Friday, June 13, 2008

المصري اليوم ودروس المسخرة الصحفية


بعيدا عن جميع القضايا الطائفية .. لم اكن انوي بالاساس كتابة اي تدوينة جديدة عن الموضوع
لانه اولا قتل كلاما وثانيا لا جديد فيه وثالثا هناك امور اخرى تستحق الكتابة والتفكير فيها ايضا

ولكني ما ان قرأت ذلك المقال قبل ايام في صحيفة المصري اليوم أصبت بحالة احباط استمرت يومين كاملين
كنت اشعر بغثيان شديد كلما وقعت عيني على اي صحيفة مكتوبة باللغة العربية بل وميلا للقئ كلما رأيت المصري اليوم

ولذلك فانا اليوم لست بصدد مناقشة تفاصيل القضية ولا الحادثة ولا حتى قضية الطائفية فقط ارصد حالة الاحباط التي اصبت لمدى التدهور الذي تشهده صحيفة كانت يوما محترمة (وربنا يستر على البديل..مابقاش فيه بديل غيرها

منذ عددها الاول كنت من أشد المتحمسين لها .. صحافة حقيقية حياد تام بعيدا عن تطبيل صحف الحكومة وتهبيل صحف المعارضة
لمن له دراية بالصحافة العالمية ومقاييسها كقارئ وعامل بها كانت المصري اليوم بالنسبة لي سابقا كما كنت اقول دائما (احسن الوحشين)كما يقولون .. كانت الاكثر حيادا في لغتها واسلوبها والاكثر مصداقية في تغطية الاخبار
كما كانت الافضل من حيث الاخراج والشكل

ولكن لا ادري ما الذي حدث .. تدريجيا وبهدوء شديد وفي عادة مصرية صميمة نجيد إفساد كل شيء يحقق نجاحا
اصبحت المصري اليوم عزبة بلا صحاب .. او صار لها اصحاب جدد ربما فتحولت إلى اوراق لا تساوي الحبر الذي تكتب به
وتضم دروسا في المسخرة الصحفية الحقيقية

من يريد ان يتعرف وبصدق على حجم التهريج الذي تفعله المصري اليوم عليه ان يقرأ تغطيتها لاحداث دير ابو فانا لمدة اسبوع واحد فقط ومقارنتها بعضها ببعض .. ليتيقن ان القائمين على تلك الصحيفة المحترمة يعتبروننا كقراء هبل او سذج او على افضل تقدير اصحاب ذاكرة ضعيفة للغاية ....مصابين بحالة من الزهايمر المبكر

المصري اليوم بتغير كلامها كل يومي

وإليكم مثالا بسيطا
http://www.almasry-alyoum.com/article2.aspx?ArticleID=108692

خبر مطول او تحقيق مصغر ايا كانت صفته نشر في صفحة قضايا ساخنة في مكان سيء بالنظر لاهمية ما يدعيه الصحفي

فبداية ::يقول الصحفي الواعي ان الكلام الوارد في مقاله يحوي حقائق جديدة ..الم يكن من الاولى ان توضع تلك الحقائق في صدر الجريدة كسبق صحفي

ولكن ما ان قرأت ما كتب حتى اكتشفت ان الجاني فجأة بقى مجني عليه والمجني عليهم بقوا مجرمين والقتيل بقى مش قتيل
والتهريج زيادة قوي


إليكم نص الخبر والمكتوب بالاحمر تعليقي عليه

وطالبت أرملة خليل إبراهيم محمد، الذي لقي مصرعه في الأحداث الأخيرة بمحاكمة سمير محمد أبولؤلؤة ، عرفيا، لأنه أفرج عن الرهبان الـ٣ قبل الثأر لزوجها (المصري اليوم وباقي الصحف والفضائيات قالت ان ابو لؤلؤة ده هو اللي خاطفهم)ا

واتهمت والدة المجني عليه أحد الرهبان بالسب والقذف لأنه قال إن نجلها مختل عقليا (مين اللي قال كده؟؟ ده كان محامي الرهبان مش الرهبان والكلام ده كان على لسان المصري اليوم فقط في معلومة نشرت بشكل مثير للشكوك من اسبوعين)ا.

قال صابر محمد شواف «٤٣ سنة» سائق حفار، وشاهد عيان علي الحادث عقب صرفه من سراي النيابة مساء الخميس الماضي، إن الراهب مكسيموس طلب منه العمل بالحفار الذي يمتلكه في بناء السور موضحا أن العرب لهم أرض في الجانب الشرقي من الأرض التي يحاول الدير وضع يده عليها (ازاي وفيه ورق بيثبت ملكية الدير للارض وتم نشره في بعض الصحف بالفعل)ا

واتهمت فتحية فتحي سيد علواني، أرملة المجني عليه، الشيخ محمد سمير أبولؤلؤة، أحد رجال المصالحات في المنطقة (الراجل بقدرة قادر في 3 ايام تحول من خاطف إلى احد رجال المصالحات في المنطقة!!!وعجبي)ا
ة بالتدخل مع الأجهزة الأمنية للإفراج عن ٣ رهبان تم التحفظ عليهم لمدة ساعتين كرهائن بهدف الثأر من أحدهم، عقب وفاة زوجها، (يعني العرب مش هم اللي خطفوا الرهبان وطلعت اسرة القتيل هي اللي خطفتهم !!!!!) وطالبت بعقد جلسة عرفية لمحاكمته، بعد تردد أقوال تفيد حصوله علي ٢ مليون جنيه مقابل تدخله (الكلام ده درس في التهريج الصحفي..

وقال أبولؤلؤة في مواجهة ساخنة حضرتها «المصري اليوم» إن الله سوف ينتقم منه لأنه فرط في حق بريء مجني عليه، كان في عمله وخرج علي أصوات الرصاص فسقط شهيدا دون أن يكون طرفا في الصراع (ده الراجل بيقول على نفسه الكلام ده!!).

وقال أبولؤلؤة إن الأهالي من المسلمين والمسيحيين كانوا يعيشون في حب وود قبل وصول الرهبان (قبل وصول الرهبان ازاي اذا كان الدير اثري اصلا يعني كان فيه رهبان في المنطقة من قبل ما ابو ابو لؤلؤة يقابل ام لؤلؤة ويجيبوا بسلامته) حيث كانت المنازل والمقابر متجاورة، وكانت مقبرة القس أبوفانا مقامة علي مساحة لا تتجاوز ١٠٠ متر (الدير بمساحته الاولى بالكنيسة الاثرية بداخله موجودين من القرن السادس يعني الصحفي لم يتعب نفسه قليلا في الفبركة)ا


وقدم العرب مستندات تؤكد ملكيتهم الأرض (العرب بيتملكوا أراضي؟؟؟؟ فيه بدو معاهم مستندات ملكية!!!!!؟؟؟ ازاااااااااي؟؟هم العرب مش بيدفعوا تمن اراضي ولا بيشتروها يا ناااس ... العرب بياخدوا الاراضي بوضع اليد ومش بيعترفوا من الاساس الا بالقانون العرفي..ولماذا لم تنشر تلك المستندات في اي صحيفة؟؟ ..ايه الصحفي المغيب ده؟؟؟؟)ا.

ضاف أبولؤلؤة: إن الواقعة الأخيرة كانت بسبب رعونة الطرف القبطي، مشيرا إلي أنه تدخل بالفعل لإنقاذ الرهبان من الهلاك، مما جعل الأهالي يتهمونه بالحصول علي ٢ مليون جنيه من الدير، (واحد من عرب هوارة بيقول رعونة الطرف القبطي!!! يعني اعلق اقول اييييييه !!!!!!)ا

ومؤكدا أن هذا لم يحدث، لكنه تدخل للإفراج عنهم لأن سماحة الإسلام تحض علي عدم قتل الأسير، مستشهدا بأن المسلمين نقلوا الراهب يؤانس الذي كان متأثرا بإصاباته بوضعه في جلباب علي شكل نقالة، نافيا وجود أي تشوهات في الرهبان، مؤكدا أنهم كانوا متأثرين من بعض الإصابات نتيجة المصادمات (وهم ضربوا نفسيهم في الطريق ولا ايه؟؟).)ا

وقال جمال مساعد، محامي المتهم، إن نيابة المنيا الكلية وجهت إلي ١٣ متهما من العرب، و٢ من الأقباط عدة اتهامات، منها اختطاف مقترن بالقتل (ازاااااااااااااااي اذا اللي خطف طرف واللي قتل طرف تاني خااااااااااالص واللي اتخطف مااتقتلش واللي اتقتل محدش خطفه !!!!!!!!) وإحراز أسلحة نارية وبنادق وخرطوش وإصابات بأعيرة نارية، وتهم عامة للجميع منها إضرام النار عمدا في المباني والمنشآت الخاصة بالدير (يعني الاتنين الاقباط متهمين باضرام نار في الدير ؟؟؟!!!!!!!!! هو الصحفي ده متعاطي حاجة ولا ايه؟؟؟؟؟

، وحبس واحتجاز ٣ رهبان، وإحداث إصابات بهم، وإطلاق النار علي الراهب باخوم.

وقال فوزي مشحوت علوان: إن العرب استصلحوا آلاف الأفدنة دون تكليف الدولة أي اعتمادات مالية، وأنهم لا يحملون سوي الفأس (هم العرب بقوا بيزرعوا ؟؟؟ هم العرب بيزرعوا ؟؟؟؟؟ هم العرب بيزرعوا ؟؟؟؟ من امتى ؟!؟!؟!؟! ) .

