول جدتي ووجدتني اقول له "ليه؟ مامعاكش تشتري على الميزان؟". وانفجرت في الضحك غيظا من عبث الموقف وهو لا يفهم سر نوبة الضحك الهستيري التي انتابتني. ه
وقبل ان ينطق أكملت
"ماعندناش يا عم ابقى اشتري واوزن بره".د

قد لا يكون ل(ليلي) أي علاقة بالواقعتين وقد تكون ليلي في قلبهما .. فقد دفعني تذكر الموقفين إلى تذكر قول ما أشبه اليوم بالبارحة وما اشبه (سعد) صاحب التعليم القليل ب(م) الجامعي صاحب الوظيفة المرموقة .. فالاثنين لديهم نفس النظرة المتدنية للمرأة
وانا اتحدث عن ليلي اتذكر مرارا كثيرا ممن تحدثوا عن المرأة في قضايا التحرش والحجاب والتحرر إلخ .. تذكرت تصريحات بعض رجال الدين والمجتمع ورجال محترمين اعرفهم عن المرأة .. وتذكرت كيف اني تحولت كامرأة فجأة على يد رجل إلى قطعة لحم تباع على الميزان
بعض الرجال (بلا تعميم) ينظرون للمرأة على انها ليست أكثر من قطعة لحم متعددة الاستخدامات .. وتناسب جميع الفصول. بعضهم يغطيها كما يفعل الجزار حتى لا يجتمع الذباب عليها
وبعضهم يظهرها كالحلواني ليتفاخر بها
ولكن الاثنان ينظران لها كقطعة لحم لا اكثر ولا اقل
فالداعين إلى تغطيتها او تعريتها لم يتجاوزا بعد حاجز جسد المرأة وربما لن يفعلوا ابدا .. فالمرأة لديهم نهدان وساقان وربما شعر طويل (اشقر في أحلام البعض). ولتتأكد عزيزي القارئ/ة من كلامي تحدث/ي أمام مجموعة من الرجال عن أي فتاة حتى وان كانت وهمية. قم بسرد تفاصيل كثيرة عن عقلها وشخصيتها وكتابتها وتفرد ارائها ...إلخ .. ولكنك يا عزيزي/تي لن تحصل/ي على الانتباه الكامل لمحدثيك إلا عندما تبدأ في سرد التفاصيل المهمة مثل (هي سمرا شوية وطويل، عودها ملفوف، عينيها عسلي) إلخ

وهذه وصفة مجربة .. فما ان تحاول ان تذكر احدهم بفتاة ما فسرعان ما ستجد اجابة كهذه (مش هي البنت الطويلة دي/ مش هي اللي بتلبس جينز على طول/ مش دي اللي بيضا وشعرها طويل) وهكذا .. حتى وان كانت عالمة ذرة تحاول تمييزها بين طلبة فصل لمحو الأمية

وعلى هذا فانه يتعين على كل امرأة تخرج إلى الشارع ان تضع لافتة واضحة المعالم مقروءة تدل على الحالة الاصلية المميزة
(طازة والمخابرة مع البائع)
(البضاعة المباعة لا ترد ولا تستبدل.. الطلاق بالنفقة)
(ممنوع لمس البضاعة منعا للاحراج)
(السعر لكيلو البلدي والختم ميري والشكك ممنووووووووووع)

31 comments:

عباس العبد said...

ازيك يا بلو
بقالى مدة معلقتش هنا
انا صريح جدا
و انا مش فاهم
......
ايه المشكلة فى ان تكون المرأة قطعة لحم ؟؟؟
ده يزعلها فى ايه ؟؟
.......
تخيلى كده
حتة لحمة تريبيانكو متبلة محطوط عليها شوية نبيت و حتتشوى و ربنا يبارك للى حياكلها
شوفى مبذول فيها مجهود قد ايه
مفيش تقدير للموضوع ده
شوفى ازازة النبيت الروزيه الشوى بكام دلوقتى
.......
انا مش فاهم نظام النظرية بتاعكم ده ؟؟
محسسانى انكم مبتفكروش كده فى الولاد
و ان البنت بتفضل عالم ذرة منكوش على دون جوان
او
ممكن تتجوز زبال مثقف و ترفض فتى من اسرة
لأن الزبال مجتهد و بيبنى نفسه عن الفتى المدلل صاحب العربية و الرصيد فى البنك
.....
بلاش بقى الحركات دى بقى
اتخنقنا
حقوق المرأة و مساواتها بالرجل
و تمكينها
كفاية حركات ستات
مش قادرين تبطلوها
......
اكبر دليل على انكم مش قادرين تبطلوا حركات الستات الى هى حركاتكم يعنى
و خصوصا انكم تجيبوا فى سيرة الناس
شوفى جبتى سيرة كام واحد فى التدوينة دى ؟
.......
سعد اكثر واقعية منكم
سعد عارف طلبه و جاب من الاخر
الراجل شايفكم بالكيلو
هو حر
زى ما يكون انتم ما بتشوفوش الراجل او الشاب من الزاوية دى
سعد اكثر واقعية
اما انتم لأ
انتم بتناضلم ضد مين
عارفه ضد مين ؟
ضد نفسيكم
انتم الى حطيطم المعيار و اخترعتم القياس و احنا مشينا عليه
جايين دلوقتى تعملو شهداء و تلبسونا العمة
بلاش بقى الحركات دى
......
يا بلو هانم
اى ولد فى الدنيا عايز يتجوز بنى ادمة
لما يصحى الصبح و هى جنبه على السرير ميجيلوش صرع من شكلها و هى منكوشة و لفا شعرها بدل بالرولو بقراطيس طعمية
........
و اكيد اى بنت مش عايز واحد بربوره نازل بيمسحه بأيد و ماسك فى التانية كتاب
.......
بلاش الهجص ده
....
ماشى انا مع احترام المرأة
و ضد تحويلها الى انسان درجة تانية
لكن لما اعوذ اكل لازم الاقى لحمة
انا مش نباتى و لا غاوى صيام
و اظن المفهوم متبادل
اى بنت عايزة ولد تتباهى بيع قدام الناس يكون داعم ليها و واقف جنبها
و الراجل نفس الحكاية
محتاج لأمرأة تروشه
يضحك و ينبسط معاها و تخاف على بيته و على اولاده
تعرف تعلم عياله و تدعمه فى مواقف هو محتاج لدعمها تقف وراه
فى ضهره
اتب يعنى
.......
بلاش زهق بقى
ما تتهدوا بقى زهقتونا
حنلاقيها منكم و لا من الحكومة
و لا من صحف المعارضة
.......
تصدقوا نبروكم ده هو الى جايب البلد ورا
حتة لحمة
حتة فرخة
حتة سمكة
و يا ريت فى الاخر طايلين حاجة
.....
انتى عارفه رأى فى الحملات
و حملة ليلى دى
مش عارف
اكيد وراها ان
واحدة عايزة تتطلق
واحدة رامية الهلب على ولد و عايزة تجذب انتباهه
واحدة ماشية كده و كده و عايزه تبرر موقفها
اه منكم يا ستات اه
..
يا ختشى

Lasto-adri *Blue* said...

