Wednesday, October 06, 2010

اينعم نؤذن في مالطا


البلد بتولع

المسلمين والمسيحيين بيطحنوا في بعض وهيولعوا البلد بجهلهم

رجال الدين والسجال الغبي هيودي البلد في ستين داهية

الانتخابات هتتزور اصلا

والصناديق هتتبدل

والورق هيتسود زي عيشتنا ما هي سودا وزي الطين

الاسعار هتفضل تغلى .. والناس مش هتعمل حاجة

المعارضة بتهبل والحكومة بتطبل لها

والامن فوق الجميع !

يابنتي طلب الهجرة هو الحل الامثل دلوقتي .. المسافر الذكي هو اللي يعرف ينط امتى من مركب غرقانة

انتخابات ايه اللي بتهبلوا فيها ؟؟؟ ما النتيجة معروفة ومحسومة .. جاتكوا خيبة

هو احنا لاقيين ناكل

كيلو الطماطم بقى ب11 جنيه واللحمة هتبقى ب100 جنيه خلال ايام

يعني ثورة الجياع كمان في الطريق

=========================

==

أقول كمان ؟

اي سبب من الاسباب السابقة يدعو للقرف والاحباط والتوتر واليأس .. والحل .. يكمن دائما في ورقة.

تأشيرة هجرة .. هي الحل الاسهل. يمكن يكون ده صحيح ..لكن طيب ولو ماقدرتش؟

مانفعتش تهاجر ؟


رفضوك في كل السكك والبلاد؟

لفيت على كل السفارات وقالولك .. شكرا مش عايزين .... عندنا منك كتير !

هتعمل ايه؟


1- هتبطل تقرا جرايد وتكبر دماغك وتقعد في البيت تلعب بلاي ستيشن وتعيش على الفيسبوك وتتفرج على ماتشات الاهلي والزمالك والاسماعيلي وانبي وتشتم فيهم كلهم

2- هتبقى شاب لطيف وحلو وكويس ومالكش دعوة باي حاجة .. هتروح الجيم وتصلي الضهر والفجر في الميعاد او مش هتفوت خدمة ولا قداس .. وهتمشي جنب الحيط ومالكش دعوة على اعتبار انها مش بتاعتك اصلا .. وهتستنى لما الخراب يقرب من باب بيتكوا وبعدين تفكر

3- هتيأس وتفقد الأمل وتلعن اليوم اللي اتولدت فيه لقيت نفسك في مصر وتكره عيشتك على اعتبار انها عيشة ولا اكتر يعقبها موتة ولا اكتر وخلاص

دي الحلول التلاتة المناسبة او المتوفرة للسؤال المذكور اعلاه واللي هو ببساطة (وبعدين؟؟ )

لكن في الواقع فيه حل رابع، حل مابنفكرش فيه كتير لانه مش بيلمع ومش حاسم ولا سريع ولا درامي ..واحنا نموت في الافلام الهندي والنهايات القاطعة. الحل اسمه

4- تحاول

دلوقتي انا قادرة اتخيل نص ردود افعال اللي بيقروا الكلام .. مابين ألفاظ خارجة واصوات خارجة برضوا !

ومابين كلام زي يا شيخة اتلهي، او مثلا موت يا حماااااااار،

او اكثر لطفا ورقة وهيكون بس استنكار اصلا لفعل المحاولة واستنكار للتفاؤل غير المسبب اللي في الكلمة المستفزة اللي اسمها المحاولة

.

لكن الحقيقة دايما كده .. مقرفة ومتعبة ومالهاش قفلة زي الافلام.

المحاولة دايما مجهدة ونتايجها مش مضمونة .. بس ظروفنا دلوقتي مالهاش حل تاني.

لما بدأنا نجهز لحملة خلي عندك صوت .. وبدأنا نعمل فيديوهات زي دي مثلا

http://www.facebook.com/profile.php?id=501371068#!/video/video.php?v=10150277396590217&oid=213501021940

http://www.youtube.com/watch?v=ZM7yOmFhcqc

http://www.egytube.info/video/84/elex1

وصممنا الموقع ده :

http://vote4egypt.com/?q=node%2F5


ردود الفعل مكانتش عظيمة .. واحد قاللي (ايه أم التفاؤل ده؟ ده انتوا هيتعمل عليكم حفلة !!)

وهنا أدركت فعلا ان الايجابية والتفاؤل اصبحوا جريمة في جيلنا.