وأكد حربي صديق مهدي، مزارع، أن الرهبان كانوا يهددون الأهالي بـ«جورج بوش»، ووصل الأمر إلي حد تصويرهم، وتهديدهم بتوصيل الصور إلي أمريكا والمواقع الإلكترونية (اظن لو فيه مسابقات في الفبركة والمسخرة الصحفية المصري اليوم هتكسب الجائزة الاولى



ولا عزاااااء لاصحاب الكلمة النظيفة

ولا عزااااء لاصحاب العقول النظيفة

ولا عزااااء للشرفاء

48 comments:

على باب الله said...

تعريص صحفي من النوع الفاخر

Anonymous said...

طيب و بالذمة اللي أنت كاتباه ده مش برضه عنصرية و طائفية؟

هما العرب بيزرعوا، عما العرب يمتلكوا أي أراضي من أساسه هما العرب بيدفعوا ثمن الأراضي الى أخره

يعني جزء من كلامك أن الخبر خطأ مش لأننا نعرف أن العرب الفلانيين محصلش أنهم زرعوا الأرض الفلانية لكن لأننا نعرف أن أصلا العرب عمرهم ما بيزرعوا.

و نفس الشيئ بالنسبة للملكية، فالمسلم بيه أنهم حرامية.

جبهة التهييس الشعبية said...

مالهم عرب الهوارة بس يا مريان؟ انت عارفة تعداد عرب الهوارة في صعيد مصر كام الف لما تشتميهم كلهم عشان واحد بس مجرم والله اعلم قال الكلام ده اصلا وللا لا؟

ده اولا

ثانيا
من امتى يا مريان المصري اليوم كان جريدة محترمة وللا عشان اول مرة يخبط في الحلل؟

المصري اليوم
1- اتسبب في سجن عشرات الشباب واتهامهم بتكوين ميليشيات وحيازة اسلحة

2- المصري اليوم كتب عن نورا يونس ومحمد الشرقاوي انهم بهائيين

3- المصري اليوم بعت بت بنص افرانك تعمل حوار مع راجل مسن وبدل ما تعمل معاه حوار تقييم فيه تاريخه النضالي حولته الى محضر تحقيق نيابة واتهمت فيه مركز الدراسات الاشتراكية بانهم عاملين تنظيم سري واتهمت فيه حركة العمال واضراباتهم بانهم متحركين من قبل حزب شيوعي سري وكانت ح تودي الناس في داهية لولا ربنا ستر وربنا ستر برضه لاسباب مجهولة قدامها علامات استفهام

4- المصري اليوم من كام سنة اخد اتنين مليون دولار من كولن باول لما جه هنا مصر وحطوها وديعة في البنك ودي اللي كانوا بيصرفوا منها المرتبات والتكليفات قبل ما الجرنال يصرف على نفسه

والمصري اليوم يا مريان عمرها ما كانت حيادية ولا نزيهة ولا امينة المصري اليوم زي الواشنطن بوست
وبتنفذ التعليمات الامريكاني مش حتى امن الدولة المصري

واحنا بقينا نعرف مين ح يتقبض عليه وايه نوع القضية اللي ح تتلفق له لما نقرا المصري اليوم

وبقينا نعرف امريكا متصالحة مع النظام وللا متخاصمة معاه لما نقرا المصري اليوم ونشوف هي سايقة في انهي سكة

والاهتمام السابق او تقدري تقولي التعاطف السابق مع المسيحيين المصريين اللي كان مخليكي فاكرة ان المصري اليوم محايد مالوش علاقة بالحيادية ولا بالنزاهة

له علاقة بالسياسية الامريكية وتعليماتها لحلفائها هنا وانا لما باقول الكلام ده مش بارمي كلام جزافي

امريكا رصدت لمصر 20 مليون دولار معلنين لتحسين صورة امريكا في الصحافة ودور النشر المصريين ونشر حرية الرأي والتعبير

والكلام ده اتكتب في الجرايد والكتاب والصحفيين الافاضل المنوط بهم نشر الحرية وتحسين صورة امريكا اجتمعوا مع ديفيد ولش ومعروفين بالاسم

والصحف المنوط بها تنفيذ التعليمات اللي عشانها اتصرف العشرين مليون دولار معروفة برضه وعلى راسها المصري اليوم


والكلام اللي انت كاتباه ده كويس انك تقريه كده وتكتبي بقى كده

عشان ده المطلوب تحديدا سيادتك

زيادة الاثارة في الفيلم بتاع خناقة العرب والدير على ارض فصل فيها القضاء اساسا

والمصري اليوم بتلعب دورها

واحنا مش مفروض نلعب دورنا باننا نشتم العرب كلهم عشان كام عربي عملوا جريمة

يعني كل المسيحيين يتشتموا عشان اللي قتل وداد حمدي مسيحي؟

اللي خطفوا الرهبان مجرمين ولازم يتحاكموا ونبطل بقى الصلح العرفي ده

ولازم يتحقق معاهم وللا زي كل مرة ح يطرمخوا على الموضوع ويقولوا اصطلحوا واحنا قاعدين نضرب اخماس في اسداس ومش عارفين ازاي ده حصل

فيه جريمة حصلت ناس خطفت وناس اتخطفت
اللي خطف لازم يتحاسب على الجريمة ويتقدم لمحاكمة

فيه قاتل وفيه قتيل اللي قتل لازم يتحاسب ويتحقق معاه ويتقدم لمحاكمة

وطول ما الصعيد ماشي بالصلح العرفي ح يفضلوا طول الوقت لقمة طرية للامن يلعب بيهم من تحت للتحت عشان يجدد قانون الطوارئ

enough is enough
والقضايا دي ما ينفعش تتحل عرفي

ولا ينفع كمان يا مريان ما نشوفش دناءة الجهة الدنيئة الا لما تئذينا احنا وطول ماهي بعيدة عننا بتئذي غيرنا احنا مالناش دعوة

karakib said...

نوارة
المصري اليوم

كتبت عن صاحبة هذة المدونة و عن اخناتون اللي هو رامي سيدهم صاحب مدونة اخناتون منذ ما يقارب سنة و نصف معلومات خاطئة للغاية ... و كانت ممكن تبقي مصيبة علي الاتنين يا نوارة لو مش فاكرة مقالة الجيل الثالث للمدونين
-------------
غير كده مفيش اعلام محايد اساسا و اللي يقول غير كده يبقي طيب
---------

تاني حاجة و معلش القهوة العالية تسمح لي ارد

هو من امتي فعلا البدو بيزرعوا !؟ هما مش البدو بيرعوا غنم و عايشين في صحرا ؟ و لا هو اللي بيذكر الحقائق بقي هو اللي متعصب اليومين دول !؟ و من امتي البدو كانوا يمتلكون اراضي ؟ هو البدو مش بيوضعوا يدهم علي اراضي ؟ و لا ده غلط ... يعني المشكلة مش بس في الدير .. لأ ده في المدن زي مدينة بدر و غيرها العرب بيعدوا يلموا فلوس من المصانع و لو ما خدوش الشهرية بيسرقوا اللي ما دفعهاش
اكيد محدش بيتكلم بصفة مطلقة لأن الاحكام المطلقة خطأ مطلق
لكن في نفس الوقت مين قال انه ده ما بيحصلش !؟ و هو لما اقول انه الفلاحين بيزرعوا و البدو بيرعوا غنم تبقي طائفية !! مش فاهم المنطق ده
من طبيعة البدوي الترحال مع الامطار و عدم الثبات في منطقة واحدة و من طبيعة الفلاح الاستقرار لأنه مرتبط بالارض
فين العنصرية و الطائفية في معلومة مؤكدة زي دي ؟؟؟

جبهة التهييس الشعبية said...

:)
يعني لما المصري اليوم تكتب على لسان الراجل اللي خطف الرهبان انه بيشتم الرهبان
وبدل ما اقول ده مجرم اقول: واحد من عرب الهوارة بيشتم الرهبان؟ اقول ايه يعني!!!

يبقى نقول ايه يعني؟

هي مشكلته انه شتم الرهبان؟
وللا مشكلته انه من عرب الهوارة؟ يعني لو ما كانش من عرب الهوارة من حقه يشتم الرهبان؟ ويخطفهم كمان بقى

ثم هي المشكلة الشتيمة
ده خطف تلات رهبان وحر طليق
حر طليق
ما اتقبضش عليه
حد يديني عقله يا نااااااااااااااااااس

karakib said...

يا نوارة هو خطفهم لوحده !!؟ و لازم نعرف هو خطفهم ليه .. السبب انه عايز ياخد الارض
طبعا مينفعش يفضل حر طليق
و لا هو و لا اللي ساعدوه من باقي الناس ايا كانوا منين ان شالله من سويسرا

lastknight said...

اتفق معك فى غرابة الصياغه الصحفيه تماما .. لكن قد أعتب عليك فى تعميم التحامل على البدو .. أيضا أشك فى بعض المعلومات التى وردت عن الصحيفه من بعض المعلقين .. عموما .. أقدر غضبك . فما حدث من الصحيفه بوجه عام نوع من لى ذراع الحقائق .. أو على الأقل صياغه بطريقة لا تقربوا الصلاه
ربنا يسترها

Anonymous said...