باذنك يا بلو.. ح رد على عباس العبد


اولا: "ممكن تتجوز زبال مثقف و ترفض فتى من اسرة،لأن الزبال مجتهد و بيبنى نفسه عن الفتى المدلل صاحب العربية و الرصيد فى البنك"
المقارنة اصلا مش موجودة.. لان بلو بتتكلم عن فكرة مختلفة... يعنى انت بتقارن ما بين شخصيتين ودى الفكرة اللى عايزين نوصلها..
يعنى ماشفتش كتير قوى بيرفضوا ولد مثلا عشان مش مبهر فى الجمال.. انما زى ما انت قلت.. واحد مكافح والتانى مدلع.. الخ الخ.. يعنى فى فرق جوهرى ما بين مثلك ومثال بلو ستون


ثانيا: "ايه المشكلة فى ان تكون المرأة قطعة لحم ؟؟؟ ده يزعلها فى ايه ؟؟"
يزعلها انها اصلا مش قطعة لحم..... هى بنى آدمة.. من قطعة لحم وروح بتفكر وتتكلم وتتحرك وبتحس زيها زيك
عمرك انت اكلت لحمة كلمتك -ع الاقل-؟


ثالثا: "اكبر دليل على انكم مش قادرين تبطلوا حركات الستات الى هى حركاتكم يعنى و خصوصا انكم تجيبوا فى سيرة الناس
شوفى جبتى سيرة كام واحد فى التدوينة دى ؟"
لا تعليق


رابعا: "حنلاقيها منكم و لا من الحكومة
و لا من صحف المعارضة"
مش فاهمة العلاقة.. ومش فاهمة "انتم" مين
ومعلش سؤال... اشمعنى كل رجل ضحكته قد كدة مع خلق ربنا ومع مراته بوز شبرين؟؟
اشمعنى الدنيا كلها بتتقلب سودة فى وشه اول ما يبدأ يتكلم مع اهل بيته؟؟
وفجأة الاسعار بقت نار... والحكومة معرفش ايه... والشغل منيل..
ثم انما سؤال.... هو لو انت مثلا اضظريت تعمل عملية ما... ح تقول ح لافيها من نفسى ولا شغلى؟ ما هى تبقى انت... ولما تكرمها تبقى بتكرم نفسك واهلك واولادك ومجتمعك.. يعنى مش بعيدة عنك قوى


خامسا: "محتاج لأمرأة تروشه
يضحك و ينبسط معاها و تخاف على بيته و على اولاده تعرف تعلم عياله و تدعمه فى مواقف هو محتاج لدعمها تقف وراه"
وهى ليه ملهاش حق تطلب منه انه كمان يحترمها، ما يقلل من دورها، يعاملها كانها انسانة زيه.. وتطل منه انه يقف وراها ان لزم الامر ايضا؟ ولا هو حلال له يطلب، وهى لاء..
اه.. اصلها قطعة لحمة اشتراها لغرض معين، وايه كمان... تعمل اللى عليها وهى ساكتة..


سادسا: "انتى عارفه رأى فى الحملات
و حملة ليلى دى، مش عارف، اكيد وراها ان
واحدة عايزة تتطلق، واحدة رامية الهلب على ولد و عايزة تجذب انتباهه، واحدة ماشية كده و كده و عايزه تبرر موقفها"
لو انه كلام ما يصحش يتقال... انما اقول لك انك بتثبت النظرية بتاعة.. اصل هى واصل هى واصل..



هى آه.... قطعة لحمة بايتة كمان وتستاهل تتباع بالرطل... طول ما انها ساكتة على حقها وعلى نمط تفكير زى سعد وغيره... بل وساعات بتشارك فيه كمان.. للأسف الشديد

عباس العبد said...

لست ادرى
انتى فهمتى كلامى غلط
انا قلت
" بنت عايزة ولد تتباهى بيع قدام الناس يكون داعم ليها و واقف جنبها "
مش كلامى ده و لا مش كلامى
.......
انا كنت بضحك مع بلو
و انتى قفشتى
ماشى
انا بحضر حملة ضخمة جدا
اسمها
سى السيد
و غرضها تحويل كل انثى قالت كلنا ليلى
الى انثى تقول
كلنا امينة
امينة مراة سى السيد
الى داستها السوارس لما خرجت من البيت من ورا جوزها
.......
حملة قوية جدا
استعدوا

karakib said...

علي فكرة كنت بافكر اكتب تدوينة عن اللي بتقوليه
و لسه بافكر
ليه ؟؟ اقول لك ليه
اصل الستات الكبار كمان بتفكر كده
مثلا مثلا
امي مصره علي انه لازم اتجوز واحده بيضه و حلوة و مش مسلوعه و تكون ما اعرفش ايه .. و كلها مواصفات جسمانيه

يعني تعالي بقي اقول لك انه فيه ليلات كبار و صغار بيعمقوا ثقافة انه البنت لازم تكون حلوة خارجيا علشان تعجب و الليلات دي كتير
غير ده بقي النقطه انه الجمال مش كل حاجه
الكلام او اني الاقي دماغ قدامي بتفهم و ترد و تتناقش
و علي فكرة في احيان كثيرة البنت بتلغي دماغها لحساب الرجل بالرغم من انها عندها واحده كنوع من الارضاء له
السؤال الابدي
اقعد مع واحده في منتهي الجمال و ما الاقيش اي كلمة تتقال
و ساعة ما اقوم احس اني كانت قاعد مع كرسي خشب

و لا اقعد مع واحده عندها دماغ حتي و لو كانت مش جميله .. و ساعة ما اقوم احس انه كان نفسي اقعد قد اللي قعدته الف الف مره

=========
لما جدتك قالت لك انه دماغه علي قده لما طلبها بيضا و مربربه
كان ليها حق
ردها كان رد سهل بدون فلسفات
لأنه الحوار و مبادلة الافكار هو جنس غير حسي امتع كثيرا من الحسي
لكن تعملي ايه في واحد او واحده ما عندهمش دماغ .. يبقي اكيد مضطرين ينزلوا للدرجه الاقل في الاستمتاع لعدم امتلاكهم ادوات افضل و عدم قدرتهم علي امتلاكها
------------------

bluestone said...

عباس:
شوف بقى .. رغم اني عارفة انك بتهزر بس هرد عليك من كلامك بقى ..
بقالى مدة معلقتش هنا

أولا:
ايه المشكلة فى ان تكون المرأة قطعة لحم ؟؟؟
صحيح .. يزعلها في ايه؟؟
الستات دول غريبين والله .. ده حتى اللحمة غالية وبتنفع في كل الأوقات ..
بس برضه الرجالة دول بايخين قوي ..
كل شوية واحد يقول لمراته ولا لخطيبته
انا مش زكيبة فلوس ...