لما تقول للناس روحوا طلعوا بطاقة انتخابية وشاركوا في الانتخابات .. وحاولوا تحاربوا التزوير بالطريقة اللي تقدروا عليها نبقى مجانين !! او بنهبل؟


رغم اننا مش بنقول هنغير مصر كلها .. ولا هنكسر الدنيا .. ولا ان البطاقة هتنزل العدالة من السما وتقضي على الفساد

لما نقول للناس ان فيه فرصة مشروعة لمواجهة التزوير . . لمواجهة الغلط .. باللي نقدر عليه وهي اننا نرفض ان حد يستغل اصواتنا .. نبقى مجانين .. زي بتوع اتصالات .. قالوا علينا مجانين !!!

بس للاسف دي الحقيقة


..

الحقيقة دايما صعبة وغير مقبولة ومحدش عايز يسمعها

لو رحت وأدليت بصوتك هتمنع التزوير تماما ؟ .. لأ مقدرش أقولك كده

ومقدرش اقولك ان البلد هتبقى يوتوبيا بعد الانتخابات لو شاركنا فيها

لكن اقدر اقولك انك لو عملت الصح .. هتحترم نفسك على الأقل ..

اقدر اقولك لو شاركت انت وانا وشوية ناس كمان هنصعب التزوير وهنصعب الفساد .. مش هنمنعه بس هنخليه صعب .. وده في حد ذاته مواجهة.

بنؤذن في مالطا؟ يمكن وايه يعني ..

ماهي حتى مالطا

بقى فيه جامع ومدنة وبيأدنوا فيها كل يوم 5 مرات !

حارب في الحتة اللي على قدك .. وبالسلاح اللي تقدر عليه .. وماتستناش نتايج كبيرة ..

بس هيبقى فيه نتيجة

وهتحترم نفسك

وهتحترم صوتك

خلي عندك صوت


http://www.youtube.com/watch?v=ZM7yOmFhcqc

4 comments:

عماد عزت said...

والله فعلا انتى سعات بتبقى متفائله بدون سبب يا ماريان
بس المشكلة مش فى ان الواحد يروح ينتخب ولا لأ،المشكلة هتنتخب مين وانت عارف ان كل واحد داخل الانتخابات عشان سبوبة ولا لقمه عيش زيادة ، محدش يستاهل صوتى ، خليه لنفسى احسن اروح اغنى بيه، اصرخ ، اتجنن ،احسن من أنى أديه لحد ميستاهلوش

candy said...

على فكرة أنا عايزة أقول حاجة

أنا كنت بفكر فى الهجرة والمعادلة والليلة دى علشان كنت فقدت الأمل ..
بالذات بعد مستوى التعليم ما بقى كدة
واضطهاد الأقباط ... وأنا منهم وفى الصعيد
والتحرش اللى بقى لايحتمل أبدااااااا
..............
..................
.......................
بس رجعت فى كل دا
وحسيت أنى هابقى خايفة برضه على اللى هاسيبهم
ثم أنا روحى هنا ، وزى السمكة لو خرجت هاعيش احسن اه ... بس من غير روح
.................
......................
.........................
وبسبب حملة "خلى عندك صوت" وبكل الغضب اللى جوايا طلعت بطاقة انتخابية
وخليت بابايا ومامتى وهما الأتنين فوق الخمسين لأول مرة فى حياتهم يطلعوا بطايق انتخابية
وإنشاء الله هاننزل ننتخب كلنا

وهاناضل علشان البلد دى تبقى احسن لحد ما أموت

والموت فى الجهاد أحسن من الحياة فى الحسرة

فانتوماس said...

احترم رأيك جدا لكن ماعتقدش اني حابقي ايجابي .. انا مع حل الهجرة .. الدنيا بقت سوده زيادة عن اللزوم يا بلو ورغم اني والحمد لله بشتغل كويس جدا لكني بحاول اهاجر برضه ورغم اني مش حاعرف اشتغل شغلانتي دي بره ببساطة لكن نوعية الحياة هي التي ابحث عنها ..احنا عايشيين في صفيحة زبالة و مع كده انا عارف ان فيه ناس بتحب الزبالة دي ..انا كنت بحبها بس حرمت

اخر المناضلين المحترمين said...

السؤال
هل ممكن تدي صوتك لمرشح مسلم منافس لمرشح نصراني؟؟؟؟؟؟؟
وهي دي بقي المواطنه

نصيحه
بلاش تمشي ورا الكنيسه في موضوع التوريث
بليز