أول مشكلة هي الكلامات الفضفاضة اللي بنفترض بيها ان مقصود هوية محددة

في ثلاث كلامات اتقالوا لحد دلوقتي، العرب، البدو، الهوارة

و دول طبعا مسميات ممكن تنطبق على ناس مختلفة خالص و متنوعة خالص و مع ذلك فيه أحكام تعميمية و فيها صيغة استحقار شديدة.

مين بقى اللي ما بيزرعوش؟ العرب؟ لو كلمة العرب مقصود بيها عشائر ليها جذور في شبه الجزيرة العربية مثلا يبقى الكلام غلط لأن أهلي في البحيرة و مريوط فلاحين من أجيال رغم أن أصولهم عرب.

لو المقصود فقط هو الناس اللي لسه عايشة في اطار عشائري فالصعيد مليان "عرب" بيزرعوا برضه

بلاش عرب خلينا في البدو، دي كلمة تنطبق على أهل سيناء اللي هما بيزرعوا في سهول العريش و جنائن فاكهة و زراعة موسمية محدودة في وسط سيناء (مش عارف أهل جنوب سيناء بيزرعوا ولا لأ)

و بتقال أحيانا على أهالي واحات الصحراء الغربية و أحيانا بدو أو عرب بتقال على أولاد علي و كلهم بيزرعوا برضه.

بعضهم بيزرع زراعة موسمية، بعضهم بيزرع زراعة محدودة بعضهم اتعلم الزراعة الواسعة لما استقر في مجتمع الفلاحين و بعضهم اتعلم الزراعة مع مشاريع الاستصلاح الأولى و بعضهم اتعلم تقنيات زراعة حديثة وقت احتلال سيناء.

لكن المؤكد أن "عرب" و زراعة مهياش كلمات متضادة لا يمكن يستخدموا في نفس الجملة (و لو لمجرد أنهم بشر أكيد قادرين على تعلم أي مهنة و تغيير نشاطهم الاقتصادي و نمط حياتهم، أسوأ أنواع العنصرية هو ما يفرض على الشخص تصور كامل لكافة صفاته و حياته بناء على هوية ما)

فقيبلتك كانت في يوم من الأيام مبتزرعش (بغض النظر عن عدم صحة الزعم ده أصلا) يبقى أكيد أكيد كل الأجيال من الأذل و حتى يوم القيامة لا زرعت و لا هتزرع أصلا.

أما موضوع الملكية فده بقى موضوع كبير محتاج كلام أصلا في معنى الملكية و دور الدولة و طبيعة القانون و تفرق فيه تفاصيل الحالة لكن أن نعمم لدرجة أننا التلميح أن محصلش أبدا أن العرب اشتروا أرض و أن كل العرب ملهمش حق في أي أرض و أن أي ملكية للعرب هي بالضرورة ملكية غير قانونية

فده ميتقالش عليه غير عنصرية

The Son of Man said...

المصرى اليوم على وزن هبل الجبل

karakib said...

اولاد علي بيزرعوا !؟ حسب معلوماتي انهم بيشغلوا اجرية من الفلاحين في ارضهم اللي في البحيرة و يقعدوا يتفرجوا عليهم طول النهار
و العيال الصغيرة من العرب بتسرح بغنم
يعني برضه ما بيزرعوش .. بيجيبوا اجريه من الفلاحين باليومية و يزرعوا لهم الارض اللي بينقوها جنب الاماكن المتبطنة بالحجر لعمل مجاري مائية
انا كمان عايش في مصر و اهلي صعايده و فلاحين و عارف يعني ايه عرب

---------
و موضوع الملكية و الاوراق ده شيء قانوني و طبعا هما لهم القانون الخاص بهم يعني حتي لو معاك ورق و عقود هم لا يعترفون بها
-------
و مين قال انه العرب اصولهم من السعودية فقط !؟ لأ في اصولهم من تركيا و من ايران و من ليبيا كمان
------
محدش قال انهم مش ممكن يغيروا نشاطهم .. لأ طبعا ممكن يغيروا نشاطهم لأنهم بني ادمين و البني ادمين ممكن يشتغلوا اي حاجه لكن هو ده الوضع القائم فعلا بالنسبة للعرب
ما بيزرعش ارض بيجيبوا اجرية من الفلاحين تزرعها لهم
و من المعروف انه ما يمسكش فاس ابدا و ده بالنسبة لهم عيبه في حقهم انهم يزرعوا بنفسهم
----------
طبعا لكل قاعدة استثناء و ده شيء محدش يختلف فيه

-------
هو التدوينة كانت بتتكلم عن ايه اساسا ؟؟

abderrahman said...

فيه مشكلة في تعريف العرب :)
فيه كلمة كمان، هي العربان
ودي كلمة مستخدمة من زمان لحد النهارده، وتقريبا هي اللي تنطبق على الناس اللي في الحادثة
فيه عائلات عرب، مزارعين فعلا، وتجار، ده غير كان فيه قبائل عرب زمان عاشت واندمجت ومنها كان في القاهرة نفسها
العرب مش كلهم عربان وبدو رحل
**
المصري اليوم فيه كتير من موضوعاتها بيبقى مكتوب لغرض، والكلام ده من مدة موجود في الأهرام
يعني مثلا الفقرة اللي كاتبها في الآخر دي اللي بيقول فيها انه الرهبان كانو بيهددوا الناس بجورج بوش، مش عارف.. خيالية لدرجة الهبل
أعتقد انه المحرر جايله اوامر ادارية بحاجة معينة فطلع الموضوع كده
ساعات بحس انه اللي بيكتب الاخبار والتقارير اللي زي دي بيبقى ضابط اتصال، أكتر منه صحافي

Empress appy said...

بصى يا بنتى نصيحه اخويه بجد اكتشفتها مؤخرا يعنى من كام سنه علشان اعرف حاجه لازم انزل وادور عليها مع ملاحظه ضروريه انك متسمعيش من سخس واحد بس يعنى لازم كذا واحد ومن هنا هتقدرى تعرفى الحقيقه بس على شرط تفكرى وتربطى الكلام وتشوفى ايه الكلمه المتشابهه تحطيهم جنب بعض
لان بجد الناس بتكدب والاحاداث بيتغطى عليها والحياه بقت زفت فاحسنلك متقريش لحد بدل ما تلاقى نفسك داخله جوه كلمات متقاطعه صعبه

غير كده عرب الهوارة ميتأخدش عليهم كلهم الكلام يعنى واحد اخطأ لو قاله يبقى خلاص انما مش كلهم العرب ناس كويسه ونضيفه صدقينى

ثانيا على فكرة العرب مش كلهم بلطجيه او البدو ومش كلهم عايشين على اتاوات ومش كلهم بيتاجروا فى السلاح ولا المخدرات فيه عائلات محترمه قوىىىىى جدا وغير كده لهم تاريخهم واسمهم وبيحكموا البلد اللى هما فيها ومنهم ناس فى مناصب عاليه

citizenragab said...

كل الكلام الاهبل اللي فوق ده مالوش لازمة
باستثناء كلام علاء
فالباقي كلامه عاطفي ومشحون ومفيش فيه اي درجة من الحيادية او العفلاينة
بداية من التدوينة اللي بتبتدي فيها اعتراضها علي اخطاء المصري اليوم
والفضية ان الفيلسوفة لما حاولت تحط ايديها علي هذه الاخطاء (التي لا خلاف عليها وانا متاكد من وجودها)تحدثت عن اشياء اخري
وجاءت بتصريحات وفندتها بخطوط حمراء تشبه في درجتها الفاقعة طريقة تفكيرها السطحية
اولا لما يجي الصحفي يغطي حادثة فالمطلوب منه يوصل لكل الاطراف وينقل تصريحاتهم
ومرات كتير بتبقي التصريحات فيها حاجات غلط وبتبقي وظيفتي كصحفي اني انقلها
وان القاريء هو اللي يحكم علي قائلها مش عليا انا
ثانيا اللهجة العنصرية اللي بتتكلمي بيها بتقول ان ربنا يستر علينا وان حضرتك ما تفرقيش كتير عن اللي بيحكمونا وكلامك وما يحمله بين السطور من اهانات للعرب وكأنهم مواطنين درجة تالته يعني الكثير

الاخت نوارة

طبعا تحمدي ربنا انك مش شغالة صحافة
لانك لو شغالة صحافة
كنتي هتبقي مطالبة انك تقدمي ولو دليل مضروب حتي عن منحة كولين باول اللي بتتكلمي عنها
ياريت نتعلم واحنا ببنقد حاجة ما نعملش نفس الاخطاء اللي بننتقدها
والا هتلاقي حد طالع بيقولك
شوفي ابوكي بيقبض كام من ساويراس
بنفس منطقك الخاطيء

علاء
كالعادة اقدرك واحترم عقلانيتك

bluestone said...

على باب الله:
ولسه ياما هنشوف من المصري اليوم

bluestone said...