وهي الزكيبة وحشة ؟؟؟
وكمان مليانة فلوس..
-------------------------------
ثانيا:
و ان البنت بتفضل عالم ذرة منكوش على دون جوان او ممكن تتجوز زبال مثقف و ترفض فتى من اسرة

زي ماقالت لستو مفيش اصلا وجه للمقارنة ...
الفكرة اللي التدوينة بتتكلم عنها هي النظرة الدونية للست من بعض الرجالة ومن غير تعميم زي ما انت عملت ..
فجأة بيبقى البني آدم شيء
الست تتحول لقطعة لحم
والراجل لبنك أو زكيبة فلوس
والبني آدم بيتنسي ..
المقارنات "البسيطة" دي مش منطقية وماينفعش اصلا نتكلم عليها
عالم ذرة ودونجوان ؟؟؟
وبعدين ايه التضاد والتعارض بين المثقف وابن الاسرة
هو المثقف مش ابن ناس ولا ايه؟؟
--------------------------------

ثالثا:
انا ما جبتش سيرة حقوق المرأة ولا مساواتها بالرجل ..
لاني اصلا لا اؤمن بالمساواة ..
وما اتكملتش عن اي حقوق
انا اؤمن بالتكامل في العلاقة بين الاتنين
وفي التدوينة كنت بتكلم عن تشييء الانسان .. تحويله لشيء ..
انت قريت غلط يا عبس ..
عملت prejudgment
قبل ما تقرا لمجرد ان العنوان فيه (ليلي)
-------------------------------
رابعا:
انتم بتناضلم ضد مين
عارفه ضد مين ؟
ضد نفسيكم
انتم الى حطيطم المعيار و اخترعتم القياس و احنا مشينا عليه
جايين دلوقتى تعملو شهداء و تلبسونا العمة

مين دول يا ابني؟؟؟؟؟؟
احنا مين؟؟؟
ايه التعميم ده؟
كلام غير علمي خالص خالص
وما ينفعش اساس لاي حوار
لاحظ اني ركزت في الكلام على عدم التعميم
لان مش كل الرجال بينظروا للمرأة بالطريقة دي
لكن اللي ضايقني ان احيانا لا يوجد فرق بين متعلم وجاهل
--------------------------------
خامسا:
اى ولد فى الدنيا عايز يتجوز بنى ادمة
لما يصحى الصبح و هى جنبه على السرير ميجيلوش صرع من شكلها و هى منكوشة و لفا شعرها بدل بالرولو بقراطيس طعمية

ايه علاقة الكلام ده باللي قلته
هو انا لما قلت ان الراجل لازم يحترم الست ويشوف فيها ابعد من الجسم .. يعني يطلع لفوق شوية ويشوف اختراع اسمه عقلها وشخصيتها ومشاعرها .. ايه علاقة ده بان الست تكون في نظره مش جميلة او مش مهتمة بنفسها .؟؟؟؟؟
فيه ستات كتير جدا ناجحات ومثقفات جدا وفي نفس الوقت مهتمات بانفسهن جدا .. والامثلة كتيرة
كون انك لسه ماقابلتهمش .. مافتكرش دي مشكلتهم بقى ...
----------------------------
خامسا:
و اكيد اى بنت مش عايز واحد بربوره نازل بيمسحه بأيد و ماسك فى التانية كتاب

ليه صورة المثقف بالنسبة لك مرتبطة بالقرف والشكل المبهدل والمنظر المهبب ده
هو انت يابني مش مثقف برضه ولا ايه
ولا انت الكتب اللي بتشتريها (وكنت ناوي تسلفهالي دي) كنت بتشتريها عشان تغطي بيها الحيطة؟؟
====================
سادسا:
لكن لما اعوذ اكل لازم الاقى لحمة
انا مش نباتى و لا غاوى صيام

مش عاجبني ابدا المفهوم اللي مبني عليه الجملة دي ... لما تعوز تاكل لحمة روح للجزار ..
لكن لما تعوز انك تبني علاقة إنسانية عاطفية جسدية مبنية على التوافق في أغلب الجوانب والاحترام المتبادل ويكون طرفها إنسان تسكن إليه ويرتاحلك وتكملوا حياتكوا سوا .. ابقى روح دور على بنت واتجوزها
===============================
سابعا:
اى بنت عايزة ولد تتباهى بيع قدام الناس يكون داعم ليها و واقف جنبها

غلط .. اي بنت عايزة راجل تتسند عليه ويحترمها ويحبها ويكون عايز يبني بيت واسرة ويتحمل المسؤولية ويكونوا سند لبعض

أما رأيك في ليلي وحملتها .. فلا تعليق


ماشي يا عم عبس ..
هزر براحتك
بس استلقى وعدك من نون النسوة :)
وبرضه عايزة الكتب بتاعتي ..

bluestone said...

لستو ادري بلو:
you got it girl
واحنا في انتظار حملة
سي عباس

bluestone said...

كراكيب:
صحيح .. فيه ستات كبار بيفكروا بنفس الطريقة
اللي ضايقني ان شاب متعلم جامعي والمفروض انه متفتح يفكر بالطريقة دي

انا مش بقول انها حكاية راجل وست .. لأ
هي في الاصل حكاية تحويل الانسان لشيء واختصاره في صفة او حاجة

ناس كتير ولحد دلوقتي بيبصوا للزواج بطريقة التاجر .. هو هيشتري بفلوسه فلازم يلاقي بضاعة كويسة يشتري بيها

هو احنا اصلا لسه ما وصلناش للدرجة اللي نقدر بيها نقارن بين الاستمتاع العقلي والجسدي اصلا .. بالنسبة لا وجه للمقارنة لاننا اصلا مانعرفش يعني ايه متعة عقلية

عباس العبد said...

انا مش حرد على بلو
لأنها صاحب البيت و عيب لما تعلى صوتك على الى مضايفينك
كل الى حقوله
انى ابتديت الحملة عندى فى المدونة
و اذا كانت تستطيع كما تقول ان تتطالب بالتكامل
ان تضع لينك لحملتى المتواضعة فى تدوبنتها هذه
الراجل ميعيبوش الا جيبه يا هانم
انا داخل ارد على كراكيب
......
يا ابنى اتجوز واحدة بيضة و حلوة و مربربة
حيجيلك جتون لو اتجوزت واحدة من بتوع الايدولوجيا و كتاب القراءة و كراس التطبيق
..........
"اقعد مع واحده في منتهي الجمال و ما الاقيش اي كلمة تتقال
و ساعة ما اقوم احس اني كانت قاعد مع كرسي خشب"
و عايز تتكلم ليه يا استاذ
كفاية انك تملى عنيك يا برنس
روق نفسك

"و لا اقعد مع واحده عندها دماغ حتي و لو كانت مش جميله .. و ساعة ما اقوم احس انه كان نفسي اقعد قد اللي قعدته الف الف مره "
عندها دماغ ترغيى فى الطبيخ ماشى
لكن تتكلم زى ما تكون قاعد مع دريدا
سامحنى مش سكتنا
........
انضم الى الحملة
حملة سى السيد
vs
كلنا ليلى
شارك معنا فى اعادتهن الى رشدهن
طالبهن رفع شعار
كلنا امينة
....
قولوا ورايا يا بنات
كلنا امينة

عباس العبد said...

انضم الى الحملة
حملة سى السيد
vs
كلنا ليلى
شارك معنا فى اعادتهن الى رشدهن
طالبهن رفع شعار
كلنا امينة
....
قولوا ورايا يا بنات
كلنا امين

bluestone said...

عباس :
انا مش هرد عليك برضه ..
عشان انا عارفة دماغ التهييس اللي ع الصبح دي ..
بس انت صعبان عليا عشان رأي الناس فيك لو صدقوا ان الكلام اللي انت بتقولوا ده انت صحيح مقتنع بيه ..

karakib said...

شوف يا صديقي العزيز .. اولا و اخيرا الجمال ده شيء نسبي جدا
و بيتغير مقاييسه تبعا للمناطق
مثلا في اوروبا العيون السود و الشعر الاسود شيء ج>اب و السمار الدهبي
اما في الشرق الاوسط الشقر و العيون الزرقا و البياض
و اللي انا اشوفها حلوه ممكن انت تشوفها وحشه

و ليه اكون انا سي السيد و هي امينه
ليه ما نكونش شبه بعض عقل بيخاطب عقل و كل واحد له دوره في الحياه
لعلمك بقي لما اتجوز لازم اشغل مراتي
لازم تشتغل علشان تبقي دماغها فيها حاجات تانيه غير انها غيرت للواد و الطماطم شحه من السوق و محشي البتنجان علي الرخامه في المطبخ
علشان ما يبقاش الموضوع استمتاع جسدي فقط و تبقي قطعه من اللحم بعد شويه املها و اعوز واحده تانيه يوم فراخ و يوم بتلو و يوم ضاني
الجسد واحد و غير قادر علي التنوع انما العقل و الروح لا تمل من اكتشافها طول الوقت
غير ده و ده
هاقول لك سر
انا اصلا ما بيشدنيش حسيا الا واحده اتكلمت معاها و لقيت عندها عقل و ثقافة و بتبقي اجمل من اي واحده تانيه
ما انكرش اني باقعد اتفرج علي هيفاء وهبي و معجب بامكانياتها جدا
بس دي ما ينفعش تعيش معاها
الجمال ده كله هاتبقي مش طايق تبص فيه لأنه بلا معني
و لو الموضوع جمال و بس يبقي المانيكانات احلي من اي واحده ممكن تشوفها


و علي فكرة بقي انا مش مصدقك علشان انت كولاجاوي
يعني شفت علي كل لون و صنف
و اكيد اكيد ما بيشدكش جمال الشكل اكتر من يوم او اتنين و بعد كده بتبص الدماغ فيها ايه
عيب عليك احنا كولاجاويه زي بعض
اطلع من دول يا عباس
يا عباس اطلع من دول
من دول اطلع يا عباس
:)

بنت القمر said...

هاي بلووووو
رحتي وجيتى وما شفناش بعض يارب الميل الاخير ما تكونش حاجه فيه دايقتك
بالنسبه لحكايه ليلي انا وصلتنى الاسئله المكتوبه وانا الحقيقه مش عارفه مين اللي صاغتها لكن الاسلوب حسيته تنظيري اكتر ومناسب للندوات فشاركت علي طريقتى

---------------------------
بالنسبه لحكايه حته اللحم بصي بقا يا بلو العزيزة انتى لو مشيتي ورا دماغ الرجاله ها تورمي الراجل عاوز واحده حلوة وجميله وموديلات جاهزةمن هيفاء الي نور اللبنانيه وغريبه امبارح كان المان بتاعي بيقولي ان سميه الخشاب حلم رجااال كتير جدا اكتر من ما نتوقع وان كان هو نفسه يفضل نور اللبنانيه
انا كمان شايفه ان الله جميل يحب الجمال وكمان كل بنت لها حلم وزوق خاص من عمرو الشريف الى رشدى اباظه حتى احمد عز
النواحي الشكليه بتأثر علي النواحي الحسيه واذا ما كانش فيه توافق وراحه يبقا ها تقلب تنافر بس السؤال هو هل الشكل بس ومعايير الجمال الشكلي التى يضعها الرجل او المرأة للطرف الاخر تكفل حياة سعيدة؟؟؟؟
الاجابه البديهيه لأ
يعنى لو انتى في حياتك احمد عز او هانى سلامه بدون باقي الكونات الهامه لشخصيته تبقا الدنيا مش ها تنفعيعنى انتى عندك سبعه وعشرين ومسيحيه ومصريه وجامعيه
يبقا اكيد اختياراتك محصورة في مصري مسيحي تلاتيني غالبا جامعي هي دى التفاصيل اللي كنتى بتتكلمى عنها البوست السابق التفاصيل اللي ها تحكم اختيارك وبالتالي توجه مشاعرك
____________________
الراجل بقا حكايه الاختيارات دى واسعه منه حبتين يعني فلاكسبول شويه عاوز واحده حلوة وموديل ما يصحاش يلاقيها لفه راسها بقراطيس طعميه
وكمان روشه تصبحه بنكت وتمسيه بزغازيغ!!!ا
وطبعا لازم تكون مثقفه عشان تربي وعياله وتدعمه في مواقف هو محتاج دعمها وتبقا في ضهره
واكيد بتحب اهله ولازم مطيعه وما يضرش غنيه وياحبذا متدينه
والقائمه لاتنتهي توفري له مطلب تسقطى في التانى وتعبش المرأءة تدور في فلك سي السيد الملول اللي عاوز ست بيت وام وزوجه ورقاصه ومثقفه لحد الهسهس ما يطلع لها في راسها عشان الزبون يقع ويحن ويتجوزها وبعد ما يقع تحافظ عليه ما يطرش لمن هي احلي واصغر واجمل تحياتىيا قمر

Anonymous said...

كلامك بيمس حاجة بفكر فيها من زمان زمش لافيلها أجابة له...
ليه أنا كشخص وتقريباً كل آلي بعرفهم ذكور أو أناث... عندنا ردود فعل شبه مشتركة بنسبة كبيرة حول جمال البنت أو وسامة الرجل....يعني هتلاقي دائماً أن فيه بنت بتتوصف بأنها جميلة بين أغلب أصحابها سواءاً بنات أو ولاد...هتلاقي كمان نفس الكلام على الولاد على أن فلان ده وسيم....
كل ده مش سؤالي، سؤالي هو هل رد الفعل الذي يبدو لي أنه غريزياً مصدره التشوية آلي صنعه الأنسان في نفسه من خلال تاريخ الأنسان على الأرض....ولا ده شيء طبيعي لكن لا ينبغي أن يؤثر على قرارات الإنسان وأختيارات وعلاقاته بشكل واضح؟
ممكن يكون سؤالي مش مفهوم بس مش مهم....أنا كنت عايز أقوله وخلاص...