علااااااااااااء:
ازيك ؟؟ انت جيت امتى ؟؟

ما علينا .. ليه ياعم عنصري وطائفية
خلينا الاول نرد ردود مجمعة على الكلام اللي انت قلته

اولا ليه عنصرية وطائفية؟
انا قلت ان العرب او العربان وهي صفة لا احب استخدامها لانها تحمل قيمة سلبية لا يزرعون وده مش وصم ليهم على الاطلاق
كون انهم مش بيزرعوا ده شيء لا يصمهم ولا يقصد بيه لا احتقار ولا تسفيه
العرب لا يزرعون وهي معلومة تؤكدها كل الكتب والمراجع حتى مواقع الانترنت التي تسرد تاريخ العرب ويشارك فيها الكثير منهم

يعني مش مواقع لسبهم .. ربما يقصد بهم العربان ولكني لا احب استخدام تلك الكلمة كما ذكرت

ولكن كونهم لا يزرعون لا ارى فيه اي اساءة ولا عنصرية

ايضا كونهم لا يشترون الارض
وهي حقيقة لان العرب او القبائل من العربان اصلا خاضعين لقانونهم الخاص وهو القانون العرفي

حتى الصحفي اكد في كتابته للخبر الغبي انه والدة القتيل طالبت بمحاكمة ابو لؤلؤة عرفيا لانها فلاحة وهو من القبايل وتعرف انهم اصلا ليهم قانونهم الخاص

فلا يعترفون بالورق الرسمي من الاساس
وهي المشكلة الاساسية بينهم وبين الدير الدير اشترى الارض من الحكومة ودفع تمنها مرة تانية للعرب عشان وضع اليد

وكلنا عارفين او سمعنا عن قواعد وضع اليد وتعامل القانون معها

انا لم اذكر البدو انا قلت عرب هوارة
اللي هم منتسبين لقبيلة هوارة
اللي تاريخها نفسه متنازع عليه ما بين اصول يمنية او ليبية لسه محدش وصل لحل حاسم للموضوع ده


القبائل اللي ارتحلت لمصر من شبه الجزيرة واليمن وليبيا كمان وكلهم بيتقال عليهم قبايل العرب ..قعدوا عصور طويلة في عداوة ما بينهم وما بين الفلاحين ..والمقولة المعروفة (ياكلها التمساح ولا ياخدها الفلاح) اللي بتشير لحرص العرب على عدم التزاوج بالفلاحين المصريين

لكن حصل اختلاط قوي جدا ما بينهم واتنقلت للفلاحين بعض عادات العرب زي "قعدات العرب" مثلا اللي مأخوزة من القانون العرفي للقبائل

فانا مش شايفة اي "استحقار" في الموضوع
وصف الشخص بانه لا يزرع .. او انه ينتمي لقبائل تخضع لقانونها الخاص


القبائل العربية اللي في الصعيد مش بتزرع اكتر من النخيل
بدو سينا بيزرعوا النخيل والخوخ
انا مش بتكلم على بدو سيناء

انما عربان الصعيد

ومعروف ايضا عنهم اعتزازهم المفزع بهويتهم وعاداتهم بدليل استمرار القانون العرفي حتى الآن وعدم خضوعهم لقانون البلد اللي عايشين فيه


انا ماقلتش طبعا ان العرب مالهمش حق في الارض

معروف ان القبائل ليها قانونها الخاص واصلا لا تعترف بقوانين الدولة مش بيتملكوا ارض

وفي الواقعة سالفة الذكر لم يرد اي كلام مطلقا على وثائق ملكية بحوزة العرب إلا في الخبر الموجه بغباء ده


كلامي كان عن الصياغة غير المنطقية لخبر غير منطقي .. واوضح ما فيه دور ابو لؤلؤة اللي اتحول من خاطف لرجل المصالحات الاول في المنطقة ....


اقرا تاني يا علاء
انت اخدت نقطة واحدة واتشعبطت فيها
وسبت باقي الكلام


=================

bluestone said...

واحد من الكتب اللي بتتكلم عن تاريخ القبيلة في مصر وهو كتاب اسمه دور القبائل العربية منذ الفتح الاسلامي
للدكتور ممدوح عبد الرحمن عبد الرحيم
وهو مدرس التاريخ الاسلامي بكلية الاداب بقنا جامعة جنوب الوادي
زي مابيقول عنه الكتاب

بيقول ان هوارة بيرجع اصلها للمغرب العربي (رغم ان كتاب تاريخ القبائل في مصر بيقول اليمن) المهم بيقول الدكتور ممدوح انها من أكبر قبائل المغرب العربي

أخذت اسمها من هوار بن أوريج بن برنس وبينقسموا إلى فروع وتسمى (بطون) ومنها كهلان وغريان ومسلاتة ومجريس وورغة وزكاوة وونيفن وقمصانة ورصطيف وبيانة وغيرهم
وفي القرن التاسع هاجر منهم الي ليبيا
وفيه منهم انضم للطوارق كمان

ووقد هاجر جزء من هوارة إلى برقه وأقاموا بها ثم هاجروا منها إلى مصر وكانوا في القرن ال13 ينتقلون بين مرسى الكنائس والبحيرة وبعدين نزحوا للصعيد

ده تاريخ موجز عن القبيلة
وان كان ده برضه مش موضوعنا

bluestone said...

نوارة:
مالهمش هوارة ياستي
اقري ردي على علاء

هو انا شتمتهم يا نوارة؟؟؟
ليه انتي وعلاء بتعتقدوا اني وصمتهم مثلا
اوسبتهم

هو عدم الزراعة بقت سبة ولا ايه ؟؟

المصري اليوم من زمان بتخبط في كل الحلل
مش حلل واحدة بس
وقلت عنها كلام كتييييير قبل كده سواء في تدوينات او تعليقات عندي وعند ناس
يعني مش اول مرة

المرة دي فعلا كانت مسخرة صحفية بغض النظر عن الموضوع ان كان طائفي ولا لأ .. الخبر مكتوب وحش قوي وفيه كمية تهريج لا تحتمل ولخبطة حقائق غير عادية


انا اشتغلت مع ناس كتير منهم قبل كده
واعرف صحفيين من المصري اليوم كتييير واعرف بلاوي برضه
بس بلاش فضايح احسن

الصحيفة اللي كانت محترمة بتشغل بلطجية وارزقية وما خفي كان اعظم


احيانا يانوارة المسخرة بتبقى تراكمية


وهي ماابتدش كدة ابدا

لا انا شامة ريحة اتهام منك اني كنت شايفة المصري اليوم كويسة لما كانت متعاطفة مع المسيحيين المصريين

وده لامؤاخذة مش مظبوط

ده شغلي يانوارة في المقام الاول

ولو سكت على تهريج صحفي لمجرد انه جاي على مزاجي يبقى اقعد في بيتنا احسن

المصري اليوم في بدايتها كانت واخدة موقف قوي جدا من النظام وبترصد المظاهرات والاحتجاجات بطريقة حيادية .. وبقت البوابةا لوحيدة اللي يقدر الناس بيها يعرفوا اخبارها خصوصا من غير مستخدمي الانترنت او قراء رويترز والبي بي سي

ربما ده لان موقف امريكا كان وحش من النظام آنذاك وبما ان المصري اليوم قابضة
الله واعلم
انا معنديش دليل على ده

نوارة

هو انا شتمت العرب فيييييييييييييين؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟

ممكن اعرف ؟؟؟
عشان انتي نرفزتيني اكتر من علاء

الخبر الغبي حول راجل من خاطف
لرجل المصالحات الاول في الصعيد
وخلا الخاطفين هما اهل القتيل

يعني الولية الارملة وام القتيل هما اللي خطفوا 3 رهبان وعذبوهم

المشكلة زي ما قلت قبل كده ان مفيش سيادة للقانون .. كل واحد ماشي بالقانون اللي عاجبه


دي مش اول مرة اتكلم عن المصري اليوم يا ست نوارة
ابقي اقري ارشيفي يا ست الحاجة

bluestone said...

عبد باشا:
انا مش بحب قوي استخدم مصطلح العربان
بحسه في سلبية او اساءة
زي ما بتستخدم كلمة نيجرو على الامريكيين من اصل افريقي
او عن العرب من الخليج انهم خلايجة
يمكن انا غلط
لكن ماقريتش عن عرب سموا نفسهم عربان

=======
ده كان قصدي من الكلام فعلا
الخبر مكتوب بتوجيه لدرجة الهبل
لا يمكن تصديقه

وفعلا بتحس انه متآمر واهبل بجد

bluestone said...

الفارس الاخير:
صياغة الخبر فيها تهريج مش طبيعي

احنا اتعلمنا الف باء صحافة ان تنسب المعلومات الي قائلها
وان تذكر وجهة نظر جميع الاطراف
وان لم يحدث
لازم تذكر انه لم يتسنى الوصول للطرف التاني للتعليق

انما صياغة الخبر مش طبيعية فيها تهريج ومسخرة غير عاديين

bluestone said...

آبي:
نص مصداقية اي خبر هو مصدره
لازم اولا تثقي في مصدره ثانيا لازم الخبر يغطي جوانب القصة كلها او اطرافها

بالنسبة للعرب ..اقري ردي على نوارة وعلاء

=================

bluestone said...

المواطن رجب:
كل واحد ليه رأي يحترم يا عم رجب

زي ما رأيك برضه يحترم رغم ادبه
بس لو انت صحفي هتفهم او المفروض تكون عارف ان اي خبر لا يعتبر خبر الا لو غطى جميع جوانب او اطراف القصة

وانه يأكد على ان المقتبسات تعود لاصحابها
وانه لا يذكر الاراء غير المدعمة من اي طرف على انها "حقائق" يا عم رجب يا مؤدب

بالنسبة لعنصرية حضرتي ياريت تروح تقرا ردي على علاء ونوارة

اقرا كويس قبل ما تشتم

واحب اعترض على اتهامك المبطن غير المحترم لاحمد فؤاد نجم
لانك وبشكل غير مباشر وشرير عملت نفس القبح اللي بتنتقده

فانتوماس said...