م said...

مساء الخير يا بلو
موضوعك المره دى من المواضيع اللى بتقسم الناس مسبقا وقبل القرايه حتى لفريقين
نص رجاله ونص ستات
وده بيعمل حساسيه شويه وبيمنعك انك تبصى للكلام بموضوعيه كامله بغض النظر عن كون صاحبه راجل او ست
نتكلم الاول عن سعد قريبكوا ده
الا اخباره ايه الوقتى؟
المهم انا زيك معترض على مبدا سعد فى الاختيار بس مش معترض على سعد نفسه
لانه ببساطه شئ عادى جدا هو حدد هو عاوز ايه وخلاص
الراجل محدود الثقافه زى ماقلتى هتفرق معاه فى ايه الست بقى بتفكر ازاى ولا بتعمل ايه
ده بالنسبه للحاج سعد
عموما بقى فيه ناس فعلا مش عارفه هى عايزه ايه
يعنى تيجى تسالى واحده او واحد عن شريك حياته مواصفاته ايه هتلاقى حاله من اتنين
يا اما مش عارف اصلا
يا اما هيقولك كلام عام زى محترم متدين مش عارف ايه وكلام ممكن ينطبق على نص سكان القاهره مثلا
او تلاقيه راسم صوره فى خياله بس مش عارف يعبر عنها
وده اكتر فى الجواز التقليدى اللى مايكونش فيه تعارف سابق بين الطرفين وده الغالب دلوقتى
تخيلى مثلا ان جالك عريس(قولى يارب) ماتعرفيهوش ولنفترض انك مش رافضه فكرة الجواز التقليدى(بنقول مثلا) وقبل ما تشوفيه قالولك طوله 150 سنتى او وزنه 120 كيلو
تفتكرى هتوافقى تشوفيه ولا هترفضى من قبل ما تشوفيه؟
لو رفضتى محدش هيقدر يلومك حتى لو كان محترم ومثقف انتى حره ودى الفكره
بس انتى عايزه الحق؟ من حق الراجل والست يحط مواصفات شكليه للطرف الاخر سواء بقى مربرب ولا معصعص لانه مش هيتجوز مخ بس يعنى
الغلطه انه يبقى ده الشرط الوحيد
وانتى بس عممتى شويه فى حتة اللى بيطالبوا بتغطية المرأه شايفنها حتة لحمه وده مش صحيح خالص
جايز (وده حقيقى فعلا) شايفنها حاجه غاليه والعيون بصاصه وكل نظره رصاصه كما قال اخونا محرم فؤاد
المشكله انا شايفها فى اللى بيطالبوا بكشفها مش تغطيتها زى المعلم فاروق حسنى لما قال الست زى الورده ما يصحش نغطيها
هو شايفها ورده مش لحمه بس الورده برضه معرضه ان اى حد مالوش لازمه يشمها مش كده ولا ايه؟
عموما سعد كان فى ايام الرخص
كان فيه جواز وكان فيه ستات ورجاله مربربين كمان
قبل الجفاف اللى احنا فيه ما يهل
الله يرحم ايامك يا سعد
مافيش فايده

Anonymous said...

تضامنا مع عباس العبد
...
من حول ليلي لقطعه لحم هي ليلي
وكل واحدة تسال امها
.......
موضوع اني ابص للبنت من منظور انها كائن حي مش قطعه لحم
اوكي انا موافق
بس لما تبطل تتمكيج وتظهر ارطال اللحم في السمانه ومنطقة الصدر
طب هيرد حد يقولي المحجبة ساترة نفسها وكدة
اقولها وما العمل في الغريزة الانسانيه
.......
علي نفس منطق ليلي المريض
لماذا دائما يعاب علي الشاب انه تخين او مسلوع او قصير او مبهدل
اين النظرة في بؤرته الثقافية وانه ليس قطعه لحم بل انسان
.........
سعد في قصتك يعرف هدفه
انسان رائع بجد
والشاب التاني في القصة
برضة عارف هو عايز ايه
وانا مبلومش علي اي حد فيهم انه مطلبش لا ثقافة ولا زكاء ولا علم
حرية شخصية
وكل واحد حر
............
موضوع ان المراءة جسمها بيجذب الرجل
دة سلاح للمراءة
ونقطه ضعف للراجل
ومحدش له في نفسه شئ
ممكن بقي كل واحدة تدعي لربنا انه ياخد منها الجاذبيه والجمال والانوثة عشان متبقاش قطعه لحم
ويديها الذكاء والفطنه وشجاعه الرجال
عشان يتقال عليها بنت رجوله بجد
ومتبقاش بالكيلو
...................
اللي يبص لمبيعات مفتحات البشرة والفير اند لافلي
والماسكات والميك اب ومكيجات المراءة
سيعلم تماما
ان هناك منافسة حاميه بين ليلات الوطن لتجميل قطع اللحم
.................
مامتك يا هانم وهيا بتوصف حضرتك بتقول دي مثقفة ومتعلمة وذكيه
ولا بتقول دي بيضاء وطويلة وجميله

سخرية الاقدار
حتي مامتك بتوزنك بالكيلو
...................
مسابقات ملكات الجمال اللي بتتعمل
وبتتقاس فيها البنات بالكيلو
بيدخلوها غصب
؟؟؟؟
ولا بيدخلوها بمزاجهم
؟؟؟؟؟
وعندها يصبح المقياس هو الميزان
ولا عزاء للثقافه
.....................
خلاصة الكلام
ليلي هي من صنعت معايير تقييمها
......
المشكله ان اي ليلي مش مقتنعه بالكلام الهجص دة
واغلب الكلام سفسطه فارغة

طب لو فيكو واحدة رجولة بجد
تعمل جمعيه
مضربون عن الزواج من اجل حقوق ليلي

ووروني بقي هيبقي فيها كام عضو


والمشكله انكو مع اول فرصة للجواز بتبيعوا الشعارات دي

يعني لو واحد مثقف حبتين
وواحد عندة عربية 2007
هتختاري مين
؟؟؟؟؟؟؟؟

Anonymous said...

يا جماعة يا جماعة (على رأي فيصل القاسم)
ماحدش قال إن المفروض البنت أو الولد مايهتموش بشكلهم عشان يبقوا مثقفين
لأني لاحظت أغلب اللي ردوا إتكلموا من المنطلق ده
لكن مايبقاش الشكل هو المقياس الأساسي للإختيار أو حتى في بعض الأحيان هو ده المقياس الوحيد
فعلا زي ما هاني قال ممكن واحدة تمكون جميلة جدا لكن الحياة معاها صعبة
إنت لو بتتكلم عن إرتباط يبقى بتتكلم عن حياة

تحياتي

بنت القمر said...

اختي بلو
معلش االله يخليكى بس في كلمتين في زوري ها اقولهم ليكى ولانينيموس اللي قبلي بتاع امك اللي خلتك قطعه لحم وارطال اللحم من السمانه
بص يا سيد انينيموس ماهي الست ليلي حفيت عشان ترضي سعاتك وتملي عينك الفارغه اللي ما يمليهاش الا............ عماله تحط لك احمر واصفر وشويه تبيض روحها وشويه تعمل لك برونزاج حبه عوزينها تخس وحبه مربربه وهي مسكينه عوزة ترضي الزبون عشان يحن ويتجوزها والا ها تقع في بئر العنوسه ولما تحن وتجوزها دا بعد معاناه طويله وذل ابدان خصوصا مع حاله الكساد الاقتصادي اللي خلت المعروض من ليلي كتير فضلت البعض سكه الحجاب والخمار باعتباره عامل جذب برضه للبعض
بنقول لما تحن وتتعطف وتجوزها وتمنحها شرف تبعيتك وتديها ضلك اللي هو ولا ضل حيطه تقعد برضه تعملك عجين الفلاحه عشان متطرش من ايدها بعد ما تقرش والفلوس تجري فايدك بعد عشر سنين جواز تكون هي اطحنت وخلفت لسعاتك عيلين لازم تعملك عجين الفلاحه عشان متطرش لليلي اصغر واجمل
يعني انت السبب منك لله شحتفتها وراك دنيا واخرة
واذا كانت امها بتوصفها انها بيضه وطويله فدى لغه السوق اللي انت تفهمها وتمشي معاك ودا اللي ها يجر الزبون ولا ايه؟؟ والا هو مش عاوز يدلع ويتشخلع
ويصبح بواحده حلوة مش لفه راسها بقراطيس طعميه
البيه الي بيدلدل بقه ادام كليبات هيفاء اكتر منلما بيشوف نظريه علميه الي بيفقد اتزانه امام نانسي اكتر من لو كان ماشي علي الحبل يعني منكم واليكم الكره رايحه جايه لامذنب ولا ضحيه عرض وطلب مجرد ان ليلي بتباصي الكره عشان تعدي الليله
الراجل كمان هوالمنتج لادوات التجميل والسنفره والبلاوي دي ولا هي بتحطها لروحها ولا لامها وابوها ماهو ليك
عشان كدا احيانا ليلي بتضربها طبنجه بعد الجواز وتتحول الي شجرة جميز بعد ان كانت غصن بان عارف ليه لان اللي عملته قبل الجواز ارهقها وهد حيلها لاجتذاب الزبون ولما وقع تعتقد احيانا انه كدا تمام ولو كانت بتعمل كدا لروحها كانت استمرت
صح ولا ايه؟؟؟
معلش يا بلو جو سوي بافارد
ايكسكيوز موا
والسلام عليكم ودمتم

bluestone said...

بنت القمر:
ازيك يا ستي عاملة ايه ..
معلش انا سافرت لمدة 4 ايام بس ومالحقتش اعمل اي حاجة ..
وقد جرت العادة اني حتى مش بكلم اصحابي المسلمين على اي ترتيبات في اول كام يوم من رمضان لاني عارفة ان الدنيا بتبقى زحمة جدا والمسائل العائلية والحاجات بتاخد كل الوقت ..

-------
بالنسبة للحملة انا قلت قبل كده انا مش بحب الحملات اصلا ..
وهي في الحقيقة مش حملة بالمعنى المفهوم
هو مجرد يوم كل واحدة فيه بتكتب عن نفسها من منطلق انها واحدة ست ...
بتتكلم عن همومها ومشاكلها

انتي عندك حق في ان كل الناس بتسعى للكمال .. يعني اي راجل عايز واحدة جميلة ومثقفة وتربي العيال وتشتغل وتبقى أم وزوجة وحبيبة وصديقة وجارة ووووو كل الحاجات

الست كمان بتدور على حاجات مماثلة
واكيد بتدور برضه على حد متكامل فيه كل الصفات دي
في وسامة براد بيت وثراء الوليد بن طلال وثقافة نجيب محفوظ وشعر نزار قباني .. إلخ

لكن لان الكمال لله وحده .. الناس بتحسبها بايه اهم الأمور بالنسبة لكل واحد ..
اللي مقدرتش افهمه ان فيه ناس كتير لحد النهاردة مش شايفة ان الست مجرد وعاء للمتعة ثم خادمة لتربية الاطفال وخلاص ... دي مسألة لا يمكن قبولها بأي حال من الأحوال ...
ان يختصر الانسان لمجرد حاجة

المواصفات أو الصفات الجسدية لاي انسان مهمة .. ومفيش مشكلة انه يكون لكل واحد تفضيلاته الجسدية في الجنس الآخر ..
يعني في ستات مابتحبش الراجل البدين مثلا او الاصلع إلخ
وفيه رجالة بيحبوا البنت الطويلة أو الرشيقة وهكذا ..
لكن يكون هو ده المطلب الأوحد والأول والأخير .. دي حاجة سخيفة جدا

bluestone said...

THE EYEWITNESS:
افتكر ان المقاييس او المعايير القياسية للجمال او الجاذبية هي من صنع البشر تماما لكن اللي بيخليها متأصلة في العقل الجمعي للبشر هي ترسيخها من قبل وسائل الاعلام والتعليم والتربية ..
يعني الطفل الصغير بيتعلم من ابوه يعني ايه ست حلوة.. ايه مقاييس (الحلاوة) بالنسبة له ..
وهنا الاعلام بيلعب اكبر دور انه يرسم ويحدد مقاييس الجمال
وهنا مابيكونش لينا دور كبير في تحديدها .. او على الاقل ما بيكونش لينا تفضيلات شخصية مختلفة كتير الا في حالات استثنائية ..
ده على صعيد الشكل
وفيه مجموعة من المعايير بتحدد نظرتنا للاخرين ودي معايير طبيعية واعتقد انها بتتحدد بطريقة فطرية .. يعني الاهتمام بالمظهر العام، الجسم المتناسق، النظافة في المظهر، الالوان، لغة الجسد
وغيرها ..
انما معايير الشكل افتكر انها بتتغير بتغير الاجيال وبيرسخها الاعلام ..
يعني من 50 سنة ولا حاجة كانت الست البدينة مثال على الجمال والصحة والعز ..
كانت أمينة رزق فاتنة السينما
كانت ليلة مراد بجسدها الفارع وكتفها العرض وقالبها الطويل تمثل الفتاة الجميلة في السينما المصرية وبالتالي في المجتمع المصري ..
ربما فيما بعد مع ظهور سعاد حسني ظهرت فكرة الجمال المتمثل في البنت صغيرة الحجم كثيرة الحركة .. والي جانبها مثال هند رستم الانثى متكاملة الأنوثة بشعرها الاشقر وجسدها الممشوق ..
وهكذا ..

كلها نماذج مصنوعة تحفر في عقولنا فنطبقها على حياتنا ..