بلو لسه بتقري الجرايد المصريه؟ ماكنتش فاكرك كده ابدا
لا وعندك صبر تقعدي تفلي الاخبار اعتقد ان وقتك اهم من الجرايد دي

Anonymous said...

الكلام عنصري برضه، حضرتك جايبالي مراجع تاريخية عشان تثبتي أن ناس عايشة النهاردة ما بتزرعش (مش فارق معايا عدم الزراعة ده شتيمة ولا لأ العنصرية هنا متمثلة في الاصرار على أن جماعة كاملة من البشر ليها أوصاف ثابتة عبر التاريخ).


أنت معترضة على كلام واحد من الهوارة بيقول فيه أنهم استصلحوا أرض بأني تقوللي "معقولة الكلام ده هو فيه عرب بيزرعوا"

نفس الشيئ بالنسبة لملكية الأرض، الأصل في الأمور أن ملكية الأرض عرفية بما أن اختراع الدولة اللي بتطلع ورق ده اختراع حديث و توثيق الملكية في مصر لم يتم بشكل كامل لحد دلوقتي، ده مهواش وضع حكر على العرب و لا هو وضع مرتبط بصفات غرائبية فيهم. لكن في نفس الوقت فيه ألاف من العرب يملكوا أراضي موثقة و بيبيعوا و يشتروا أرض.

أنت برضه ردا على ادعاء شخص من العرب بأن عنده ورق و أنه اشترى أرض كان ردك هما من امتى و العرب بيشتروا أراضي و مالهم هم و مال القوانين و الورق.

يعني كلام فلان خطأ لأنه لا يتوافق مع صورتنا عن قبيلته، و الأنكى أن صورتنا عن قبيلته دي صورة ثابتة عبر الزمان و المكان.

تصور عموم مسلمي مصر أن المسيحيين كلهم أغنياء جزء من عنصرية و طائفية بغيضة رغم أن الغنى مش عيبة و مش شتيمة. تصوير اليهودي على أنه بالضرورة كسيب و تاجر شاطر و حريص على المال كان و لا يزال جزء أساسي من عنصرية بغيضة رغم أنها كلها صفات يمكن اعتبارها حميدة.

citizenragab said...

حضرتي صحفي
والاقتباسات في كل اللي انتي كاتباه راجعة لاصحابها وعلي لسانهم

والقضية دي بالذات بالاضافة لقضية الزيتون
اخدت من مناقشاتنا كتير لانها اتغطت بشكل كتير صح
وتم فيها اخذ كل الاطراف
يعني مش قادر اتصور انك متصورة ان المصري تغطيته انحازت للاعراب علي حساب الرهبان

بس حضرتك ممكن تجيبي تغطية الملف كلها في كل الاعداد وتضعيها امامك ثم تردي


عفوا علي قسوة الفاظي
ولكن كم الاستفزاز كان كبير

وعن اتهامي المبطن الي احمد فؤاد
كونك بتقولي اني عملت حاجة غلط ده في حد ذاته بيقول انك بتديني اللي قالته نوارة ولا ايه ؟


بس انتي ليه ما قلتيش رايك في اللي قالته نوارة؟

مرة ثانية
انتي عنصرية
الاعراب مواطنون مصريون
ولا يفترض انهم متهمون في كل نزاع يدخلونه الي ان يثبت العكس
القاعدة معروفة
المتهم بريء الي ان تثبت ادانته

جبهة التهييس الشعبية said...

مريان


(واحد من عرب هوارة بيقول رعونة الطرف القبطي!!! يعني اعلق اقول اييييييه !!!!!!)ا

انت شايفة ان الجملة دي مش شتيمة؟

يعني الجملة لو كانت كده مثلا:
واحد مجرم وخاطف تلات مواطنين بيقول رعوة الطرف القبطي!!! يعني اعلق اقول ايه

ما كانش ح يبقى فيها اي شبهة عنصرية

بالنسبة للفلوس اللي وزعها كولن باول
انا مش مسئولة عن واحد قاعد يلعب في مناخيره وما بيقراش الجرايد ويقول انا صحفي

الكلام ده اتكتب في الصحف اياميها وبقاله سنين اجيب له الارشيف منين دلوقت؟

اما فلوس ساويرس فاللي اخده ابويا ييجي ياخد منه

ما تشغليش بالك انت فيه ناس كده فشلة ونكرة وما حيلتهمش غير يقلوا ادبهم ع الفاضية والمليانة عشان يتشهروا

لا طبعا عدم زراعتهم ما يعيبهمش في حاجة

انا كتبت لك الجملة اللي اثارت استيائي

على اي حال انا شخصيا شايفة انها نزاع على اراضي بين مواطنين والموضوع الطائفي مالوش اي علاقة بيه

بس المصري اليوم عايزة تلعب
ويا ستي لو عندك الجرايد اللي فيها خبر الاتنين مليون جنيه ياريت تعملي لها سكان عشان الاستاذ اللي بيلعب في مناخيره يقراها بنفسه

انا مش عندي الجرنال دلوقت لاني مش باشيل جرايد فات عليها اربع خمس سنين
الا اذا كان بيدور على شغلانة في المصري اليوم

ربنا يرزقه بقى
طب لما انت عارفة المصري اليوم خبطت في الحلل كتير

بتقولي جرنال محترم ليه؟ عمري ما شفت فيه اي احترام

لو تفتكري كان فيه حوادث طائفية برضه من كام سنة جات بعد ما المصري اليوم نشر بالبونط العريض وبالاحمر ان كوندوليزا بلغت النظام ان المعونة الامريكية ح تخصص للكنيسة المصرية بس

يعني اقول ايه؟ اقول ايه؟
ده شغل صحافة
لو قريتي الخبر اللي كان مكتوب بالبنط العريض ح تلاقيه مافيهوش اي دليل على الكلام ده

انا مش حسنة النية بطبعي
وشايفة انه من السذاجة اني اظن انهم بيسعوا ورا الاثارة بس

citizenragab said...

ههههههههههه
كالعادة عشان انتقدت اسلوبك
بقيت فاشل وبلعب في مناخيري
وشيرلوك هولمز نجم اشتغل وتوصل الي رغبتي الكامنة في العمل صحفيا في المصري اليوم


اوكي جرايد نشرت خبر ان كولين باول اعطي 2 مليون للمصري

اشمعني الخبر اللي اتنشر في جرنان ناسية اسمه فاكراه وبتستشهدي بيه
كان ناشر صور لكولين وهو بيدي مجدي الجلاد الفلوس
كان ناشر اثبات

يعني باختصار اشمعني اتعاملتي مع الخبر ده بكل حسن نية وصدقتيه وخبر المصري لا


اما فكرة ابوكي واللي اداه حاجة يجي يا خدها

والله انا مش متأكد من الكلام ده ..وقلته بس عشان افهمك ان طريقتك في الكلام غلط
لكن بمنطقك

فاللي ليه فلوس عند ابوكي مش هيجيي ياخدهم

لانه اخد بيهم كتير

citizenragab said...

نسيت اقولك ان كلام صاحبة المدونة لو اتكتب بالطريقة اللي انتي شرحتييها ليها
كان فرق كتير

يعني ..اوقات بتقولي كلام كويس وبتقدري تبقي عقلانية وناضجة شوية

karakib said...

المواطن رجب
انت بتقول
---
كل الكلام الاهبل اللي فوق ده مالوش لازمة
-------
و بتقول
----
فالباقي كلامه عاطفي ومشحون ومفيش فيه اي درجة من الحيادية او العفلاينة
----
-----
يا استاذ الأدب فضلوه عن العلم .. يعني لو ماكنتش قادر تبقي فاهم الكلام و توصل لمعناه و لو ما كنتش قادر تفهم انه نقد اراء الناس لا يكون بالكلمات الجارحة و السباب زي اهبل و يجب أن لا يمس اشخاص بأي شكل من الاشكال يجب أن يكون موجها لأرائهم و يكون له حجة يبقي انت ماعندكش علم
يفضل يكون عندك ادب بقي بما انك ماعندكش علم
انت جاي تقول انا صحفي و فاهم و داخل تقول فلان بيفهم و فلان ما بيفهمش
طيب ما صاحبة المدونة و عبده باشا صحفيين ... يعني جاي تبيع الميه في حارة السقايين و بعدين مين طلب منك تقول رأيك في الاشخاص هنا ؟؟ انت بتشتغل محلل نفسي و لا ايه ؟ انت تنتقد اراء الناس مش شخوصهم
الادب فضلوه عن العلم و تبقي مصيبه لما تبقي قليل الادب و العلم

ألِف said...

مساء الخير،

أنا كمان شايف أن الخطاب ال مش واضح و أن خلط المفاهيم (حتى لو كان شائع و دارج) و تعميم الصور بيزيد المشاكل لأنه بيزيد من عدم فهم الناس لبعض و بالتالي خوفهم.