اتمنى اني اكون فهمت سؤالك صح ؟؟ او حتى قربت :)

bluestone said...

محمد الهنداوى:
مساء الخير يا دكتور ..
بتسأل عن سعد
اتجوز غالبا الله واعلم .. هو كان جار جدتي معرفش ان كان عايش ولا لأ حتى ..

ممكن بسهولة التماس العذر لواحد زي سعد بسبب التعليم البسيط والثقافة المحدودة وانه هو نفسه معندوش اكتر من كده ..
رغم ان حتى بعض الرجال لو كان تعليمهم بسيط فيه امور كتر بيطلبوها غير الجسم ..
انا زي ما قلت مش بعترض على التفضيلات الجسدية .. اكيد كل واحد في الدنيا عنده افكار وتفضيلات معينة .. فيه واحد بيكره البنت الشقرا وناس بتحب اصحاب البشرة السمرا وهكذا ..
كل اعتراضي يا دكتور على ان التفضيلات الجسدية تكون هو الحاجة الوحيدة اللي بيطلبها البني آدم ..
كما لو انه بيشتري لحمة من عند الجزار ..

وبعدين حتى لو التمسنا العذر لواحد زي سعد .. طيب والتاني .. الجامعي المثقف المحترم المتفتح .. لما كل أمانيه في الحياة انه يتجوز واحدة رشيقة .. وبس ..
ده بقى عذره ايه؟؟؟

انا بتفق معاك تماما في ان ناس كتير جدا مش عارفين هما عايزين ايه ..
وده بسبب انه مفيش تفرد او تميز .. يعني الناس بقت شبه بعضها ..
ده غير ان ناس كتير فاهمة الجواز اصلا غلط .. وده موضوع تاني خالص

تركيزي هنا كان على النظرة المتدنية للمرأة .. لما ينظر إليها على انها إما عورة في حاجة لتغطية
او شكل جميل في حاجة لعرض .. وبس

وعلشان ماندخلش في مناقشة قضية الحجاب والنقاب والخمار والساري والشابور .. وغيرها من باقي الملابس .. لانه موضوع كبير وبرضه مش موضوعنا ...
اعتراضي الأول والاساسي على النظرة دي للست .. لا صوتها عورة ولا شكلها عورة ولا جسمها عورة وجب تغطيتها والخجل منها .. ولا هي عروسة حلاوة مطلوب تتلون بألوان الطيف وتمشي في الفاترينة ليل ونهار ...

الخيابة اللي بجد اعتبارها وردة وفلة وجوهرة وشوال بطاطس .. كلها في النهاية أشياء ..
وهي بني آدم ..
ازاي تختزل الانسان وتحوله إلى شيء .؟؟؟؟

bluestone said...

Anonymous:
وبعدين في الناس المجاهيل الوحشين دول؟؟
ما علينا ..
السيد المجهول اللي متضامن مع عباس العبد

مع ان عباس العبد نفسه مش متضامن مع نفسه في المسألة دي ..
-------------
اولا:
من حول ليلي لقطعه لحم هي ليلي
وكل واحدة تسال امها
.......
لو كنت قريت شوية في الردود كنت هتفهم .. لاني قلت انها مش مشكلة الرجل ولا غلطته لوحده .. النظرة المتدنية للمرأة امر موروث بتشارك فيه المرأة ايضا
بدليل والدة كراكيب مثلا اللي عندها شروط محددة في زوجة ابنها .. لم

ثانيا:
(موضوع اني ابص للبنت من منظور انها كائن حي مش قطعه لحم
اوكي انا موافق بس لما تبطل تتمكيج وتظهر ارطال اللحم في السمانه ومنطقة الصدر)
ايه المنطق المغلوط ده ..
كل واحد حر بيعمل اللي هو عايزه
ونظرتك للاخر بتبقى دايما نابعة من قيمك انت مش من مظهر الآخر ..
اذا انت ماقدرتش تشوف أبعد من الميك آب أو الحجاب أو غيره يبقى المشكلة عندك بالتأكيد

وبعدين انت ناقدت نفسك بنفسك .. يعني حتى المحجبة .. برضه ان التمست العذر لنفسك وقلت يا حرام .. هنعمل ايه في الغريزة الانسانية !! مش قادر تسيطر عليها .. معذور برضه . ..

المشكلة اصلا في انك ماشفتش الا اللي انت عايز تشوفه .. جسد يا اما متغطي او لأ .. انت شفت الجسد وماشفتش البني آدم يا عم المجهول

-------------
بقى منطق ليلي بقى هو اللي مريض ..
يا لا مش مشكلة
----
ثالثا:
(لماذا دائما يعاب علي الشاب انه تخين او مسلوع او قصير او مبهدل)
مين اللي قال كده ؟؟
وليه عممت ؟؟ مين دائما ومين بيعيب؟؟
فيه ناس نظرتها سطحية للأمور
لكن انت عمرك شفت راجل تخين مش عارف يتجوز لانه تخين ؟؟؟ أو لانه أنفه كبيرة مثلا ؟؟ أو لانه أصلع ؟؟؟
مابيحصلش كقاعدة عامة
-----------------------
اذا انت شايف سعد انسان رائع
انت حر ما اقدرش اقولك اكتر من كده
............
(ممكن بقي كل واحدة تدعي لربنا انه ياخد منها الجاذبيه والجمال والانوثة عشان متبقاش قطعه لحم)

برضه كلامك غلط .. جدا ..
ليه المقارنة بين الثقافة والشكل ؟؟؟
ايه العلاقة بين الاتنين ؟؟
وهل البني آدم المثقف بالضرورة لازم يكون شكله مش ولابد مثلا ..؟؟ ده كلام غريب جدا ..
ثم ان محدش اصلا قال ان المرأة مش من المفروض انها تكون جميلة او انها تهتم بنفسها مثلا.. .او ان كل واحد يكون عنده تفضيلات معينة ..
لكن اللي قلته بالظبط .. انه المواصفات الشكلية متكونش هي الشرط الوحيد
------------
رابعا: (مامتك يا هانم وهيا بتوصف حضرتك بتقول دي مثقفة ومتعلمة وذكيه
ولا بتقول دي بيضاء وطويلة وجميله)
وانت ايش عرفك يا مجهول اصلا ؟؟
ايه الافتراضات البطيخية بتاعتك دي؟؟

وبعدين ايه علاقة الكلام اللي بنقوله
بالاضراب عن الجواز ؟؟؟
انت قريت ايه اصلا؟؟
ولا فهمت ايه من التدوينة ؟؟؟؟؟؟

اما بالنسبة لسؤالك الاخير.. فانا قائمة متطلباتي كبيرة طويلة قوي .. ومافيهاش للاسف عربية 2007

وطبعا في ظل اسلوبك الرفيع وذوقك العالي مانقدرش نضيف اي حاجة تانية ..

وبنقولك ابقى تعالى تاني بس ابقى قول اسمك .. عشان اللي بيخاف بس هو اللي بيفضل مجهول

bluestone said...