"يا عديم الزراعة" فعلا مش سبة و لا حاجة يا ماريان :) لكن كمان ما ينفعش تتبني عليها افتراضات عن من ال غلطان في القضية دي بالذات و الأرض بتاعت من و من ال بلطج عليها. و أظن دا كان قصد علاء. حتى لو كان العرب هم ال فارضين نفسهم على الدير أو بيستغلوا رغبة الدير المشروعة في التوسع و بيحاولوا ياخدوا ال يقدروا عليه منهم، ما ينفعش أن تكون حيثيات الحكم هي "…لأن العربان عرف عنهم تاريخيا أنهم لا يملكون الأراضي بعقود و لا يزرعونها…"، مش بالذمة يبقى حكم مسخرة؟

بالنسبة لموضوع "العرب يستعيبوا مسك الفاس" و "العرب لا يزرعون وهي معلومة تؤكدها كل الكتب والمراجع" فدا غير صحيح غير في الصورة النمطية البلاستك يعني. الأرض من بعد مرسى مطروح لغاية عمق ليبيا بتتزرع شعير على المطر، و ال ساكنها و بيزرعها عرب أولاد علي، سواء الأحمر أو الأبيض.
الصعايدة مش فيه منهم كثير عرب و أسماء عشائرهم عربية صُحّ؟ و هم بيزرعوا ذرة و قصب و خضار بقالهم كم مية سنة؟!
العرايشة دول إيه؟ عرب أصليين لسة بشوكهم. بيزرعوا خوخ لطيف مهجن باللوز، و نخل، و كانوا أسلافهم (برضو مجازا) زمان بيزرعوا شعير برضه في سهل الطينة.

السيناويين الجنوبيين يا علاء أرضهم وعرة ما فيهاش سهول خصبة زي سهل الطينة في الشمال، فيها سهول ساحلية مناخها صعب و بتجرفها السيول من الجبال، و مش بيزرعوا غير حدائق بسيطة في المرتفعات حوالين كاترينة، و نخيل في وادي فرّان، غير كدا الباقيين [كانوا] رُحّل.

كراكيب، أنت خلطت في موضوع "عرب أصلهم من إيران و تركيا". تقصد "بدو". "عربي" يعني من شبه الجزيرة في الأصل، سواء كان من البدو الرحل زي بتوع نجد، أو فلاح من 3000 سنة زي بتوع نجران ال ساكنين في أرض خضرا و بيوتهم بين الشلالات و الينابيع في الجبال ال كانت تغطي قممها الثلج، و كمان في عُمان و اليمن، أو صياد لؤلؤ زي بتوع ساحل الخليج الفارسي من مئات السنين، أو حضري ساكن في قرية دائمة زي بتوع مكة و يثرب، و يقلّب رزقه :)

لكن الصورة النمطية أن العربي لازم يكون راكب جمل و ماشي في الصحراء و الشمس ناقحة في أم راسه!

كانت فيه دعوة من بعض علماء الأنثروبولوجيا أنهم يستبدلوا كلمة "ساميّون" ال هي كلمة أسطورية من فلكلور التوراة بكلمة "عرب" كدلالة على الأقوام المتقاربة ال أصلها من شبه جزيرة العرب، و في الشام و العراق، باعتبار أن العرب هم الممثل الكبير لهم و أن شبه الجزيرة هي موطنهم الأصلي كلهم. لكن الموضوع دا ما اشتغلش قوي يعني، غالبا لأسباب نفساوية شعوبية برضو.

لكن زي ما أنت بتقول يا كراكيب في بدو مش عرب: مغول و ترك و زنوج و أمازيغ و هنود حمر و غيرهم.

صحيح كلمة "عربي" كانت لها دلالة "بدوي"، مش بس مؤخرا لكن من زمان، لكن دا سببه أن البدو ال عرفناهم في المنطقة هم غالبا من العرب. يعني زي ما أي مناديل ورق تبقى "كلينكس"، أو أي حاجة ساقعة تبقى "ببسي". لكن زي ما قال عبده باشا فالعرب الإثنيين (مجازا يعني، في مقابل الترك و الأمازيغ و النوبيين مثلا) كانوا بيميزوا "الأعراب|العربان"، و لولا أني مش عاوز أعكها زيادة كنت قلتلكم على كلمة بايخة كان القرآن قالها عليهم :)

أو زي كدا ما "قبطي" ال كانت اسم جنسية بقيت اسم "دين". طيب نعمل إيه لو لا سمح الله واحد مصري مسيحي قرر يغيظ الحكومة و يغير دينه و يبقى مسلم؟ نسميه إيه لو ما كناش عارفين نفرق بين المصطلحات؟

آه، بالمناسبة، و لأجل الصدف السعيدة ال بافرح لما ألاقيها في الحوارات ال زي دي، الهوارة بالذات مش من شبه الجزيرة خالص، دول أصلا أمازيغ استعربوا و جم مصر مع الهلالية و هم راجعين بعد تغريبتهم ال بيحكيها شعراء الربابة. (لقيت ماريان جايبة سيرة الموضوع في تعليق لاحق! أما إيه المشكلة بقى؟!).

نرجع للموضوع الأصلي: المصري اليوم مش هتتصلح غير لما مجدي الجلاد يسترجل أو يمشي، لأنه زي ما بيقول صديقي جمال مش قد منصب رئيس تحرير و زي ما يكون عنده إحساس أنه موظف وصل بالترقية و لسة بينحني و هو بيتكلم مع مسؤولين الحكومة كدا زي ما يكونوا كاسرين عينه أو لهم حاجة عنده أو هم رؤساؤه ال مشغلينه.

و عموما قلنا أن الصحافيين زيهم زي أغلبنا: محتاجين يتعلموا مايهيجوش و مايبالغوش و يقدموا حجج مقنعة لكلامهم، و لما يغلطوا يتراجعوا بوضوح و يصححوا.

karakib said...

الف
ممكن يكون فعلا عندي stereotype انه العرب ما بيزرعوش ..و لأنه العرب اللي شفتهم كانوا فعلا ما بيزرعوش و بيجيبوا اجرية .. فانا قلت خبرتي الشخصية مش عن قراءات لأ دي حاجة انا شفتها
ممكن يكون في وضع تاني ما اعرفوش للعرب
اذا رجعنا لموضوعنا الاساسي و هو الدير
العرب اللي اعتدوا عليه ما بيزرعوش فعلا
و احب انك تشوف صور الاعتداءات التي وصلت الي داخل الكنيسة
http://www.facebook.com/photo_search.php?oid=14449224484&view=all

جبهة التهييس الشعبية said...

الاستاذ رجب حوش صاحبك عني

انا ما كنتش ناوية ارد عليك بشكل مباشر احتراما لصاحبة المدونة
بس معلش يا مريان ح استأذنك لانه لطيف موت

حضرتك مدرس مادة ايه؟
مش ح اسألك مدرس سنة كام، لانه باين انك مدرس تالتة خامس ورابعة اول
بس مادة ايه دي حضرتك اللي مخلياك تدخل المدونة وتصحح ورقنا ورقة ورقة وتدينا كلنا صفر على عشرة وتذنبنا كلنا - كالعادة طول عمري كنت باتذنب في المدرسة ومرة جبت لمدرسة كومة سكر - وتديني انا بالذات مسطرتين وتنزلني عند الوكيلة
وتدي علاء الفول مارك ونجمتين وتوقفه في طابور الصبح عشان نصقف له وبعدين توقفه على الفصل عشان يكتب اسامي اللي بيرغوا وانت واخدني عند الوكيلة؟
مادة عربي شكلها كده
هم مدرسين العربي دايما بيبقوا كده
طب انصحك بما انك سبت مهنة التدريس وبقيت صحفي زي ما بتقول ياريت تنسى تاريخك في مدرسة ام المدونين الثانوية بنات وتحاول تتعامل مع البشرية على انهم بشرية حضرتك

انت مين حضرتك عشان مدي نفسك الحق انك تدخل مدونات الناس وتشعلق حواجبك وتخنف وتتكلم كأنك هيكل وتقول: ده كلام فارغ...ده كلام مليان...ده مش كلام له سند
امممممممممم طب ما احيانا انتي يا بنوتة بتعرفي تقولي كلام عقلاني

هو انت معاك ليسانس شعلقة حواجب قسم خنفان وده مديك الحق انك تتكلم بوصفك صاحب القول الفصل والنهائي و: اسكتو بقى انا ح اتكلم واقول
ده كويس...ده وحش كل كلامكو اللي فات ده مالوش لازمة؟

له لازمة وللا مالوش لازمة بالنسبة لمين يعني حضرتك؟ بالنسبة لك اكيد، طب انت مين يعني؟ ومين قال لك ان صاحبة المدونة وللا انا وللا علاء وللا هاني وللا اي حد مهتم وقاعد يقرقض ضوافره ويعد مسامير الباب: يارب يارب كلامي يبقى له لازمة عند رجب حوش صاحبك عني

مش قادرة اقول لك انا مش عارفة انام الليل من كتر ما انا شايلة هم كلامي له لازمة وللا مالوش لازمة بالنوسبة لك يافندم
آه قلبي قلبي قلبي

وبالمناسبة يا ح الناظر

بما انك بتربي نشء اللي هو احنا طبعا
فهاني بيقول لك: الادب فضلوه عن العلم

كركر كركركركر
الله يحظك
سليتني ع المسا

mero said...
This comment has been removed by the author.
mero said...
This comment has been removed by the author.
bluestone said...

ياعلاء يا عزيزي
الصورة اللي كونتها مكانتش بس من كتب التاريخ .. كل وسائل الاعلام اللي احنا بنعتمد عليها في مصادر المعلومات للاسف هي اللي قالت كده

يعني من بداية الازمة وسائل الاعلام الرسمية والمستقلة والفضائية قالت ان الارض صحراء .. مساحة من الصحراء
ومحدش جاب سيرة لا اراضي زراعية ولا غيره
لان الخلاف على ارض زراعية كان هيبقاله طبيعة مختلفة

الصورة المقصودة اللي رسمها الصحفي هي المشكلة .. عاملة زي الفيلم العربي .. فيلم الارض كمان .. ياحرام ابو لؤلؤة المسكين اللي طلع بتاع صلح وكويس واول صورة اتنشرت له صورة كأنه فيها بيعيط وكل العرب مالهمش الا الفأس ومش اخدوا من الدولة اي حاجة خالص يا حرااام
والرهبان فجأة تحولوا لمفتريين وبيشيلوا سلاح ومش عارف ايه
المشكلة ان ده عكس الصورة اللي اترسمت في كل وسائل الاعلام قبل كده

المقال رسم صورة احادية عجيبة الكلام فيها موجه بطريقة غريبة

بالنسبة لتملك الارض
لحد النهاردة القبائل لا تحتكم الا للقانون العرفي ياعلاء
اذا كانت أم القتيل بتطالب محاكمة واحد من العرب "عرفيا" مش بالقانون لانها عارفة ان القانون غير مطبق على العرب

في الحقيقة انا ماسمعتش ولا شفت عرب بيبعوا ويشتروا ارض بموجب ورق رسمي
اللي اعرفه انهم بيعتمدوا وكل الناس اللي بتتعامل معاهم بمبدأ وضع اليد

وحتى الان هم بيتعاملوا بمنطق وضع اليد وقانونهم العرفي
والدليل على كده كلام المحافظ للمسؤولين عن الدير لما قال للرهبان ادفعولهم وخلصونا وهو ما حدث بالفعل

فهل القبائل في هوارة خاضعين للقانون المصري ولا لقانونهم الخاص؟؟ ومدى مشروعية ده هو السؤال المهم؟؟

bluestone said...

المواطن رجب:
يا عم المواطن

انا ماقلتش ان المصري اليوم ولا تغطيتها انحازت للعرب ولا انحازت للرهبان
هات من كلامي ما يدل على كده

انا قلت المقال مش منطقي وفيه كلام مش منطقي
ابو لؤلؤة المحافظ قال عليه خاطف
الصحف الرسمية والمعارضة والمصري اليوم نفسها قالت عليه خاطف
وفجأة بعد يومين تحول إلى رجل المصالحات الاول في المنطقة

وتاني ما ينفعش اي اقتباسات تسمى "حقائق" بدون ادلة

وتالت الخبر من الجانب الصحفي مش دقيق ولا متوازن على الاطلاق

ورابع المشكلة انه في الخبر عمل اتهام خطير ان اهل الميت هم اللي خطفوا الرهبان
يعني هيلبسوا القضية للفلاحين وده عكس كل الكلام اللي اتقال في الصحيفة نفسها وفي كل وسائل الاعلام لمدة اسبوعين

موضوع الدير والزيتون اتغطوا تغطية زي الزفت في كل وسائل الاعلام
موضوع الزيتون بالتحديد اخد اكبر من حجمه والصحف الحكومية اول من سارع للحديث عن انه حادث طائفي وده منتهى الغباء والقفز لاحكام مسبقة

وكل وسائل الاعلام فضلت تغني في موال الطائفية اسبوعين مع ان المفروض اننا نتكلم عن السيطرة على الشارع والامان والسطو المسلح وجريمة قتل بشعة من غير سرقة سواء القتيل اسمه بطرس ولا اسمه محمدين الي ان يثبت اي حاجة

يعني حضرتك زميل .. يا اهلا يا اهلا
مش هينفع طبعا اسألك فين بس ايميلي موجود واحب اعرف انت في انهي مؤسسة يمكن نطلع نعرف بعض


حضرتك بتقول
( بس حضرتك ممكن تجيبي تغطية الملف كلها في كل الاعداد وتضعيها امامك ثم تردي

ماهو ده اللي عملت لقيت مليون رواية ومليون اسلوب
مفيش ثبات ولقيت كمان كتييييييييير كتابات موجهة

معلش يا سيدي استحمل الاستفزاز

ايوة انا قلت لنوارة يا سيدي اني لا املك دليلا على كون المصري اخدت فلوس ولا ما اخدتش وعشان كده مقدرش اتكلم علي المسألة دي
اقرا ردي تاني


وباقولك اقرا تاني
او اقرا ردي على علاء
انا لا ادنت العرب
ولا قلت انهم مش مصريين ولا قلت انهم يع وحشين

انا قلت ان القبائل غير خاضعة للقانون المصري ودي مشكلة الدولة اولا

ومحدش قال انهم متهمون في كل نزاع الا حضرتك دلوقتي
لانك عملت زي الصحف بالظبط
نفيت ما لم يتم ذكره اصلا فحولته لشك

ايه ياااع اللي في الاخر دي ؟؟

يالا ما علينا
مرة تانية
مضطرة اشكرك على ذوقك

abderrahman said...

مش عارف يا اخ رجب تعليقاتك نرجسية، يعني للاسف انت ماجتش مثلا بالرأي المحايد

ثانيا نصيحة لوجه الله تعالى مدافعش عن صحافة ولا عن صحافي كده وكانك بتدافع عن شرفك، مادمت صحافي خبرة، وعندك قدرة جامدة على فضح وكشف هبل الاخرين، متقعش في فخ انك تدافع عن رئيس تحرير ولا جريدة ، لمجرد انك تثبت ولاءك
وحضرتك مش اول مرة تدافع عن المصري اليوم باستماتة كده، ومعرفش اذا كنت بتشتغل فيها ولا ايه، ولا ليك اصحاب هناك ولا علاقتك بيها انك بتشتريها بس

الموضوعات اللي زي اللي مكتوبة فوق دي موجود زيها في الدستور وساعات بيبقى فيه درجة من العبط الصحافي في الاهرام اللي كانت في يوم الجريدة الاولى في مصر، انما ان حد يدافع عن الاخطاء دي، فدي مشكلة كبيرة، في النهاية من حق اي حد حتى لو مش متخصص انه يمسك مقال ويعلق عليه
وفيه مدونين بيعملو كده مع مقالات اجنبية كمان
ومحدش فينا عنده مشكلة انه المكان اللي بيشتغل فيه أو كان بيشتغل فيه يتعرض لنقد أو انه يعاب عليه طريقة في التغطية، أو حتى في السياسة التحريرية من الاساس

في الدستور ساعات بيحصل انه يبقى فيه اخبار مكتوبة بطريقة متحيزة وتحريضية فمش عشان بشتري الدستور ولا بشتغل فيها اقوم استهبل واعمل نفسي مش شايف
وبيحصل في صياغة بعض الأخبار في البديل انها تكون متحيزة وتصور ان مصر عايشة في ثورة من اقصاها لجنوبها
ونفس الكلام ده في اي جريدة والشغل اليومي دايما بيبقى فيه مشاكل عن لو جريدة اسبوعية او مجلة، بسبب السرعة في النشر قبل المنافسين، أو انك تختار عنوان مختلف في حالة عدم انفرادك

bluestone said...

فانتوماس:
هنعمل ايه مجبر اخاك لا بطل !!!
================================

bluestone said...

:
نوارة
لا مش شتيمة .. تخيلي انتي واحد لا بيعرف يقرا ولا يكتب (كما كتب عنه) ومتهم بحرق واتلاف ممتلكات وخطف رهبان وتعذيبهم وبيقولك
رعونة الطرف القبطي
تبقى مش نكتة ؟؟
عندنا الاقتباس لو كان باللغة العامة بيترك كما هو او زي ما بتقول صحفيا "تفك الاقواس" عشان تحافظ على حيادك التام ولا تنسب اي معنى حتى لشخص ماقالوش .. فاهمة قصدي؟؟

يعني ممكن انقل عنك كلمة بالعامية واضعها في سياق لغة عربية فاقوم باختيار مرادف غير مضبوط لغويا يحمل المعنى اللي اخترتيه اكثر مما يحتمل
هنا تبقى مشكلة وابقى خسرت مصداقيتي في المرادفات ..

انا فعلا قريت موضوع الفلوس ده
لكن ماذكرتوش لاني شخصيا لا املك دليل عليه

وحالة المصري اليوم كلها بقت بالنسبة لي مش مفهومة على الاطلاق
انا قلت بدأت محترمة .. انما دلوقتي !!

لو قابلتك في يوم هاقولك بلاوي

انا اكتر حاجة بتزعجني ان واحد يعمل نفسه وصي على اراء الاخرين .. فيبقى كلام فلان هبل وكلام علان تهريج وكلام ترتان عبقرية تمشي على كلمات

من حقك تذكر رأيك ولكن ليس من حقك تسفيه اراء الاخرين

مفيش في مصر صحافة بالمعنى الحقيقي لاسباب كتير
لكن فيه صحفييين محترمين
المشكلة الكبيرة ما بين بعض المحترمين دول انه ساعات مش بنبقى عارفين الفرق بين مقال الرأي والخبر

زي ما اتعلمنا في الصحافة الصحفي اللي بينقل الخبر ليه شروط اساسية يجب اتباعها وهي الاجابة على 5 اسئلة:
مين
مع مين
بيعمل ايه
فين
امتى
بس بلا اضافات ولا توابل ولا اراء شخصية ولا احكام مسبقة من اي نوع

لو تحليل صحفي
تضاف ليه
وخلفيات تاريخية

لو تحقيق تضاف ملاحظات ومشاهدات الصحفي

لو مقال رأي حيث يشترط في الصحفي انه يكون كاتب ليه باع في الكتابة او خبير فيما سيكتب فيه

بس احيانا للاسف التصنيفات اللي فوق بتدخل على بعضها

abderrahman said...