يحي المصري:
(مايبقاش الشكل هو المقياس الأساسي للإختيار أو حتى في بعض الأحيان هو ده المقياس الوحيد)

انت جبت التايهة

تحياتي ليك

عباس العبد said...

صباح الفل يا امينة انتى و هى
عاملين ايه من غير سى السيد ؟
........
جبتى منين كلمة المرأة وعاء للمتعة و خادمة لتربية الاولاد ؟
اول مرة اسمعها فى حياتى
محدش بيفكر كده خالص
ازاى يعنى
و كمان بتألفوا كلام احنا مقلناهوش
عيب عيب يعنى
......
انونيمس
" بس لما تبطل تتمكيج وتظهر ارطال اللحم في السمانه ومنطقة الصدر "
انت نسيت اهم منطقة تتراكم بها الشحوم و تتكون بها الدهون
و تلبس افضح الازياء بواسطة بنات حواء
و سلملى على كلفن كلاين
المفروض متصرحش بالكلام ده
علشان هما بيتلكيكم
خش اقرا كاتبين ايه عندى
كلهم بيتمنوا يبقوا امينة
و كله بحسابه
دول ما فهموش الاسئلة بتاعة الحملة
متدغطش عليهم جامد
.......
بقولكيا بلو
واضح انك مش حبه موديل 2007
و انا حجيب عربية قريب موديل 2008
مش انتى عايزه 2008
و مثقف و بموت فى الشيخ زبير الى هو شكسبير بس بالليبى
انت عارفه انا بحب شكسبير قد ايه
انفع ؟
و عندى دوار كبير

bluestone said...

عباس :::
انت وعربية 2008 ؟؟؟؟؟؟؟؟؟؟؟؟؟؟؟؟؟؟
no way
ابقى قابلني

وبرضه
نو يا شيري نو

وبلاش انت !!
والكلام ده والاوصاف دي
موثوق منها تماما ..
وانت عارف وانا عارفة ..

وابعد يا بني عن سكة الانونيموس .. ده برضه لهو خفي .. ورد الفعل كله هينزل على دماغك

micheal said...

للاسف نحتاج الي وقت طويل من أجل تغيير هذه النظره و للاسف وسائل الاعلام هي المغذي الرئيسي لهذه النظره
تحياتي لكي

م said...

لا صوتها عورة ولا شكلها عورة ولا جسمها عورة وجب تغطيتها والخجل منها

****** ..
معلش يا ماريان هعلق باختصار
صوت المرأه مش عوره
صحيح
الا فى حالات معين ذكرها القران حين تخضع بالقول فيطمع الذى فى قلبه مرض
اما جسمها فهو عوره يجب سترها وده لا يقلل من شانها ابدا
ده امر شرعى لا يخضع لرأيى ولا رأى غيرى
هو مش موضوعنا بس انتى اللى قلتى وكان لازم ارد

Egyptiana Trapped Soul said...

اول زيارة لى لمدوتك، وقد شد انتباهى هذا الموضوع بالذات
ربما لانى واحدة من المنادين بحقوق المراة، والكف عن معاملتها على انها جسد

المشكلة ان هناك الكثير من التضارب فى الاراء واذدواجية المفاهيم، بالاضافة الى ان الموضوع نفسه شائك وبه العديد من الجوانب التى تؤخذ على انها نقاط ضعف

بدون تطويل، لقد لاحظت هنا ان هناك بعض المعلقين من انصار ان المراة قطعة لحم، يخلطون بين الثقافة والشكل، ينظرون للعلاقة بين المراة والرجل على انها حسية فقط بدون النظر الى ابعاد اخرى

ولهولاء اقول
حرية المراة تكمن فى احترامها ومعاملتها كانسان!!!
هل يصعب عليكم فهم تلك الكلمات

ولا المراة ان لم تكن قطعة لحم ... تكون عانس او عاهرة او عندها مشاكل نفسية

خلق الله للمراة جسدا جميلا، وعقلا راشدا، وسيحاسبها كما يحاسب الرجل... اذن كيف يعتبرنا الله كائنات كاملة وانتم تعتبروننا كائنات ناقصة

على العموم انا اوافق ان الموضوع كبير، وان اعدى اعداء حركة حرية المراة هم النساء الذين وافقوا على التحول الى قطع لحم

الحيوان يستطيع ان يميز بين لصالح والطالح

اما للبنى ادم ان يميز بين المراة الحرة، والمراة التى تسعى للعيش فى الظل، يكفيها امتاع الرجل وتربية العيال والمناكفة فى زوجها طوال النهار على كلام فاضى؟؟؟

على الاقل من تملك الحرية والعقل ... يتكون سندا، وليس ترابيزة فى المنزل

اقول لمن يقول علينا قطع لحم
انتم يا ابناء قطع اللحم واخوات قطع اللحم وازواج قطع اللحم... هذه حياتكم، وهولاء نسائكم... فهنيئا لكم

ولكن اعلموا ان هناك من النساء من يرفضن ان يعاملن بهذه الطريقة، وبدأن مشوار طويل، ولن يقفن لان مجموعة من الكانيبالز تسد الطريق

تحياتى بلوستون
وفى انتظار المزيد

على باب الله said...

كان حظي حلو أني وجدت مدونتك

مدونة جميلة جداً حقيقي

و بوست رائع

لكن يا رب ما تكونيش بتدني في مالطا

bluestone said...

MICHAEL:
اتفق معك تماما في مساهمة الاعلام في تعزيز النظرة السيئة
============================

محمد الهنداوى :
انا مفهمتش يعني ايه صوتها عورة (حينما تخضع بالقول فيطمع الذي في قلبه مرض)
محتاجة شرح دي يا دكتور
==
=====================
Miss Egyptiana "Trapped Soul":
منورة أولا


المشكلة ان البعض يفترض في حالة وجود الثقافة انتفاء الشكل وفي حالة وجود الشكل غياب الثقافة
ودي نظرة أحادية تعميمية غير دقيقة
الله ينور عليكي
======================================
على باب الله:
منور
واحنا حظنا احسن طبعا
وعلى فكرة
حتى مالطا بقى فيها مسجد

يا مراكبي said...

الحوار اللي بعد البوست ومكتوب هنا في التعليقات ظريف جدا جدا .. خسارة إنه فاتني أتشاكل مع الناس الحلوة دي كلها

لكن في الواقع إن نظرة الرجال للمرأة على إنها قطعة لحم دي حقيقية وهي الغالبية كمان .. والمشكلة الأكبر في إن فيه سيدات بيربوا أولادهم بنين وبنات على كده .. للأسف

bluestone said...

يا مراكبي:
اهلا بيك
ومايفوتكش شكل تاني
انت صح
المشكلة ان فيه ستات كتير بتربي بناتها على النظرة دي
الراجل مش هو الملوم الوحيد في المسألة دي
فيه ستات كتير كمان قابلة الفكرة دي وبتصدرها لاولادها