معلش يا ماريان انا اسف على التطويل بس عايز اسجل موقف
:))
كنت عايز اقول حاجة عن العرب والعربان
لان الموضوع ده بالذات اتعاملت فيه مع اصحاب زملا زمان من اصول عربية
وفيه منهم من مناطق حوالين القاهرة ومش زي العربان دول خالص
يعني كانوا اصلا عائلات ليهم اراضي وعايشين بنزعة اقطاعية
وليهم قاضي عرب، انما دلوقت موظفين عاديين وعيالهم في الجامعة ، وعلى اطراف المدينة..حتى لو مختلفين عن بقية سكان القاهرة شوية او حتى عن القالب الريفي التقليدي بدرجة ما

دول بالذات لاني احتكيت بيهم مختلفين حبة عن العربان البدو المتمسكين بالنزعة اللي تقصديها اللي بتخليهم شايفين نفسهم فرسان

وحتى مسالة الصل العربي دي نسبية، وفيها انتحال محتمل في بعض القرى
زي ما حصل مع بعض المنتسبين لال البيت والاشراف

المصيبة الحقيقية اننا في القرن الواحد وعشرين وبنتكلم وكاننا في العصر العثماني
عرب واشراف.. ودور الكنيسة كممثل عن الاقباط

وده بيودي الواحد لكلام احد المعلقين عن هل العربان دول خاضعين للقانون؟؟؟
السؤال هل القانون أصلا مفعل في البلد دي على الجميع ؟؟ هل القانون صوري، ولا إيه ؟؟

المسألة مش بس عن فئة ولا جماعة بيطبق عليها ولا لأ.. المسألة انه فيه مزاجية وغرض في تطبيق او عدم تطبيق القانون

المنيا دي نفسها هي اللي حصل فيها مسخرة الثانوية العامة الآخرانية

انا رأيي هي دي المشكلة.. الطائفية وجه او ملمح للمشكلة الاصلية

bluestone said...

ألف :
ألف ينير ارجاء القهوة
يا قهلا يا قهلا

عشان نكون على نور
ما هي مصدر معلوماتي اللي استندت عليها اولا كتب التاريخ التي تسرد تاريخ العرب وعادات القبائل
ثانيا ما تناقلته الصحف ووسائل الاعلام العربية ...
مفيش مصدر تاني غير المعايشة الحقيقية
وده مستحيل عمليا بالنسبة لي

حاولت انتقاء اكثر المصادر مصداقية يا ألف


انا مابنيتش افتراضات على دي بس
انا عارفة ان فيه بعض القبائل بتزرع بالفعل في سيناء مثلا وبعض مناطق الصعيد كما علمت لاحقا وده اللي قلته في التعليقات
لكن كمان استندت على ماكتب في الصحف وما قاله سكان والمحافظ من ان الارض صحرااااء وان العرب لا يزرعون تلك الارض من الاصل


بالنسبة لتملك الارض هتلاقي "حيثيات" فكرتي في ردي على علاء
بالنسبة لعلاقة العرب بالقانون

لكن فيه جزء مهم هو اولا ان الخبر صحفيا مسخرة
ثانيا ان بطل القصة كلها تحول في يومين من جاني وخاطف لرجل المصالحات الاول في
المنطقة

بالاضافة لاتهامات مبطنة ان الولية الارملة وام القتيل و4بنات اطفال هم اللي خطفوا الرهبان ؟؟؟

محدش اخد باله ليه من الموضوع ده ؟؟؟!؟!؟!؟!

معلومة واحدة غير دقيقة في اي خبر يمكنها ببساطة هدم الخبر كله من اساسه

لغة الخبر لا متوازنة ولا دقيقة ولا محترمة من الاساس .. الخبر واضح قوي انه مكتوب بتوجيه ما ايا كان التوجيه ده

متشكرين يا ألف على اثراء النقاش والمعلومات المهمة

الموضوع الاصلي كان نقاش في التهريجات الصحفية في المصري اليوم .. وممكن نعمل كل شهر خبرين تلاتة نحللهم وننشرهم وهتبقى مادة لطيفة للضحك ومش هتغلب ممكن في المصري تلاقي خبر من ده كل يوم

منور يا ألف

citizenragab said...

ماريان
انا في تاني رد اعترفت اني كنت قاسي في كلامي
بس برضه ارجع واقول كم الاستفزاز كان عالي

ثانيا : انا ما دخلتش اتنك واقول انا صحفي هييييييييييه"ومقتلش اني صحفي غير لما انتي قلتي لو كنت صحفي كنت هتعرف


ثالثا : انا لسه عند راي كل كلماتك التعقيبية اللي باللون الاحمر فيها قدر من العاطفه والراي الشخصي اللي مبني علي اساسه احكام


نوارة نجم

صدقيني كل ما احاول اقنع نفسي اني ارد عليكي كويس اتأكد انك متستحقيش

اولا : مش لازم ابقي مدرس عشان اقول راي في كلام
وطول ما انتي ليكي الحق تشتمي في المصري وصلاح دياب وحسني مبارك نفسه انا كمان ليا حق انتقدك وانتقد كلام اللي ميعجبنيش
واقول للي كلامه يعجبني كلامك عجبني
بغض النظر عن اذا كان ده يناسبك شخصيا او لا
بالمناسبة وقبل ما تتسرعي انا مش من محبي مجدي ولا دياب ولا حسني
ويمكن في نفس الوقت اللي بدافع فيه عن المصري هنا في عندي تدوينة دلوقتي بتنتقد شيء فيه

ثانيا: طالما عملنا مدونات وفتحنا باب التعليق فمينفعش اي رد ميعجبناش نقول انت اللي اللي دخلك تعلق
وانا بشكر مريان انها مقلتش الكلام العبيط ده

ألِف said...

كراكيب، للاسف ماعنديش حساب في الكتاب فمش هاقدر أشوف الصور. ما تنشروا خارج السور بقى، لو مش علشاني فعلشان التاريخ :)

الحجرالأزرق :)
كل ما تحصل حاجة زي دي أرجع أفتكر اقتراح كنت متحمس له، و أظن كان تحمس له عمروعزت و حمكشة و عمرو غربية و رامي كرم، بإنشاء مرقاب الصحافة المصرية. موقع لطيف مفهرس يتلقى مراسلات و ينشر انتقادات الأخطاء المهنية الواضحة في الصحف:
- الصياغات الفاشلة للأخبار
- خلط الخبر بالرأي أو الإعلان (لكن مش الاختلاف في الرأي)
- اللغة التهييجية و المانشتات السخيفة
- المغالطات في الحقائق (المعلومة بالضرورة زي أن "السبت" كان يليه دائما "الأحد")
- تحريفات التصريحات و الحوارات الصحفية (علاء ممكن يهتم)
- السرقات (1 و 2) من الصحافيين المستقلين على الوب (مقالات و الصور)
- حق الرد لكل من هم من عديمي المدونات
- ما يستجد من بلاوي

يعني من الآخر نعمل مسح ضوئي لروزاليوسف كلها

karakib said...

الف الصور دي كتير اوي اعمل اكاونت لمدة عشر دقائق اتفرج عليهم و اخرج
:) و صدقني احنا برا السور اهه دي اهم حاجه نبقي برا السور :)
دي مجموعة عاملها ناس لمتابعة اخبار اللي بيجصل هناك و أي حد عايز يشترك فيها ممكن يشترك
و ممكن من غير ما تشترك تتفرج علي الصور
مش هتندم انك عملت اكاونت لأنه هتشوف عقود ملكية الدير للارض و التخريب اللي حصل

The Alien said...

أنا فقدت ثقتي ف الصحافة المصرية بكل أنواعها من زمان
بس إتعلمت منهم درس لطيف .. إني لم اأقرا خبر لازم أروح أتأكد منه اﻷول عشان ف العادة هيرجعوا ف كلامهم تاني يوم

تحياتي

جبهة التهييس الشعبية said...

دليل ايه يا مريان
المصري اليوم ده جرنال مش ولية ارملة غرقان دراها

ابسط حاجة لما كذا جرنال ينشروا انهم اخدوا فلوس من كولن باول المصري اليوم يقدر يكذب لكنهم ما كذبوش ولا حتى في خبر تلات اسطر

والا ايه الدليل على اي حاجة في الدنيا بقى

هو مش مجدي الجلاد كان من ضمن الناس اللي اجتمعوا ما ديفيد ولش والصور اتنشرت
وللا دي كمان صور متلفقة

انا وانت غلطانين اننا بنرد على واحد اسمه رجب

جبهة التهييس الشعبية said...

وبالمناسبة دي عنصرية ضد اسم رجب

bluestone said...

ألف:
دي فكرة رائعة جدا
وافتكر انها سهلة جدا في التنفيذ

ياريت لو الفكرة لسه قائمة يتم اعادة احيائها وتنفيذها

وابقوا خدوني العب معاكواااااااااااا

hema said...

والله ما ان فاهم حاجة
المهم
دا البلوج بتاعى ياريت تشرفنى يا صاحب هذا البلوج الجامد
http://egyptnewstoday.blogspot.com/